சட்டச்சொற்கள் விளக்கம் 71-80 : இலக்குவனார் திருவள்ளுவன்

 

ஃஃஃ    இலக்குவனார் திருவள்ளுவன்      21 December 2023      அகரமுதல

(சட்டச்சொற்கள் விளக்கம் 61-70 : இலக்குவனார் திருவள்ளுவன் – தொடர்ச்சி)

சட்டச்சொற்கள் விளக்கம் 71-80

71. Abbreviate	சுருக்கு   நூல் முதலிய எதையும் சுருக்குதல், எனினும் குறிப்பாக ஒரு தொடரைச் சுருக்கித் தலைப்பெழுத்துச் சொற்களால் குறிப்பிடல்.திருவள்ளுவர் ஆண்டு என்பதைத் தி.ஆ. எனக் குறிப்பிடல்போல்.   காண்க: Abbreviation
72. Abbreviation	குறுக்கம்   குறியீடு சுருக்கக் குறியீடு குறுங்குறி குறிப்பெழுத்து சொல்குறுக்கம் சுருக்கீடு   ஒரு சொல் அல்லது தொடரின் சுருக்கம். திருவள்ளுவருக்குப் பின் என்பதைத் தி.பி.என்பதுபோல் இந்தியத் தண்டிப்புச் சட்டம் என்பதை இ.த.ச. என்பதுபோல் பெரும்பாலும் எழுத்துகளின் சேர்க்கையாக இருக்கலாம்.   சொல்லின் முதல் எழுத்தாகவும் அல்லது பகுதி எழுத்துகளாகவும் இருக்கலாம். சான்றாக மருத்துவர் என்பதை மரு. என்றும் பொறியாளர் என்பதைப் பொறி. என்றும் சுருக்கிக் கூறுவது. ஆங்கில எடுத்துக்காட்டாகக் கூற வேண்டுமென்றால் abbreviation என்னும் சொல்லே,abbr., abbrv.,  abbrev. என்று குறுக்கப்படுவதைக் கூறலாம்.   சுருக்கம் என்னும் பொருள் கொண்ட brevis என்னும் இலத்தீன் சொல்லில் இருந்து உருவானதே abbreviation.   பிரிவு 98 , இந்தியச்சான்று சட்டம்
73. Abdicate	கைவிடு துற, நீக்கு (வி.)   காண்க: Abdication
74. Abdication	துறத்தல் (வி.)     உரிமைத் துறப்பு           பதவி துறத்தல்      ஆட்சித்துறப்பு கைவிடு, துற, நீக்கு பதவி அல்லது பொறுப்பைத் துறத்தலைக் குறிக்கிறது.   இறையாண்மை மிக்க ஆட்சித்தலைமையை – அரியாசனத்தை வேண்டாம் என உதறித் தள்ளுவதைக் குறிக்கிறது.   ஒருவர் அல்லது அரசின் கிளை அலுவலகம், சட்டப்படிக் கொண்டுள்ள தமக்குரிய உரிமைகள், நம்பிக்கை, இறையாண்மை, கடமைகள், நயப்புரிமைகள், முன்னுரிமைகள் முதலியவற்றை விட்டுவிடல் அல்லது கைவிடல்.   ஓர் அதிகாரி, தன் அலுவலகத்தின் சலுகைகள், முன்னுரிமைகள், வாய்ப்பு வசதிகளைக் கைவிடுவதையும் குறிக்கிறது. அரசோ அதிகாரியோ பொறுப்புகள் அல்லது கடமைகளை நிறைவேற்றத் தவறுவதைக் குறிக்கவும் இதனைப் பயன்படுத்துகின்றனர்.    உரிமைத் துறப்பு என்பது. தமிழ்த்தேசியப் பெரும்புலவர் இளங்கோ அடிகள், ஆட்சித் துறப்பிற்காக இல்வாழ்க்கையையே துறந்து துறவியானது போன்றது. பதவித் துறப்பு என்பது பெருந்தலைவர் காமராசர் மூத்த தலைவர்கள் கட்சியில் கருத்து செலுத்துவதற்காக ஆட்சிப்பொறுப்புகளைத் துறக்க வேண்டும் எனக் கூறி முன் எடுத்துக்காட்டாகத் தமிழ்நாட்டு  முதல்வர் பதவியைத் துறந்தது போன்றது.   abdicātiō என்னும் இலத்தீன் சொல்லின் பொருள் துறவு.
75. Abdomen	அடி வயிறு   அகடு,   நடுவிடம், உள்ளிடம் எனவும் பொருள்கள்.   வாயின் இறுதிப்பகுதி வயிறு எனப்படுகிறது.   வயிறு என்பது பாலூட்டிகளின் உடலில் நெஞ்சிற்கும், இடுப்பிற்கும் இடைப்பட்ட பகுதியாகவும், கணுக்காலிகள் போன்ற முதுகெலும்பிலிகளில் உடலின் முடிவுப் பகுதியில் நெஞ்சுப் பகுதிக்கு (thorax) அல்லது தலைநெஞ்சுப் பகுதிக்குப் (cephalothorax) பின்னாகக் காணப்படும் துண்டங்களாலான பகுதியையும் குறிக்கும்(விக்கிபீடியா).
76. Abduct	ஆட்கடத்து   காண்க: Abduction
77. Abducting and kidnapping	வன்னகற்றலும் கடத்திச் செல்லலும்   காண்க: Abduction   இளவரை அல்லது மனநலமற்றவரைச் சட்டபூர்வப்  பாதுகாவலரிடமிருந்து பறிப்பது அல்லது இந்திய எல்லைக்கு அப்பால் அழைத்துச் செல்வது கடத்தல்(kidnapping) எனப்படுகிறது.   இந்திய எல்லைக்கு அப்பால் அழைத்துச் செல்வது எனச் சட்ட விளக்கங்கள் தெரிவிக்கின்றன. இந்தியாவிற்குள் கடத்திச் சென்றால் கடத்தல் ஆகாதா? பாதுகாவலர் பாதுகாப்பிலிருந்து உரிய இசைவின்றியும் நெறிமுறையின்றியும் வேற்றிடம் அழைத்துச் செல்வது கடத்தல் என்பதே சரியாக உள்ளது.   ஆதலின் கடத்தல் என்பதை , இ.த.ச. பிரிவு 359இன்படி , இந்திய எல்லைக்கு வெளியே கடத்திச் செல்லுதல், இந்தியாவிற்குள் பாதுகாவலரின் பாதுகாப்பிலிருந்து கடததிச் செல்லுதல் என இருவகையாகக் கூறுவதே சரியாகும்.   வலிமையைப் பயன்படுத்தி, அல்லது வஞ்சக வழியில் கட்டாயப்படுத்தி கொண்டு செல்லலே வன்னகற்றல் (Abduction)எனப்படுகிறது.   Abduction, Kidnapping என இரண்டையுமே கடத்தல் என்பதால் வேறுபடுத்த வேண்டியுள்ளது. Abduction என்பதை ஆட்கடத்தல் என்றால் Kidnapping  என்பதைப் பொருள்கடத்தல் என்று மட்டுமே பொருள் கொள்ள நேரிடும்.  எனவே, Abduction என்பதை வன்னகற்றல் எனலாம்.
78. Abduction	வன்னகற்றல்   வன்முறையில் கடத்துதல் கடத்திச் செல்லுதல் ; வலக்காரமாக/பலவந்தமாக/(பலாத்துகாரமாக) எடுத்துச் செல்லுதல்;  பிரித்தெடுத்தல்                          ஆண்/பெண்/சிறுவன்/சிறுமி  என ஒருவரை அல்லது ஒன்றுக்கு மேற்பட்டவரை அவர் அல்லது அவர்கள் இருக்கும் அல்லது விரும்பும் இடத்திலிருந்து வேறிடத்திற்குக் கட்டாயமாக அழைத்துச் செல்வது, வன்முறை, அச்சுறுத்தல், ஏமாற்றுதல் மூலம் இடம் பெயர வைப்பது கடத்தலாகும். ஒருவர் தப்பியோடுவதையோ அவரைப் பிறர் மீட்பதையோ தடுப்பதற்காக அவரைக் கட்டுப்படுத்துவது, மறைப்பது முதலியனவும் கடத்தலின் ஒரு பகுதியே.   ஒருவரை அல்லது பலரை அல்லது கூட்டத்தினரை அவர்கள் இருக்கும் இடத்திலேயே அடைத்து வைத்து அவர்கள் தொடர்பானவர்கள் அல்லது அரசிடம் மிரட்டி பணம் அல்லது ஆதாயத்தைக் கேட்பதும் கடத்தலே.   abduco  என்னும் இலத்தீன் சொல்லின் பொருள் அப்பால் கொண்டு செல்லல்.( ab =அப்பால், duco = கொண்டு செல்லல்) இருக்கும் இடத்திலிருந்து கடத்துவதன் மூலம் அப்பால் கொண்டு செல்வதால் இவ்வாறு குறிப்பிட்டனர். அகற்றல் என்றால் ஒருவரை நீங்கச்செய்தல். வன்னகற்றல் என்றால் வன்முறையைப் பயன்படுத்தி மேலே கூறியவாறு உரிய இடத்திலிருந்து வேறிடத்திற்குக் கொண்டு செல்லுதல் எனப்பொருளாகிறது.   காண்க: Abducting and kidnapping
79. abet	தூண்டுதல் தூண்டுநர், உடந்தையர், உடந்தையாயிரு; தூண்டிவிடு; ஒத்தாசைபுரி; தீயசெயலுக்குத் துணை புரிதல் /ஆதரவளித்தல், தெரிந்தே, உதவி, ஊக்கம், வேண்டுமென்றே,   உடந்தை(குழந்தைத் திருமணத் தடைச் சட்டம், 2006 பிரிவு 10  குழந்தைத்திருமண உடந்தையாளருக்கான தண்டனையைக் கூறுகிறது) ஆதரவு, தீவிரமாக   குற்றச் செயலுக்கு அல்லது குற்றம் புரிவோர்க்குத்  துணைபுரிதலை அல்லது ஊக்கப்படுத்தலை அல்லது தூண்டுதலைக் குறிக்கிறது. எனவே குற்றஞ்செய்யத் தூண்டி விடுபவர் அல்லது குற்றத் தூண்டிவிடுநர் எனலாம்.   பழம் பிரெஞ்சு, தொல் செருமன் முதலான வெவ்வேறு மொழிகளில் இடம் பெற்று இடைக்கால ஆங்கிலத்தில் இடம் பெற்ற சொல்.
80.Abetment	உடந்தையாயிருத்தல்   தூண்டுகை; உடந்தை; ஒத்தாசை ;  தீச் செயலுக்கு உதவுதல் ஆதரவளித்தல் குற்ற உடந்தை   ஒன்றைச் செய்யுமாறு மற்றொருவரைத் தூண்டுதல். செயல் அல்லது சட்டமுரண் செய்யாமை நேரும் வகையில் மற்றொருவருடன் அல்லது பலருடன் சதி செய்தல். செயலால் அல்லது சட்ட முரணான செய்யாமையால் குற்றச் செயலுக்கு உள்நோக்குடன்  உதவுதல்   தூண்டுதல் [ஊழல் தடுப்புச் சட்டம், 1988 இல் பிரிவு 3(1).(ஆ)] குற்ற உடந்தை [கொத்தடிமைத் தொழிலாளர் முறை (அழித்தல்) சட்டம் 1976 பிரிவு 20 ](S. 20 BLS(A)A, 1976) [1985 ஆம் ஆண்டின் போதை மருந்துகள் – மனநோய்ப் பொருள்கள் சட்டப் பிரிவு 29] உடந்தையாயிருத்தல் (போதை மருந்துகள் – மனநோய்ப் பொருள்கள் சட்டம் 1987 பிரிவு 4/ S.4 M.N. the Commission of Sati (Prevention) Act, 1987)

(தொடரும்)

இலக்குவனார் திருவள்ளுவன்

சட்டச்சொற்கள் விளக்கம் 61-70 : இலக்குவனார் திருவள்ளுவன்

 

ஃஃஃ      இலக்குவனார் திருவள்ளுவன்      18 December 2023      அகரமுதல

(சட்டச்சொற்கள் விளக்கம் 51-60 : இலக்குவனார் திருவள்ளுவன் – தொடர்ச்சி)

சட்டச்சொற்கள் விளக்கம் 61-70

61. abate in equal proportion	சம விகிதத்தில் குறைப்பு   பங்குகளை முழுமையாகச் செலுத்த இறந்தவர் சொத்துகள் போதுமானவையாக இல்லாவிட்டால் அச்சொத்தின் பயனாளர்களிடம் சரிவிகிதமாகப் பகிர்ந்து குறைத்தல் என்பது போன்று இழப்புகளைச் சரி விகிதத்தில் குறைத்தல்   மாகாண மாநகர நொடிப்புச் சட்டம் பிரிவு 49.2.
62. Abatement	தணிவு   அறவு   தள்ளுபடி, விலக்கிவை   நூப்பு, அற்றுப்போதல், குறைப்பு செயலுறுத்தாணையை (ரிட்) அல்லது வழக்கு நடவடிக்கையை நீக்குதல் , தொல்லையை நிறுத்துதல்.   திரும்பச்செலுத்தப் போதுமான பணம் இல்லாத பொழுது கடனாளிகளுக்கான கொடுப்பனவுகளை விகிதமுறையில் குறைத்தல் போதுமான பணம் இல்லாதபொழுது விருப்பாவணத்தில் குறிப்பிட்ட தொகையை விகித முறையில் குறைத்தல்.   “நீரற வறியாக் கரகத்து” (பாரதம் பாடிய பெருந்தேவனார், புறநானூறு 1:12) என்ற அடியில் அறவு என்னும் சொல் நீங்குதல் என்னும் பொருளில் வந்துள்ளது.   காண்க: Abate
63. Abatement By reason of death	மரணத்தால் தள்ளுபடி     குற்றவியல் வழக்கில் குற்றஞ்சாடடப்பட்டவர் இறந்தபின், வழக்கைத் தொடருவது பயனற்றதாகவும் பொருளற்றதாகவும் ஆவதால், வழக்கு தள்ளுபடி செய்யப்படுகிறது.   ஆனால், உரிமை வழக்கில் ஒரு தரப்பினர் இறந்து விட்டால், வழக்கு தொடர்வதற்குரிய உரிமை நீடிப்பின், இறந்தவரின் மரபுரிமையர் அல்லது சட்டச் சார்பாளர் வழக்கினைத் தொடர்ந்து நடத்தலாம்.
64. Abatement of appeal	மேல்முறையீடு முற்றாதல்   மேல்முறையீடு அற்றுப்போதல்‌   மேல்முறையீட்டை வழக்கு உசாவல் முதலான தொடர் நடவடிக்கை யின்றி முடித்து வைத்தல்.   குற்ற நடைமுறைச்சட்டப் பிரிவு 394 இல் பிரிவு 377 அல்லது பிரிவு 378 இன் கீழ் மேற்கொள்ளப்பட்ட ஒவ்வொரு மேல் முறையீடும் குற்றம் சாட்டப்பட்டவரின் மரணத்தில் முற்றாக்கப்படும் என்கிறது.
65. Abatement of charges	கட்டணக் குறைப்பு; கட்டணத் தள்ளுபடி; செலவுக் குறைப்பு   2. குற்றச் சாட்டுகள் அற்றுப்போதல்; குற்றச் சாட்டுகள் முற்றாதல்; குற்றச்சாட்டுகளைத் தள்ளுபடி செய்தல். அறிமுகம்,தொடக்க நாள்,ஆண்டு விழா, காலமுறை ஆண்டு விழா முதலிய சிறப்பு நேர்வின் பொருட்டும் தேங்கிய பொருள்களை விற்பதற்கு அல்லது கூடுதல் விற்பனைக்கு என விளம்பரத்திற்காகவும் கட்டணக் குறைப்பு தரப்படுகின்றது.   குற்றஞ்சாட்டப்பட்டவர் இறந்த பின் அல்லது முற்றிலும் பொய்வழக்கு என அறிந்த பின் வழக்கில் குற்றச்சாட்டு(கள்) அற்றுப்போனதாக அறிவிக்கப் பெறும்.
66. abatement of nuisance	தொல்லை அகற்றல்   தொல்லை குறைப்பு   தொல்லையாகக் கண்டறியப்பட்ட ஒன்றை, நீக்குதல் அல்லது அகற்றுதல் அல்லது அழித்தல் அல்லது களைதல்.   இத்தகைய செயல் அமைதியான முறையிலும் வீண் கேடிழைக்காதவகையிலும் இருக்க வேண்டும்.
67. abatement of suit	வழக்கறவு; வழக்கறுதல்‌   வழக்கில்லாமை   குற்றச்சாட்டு(கள்) அற்றுப்போன நேர்வில் வழக்கு அற்றுப்போகிறது.   வழக்கில் முதன்மைத் தரப்பார் இறந்துபோவதால் அவ்வழக்கு  அற்றுப் போகும்.
68. abatement of taxes	வரிக் குறைப்பு   வரி செலுத்துபவர் செலுத்த வேண்டிய வரித்தொகையில் மேற்கொள்ளப்படும் குறைப்பு.
69. Abator / Abater	களையுநர்   தொல்லையைக் குறைக்கும் ஒன்று, குறைக்கும் ஓராள் அல்லது பொருள்; ஒரு குடியிருப்பில் குறையும் ஒன்று
70. Abbot	மடத் தலைவர்   மடத்தின் தலைவர்   திருமடத்தந்தை, திருமட முதல்வர், குருமடத்து முதல்வர் என்றும் குறிக்கப் பெறுகிறார். மடத்தலைவர் என்றால் அறியாமை மிக்கத் தலைவர் என்று வேடிக்கையாகக் கூறினாலும் அது பொருளன்று. நகைச்சுவையாக ஒன்றைக் கூறுவார்கள். ஒரு சமயத் தலைவர் மற்றொரு சமயத்தலைவரைச் சந்திக்கச் சென்றாராம். அறிவில் ஆதவன்(சூரியன்) எனச்சொல்வதுபோல் வாருங்கள் அறிவில்லாதவனே என்றாராம். தன்னை அறிவில்லாதவன் எனக் கூறுவதால், அவரும் உடன் வணக்கம் மடத்தலைவரே என்றாராம். மடையர்களின் தலைவர் என்று கூறினாலும் மடத்தின் தலைவர் என்பதாகச் சொன்னதாகச் சமாளிக்கலாம் அல்லவா?

(தொடரும்)

இலக்குவனார் திருவள்ளுவன்

சட்டச்சொற்கள் விளக்கம் 51 – 60 : இலக்குவனார் திருவள்ளுவன்

 

 ஃஃஃ      இலக்குவனார் திருவள்ளுவன்      14 December 2023      அகரரமுதல

(சட்டச்சொற்கள் விளக்கம் 41-50 : இலக்குவனார் திருவள்ளுவன் – தொடர்ச்சி)

சட்டச்சொற்கள் விளக்கம் 51 – 60

51. Abandonment of a child	குழந்தையைக் கைவிட்டுவிடுகை   பன்னிரண்டு அகவைக்குக் கீழுள்ள குழந்தையை அதன் பெற்றோர் அல்லது காப்பாளர் அந்தக் குழந்தையை விட்டு முற்றிலுமாக விலகிச்செல்லவேண்டும் என்னும் கருத்துடன் ஓரிடத்தில் விட்டுச்செல்லுகை அல்லது பாதுகாப்பின்றி விடுதல். குழந்தையைக் கைவிட்டுவிடுகை (பி.317, இ.த.தொ.ச.)
52. abandonment of copyright	பதிப்புரிமையைக் கைவிடல்     Copyright என்பது பதிப்புரிமை, தனிப்பயனீட்டுரிமை.   புத்தகத்தைப் பதிப்பித்து வெளியிடுதவற்கான உரிமை மட்டுமல்ல, ஓவியம்,பாடல், நாடகம், கதை, திரைப்படம் முதலியவற்றை ஆக்கிய மூலவருக்கு அல்லது அவரால் குறிக்கப்பெறும் உரிமைச் சார்பருக்கு அவற்றை அச்சிட்டு வெளியிட்டு விற்பனை செய்யவோ, பாடவோ, ஒலிப்பதிவு செய்யவோ, நடிக்கவோ, திரைப்படமாக்கவோ, இசைத்தட்டு அல்லது ஒலியிழை அல்லது ஒளியியிழை அல்லது வேறு வடிவில் உருவாக்கவோ குறிப்பிட்ட ஆண்டு அளவுக்குச் சட்டம் அளிக்கும் தனி யுரிமை.   அறிஞர்களின் நூல்களைத் தமிழக அரசு நாட்டுடைமை ஆக்குகின்றது. இதற்கான பரிவுத்தொகையை பதிப்புரிமையாளருக்குத் தந்துடுகிறது. இதனால் அவர்கள் பதிப்புரிமையத் துறந்தவர்கள் ஆகின்றனர். அத்தகையவர்களின் படைப்புகளை யார் வேண்டுமென்றாலும் எந்த வடிவிலும் பயன்படுத்தலாம், விற்கலாம்.
53. abandonment of plea	வாதுரிமையைக் கைவிடல்   வாதத்தைக் கைவிடல் என்று குறிப்பதை விட வாதுரிமையைக் கைவிடல் என்பது சரியாக இருக்கும்.   வழக்காடியின் விளம்புரைக்கு எதிராளி அளிக்கும் மறுமொழி, எதிருரை, எதிர்வாதம், முறையீடு, வேண்டுகை,முதலியவற்றைத் தெரிவிப்பதற்குரிய உரிமையைக் கைவிட்டு விடல். குறிப்பிட்ட கால வரம்பிற்குள் எதிருரை அளிக்க வேண்டும் என்ற காலவரம்பிற்குள் எதிருரையை அளிக்காவிட்டால், அது வாதுரிமையைக் கைவிட்டதாகக் கருதப்படும்.
54. abandonment of pollution	மாசுக்கேட்டை அகற்றல்   ஊர்திப் புகை, மின் குளிரி முதலிய கருவிகள் மூலம் வெளியேறும் மாசுக்கேடு எனப் பலவகையிலும் இயற்கைக்குக் கேடு தரும் கேடுகளால் ஏற்படும் மாசுக்கேடுகளை அகற்றுதல்.
55. abandonment of revenue	வருவாயைக் கைவிடல்   நிலம் அல்லது சொத்து அல்லது வருவாய் தரக்கூடிய ஒன்றின் மூலம் கிடைக்கக்கூடிய வருவாயின் பயன்பாட்டுரிமையை விட்டு விடல்.
56.abandonment of right	உரிமை துறத்தல்   உரிமையைக் கைவிடுதல் பற்றினை அல்லது உரிமை கோரலை அல்லது உரிமை வழக்கு நடவடிக்கைகளை அல்லது மேல்முறையீட்டினை அல்லது தனியுரிமையை அல்லது உடைமையை அல்லது உரிமையைக் கைவிடுதல் அல்லது துறத்தல்.   வேண்டுமென்றேயும் நிலையாகவும்  சொத்து, பொதுப்பாதை உரிமை, வளாகங்கள், ஒப்பந்த உரிமைகள், வாழ்க்கைத் துணையை அல்லது/உடன் குழந்தைகளை  விட்டு விடுதல், ஒப்படைத்தல் அல்லது கை விடல்.
57.Abandonment, material	கைவிடப்பட்ட பொருள்   அகற்றப்பட்ட அல்லது எரிக்கப்பட்ட அல்லது தீக்கிரையாக்கப்பட்ட அல்லது இல்லாது ஆக்கப்படுகின்ற அல்லது இவற்றுக்கு முன் இந்நோக்கத்திற்காகத் திரட்டப்பட்ட, சேமிக்கப்பட்ட பொருள்கள் கைவிடப்பட்ட பொருள்கள் ஆகும்.
58. Abandonment, moral	கடப்பாட்டு உரிமையைக் கைவிடல்   moral – நல்லொழுக்கம் என நேர் பொருளாக நோக்கக் கூடாது. பேச்சு வழக்கில் தார்மீக உரிமை என்று குறிக்கின்றோம் அல்லவா அத்தகைய கடப்பாட்டு உரிமை எனல் வேண்டும். நன்னெறி சார் செயல் என்றும் குறிப்பிடலாம்.
59. abatable nuisance	குறைக்கக்கூடிய ஒரு தொல்லை   அடக்கப்பட்ட அல்லது தணிக்கப்பட்ட அல்லது தீங்கற்ற வகையில் குறைகளைந்து தொல்லைகளைக் குறைத்தல்.
60. Abate	தணி     அருகியற்றுப்போ; அற்றுப்போ; அற்றுப்போதல்; ஆறப்போடுதல்; தாழ்த்து ; குறை ; தள்ளுபடிசெய் ; விலக்கிவை . குறைக்க, ஒரு வழக்கை முடிக்க, மறுக்க அல்லது  இடைநிறுத்த. தவிர்க்கக்கூடிய. இறுதி ஆவணத்தில் குறைத்தல் அல்லது மறு திட்டமிடல்   abate என்னும் இத்தாலியச் சொல்லில் இருந்து கடன் வாங்கிய சொல். பிரிவு 6(1), நிலக்கரிச் சுரங்கத் தொழிலாளர் நல நிதி (நீக்கறவு) சட்டம், 1986   காண்க: Abatement

(தொடரும்)

இலக்குவனார் திருவள்ளுவன்

சட்டச்சொற்கள் விளக்கம் 41-50 : இலக்குவனார் திருவள்ளுவன்

 

ஃஃஃ     இலக்குவனார் திருவள்ளுவன்      11 December 2023      அகரமுதல

(சட்டச்சொற்கள் விளக்கம் 31 –40 : இலக்குவனார் திருவள்ளுவன் – தொடர்ச்சி)

41. Abandoned	கைவிடப்பட்ட   கைவிடப்பட்ட குடும்ப உறுப்பினர், கைவிடப்பட்ட சொத்து, கைவிடப்பட்ட ஏரி, கைவிடப்பட்ட சுரங்கம், கைவிடப்பட்ட பணிகள் என்பன போன்று பாெறுப்பைத் துறக்கும் நிலை.
42. Abandoned child	கைவிடப்பட்ட குழந்தை   பெற்றோர்/உறவினர்/பாதுகாவலர்/பேணுநர் இன்றி விடப்படும் குழந்தை.   அனாதை/உறவிலி/ஏதிலி எனக் குழந்தை மீது அவமுத்திரை குத்தக்கூடாது. எனவே, கைவிடப்பட்ட குழந்தையைக் கண்டெடுக்கப்பட்ட குழந்தை அல்லது கேட்பாரற்ற குழந்தை எனக் குறிப்பிடுகின்றனர்.   இந்தியத் தண்டிப்புச்சட்டம், இந்து மகவேற்பு பேணுகைச் சட்டம் 1956 ஆகியன கைவிடப்பட்ட குழந்தை தொடர்பாகக் கூறுகின்றன.   குழந்தையைக் கைவிடுவது இந்தியத் தண்டிப்புச் சட்டத்தின் 317ஆவது பிரிவின் கீழ்த் தண்டனைக்குரியது.   காண்க : Abandonment of a child
43. abandoned goods	கைவிடப்பட்ட பண்டங்கள்   கைவிடப்பட்ட பொருள்கள் என்பன பெறப்படாத பொருள்களாகும்.   சரக்கு பெறவேண்டியவரைக் கண்டறிய முடியாச் சூழலில் அல்லது சரக்கு பெறுவதற்குரியவர் அதனை ஏற்காத அல்லது மறுத்த சூழலில் அல்லது சரக்ககத்தில் சட்ட பூர்வமாக வைத்திருக்கக்கூடிய கால வரம்பு கடந்த பின்பும் யாரும் பொருள்களை எடுத்துச்செல்ல முன் வராமையால் இருக்கக்கூடிய பொருள்கள். சுருக்கமாக, உரியவரால் எவ்வகைத் தகவலுமின்றி ஏற்கப்படாதவை கைவிடப்பட்ட பண்டங்களாகும் எனலாம்.   ஊர்திக் காப்பு நிறுத்திடத்தில் குறிப்பிட்ட கால அளவு கடந்த பின்னும் எடுத்துச் செல்லப்படாத வற்றிற்கும் இது பொருந்தும். சுங்கத்துறையில் பிரிவு 48(1) / 61இன்படிக் கோரப்படாத அல்லது எடுக்கப்பட்ட பொருள்களாகும். கெட்டுவிடக்கூடிய உணவுப்பொருள் அல்லது விரைந்து அழியக்கூடிய பொருள்கள் குறிப்பிட்ட காலவரம்பிற்குள் இருந்தாலும், அழிநிலை வரும் பொழுது கைவிடப்பட்ட பண்டமாகக் கருதி நடவடிக்கை எடுக்கலாம்.   சில நேரங்களில் கவனக் குறைவின் காரணமாகவோ குறித்த அளவிற்குமேல் பொருள்களை எடுத்துச் செல்ல இயலாமையாலோ சில பண்டங்கள் விடப்பட்டிருக்கலாம். இவற்றைக் கைவிடப்பட்ட பண்டங்கள் எனக் கருதக்கூடாது.
44. abandoned grounds	கைவிடப்பட்ட நிலங்கள்   கைவிடப்பட்ட நிலங்கள் என்பன கைவிடப்பட்ட மனையிடங்கள், திடல்கள் ஆகியவற்றையும் குறிக்கும். பயன்படுத்தப்படாமல் அல்லது செப்பனிடாமல் உரியவர் கவனிப்பின்றிப் பாழடைந்த நிலைக்கு ஆளாகும் சுற்றுப்புறத்திற்கும் பொதுமக்களுக்கும் கேடு அல்லது இடர் விளைவிக்கும் நிலங்கள் கைவிடப்பட்ட நிலங்களாகும்
45. abandoned property	கைவிடப்பட்ட சொத்து;   நிலையாக ஒரு சொத்தை அல்லது உடைமையை விட்டுவிட்டுச்செல்லுதல்.   வாடகைதாரர் அல்லது குத்தகைதாரர் குடியிருந்த வீட்டை அல்லது பயன்படுத்திய நிலத்தை விட்டுச் செல்லும் பொழுது தனக்குரியவற்றைக் கைவிட்டுவிட்டுச் செல்லுதல். தன் கட்டுப்பாட்டில் உள்ள உரிமைப் பொருளைக் குறிப்பிட்ட இடத்தைவிட்டுப் பெயரும் பொழுது தொடர்பயன்பாட்டிற்கு எடுத்துச்செல்லாமல் அல்லது எடுத்துச் செல்ல இயலாமல் உரிமையைக் கைவிடுதல். போர், கலவரம், அல்லது புயல், வெள்ளம், நில நடுக்கம், கடல்கோள் முதலான இயற்கை இடர் போன்ற சூழலில் ஒரு நகரம் அல்லது இடம் அல்லது ஒரு நாட்டைவிட்டுப் புலம் பெயர்வோர் தமக்குரிய உடைமைகளைக் கொண்டு செல்ல இயலாமல் கைவிடப்பட்ட சொத்து.   ஆதனம் என அகராதி ஒன்றில் குறிக்கப்பெற்றுள்ளது. நீளுதல் என்னும் பொருளில் வரும் பொழுது இது தமிழ்ச்சொல்லே. ஆனால், கைவிடப்பட்ட சொத்து என்னும் பொருளில் தமிழ்ச்சொல்லன்று.
46. Abandonee	கைவிடப்பட்டவர்   வாழ்க்கைத் துணைவரால் கைவிடப்பட்டவர், பெற்றோரால் கைவிடப்பட்டவர், பிள்ளைகளால் கைவிடப்பட்டவர் எனப் பொறுப்புகளைக் கைவிடுபவர்களால் ஆதரவற்றவர்களாக ஆகிறவர்கள்.
47. Abandoning	கைவிடல்   தன் பொறுப்பிலுள்ள ஒன்றின் மீதான பொறுப்பைத் துறத்தல்.
48. Abandoning child	குழந்தையைக் கைவிடல்   தன் பொறுப்பிலுள்ள குழந்தை மீதான பொறுப்பைத் துறத்தல்.   காண்க: Abandonment of a child
49. Abandoning without reasonable cause	தக்கக் காரணமின்றிக் கைவிடுதல்   பிரிந்து செல்வது என்பது மற்ற துணையின் அனுமதியின்றியும் சரியான காரணமின்றியும் கைவிடுவது பிரிந்து செல்வதாகும். இது திருமணக் கடமைகளில் இருந்து விலகுவதாகும். முன்பு, பிரிந்து செல்வது நீதித்துறை பிரிவிற்கான ஒரு காரணமாக மட்டுமே இருந்தது. ஆனால் 1976 இல் இந்து திருமணச் சட்டத்தில் திருத்தம் மேற்கொண்டு இதனைத் திருமண விலக்கிற்கான காரணமாகவும் மாற்றியது.   2014இல் மும்பை நீதிமன்றம், சீமா பட்டீல் வழக்கில், தக்கக் காரணமின்றித் துணையைப் பிரிவது கொடுமை என்றும் மணவிலக்கிற்குத் தக்கக் காரணம் என்றும் தீர்ப்பளித்துள்ளது.
50. Abandonment	கைவிடுகை   கைவிடுதல்,   விடுகை,  விட்டு விடுகை, துறப்பு   திட்டத்தை அல்லது செயலைத் தொடராமல் விட்டு விடுதலைக் குறிக்கும்.   உரிமை கோரல், உரிமை வழக்கு நடவடிக்கைகள், மேல் முறையீடு, உடைமை, வட்டி,  வருவாய் ஆகியவற்றின் மீதுள்ள உரிமையைக் கைவிடல்  அல்லது மீள் கோரல் இல்லை என்ற நிலைப்பாட்டில் முற்றிலுமாக உரிமையைக் கைவிடல்.

(தொடரும்)

இலக்குவனார் திருவள்ளுவன்

சட்டச்சொற்கள் விளக்கம் 31-40 : இலக்குவனார் திருவள்ளுவன்

 

ஃஃஃ     இலக்குவனார் திருவள்ளுவன்      07 December 2023      அகரமுதல

(சட்டச்சொற்கள் விளக்கம் 26 -30 : இலக்குவனார் திருவள்ளுவன் -தொடர்ச்சி)

சட்டச்சொற்கள் விளக்கம் 31-40

31. A while	சிறிது நேரம்   while-குறிப்பிட்ட ஒரு செயல் நிகழ்வின்போது; அச்சமயத்தில்; அப்பொழுது; உடன் நிகழ்வாக; அதே வேளையிலேயே. காலம்; நேரம்; எனப் பொருள்கள். ஆனால், A while என்னும் பொழுது சிறிது நேரம் அல்லது கொஞ்ச நேரம் என்றே குறிக்கிறது.
32. A, An	ஒரு, ஓர்   ஒற்றை எண்ணிக்கையைக் குறிக்கும் ஒரு என்னும் சொல் உயிரெழுத்தில் தொடங்கும் சொல்லுக்கு முன்னர் ஓர் என வரும்.
33. A.M.	முற்பகல்/மு.ப.   Ante meridian என்பதன் சுருக்கம்.
34. Abandonment of a child	குழந்தையைக் கைவிடுதல்   12 அகவைக்குட்டபட்ட ஒரு குழந்தையை, குழந்தையின் தாயோ, தந்தையோ, பேணுநரோ, முழுமையாகக் கைவிடும் நோக்கில் பாதுகாப்பின்றி எங்காவது விட்டு விடுதல். இ.த.ச.317இன் கீழ் இது குற்றமாகும்.   12 அகவைக்கு மேற்பட்ட குழந்தையைக் கைவிடுதலும் குற்றமே. காண்க: Abandoned child – கைவிடப்பட்ட குழந்தை
35. ab extra	வெளியிலிருந்து   வழக்காளர்களைப் பொறுத்தவரை வெளியிலிருந்து பெறப்படும் நிதி என்னும் பொருளில் குறிக்கப் பெறுகின்றன.   ஒருவர் மூன்றாம் தரப்பிடமிருந்து நிதி பெற்றிருக்கலாம். இந்நிதி வெளியிலிருந்து பெறும் கூடுதல் தொகையாகக் கருதப்படுகிறது.   ab = இருந்து, extra = வெளி இலத்தீன் தொடர்
36. ab initio	தொடக்கத்திலிருந்து   தொடக்கத்தில் இருந்து தொடக்கத்திலிருந்தே அடி முதலாக அடிமுதலே ஆதிதொட்டு; எனவும் சொல்லப்படுகின்றன.   தொடக்கதிலிருந்தே உள்ள நிலைப்பாட்டைக் குறிக்கின்றன.   Ab initio என்னும் இலத்தீன் சொல்லின் பொருள் தொடக்கத்திலிருந்து. ab = இருந்து, initio = தொடக்கம் எ.கா.: தொடக்கத்திலிருந்தே திருமணம் செல்லுபடியாகாது (the marriage was void ab initio). செயல் ஆணை, தலைவரின் அதிகாரத்தைத் தாண்டுவதால், வரம்பை மீறுவதாகிறது. எனவே, தொடக்கத்திலிருந்தே இஃது ஒழிவாகிறது(The Executive Order exceeds the President’s authority and is therefore ultra vires and void ab initio.)   ஓர் ஒப்பந்தம் எந்த நேரத்திலும் சட்டப்பூர்வமாகச் செல்லுபடியாகாத நேர்வில் அது “வெறும் தொடக்கம்” (“void ab initio”) என்று கருதப்படுகிறது. தொடக்கத்திலிருந்து என்னும் தொடர் வெவ்வேறு நிகழ்வுகளில் பயன்படுத்தப்படுகிறது. சட்டத்தில் இத் தொடரின் விளக்கம் : ஒரு சட்டம், ஒப்பந்தம், விற்பனை அல்லது செல்லுபடியாகாத பிற செயலுக்குச் சட்டப்பூர்வ விளைவு இல்லை. வெற்றிடமான செயலை அங்கீகரிக்கவோ சரிபார்க்கவோ முடியாது. தொடக்கத்தில் இல்லாத ஒரு செயலுக்கு எந்த ச் சட்டப்பூர்வ விளைவும் இல்லை. இலத்தீன் தொடர்
37. Ab intestato	விருப்பாவணமின்றி   ஒருவர் தான் இறக்கும் நேரத்தில் அல்லது அதற்கு முன்னர் தன் சொத்துகளைத் தனக்குப்பின் யார் யாருக்கு உரிமையாக்குகிறார் என்னும் தன் விருப்ப முடிவைத் தெரிவிக்கும் இறுதி முறியின்றி/ இறுதியாவணமின்றி/ விருப்பாவணமின்றி/ விருப்பாவணம் அற்ற வழி/ விருப்புறுதி அற்ற நிலையில் இறந்து போவதைக் குறிக்கின்றன.   எ.கா. முறையீட்டாளரின் தந்தை இறுதி முறி எழுதாமல் இறந்துள்ளதால், நேரடியாகச் சொத்துரிமை கோர இயலாது.   சொத்துவகையில், சட்டப்படியான விருப்பாவணம் அல்லது இறுதி ஆவணமின்றி  ஒருவர் இறந்த பிறகு அவரது சொத்துகளைக் கையாளும் சட்டங்களை/முறையை இத் தொடர் குறிக்கிறது.   வேறுவகையில் சொல்வதனால், இறப்பதற்கு முன் சட்டபூர்வமாக   இறுதி ஆவணத்தை உருவாக்காமல் இருப்பதைக் குறிக்கிறது எனலாம்.   இலத்தீன் தொடர்
38. Aback	திகைப்புற்று வியப்புற்று   எதிர்பாராத வகையில் அல்லது அடுத்தடுத்த நிகழ்வில் அல்லது தெரியாமல் ஏற்படும் அதிர்ச்சியில் அல்லது குழப்பத்தில் திடுக்கிடல் அல்லது திகைத்தல்
39. Abactor	ஆநிரை கவர்வோன் கால்நடைக் கள்வன்   abactor  என்னும் இலத்தீன் சொல்லில் இருந்து குறிக்கப் பெறுகிறது. abacter  என்றும் சொல்லப் பெறுகிறது.
40. Abandon	கைவிடு   சட்ட உரிமையை அல்லது கோரலைக் கை விடுதல்.   பெற்றோர் உரிமைகளைப் பேணல், காத்தல் , முடிவுறுத்தல் வழக்குகளில், எந்த ஆதரவிற்கான வாய்ப்பு இன்றியும் குழந்தையைப் பேணுதல், பாதுகாத்தல், கட்டுப்படுத்தல் ஆகியவற்றிற்குப் பொறுப்பேற்காமலும் குழந்தையை விட்டுவிடுதல்.   எந்த ஒருவரையும் அல்லது நோக்கத்தையும் குறிப்பிடாமல் முழுமையாக விட்டு விடுவது.   சொத்தையோ மனைஇடங்களையோ வழிஉரிமையையோ, கப்பலையோ, ஒப்பந்த உரிமைகளேயா வாழ்க்கைத் துணையையோ குழந்தைகளையோ இரு தரப்பாரையுமோ வேண்டு மென்றேயும் நிலையாகவும் விட்டுவிடுதல், ஒப்படைத்தல், அல்லது கைவிடுதல். வாழ்க்கைத் துணையைக் கைவிடுதல் என்பது நிலையான பிரிவை நோக்கமாகக் கொண்டதும் குழந்தைகளுடன் நெடுங்காலம் தொடர்போ ஆதரவு தராமலோ இருத்தலும்.   குறிப்பிட்ட நிறுவனம் அல்லது துறை திட்டம் ஒன்றை (அல்லது பலவற்றை) நிறுத்துதல். செயலை அல்லது செய்கையை அல்லது சட்ட பூர்வ நடவடிக்கையை நிறுத்துதல். எனவே, விண்ணப்பம் அல்லது வழக்கு கைவிடப்பட்டது என்றால் விண்ணப்பம் அல்லது வழக்கு இனி நிலுவையில் இல்லை எனப் பொருள்.   (நிலுவையில் இருந்தால் வழக்கு என்றேனும் கேட்பிற்கு வரும். நிலுவையில் இல்லை எனில் வழக்கு முடிவுற்றதாகிறது.) அம்போ என விடல், நட்டாற்றில் விடல், கை கழுவுதல் இவையும் மக்கள் வழக்கில் கைவிடலைக் குறிக்கும். கெடுங்காலைக் கைவிடுவார் கேண்மை அடுங்காலை உள்ளினும் உள்ளஞ் சுடும் (குறள் 799) என்கிறார் திருவள்ளுவர். இன்னா, கெடும் இடம் கைவிடுவார் நட்பு (இன்னா நாற்பது 36) என்கிறார் கபில தேவர்.

(தொடரும்)

இலக்குவனார் திருவள்ளுவன்

சட்டச்சொற்கள் விளக்கம் 26 -30 : இலக்குவனார் திருவள்ளுவன்

 

ஃஃஃ இலக்குவனார் திருவள்ளுவன்      04 December 2023      அகரமுதல

(சட்டச்சொற்கள் விளக்கம் 21-25 : இலக்குவனார் திருவள்ளுவன்-தொடர்ச்சி)

சட்டச்சொற்கள் விளக்கம் 26 -30

26. a priori	முற்கோள்   முன்னறி, புலனுக்கு முன் எழு, புலச் சார்பற்ற, முந்தையதிலிருந்து.     நிகழ்வைப்பற்றிய அறிதலுக்குத் தேவையின்றி நிகழ்விற்கு முன் எழுப்பப்படும் வாதம். பொதுக் கோட்பாடுகளிலிருந்து ஊகிக்கப்படும் காரிய அறிவு.   இலத்தீன் தொடர்
a quo	எதிலிருந்து   எந் நீதிமன்றத்திலிருந்து இவ்வழக்கு இந்த நீதிமன்றத்திற்கு வந்துள்ளது என்பதைக்  குறிக்கின்றன.   மேல்முறையீட்டில் கீழே உள்ள நீதிமன்றத்தைப் பொறுத்தவரை, வழக்கு நிகழ்ந்த முதல் நீதி மன்றம் அல்லது மேல்முறையீட்டு நீதிமன்றம்.   இலத்தீன் தொடர்
A share of profits	ஆதாயப் பங்கு ஆதாயப் பகிர்வு, ஆதாயப்  பாகீடு     ஊழியர்களுக்குத் தரப்படும் வழக்கமான ஊதியம், மீதூதியம் ஆகியவற்றுடன் நிறுவன ஆதாய அடிப்படையில் ஊக்கத்திட்டங்களுடன் நிறுவனப் பங்குகளையும் பங்கிட்டு வழங்குதல்.   இவ்வாறு பங்குகளை ஊழியர்களுக்கு வழங்குவது ஊழியர்கள்-முதலாளி அல்லது நிறுவனத்தின் இடை யே  பிணக்குகளைக் குறைக்கவும் ஒத்துழைப்பைப் பெருக்கவும் உதவுகிறது.
A subsequent offence	தொடர் குற்றம்   பின்புரிந்த குற்றம்   அடுத்து செய்த குற்றம்   ஏற்கெனவே ஒரு குற்றத்திற்காகத் தண்டிக்கப்பட்டவர்  இரண்டாவதாகச் செய்யும் தொடர் குற்றம்.
A suit or proceeding between the parties to a marriage	திருமணம் தொடர்பான தரப்பாரிடையே வழக்கு அல்லது செயன்மை   குடும்ப நல நீதிமன்றச் சட்டம், 1984 பிரிவு 7 (1) (ஆ).(இ) இது குறித்துக் கூறுகிறது.

(தொடரும்)

இலக்குவனார் திருவள்ளுவன்