சட்டச் சொற்கள் விளக்கம் 811-820 : இலக்குவனார் திருவள்ளுவன்

 

    ஃஃஃ     இலக்குவனார் திருவள்ளுவன்      27 September 2024      அகரமுதல

(சட்டச் சொற்கள் விளக்கம் 801-810 : இலக்குவனார் திருவள்ளுவன் – தொடர்ச்சி)

சட்டச் சொற்கள் விளக்கம் 811-820

811. Admiralty Jurisdiction	கடலாண்மைப் பணி வரம்பு.   கடல்சார் உரிமை கோரல்கள் தொடர்பான பணியாட்சி வரம்பு தொடர்புடைய நீதிமன்றங்களுக்கு இருக்கும்.  கடலாண்மைப் பணிவரம்பு என்பது கடல்நீர் எல்லை வரை இருக்கும்.
812. Admissibility	ஏற்புடைமை   ஏற்புத்தன்மை   ஏற்கத்தக்கத்தன்மை;   ஒன்றை – குறிப்பாகச் சான்றினை – நீதிமன்றத்தால் அல்லது உரிய அலுவலரால் ஏற்றுக் கொள்ளக்கூடிய தன்மை.
813. Admissibility Of Document	ஆவண ஏற்புடைமை   ஆவணங்கள் நீதிமன்றத்தால் ஏற்பதற்குரிய ஆவணம், சான்றுரை, தெளிவான சான்று முதலானவற்றின் தகுதித்தன்மையைக் குறிப்பது.   எல்லா ஆதாரங்களும் நீதி மன்றத்தால் ஏற்கப்படா. நம்பகமானவையும் பொருத்தமானவையும் மட்டுமே நீதி மன்றங்களில் ஏற்கப்படும்.   நீதிமன்றத்தால் ஏற்கப்படும் அல்லது ஒப்புக்கொள்ளப்படும் தகுதியுடைமையையே இது குறிக்கிறது.   பல்கலைக்கழகத்தில் சேரும் பொழுது பல்கலைக்கழகத்தால் ஏற்கப்படும் ஆவணத் தகுதியுடைமையயும் இது குறிக்கிறது.
814. Admissible	ஏற்றுக்கொள்ளத்தக்க, அனுமதிக்கத்தக்க ஏற்கத்தக்க   முறையிடப்படும் விண்ணப்பம் அல்லது மேல்முறையீடு ஏற்கத்தக்கது. சான்றுக்கு அளிக்கப்படும் ஆதாரம்/ஆதாரங்கள் ஏற்கத்தக்கது/ன.   நீதிபதி குறிப்பிட்ட சான்று அல்லது ஆதாரம் ஏற்றுக்கொள்ளத்தக்கது; எனவே, அனுமதிக்கத் தக்கது எனல். எ.கா. நீதிபதி, அளிக்கப்பட்ட ஒலியிழை ஆதாரமாக ஏற்கத்தக்கது எனத் தீர்ப்பளித்தார்.   முறை மன்றத்தால் வழக்காளி வழக்கிற்கான புதிய சான்றினை அளிக்கையில்   ஏற்கத்தக்கது என முடிவெடுக்கலாம்.   admissible என்னும் பிரெஞ்சுச் சொல்லின் பொருள் ஏற்பதற்குத் தகுதியுடையது.
815. Admissible Evidence	ஏற்கத்தக்க சான்று   நீதிமன்றத்தில் ஏற்கப்பெறும் வழக்கு உசாவுநருக்கு உதவுவதாகக் கருதப்படும் அல்லது வழக்கினை முடிவுகட்டுவதற்கு வாய்ப்பாக  அமையும் சான்று.
816. Admission	ஏற்கை ஒப்புகை, சேர்த்தல், அனுமதித்தல் முதலான வேறு சில பொருட்கள் இருப்பினும் இந்த இடத்தில் குற்றத்தை ஏற்றுக் கொள்ளுதலையே-ஏற்கையையே குறிக்கிறது.   வழக்கு தரப்பார், அவர்/அவர்களுக்கு எதிராக அளிக்கப்பட்ட  உண்மை அறிக்கையை ஒப்புக் கொண்டு ஏற்பது. சில சூழல்களில் அமைதிகாப்பதும் அறிக்கையை ஏற்பதாகும்.   மற்றொரு தரப்பாரின் கருத்திற்கு எதிர்ப்பு தெரிவிக்காமல் இருப்பது, எதிர்ப்பதற்கு ஒன்றுமில்லை என்பதால் ஏற்றுக் கொள்வதாகிறது.   சான்று சட்டத்தில் ஏற்கை என்பது எதிர்த்தரப்பாரின் முன் அறிக்கையாகும். இது செவிவழி மறுப்பின் மீது ஆதாரமாக ஏற்றுக் கொள்ளப்படலாம். பொதுவாக, குற்ற ஏற்கை  குற்ற வழக்கிலும் உரிமை வழக்கிலும் ஏற்கப்படுகிறது.   வழக்காற்றுச் சட்டத்தில்(Common Law) ஏற்கை ஏற்கப்படுகிறது. ஆனால், இக்கூற்றுரை, விருப்பமற்றது, நேர்மையற்றது, கூற்றுரை பெறப்பட்ட சூழல் முறையற்றது அல்லது சட்ட முரணானது என்றால்  இது விலக்கப்படும்.   சட்டக்கோட்பாட்டியலில் முன்தீர்ப்புகள் அடிப்படையிலான நடைமுறை விதிகளையே எழுதப் பெறாத சட்டங்கள் என்கின்றனர். எழுதப்பெறாத சட்டங்கள் என்பதை விட வழக்கத்தில் பயன்படுத்துவதால் வழக்காற்றுச் சட்டம் என்பது ஏற்றதாக இருக்கும்.
817. Admission Committee	ஏற்கைக் குழு   சேர்க்கைக் குழு என்பது பொதுவாகக் கல்வி நிலையங்களில் குறிப்பிட்ட படிப்பிற்காக, நுழைவுத்தேர்வு இருப்பின் அதன் அடிப்படையில் அல்லது வேறுவகையில் தகுதியை அறிந்து தக்கவரைச் சேர்த்துக் கொள்வதற்கு ஆராய அமைக்கப்படும் சேர்க்கைக் குழுவாகும்.   வழக்கு மன்றங்களில் பதியப்படும் வழக்குகளை ஏற்பது குறித்து ஆராய்ந்து முடிவெடுக்கக் குழுக்கள் இருப்பின் அவற்றை ஏற்கைக் குழுக்கள் எனலாம்.   கல்வித்துறையில் Admission – சேர்க்கை எனப் பயன்படுத்தப்பட்டாலும் கல்வித் துறையிலும் சட்டத்துறையிலும் பொதுவாக இருக்க வேண்டும் என்பதற்காக ஏற்கை எனக் குறிக்கப்பட்டது.
818. Admission Fee	அனுமதிக் கட்டணம் சேர்க்கைக்கட்டணம் நுழைவுக் கட்டணம்   வரைபடம் போன்றவற்றின் அனுமதிக்காக, கல்வி நிலையத்தில் சேருவதற்காக, காட்சியகம் போன்றவற்றில் நுழைவதற்காகச் செலுத்த வேண்டிய கட்டணம். அனுமதி தமிழ்ச்சொல்லே எனச் செ.சொ.பி.அகரமுதலி விளக்குகிறது.
819. Admission Form	சேர்க்கைப் படிவம் கல்வியகத்தில் அல்லது வேறு நிலையத்தில் அல்லது அமைப்பில் அல்லது குழுவில்  சேருவதற்காகக் கோரப்படும் விவரங்கள் அடங்கிய படிவம்.
820. Admission Of Guilt	குற்ற ஏற்புரை   குற்றப்பாடு ஒப்புதல் / ஏற்பு குற்றத்தை ஒப்புக் கொள்வது என்பது குற்றம் சாட்டப்பட்ட ஒருவரின் சொற்களில் இருந்து , ஆம், நான் குற்றவாளி போன்ற தெளிவான சொற்கள் இடம் பெறாவிட்டாலும் குற்றச்செயலை ஏற்றுக் கொள்ளுதல்.

(தொடரும்)

இலக்குவனார் திருவள்ளுவன்

சட்டச் சொற்கள் விளக்கம் 801-810 : இலக்குவனார் திருவள்ளுவன்

   ஃஃஃ   இலக்குவனார் திருவள்ளுவன்      25 September 2024      அகரமுதல

(சட்டச் சொற்கள் விளக்கம் 791-800 : இலக்குவனார் திருவள்ளுவன்- தொடர்ச்சி)

சட்டச் சொற்கள் விளக்கம் 801-810

801. Administrative Machinery	பணியாண்மை இயங்கமைவு   Machinery என்றால் இயந்திரம் என நேர் பொருளில் சொல்வதை விட இயந்திரத்தின் இயக்கம் போன்று இயங்கு நிலையைக் குறிப்பதால் இயங்கமைவு எனலாம்.   பணியாண்மைக்கான செயற்தொகுதியைக் குறிப்பதே பணியாண்மை இயங்கமைவு ஆகும்.
802. Administrative Office	பணியாண்மை அலுவலகம்   ஒரு துறை அல்லது ஓர் இயக்ககம் அல்லது ஒரு செயலகம் அல்லது ஒரு நிறுவனம் அல்லது ஓர் அமைப்பு போன்றவற்றின் அன்றாடப் பணிகளைப் பார்க்கும் அலுவல் அமைப்பே பணியாண்மை அலுவலக மாகும்.
803. Administrative Power	பணியாண்மை அதிகாரம்   ஒரு துறை அல்லது ஓர் இயக்ககம் அல்லது ஒரு செயலகம் அல்லது ஒரு நிறுவனம் அல்லது ஓர் அமைப்பு போன்றவற்றின் அன்றாடப் பணிகளின் ஆளுமைகளையும் பணியாளர்களின் செயற்பாடுகளைக் கட்டுப்படுத்துவதற்கும் உடைய அதிகாரம் பணியாண்மை அதிகாரம் ஆகும். பணியாளர்களின் செயற்பாடுகளைக் கட்டுப்படுத்தல் என்னும் பொழுது பணியாளர்களின் ஊதியம், விடுப்பு முதலிய பணியாளர் நலன்களை வழங்குதல், நிறுத்தி வைத்தல், நீக்குதல், பணியிடங்களை நீக்குதல்  அல்லது மாற்றியமைத்தல் ஆகியவற்றிற்கான அதிகாரம் அல்லது இவற்றிற்கான அதிகாரம் உடைய மேலலுவலர்க்குப் பரிந்துரைத்தல்,  தவறு அல்லது குற்றம் புரியும் பணியாளர்களை உசாவுதல் (விசாரித்தல்) தண்டித்தல், மன்னித்தல் அல்லது இவற்றிற்கான அதிகாரம் உடைய மேலலுவலர்க்குப் பரிந்துரைத்தல் ஆகியனவும் அடங்கும்.
804. Administrative Procedure	பணியாண்மை நடைமுறை   அரசு அல்லது தனியார் நிறுவனத்தின் மேலாண்மை அதிகாரங்களைச் செயற்படுத்தும் பாங்கு அலுவலக நடைமுறையாகும்.   பணியாளர் அல்லது அதிகாரி தனக்கு ஒதுக்கப்பட்ட பணிகளை அல்லது அதிகாரத்திற்கு உட்பட்ட செயல்களை நடைமுறைப்படுத்துவதையும் குறிக்கிறது.
805. Administrative Reforms Commission	பணியாண்மைச் சீர்திருத்த ஆணையம்   பணிகள், பணியாளர்களிடையே உள்ள குறைகளைக் களைதற்கும் செயற்பாடுகளைத் தரப்படுத்துதற்கும் உயர்த்துவதற்கும் அமைக்கப்படும் குழுவே பணியாண்மைச் சீர்திருத்த ஆணையம் ஆகும்.   இந்தியப் பொதுப்பணியாண்மையை மதிப்பாய்வு செய்வதற்கு முதலில் 05.01.1966 இல் பணியாண்மைச் சீர்திருத்த ஆணையம்(ப.சீ.ஆ.) அமைக்கப்பட்டது. மொரார்சி தேசாய் இதன் தலைவராக முதலில் இருந்தார். அவர் துணைத் தலைமையமைச்சராக ஆன பின்பு அனுமந்தையா இதன் தலைவரானார். 37.08.2005இல் வீரப்ப மொய்லி தலைமையில் இரண்டாவது பணியாண்மைச் சீர்திருத்த ஆணையம் அமைக்கப்பட்டது.   மாநில அரசுகள், தேர்தல் ஆணையம், தேர்வாணையம் முதலான தன்னாட்சி அமைப்புகள் தத்தம் அதிகார வரம்பிற்குட்பட் பணிகளில் சீர்திருத்தம் காணவும் தனித்தனிச் சீர்திருத்த ஆணையம் அமைக்கலாம்.   சிறைத்துறைச் சீர்திருத்த ஆணையம், காவல் துறைச் சீர்திருத்த ஆணையம் எனத் தனித்தனியே துறைகளின் பணிகளை மேம்படுத்துவதற்காகவும் பணியாண்மைச் சீர்திருத்த ஆணையங்கள் அமைக்கப்படுகின்றன.
806. Administrative Remedies	பணியாண்மைத் தீர்வுகள்   நிறுவனம், வாரியம், முகவாண்மை, ஆணையம் முதலியவற்றால் வழங்கப்படும் நீதித்துறை சாராத பணியாண்மை முறையிலான தீர்வு பணியாண்மைத் தீர்வாகும்.
807. Administrative Tribunal	பணியாண்மைத் தீர்ப்பாயம்   பணியாண்மைத் தீர்ப்பாயம் என்பது நீதித்துறை அதிகாரங்களை வழங்கிச் சட்டப்படி அமைக்கப்படும் பணியாளர்களுக்குத் தீர்வு வழங்கும் அமைப்பாகும்.   எல்லாப் பொருண்மைகளிலும் நீதிமன்றத்திற்குப் பொது அதிகார வரம்பு உள்ளது. தீர்ப்பாயம் பணித் தொகுதிச் சிக்கல்களைக் கையாளுகிறது. பணியாண்மைத் தீர்ப்பாயம் குறிப்பிட்ட சிக்கலைத் தீர்ப்பதற்கு வரம்பிற்குட்பட்ட அதிகாரம் உடையது.
808. Administrator (Also Estate Trustee)	பணியாட்சி அலுவலர்   நிருவாக அலுவலர் சட்ட உரித்தாளர் உரியர்   இறுதிமுறி இல்லாமல் இறந்த ஒருவரின் அல்லது இறுதிமுறியில் பெயர் குறிப்பிடப்பட்ட நிறைவேற்றுபவரின் சொத்துகளை பணியாட்சி /நிருவாகம் செய்ய நீதிமன்றத்தால் நியமிக்கப்படுபவர்.   பணியாட்சி /நிருவாக அலுவலர் இப்போது (காலமானவரின்) உடைமைப் பொறுப்பாளர் / சட்ட உரித்தாளர் என அழைக்கப்படுகிறார்.   இறப்பிற்குப் பின் முடிவெடுப்பதைத் தத்துவமாகக் கருதித் தத்துவகாரர் என்று அழைத்துள்ளனர்.
809. Admiralty Action	கடலாண்மை நடவடிக்கை கடல் எல்லை, பன்னாட்டு நீர்ப்பயன்பாடு, கப்பல் பயணம், மீன்பிடித்தல் முதலியவற்றைக் கையாளும் பன்னாட்டுச் சட்டத்தின் கிளை கடற்சட்டமாகும். இது தொடர்பான நடவடிக்கைகள் கடலாண்மை நடவடிக்கை ஆகும்.
810. Admiralty Court	கடலாண்மை தீர்ப்பாயம்   கடலாண்மை நீதிமன்றம் என்பது கடல்சார் தீர்ப்பாயம்/ நீதிமன்றம் (maritime court)என்றும் அழைக்கப்படுகிறது.   கடற்சட்டம், கடல், கப்பல், கடற்சட்டம் தொடர்பான வழக்குகள் மீதான பணிவரம்பு கொண்ட தீர்ப்பாயம் ஆகும். முன்பு நீதிமன்ற அமைப்பின் தனிப்பகுதியாகவே கடல்சார் தீர்ப்பாயங்கள் இருந்தன.  அப்பொழுது நீதிமன்றம் எனக் குறிப்பது பொருத்தமாக இருந்தது. இப்போது, நீதிமன்றம் எனப் பெயரில் இருந்தாலும் பணியமைப்பு அடிப்படையில் தீர்ப்பாயம் என்பது சாலப் பொருத்தமாக அமையும்.

(தொடரும்)
இலக்குவனார் திருவள்ளுவன்

சுதா சேசையன் நியமனத்தை வரவேற்கலாமே(!)- இலக்குவனார் திருவள்ளுவன்

 

  ஃஃஃ    இலக்குவனார் திருவள்ளுவன்      24 September 2024      அகரமுதல

சுதா சேசையன் நியமனத்தை வரவேற்கலாமே(!)

மரு.சுதா சேசையனைச் செம்மொழித்தமிழாய்வு மத்திய நிறுவனத்தின் துணைத்தலைவராக அமர்த்திய பொழுது செய்தி ஆசிரியர் ஒருவர் இத்தகவலைத் தெரிவித்தார். தெரிவித்தவர், “தமிழறிஞர் அல்லாத ஒருவரை எப்படி நியமிக்க முடியும்? கண்டித்து அறிக்கை வெளியிடுங்கள். வெளியிடுகிறோம்” என்றார். நான் அதற்குத், “தமிழ் தொடர்பான துறை என்றால் தமிழறிஞரல்லாதவர் அல்லது தமிழறியாதவர் அல்லது தமிழரல்லாதவரை அமர்த்துவதுதான் மரபு. இம்மரபைப் பின்பற்றி யுள்ளனர். இதில் கண்டிப்பதற்கு என்ன இருக்கிறது” என்றேன். மேலும் “இஃது ஓர் அதிகாரமில்லாத பதவி. இதை அறியாமல் அவர் வந்திருக்கலாம். இவர் வந்த பின்னராவது இப்பதவிக்கு அதிகாரம் கிடைக்கட்டுமே! எனவே, அவரை வரவேற்கலாமே!” என்றேன்.

ஆனால் நாளிதழ் ஆசிரியர் ஒருவர் இவரை வரவேற்றதுடன் நில்லாது,”தமிழைப் போலவே சமற்கிருதத்திலும், ஆங்கிலத்திலும் புரிதல் உள்ள ஒருவர்தான் அந்தப் பதவியை வகிப்பதற்குத் தகுதியானவர். என்னதான் தனித்தமிழ் குறித்துப் பேசினாலும், சமற்கிருதத்துடனான ஒப்பீட்டுப் பார்வை இல்லாமல் தமிழாய்வு என்பது முழுமை யாகாது.” எனக் குறிப்பிட்டுள்ளார்.  பூனைக் குட்டியை வெளியே விட்டுவிட்டனர்

பிற்காலத்தில் மணிப்பிரவாளம் செல்வாக்காக இருந்த பொழுது தமிழ் மட்டும் அறிந்த புலவரை அரைப்புலவர் என்று எள்ளி நகையாடினர். அதைப்போல் கொண்டு வரப் பார்க்கிறார்கள்.  மருத்துவக் கல்லூரி, சிற்பக் கல்லூரிகளில் சமற்கிருதம் பாடமாக இருந்ததை  அரும்பாடுபட்டு நீக்கிய பின் மீண்டும்  அம்முறையைக் கொண்டுவர எண்ணுகிறார்கள் போலும். தமிழறிஞர்கள் பிற எந்த மொழியையும் எத்தனை மொழியையும் அறிந்திருப்பது சிறப்பதுதான். ஆனால், செம்மொழி யல்லாத சமற்கிருதம் அறிந்தவராக இருக்க வேண்டும் என்பது தமிழுக்கு இழைக்கப்படும் அநீதியாகும். இனிச் செம்மொழி நிறுவனப் பதவிகளுக்கெல்லாம் சமற்கிருத அறிவு தேவை எனக் கொண்டு வந்தால் வியப்பதற்கில்லை. இதனை முளையிலேயே கிள்ளி எறிய வேண்டும். எனவே நாம் இக்கருத்தைக் கண்டிக்க வேண்டும்.

  மேலும் இவர்பற்றிய குறிப்புகள் எதிலும் இவர் சமற்கிருதப் புலவர் எனக் குறிப்பிட வில்லை. ஒரு வேளை இவர் சார்ந்த குலத்தின் அடிப்படையில் சமற்கிருதம் அறிந்திருப்பார் எனக் கருதி அதைப் புலமையாகக் குறிப்பிடுகிறார் போலும். ஒருவேளை இவர் சமற்கிதத்தில் புலமை மிக்கவராக இருந்தாலும் அது குறித்து நமக்குக் கவலையில்லை.

மேலும், “சங்க இலக்கியமானாலும், சமய இலக்கியமானாலும்…. … ஒருசேரப் புலமை வாய்ந்த ஒருவர் ” என்கிறார்.

இவர் சங்க இலக்கியப் புலமை மிக்கவராக எங்கும் கூறியதில்லை.  ஆன்மிக/ஆன்மீகச் சொற்பொழிவாளர் என்றுதான் கூறப்படுகிறார். அதுவும் அரசுப் பதவியில் இருந்த பொழுதே பெரும்பாலும் இவற்றிலேயே நேரத்தைச் செலவழித்தவர் என்றும் கூறப்படுகிறார். அப்படியானால் இனி, இறைநெறிச் சொற் பொழிவாளர்கள், கதைப் பொழிவாளர்கள், தொகுப்பாளர்கள் முதலானோர் தமிழ் சார்பான பணிகளுக்கு நியமிக்கப்படுவார்களோ?

 சமய இலக்கியம் என்பது கி.பி. 7 ஆம் நூற்றாண்டுதான். “கி.பி. 600க்கு முந்தைய காலத்தைச் செவ்வியல் காலமாகக் கொண்டு பண்டைத் தமிழ்க்குமுகம் பற்றிய ஆய்வுகளைச் செம்மொழித் தமிழாய்வு மத்திய நிறுவனம் மேற்கொண்டு வருகிறது” என இதன் நோக்கம் தெளிவாகக் கூறுகிறது. எனவே, செம்மொழிக் காலம் இல்லாத பிற கால இலக்கியப் புலமை குறித்துப் பேசுவதற்கே வாய்ப்பில்லை. எனவே, இவற்றைத் தகுதியாகக் கொள்ள இயலாது. சிறந்த பல் மருத்துவர் என்பதற்காகக் கண் மருத்துவம் பார்க்க அவரிடம் ஒப்படைக்க இயலாது. மரு.சுதா சேசையன் மருத்துவக் கல்வியிலும் மருத்துவப் பணியாண்மையிலும் பட்டறிவு மிக்கவர். அவர் பட்டறிவிற்கும் பணியறிவிற்கும் ஏற்ற பதவியை அளித்தால் வரவேற்கலாம். அனைத்திந்திய மருத்துவக் குழு, தேசிய மருத்துவ ஆணையம் போன்றவற்றில் பதவி வழங்கினால் மகிழலாம். அதைவிட்டு விட்டுச் செம்மொழி நிறுவனத்தில் புகுத்துவது ஏன் என்பதுதான் தமிழறிஞ்களின் கேள்வி; தமிழன்பர்களின் வருததம்.

இன்னும் சிலர் “இதன் தலைவர் முதல்வர். அவரே பாசகவிற்கு அஞ்சி வாய்மூடி அமைதி காக்கிறார். நீங்கள் ஏன் குதிக்கிறீர்கள்” எனத் தமிழன்பர்களைக் கேட்கின்றனர். அவருக்கும் சேர்த்துத்தான் தாங்கள் குரல் கொடுப்பதாகத் தமிழன்பர்கள் கூறி வருகின்றனர். அண்ணா பல்கலைக் கழகத்தில் கீதையைப் புகுத்தியதுபோல் கல்வித்துறைகளில் வரணாசிரமத்தை – சனாதனத்தை – புகுத்தி வருவதுபோல் தமிழாய்வு நிறுவனம் மூலம் இவற்றைப் புகுத்துவதே ஒன்றிய அரசின் நோக்கம் என்கின்றனர். இதை நாம் மறுப்பற்கில்லை. எனவேதான்  தமிழாய்வு நிறுவனத்திற்குச் சமற்கிருதப்புலமை அறிந்தவர் இருப்பதே சிறப்பு என்று குரல் எழுகிறது.

இந்தியாவில் 18 சமற்கிருதப் பல்கலைக் கழகங்கள் உள்ளன. உலகெங்கும் ஒன்றிய அரசு பல்வேறு சமற்கிருத அமைப்புகளை நடத்துகின்றது. இவற்றிலெல்லாம் உலகின் மூத்த செம்மொழியான தமிழ் அறிந்தவர் அமர்த்தப்பட வேண்டும் என்று குரல் கொடுத்தால் இவரின் நாணயத்தைப் பாராட்டலாம். அவ்வாறில்லாமல் தமிழ் நிறுவனங்களில் மட்டும் சமற்கிருதம் வேண்டும் என்பது தமிழுக்கு இழைக்கப்படும் அநீதியே!

பிற அமைப்புகள் போல் இந்நிறுவனத்தின் அதிகாரம் மிக்க அமைப்பு ஆட்சிக் குழுதான். இதில் இவரைத் துணைத்தலைவராகச் சேர்த்திருப்பதன் மூலம் துணைத் தலைவர் பதவியை அதிகாரம் மிக்க பதவியாக மாற்றி அதன் மூலம் சமற்கிருதத்தைத் தமிழுக்கு மேம்பட்டதாக அறிவிக்கச் செய்யச் சதி நடப்பதாக உணர்வதால் இது கண்டிக்கத்தக்கதே! எனவே, இவரின் நியமனமும் கண்டனத்திற்குரியதே கண்டனத்திற்குரியதே!

என்றும் ஒருவுதல் வேண்டும் புகழொடு

நன்றி பயவா வினை.   (திருவள்ளுவர், திருக்குறள், ௬௱௫௰௨ – 652)

இலக்குவனார் திருவள்ளுவன்

தலைவர்

தமிழ்க்காப்புக் கழகம்

சட்டச் சொற்கள் விளக்கம் 791-800 : இலக்குவனார் திருவள்ளுவன்

 

    ஃஃஃ   இலக்குவனார் திருவள்ளுவன்      23 September 2024      அகரமுதல

(சட்டச் சொற்கள் விளக்கம் 781-790 : இலக்குவனார் திருவள்ளுவன்- தொடர்ச்சி)

சட்டச் சொற்கள் விளக்கம் 791-800

791. Administration Bond	பணியாட்சிப் பத்திரம் பிணை முறி விண்ணப்பத்தில் வழங்கப்பட்ட அல்லது நீதிமன்றத்தில் அளிக்கப்பட்ட சொத்துரிமை விண்ணப்பத்தில் நீதிபதியால் கோரப்பட்ட பிணையர்கள் உறுதிமொழி. உடைமையின் பணியாட்சியரால்,  விருப்புறுதி/இறுதி முறிக்கேற்பச் செயற்படுவதற்கான உறுதி மொழி அளிக்கும் பத்திரம். – இந்திய மரபுரியமையர் சட்டம் 1925(Indian Succession Act, 1925)
792. Administration Of Justice	நீதிப் பணியாண்மை   நீதிப் பணியாண்மை என்பது அரசின் முதன்மைச் செயல்பாடாகும். இது பொதுவாக உரிமையியல் நீதிமன்றப் பணியாண்மை, குற்றவழக்கு நீதிமன்றப் பணியாண்மை என இரு வகையாகப் பிரிக்கப் பட்டுள்ளது.   குற்றவழக்கு நீதிப் பணியாண்மை என்பது, தவறு செய்தவர்களைத் தண்டிப்பது. குற்றவாளிகளைத் தண்டிப்பது அரசுதான்.
793. Administration Suits	பணியாண்மை வழக்குகள்.   பணியாண்மையால் ஏற்படும் சிக்கல்கள், பாதிப்புகள், தீய விளைவுகள், கேடுகள் தொடர்பான அல்லது அவற்றிற்கு எதிரான வழக்குகள்.
794. Administration, Letters Of	பணியாண்மை ஆவணங்கள்.   letter  என்பது பொதுவாக மடலைக் குறித்தாலும், நடைமுறையில் எழுதப்பட்டுள்ள எதையும் குறிக்கும். எனவே, இந்த இடத்தில் ஆவணம் என்று பொருள்படும். சிலர் பத்திரம் என்பர். பொறுப்பு அமர்த்தல் ஆணையைப் பத்திரம் எனச் சொல்வதைவிட ஆவணம் என்பது பொதுவானதாக அமையும். விருப்புறுதியாளரின் இறுதி முறி அல்லது விருப்ப முறி இல்லாத பொழுது, அவருடைய சொத்தின் பணியாண்மைப் பொறுப்பை ஏற்பதற்கு அல்லது அதனைக் கையகப்படுத்துவதற்கு அல்லது அதனை முடிவு கட்டுவதற்கு குறிப்பிட்ட ஒருவரை அமர்த்தும் சட்ட முறையான ஆவணம்.
795. Administrative Adjudication	பணியாட்சித் தீர்ப்பு நிருவாக நீதிமுறைத் தீர்மானிப்பு துறைக்குள்ளேயே பகுதி நீதித்துறைபோல் செயல்பட்டு  உசாவல் மேற்கொண்டு அளிக்கப்படும் தீர்ப்பு. வருவாய்த்துறை, பத்திரப்பதிவுத்துறை, அறநிலையத்துறை முதலான பல துறைகளில்  துறையுடன் பிணக்கு உள்ள பொதுமக்களுக்கும்  பொதுவாகத் துறைகளில் துறைப்பணியாளர்களின் ஒழுங்கு நடவடிக்கைகளில் அந்தந்தத் துறைத்தலைமையும் உசாவித் தீர்ப்பளிக்கின்றன. பல்வேறு மாநிலங்களும் ஒன்றிய அரசும் பணியாட்சித் தீர்ப்பிற்கென் தீர்ப்பாயங்கள் வைத்துள்ளன. இந்திய அரசு, பணியாளர்கள் பொதுக் குறைகள் ஓய்வூதிய அமைச்சகம், பணியாளர் – பயிற்சித் துறை, பணியாட்சித் தீர்ப்பாயங்கள் சட்டம் 1985 (மத்திய சட்டம் 13/1985) கீழ் 12.12.1988 முதல் தமிழ்நாடு மாநிலத் தீர்ப்பாயம் செயல்பட்டது.  சில ஆண்டுகளில் தமிழ்நாட்டரசின் பரிந்துரைக்கிணங்கக் கலைக்கப்பட்டது.
796. Administrative Body	பணியாண்மைக் குழாம்   பணியாளுமையை மேற்கொள்ளும் பணியாளர், அலுவலர் தொகுதி.   உள்நாட்டு/வெளிநாட்டு/தேசிய/கூட்டாட்சி/மாகாண/மாநில/நகராட்சி/ பிற உள்ளாட்சிகள்/ அல்லது ஒழுங்குமுறை அமைப்பு, மற்றும் எந்த ஒருகோட்டம்/பிரிவு/ முகவாண்மை/ அமைச்சு/ ஆணையம்/ வாரியம் அல்லது அதிகாரத்துவம் அல்லது அரசு சார் அமைப்பு அல்லது தனியார் அமைப்பு அல்லது பன்னாட்டு நீதி மன்றம்/நீதித்துறை அதிகார அமைப்பு/ தீர்ப்பாயம்/பணியாண்மை நீதிமன்றம்/ ஆணையம்/கழகம்/நிறுவனம் அல்லது முற்கூறியவற்றின் கீழ்ச் செயல்படும் அமைப்பின் அலுவலகத்தை நடத்தும் குழு.   அலுவலக ஆட்சியைக் கவனிப்பதைப் பணியாட்சி என முதலில் குறித்திருந்தேன். மேலாண்மை என்பதுபோல் பணியாண்மை என்பது ஏற்றதாக இருக்கும் என்பதால் பணியாண்மை எனக் குறித்துள்ளேன்.   நிருவாக அமைப்பு என்பர். நிருவாகம் என்பதைவிடத் தமிழ்ச்சொல்லான பணியாண்மையே ஏற்ற சொல்லாகும்.  பணியாண்மையிலேயே அமைப்பு முறையும் அடங்கி விடுகிறது. எனவே, தனியாக அமைப்பு என்று சொல்ல வேண்டா. Body என்பதற்குப் பல பொருள்கள் உள்ளன. அமைப்பினைச் செயற்படுத்தும் குழுவைக் குறிப்பதால் பணியாண்மைக் குழு எனலாம்.
797. Administrative Decision	பணியாண்மை முடிவு   பணியாண்மை முடிவு என்பது, உள்ளூர் அரசாங்க மேம்பாட்டு விதிமுறைகளில் குறிப்பிடப்பட்டுள்ள விவரங்களைத் தீர்மானித்தல், புறநிலைத் தரங்களைப் பயன்படுத்துதல், ஆகியவற்றை உள்ளடக்கிய வளர்ச்சி விதிமுறைகளைச் செயற்படுத்துதல், பணியாண்மை செய்தல் அல்லது நடைமுறைப்படுத்தல் ஆகியவற்றில் எடுக்கப்பட்ட முடிவுகள் ஆகும்.
798. Administrative Discretion	பணியாண்மை உளத்தேர்வு   பணியாண்மையில் முடிவெடுக்கும் அதிகாரம் உடையவர் கொண்டுள்ள பணியாண்மை உளத்தேர்வு உரிமை ஆகும்.   முடிவெடுக்க ஒருவருக்கு இருக்கும் அளிக்கப்படும் உரிமையும் அதிகாரமும் பொதுவாக விருப்புரிமை அல்லது தன் விருப்புரிமை எனப்படுகிறது. விருப்பு வெறுப்பற்று ஆராய்ந்து வழங்கப்பட வேண்டிய தீர்ப்பை விருப்பின் அடிப்படையில் வழங்குவதாகக் கூறுவது சரியாக அமையாது. தீர்ப்புரிமை என்பது பொதுவான சொல்லாக அமையும்.   தனக்கு ஏற்றதாகக் கருதப்படுவதைத் தெரிவிக்கும் உரிமை என்ற பொருளில் தனக்கேற்புமை என்கின்றனர். இதனையே தன் மனம் / உள்ளம் தேர்ந்தெடுக்கும் முடிவினை அறிவிப்பதால் மனத்தேர்வு/ உளத்தேர்வு என்கின்றனர்.   இருவகையில் எவ்வகை முடிவு சரி எனத் தெளிவு இல்லாத பொழுது மனம் தேர்ந்தெடுக்கும் கருத்தினைத் தெரிவிக்கும் உரிமை அடிப்படையில் தீர்ப்பு வழங்குவது சட்ட முறையான ஒன்றாகும்.
799. Administrative Finality	பணியாண்மை அறுதி முடிவு   பணியாண்மையில் மேற்கொண்டு முடிவு எடுக்கவோ கருத்து தெரிவிக்கவோ வழியில்லா நிலையில் எடுக்கப்படும் இறுதி முடிவாகும்.
800. Administrative Law	பணியாண்மைச் சட்டம்   பணியாண்மைச் சட்டம் என்பது, அரசின் பணியாண்மை நிறுவனங்களின் செயற்பாடுகளை ஒழுங்குபடுத்தும் சட்ட அமைப்பு ஆகும்.   செயலாண்மையால் அல்லது இதன் துணை அமைப்புகளால் செயற்படுத்தப்படும் முறைகேடான அதிகாரப்  பயன்பாட்டிலிருந்து பொதுமக்களைப் பாதுகாப்பதற்கும் செயன்மை(நிறைவேற்று) அதிகாரத்தை ஒழுங்கமைப்பதற்கும் பணியாண்மைச் சட்டம் உறுதுணையாய் அமைகிறது.

(தொடரும்)
இலக்குவனார் திருவள்ளுவன்