மாற்றுப் பொருள் சொற்கள் 2/2 இலக்குவனார் திருவள்ளுவன்

ஃஃஃ      இலக்குவனார் திருவள்ளுவன்      31 October 2026      அகரமுதல

(மாற்றுப் பொருள் சொற்கள்  1/2 )

மாற்றுப் பொருள் சொற்கள்  2/2

மாற்றுப் பொருள் சொற்கள்  2/2

1. Acid test – கடுந்தேர்வு

Acid  – காடி, காடித்தன்மை, காடிப்பொருள், புளியம், புளிப்பு, அமிலம், புளிமம், அமிலத்தன்மை, புளிப்புத் திராவகம், தீநீர் முதலிய பல பொருள்கள் உள்ளன. எனினும் இவை நீதித்துறையில் Acid test என்னும் பொழுது பொருந்தா.

புளிம ஆய்வு, எரிம ஆய்வு , எரிமச்சோதனை என்பன நேர் பொருளாக இருந்தாலும் இந்த இடத்தில் பொருந்தாது. அக்கினிப் பரீட்சை எனச் சொல்வது இதற்குப் பொருந்தும். ஆனால் அக்கினி தமிழ்ச்சொல்லல்ல. எனவே,  கடுமையான தேர்வைக் குறிக்கும் இதனைக் கடுந்தேர்வு என்பதே சரியாகும்.

5.         Case – வழக்கு, நோய்வு    

 நீதித்துறையில், Case diary -வழக்குக் குறிப்பேடு > வழக்கேடு;

Case stated      வழக்கு விவர உரை; கூறப்பட்ட வழக்கு (மற்றொரு நீதிமன்றத்தின் கருத்தைக் கூறக்கேட்டல்)

என்பனபோல் பயன்பெறுகிறது. ஆனால் மருத்துவத்துறையில்  நோயாளியின் Case ஐக் குறிக்கையில் வழக்கு என்பது பொருந்தாது. நேர்வு என்னும் சொல்லும் பொருந்தாது. இங்கே நோயின் தன்மை முதலியனவே குறிக்கப் பெறுவதால்  நோய்வு எனலாம்.

Case sheet      நோய்‌ விவரக்‌ குறிப்புத்தாள்‌;

நோய்வுக்‌ குறிப்புத்தாள்‌; நோய்வுக் குறிப்பி; என்றும்

நீதித்துறையில்

வழக்கு விவரக் குறிப்புத் தாள்  வழக்குக் குறிப்பி; என்றும் குறிக்கலாம்.

            6. Caveator – தடையீட்டாளர்

            கவனமாயிரு, விழிப்பாயிரு, எச்சரிக்கையாயிரு என்னும் பொருள்கள் கொண்ட caveō என்னும்இலத்தீன் சொல்லில் இருந்து caveat உருவானது. இச்செயலுக்குரியவர் Caveator – முன்னெச்சரிப்பு மனுதாக்கல்‌ செய்பவர்‌ எனக் குறிக்கப்பெறுகிறது. இத்தகைய நெடுந்தொடர் சொல்லைக் குறித்தால் அயற்சொல்லே எளிய பயன்பாடாக இருக்கும் எனக் கருதி, கேவியேட்டர் என்றே பயன்படுத்துவர். சிலர் கேவேட்டர் என்றே குறிக்கின்றனர்.  எனவே சுருங்கிய தமிழ்ச்சொல்லையே பயன்படுத்த வேண்டும்.

நீதிமன்றத்தில் ஒருவர் தொடர்பில் அல்லது அவருக்கு எதிராக மற்றொருவர் வழக்கு தொடுக்கவோ விண்ணப்பம் அளிக்கவோ செய்யலாம்.  அதனால் தனக்குத் தீங்கு ஏற்படும் என அஞ்சி  முன் எச்சரிக்கையாக இவ்வழக்கு விவரம் தனக்குத் தெரியாமல் தொடரவோ முடிக்கவோ கூடாது என்பதற்காக எச்சரிக்கையாகத் தன் கருத்தைக் கேட்காமல் முடிவெடுக்கக் கூடாது என்று உரியவர் நீதி மன்றத்தில் விண்ணப்பிக்கலாம். இவ்வாறு விண்ணப்பிப்பதையே கேவியட் என்கின்றனர். இவ்வாறு விண்ணப்பிப்பவர் கேவியேட்டர் எனப்படுகிறார். இத்தகைய எச்சரிக்கை விண்ணப்பம் ஒரு வகையில் வழக்கைத் தடுப்பதே. எனவே,  தடைகோரும் விண்ணப்பதைத் தடையீடு என்றும் அவ்வாறு கோருநரைத் தடையீட்டாளர் என்றும் சொல்லலாம்.

7. Service- சேர்ப்பு

Service என்றால்,

சேவகம்,சேவுகம், தன்னலம் கருதாமல் ஆதாயம் எதிர்பாராமல் ஒன்றின் நன்மைக்காக அல்லது வளர்ச்சி போன்றவற்றிற்காகச் செய்யும் பணி, தரப்படும் பொறுப்பை ஊதியம் பெற்று நிறைவேற்றுவது, அரசு நிறுவனத்தில் பணியாற்றும் காலம், பணிக்காலம், உணவு மேசைக்கலன், ஆணைகளுக்குக் கீழ்ப்படியும் நிலை, பணி, பணித் தொகுதி, எந்திரப் பொறி சீராக்கம், சேவை, இனப்புணர்ச்சி, தொண்டு, ஊழியம், அடித்தெறிதல், செம்பணி, வழங்கல், தொண்டு; வசதி; பொதுப்பயன், பணியம், விற்பனை, வசதி, பொதுப்பயன், ஆவணம், அகம்படித்தொண்டு, பத்தி, சேடியம், கைங்கரியம், ஏவல், தொண்டுதுரவு, பண், கயிங்கரியம், குடிமைப்பாடு, சீராக்கம்,பண்டுகம், திருப்பணி, குற்றேவல் முதலிய பல பொருள்கள் உள்ளன.

நீதித்துறையில் அழைப்பாணை அல்லது பிற வழக்காவணம் ஒருவரிடம் சேர்க்கப்படுவதை Service என்கின்றனர். அஃதாவது நீதிமன்றத்தில் உரிய ஆவணம் உரியவரிடம் சேர்க்கப்படுவதையே இது குறிக்கிறது. எனவே சேர்ப்பு எனலாம்.

நீதி மன்றத்தில் என்று மட்டுமல்லாமல், பொதுவாக ஓர் அலுவலகத்திலிருந்து மடல், ஆணை, அறிவிக்கை அல்லது பிற அலுவலாவணத்தை உரியவருக்குச் சேர்ப்பதைச் சார்வு என்பர். எடுத்துக் காட்டாக,

service by post : அஞ்சல்வழிச் சார்வு

எனினும்

dependency : சார்வு எனப்படுவதால் இங்கே தவிர்க்கப்பட்டுள்ளது. ஆதலின் சேர்ப்பு என்பதே ஏற்றதாகக் கருதப்படுகிறது.

8. Prescription – துய்ப்புரிமை

prescription என்றால் பெரும்பான்மை மருத்துவர் எழுதித்தரும் மருத்துவக் குறிப்பு என்றே கருதுவதால் அப்பொருளில் சில அகராதிகளில் இடம் பெற்றுள்ளது. இந்த இடத்தில் அது பொருந்தாது.

இந்தியத் துய்ப்புரிமைச் சட்டம் 1882, பிரிவு 15(S. 15 IEA,1882), பிரிவு4(2) இந்திய மீன்பிடிச் சட்டம், 1897 ஆகியவற்றில் இது குறிக்கப்பெறுகிறது.

prescription என்பதற்கு மருந்துப் பரிந்துரைச் சீட்டு, மருந்துச்சீட்டு, அனுபோகஇழப்பு, மருந்து மருத்துவக் குறிப்பு, மருந்துக்குறிப்பு, மருந்து அறிவுரை, மருந்தெழுதித்தருதல், நோய் தீர் மருந்தறிதல், புரவரைவு, மருந்துநியமம், வழக்கமுறைமை, நோய்மருந்தளவு நீடனுபோக உரிமை,நீடனுபோகம், அறிவுரை, விதிப்புரை,  மரவெட்டல் செயல்பாட்டுக் குறிப்பு எனப் பல பொருள்கள் உள்ளன. இவற்றுள் அனுபோக உரிமை என்பதே சட்டப் பயன்பாட்டிற்குரியது. அனுபோகம் என்பதன் தமிழ்ச்சாெல் துய்ப்பு என்பதாகும்.

நீண்ட காலத் துய்ப்புரிமை அடிப்படையில் சொத்தினை அல்லது சொத்துமீதான சில உரிமைகளை அடைதலையே குறிக்கிறது.  எனவே,

prescription – துய்ப்புரிமை

எனலாம்.

இவ்வாறு பொதுவாக இயல்பான நேர்வில் ஒரு சொல் தரக்கூடிய பொருள், தான் பயன்படும் இடத்திற்கு அல்லது துறைக்கு ஏற்ப வேறு பொருளில் வழங்கப்படுவதே வழக்கமாகும். இத்தகைய மாற்றுப் பொருள் சொற்களை அறிந்து உரிய இடங்களில் பயன்படுத்த வேண்டும். இவ்வாறு கையாளும்  பொழுது நீண்ட சொல்லாக இல்லாமலோ அயற்சொல்லாக இல்லாமலோ கிரந்த எழுத்தைப் பயன்படுத்தாமலோ தமிழ்ச்சொல்லையே நாம் பயன்படுத்த வேண்டும். இப்பணிகளில் ஈடுபடுவோர் மிகக் குறைவாக உள்ளனர். எனவே, இததகைய கருத்தரங்கங்கள் மிகுதியாக நடைபெற்று எந்தத் அயற்சொல்லுக்கும் ஏற்ற தமிழ்ச்சொல் இ்லை என்ற அவலநிலை இல்லாமல் தமிழ்ச்சொல் வளத்தைப் பெருக்க வேண்டும்.

துறைதோறும் மாற்றுப் பொருள் சொற்களைப் பெருக்குவோம்! தமிழ்ச்சொற்களஞ்சியத்தைச் சிறப்பிப்போம்!

– இலக்குவனார் திருவள்ளுவன்

thiru2050@gmail.com

தமிழ் இணையம் 2003

திருக்குறளில் பதவி மேலாண்மை 2/2 – இலக்குவனார் திருவள்ளுவன்

ஃஃஃ    இலக்குவனார் திருவள்ளுவன்      31 October 2026      அகரமுதல

(திருக்குறளில் பதவி மேலாண்மை 1/2 தொடர்ச்சி)

திருக்குறளில் பதவி மேலாண்மை 2/2

உள்ளியது எய்தல் எளிதுமன் மற்றுந்தான்

உள்ளியது உள்ளப் பெறின்.   (திருக்குறள், ௫௱௪௰ – 540)

என்கிறார் திருவள்ளுவர். எண்ணியதையே எண்ணி எண்ணத்தை ஒருமுகப்படுத்துவதன் மூலம் எண்ணத்தை நிறைவேற்றுவது எளிது என்கிறார் திருவள்ளுவர்

அறம்பொருள் இன்பம் உயிர்அச்சம் நான்கின்

திறம்தெரிந்து தேறப் படும்

ஒருவரைப் பதவியில் அமர்த்தும்போது, அறங்களை மதித்து நடப்பவனா, நல்வழியில் பொருள் சம்பாதித்து வாழ்க்கை நடத்துகிறவனா, குற்றமான இன்பங்களை விரும்பாதவனா, சமயம் நேர்ந்தால் உயிருக்கு அஞ்சாமல் உதவக் கூடியவனா என்ற நான்கையும் விவரமாக அறிந்து கொண்ட பிறகே ஒருவனை நம்ப வேண்டும் என்கிறார் திருவள்ளுவர். (தெரிந்து தெளிதல், குறள் எண்: ௫௱௧ – 501)

ஒரு பதவியாளர் தான் வகிக்கும் பதவி தொடர்பான முதிர்ந்த பட்டறிவை உடையவர் துணையைக் கொள்ள வேண்டும். பதவியாளர் சிறப்பாகச் செயற்பட வினைத்திட்பம் உடையவராக இருக்க வேண்டும்.

பதவி மேலாண்மை குறித்த திருக்குறள்களை விளக்கினால் பக்கங்கள் கூடும். எனவே, ஓரிரு தொடர்களில் சுருக்கமாக அவற்றைப் பார்ப்போம்.

திருவள்ளுவர் உணர்த்தும் பதவி மேலாண்மைக் கருத்துகள்.

வினையுறுதி ஆகிய மனத்திண்மை தேவை. (௬௱௬௰௧ – 661)  

பதவிப்பொறுப்பில் செயற்படுத்தும்போது ஏற்படும் இடையூறுகளை முன்பே அறிந்து நீக்கும் திறமை தேவை. (௬௱௬௰௨ – 662)

செயலை இடையில் நிறுத்துவது பதவிக்கு அழகல்ல. (௬௱௬௰௩ – 663)

இப்படிச் செய்யலாம் எனச் சொல்வதை விட சொல்லிய வண்ணம் செய்து முடிக்கும் திறனே பதவியாளர்க்குத் தேவை. (௬௱௬௰௪ – 664)

செயற்பாட்டில் ஊறு நேரும்பொழுது அதனை அழிக்கும் வெல்லும் திறன் பதவியாளர்க்குத் தேவை. (௬௱௬௰௫ – 665) எண்ணியதை எண்ணியவாறு அடையக்கூடிய திறமை தேவை. (௬௱௬௰௬ – 666)

தோற்றம் கண்டு எடைபோடாமல் உண்மையான வினைத்திட்ப முடையாரை அறிந்து பயன்படுத்த வேண்டும். (௬௱௬௰௭ – 667)

மனம் தெளிந்து செய்வதாக மேற்கொண்ட செயலின்கண் தளர்ச்சியின்றிக் காலத்தாழ்வை நீக்கிச் செய்க என்கிறது.(௬௱௬௰௮ – 668)

துன்பம் நேரும்பொழுது உறுதியாக எதிர்த்துப் பணியாற்றி முடிவில் இன்பம் அடையச் செய்ய வேண்டும். (௬௱௬௰௯ – 669)

செயலில் உறுதிப்பாடு இருக்க வேண்டும். (௬௱௭௰ – 670)

ஒரு செயலில் ஈடுபட முடிவெடுக்கும்போது அச்செயலால் விளையும் சாதக பாதகங்கள் பற்றிய ஆராய்ச்சி யறிவும் முடிவெடுத்த பிறகு காலந்தாழ்த்தாது அச்செயலில் இறங்கும் இயல்பும் இருக்க வேண்டும். (௬௱௭௰௧ – 671)

காலந்தாழ்த்தி முடிக்க வேண்டியவற்றைக் காலந்தாழ்த்தியும் உடனே செய்ய வேண்டிய செயலை உடனேயும் செய்யும் திறமை வேண்டும். (௬௱௭௰௨ – 672)

ஒரு செயலை இயல்பாகச் செய்ய முடியாதபோது, அதை முடிப்பதற்குரிய வழி வகைகளை ஆராய்ந்து செய்யும் திறன் வேண்டும். (௬௱௭௰௩ – 673)

ஒரு செயலை அரைகுறையாக விட்டுவிடக்கூடாது. முற்றிலும் நிறைவேற்றும் பண்பு வேண்டும். (௬௱௭௰௪ – 674)

ஒரு செயலில் ஈடுபடுவதற்கு முன்பு, அதற்குத் தேவையான பொருள், ஏற்ற கருவி, காலம், மேற்கொள்ளப் போகும் செயல்முறை, உகந்த இடம் ஆகிய ஐந்தையும் குறையில்லாமல் பார்த்துக் கொள்ளும் திறமை வேண்டும்.(௬௱௭௰௫ – 675)

ஒரு செயலைச் செய்வதற்கு அது முடிவதற்கான முயற்சி, இடையில் வரும் தடை, முடிவில் அடையும் பெரும்பயன் ஆகியவற்றை ஆராயும் அறிவு வேண்டும். (௬௱௭௰௬ – 676)

 ஒரு செயல் குறித்து முழுமையாக உணர்ந்தவனின் கருத்தினை முதலில் அறிந்து கொண்டே அச்செயலில் ஈடுபட வேண்டும். (௬௱௭௰௭ – 677)

ஒரு செயலில் ஈடுபடும்போது அது தொடர்பான மற்றொரு செயலிலும் ஈடுபடும் திறமை வேண்டும். (௬௱௭௰௮ – 678)

செயலில் ஈடுபடும் முன் அதனால் வரும் இழப்பு,ஆக்கம், நீண்ட கால ஆதாயம் இவற்றை எண்ணித் திட்டமிட வேண்டும். (௪௱௬௰௧ – 461) செயலை எளிதாகச் செய்ய பதவித் தொழிலுக்குரிய அறிஞர்களின் துணையைக் கொள்ள வேண்டும். (௪௱௬௰௨ – 462)

ஆதாயம் வருவதாகக் கருதி முதலுக்கே தீங்கு நேரும் செயலில் இறங்கக் கூடாது. (௪௱௬௰௩ – 463)

இழிவும் களங்கமும் தரும் செயலில் இறங்கக் கூடாது. (௪௱௬௰௪ – 464). எதிர் அணியினரை நிலைபெறச் செய்யும் வகையில் முன்னேற்பாடுகளை ஆராயாமல் செயலில் இறங்கக் கூடாது. (௪௱௬௰௫ – 465)

கேடு விளையும் வண்ணம் செய்யத்தக்கவற்றைச் செய்யாமலும் செய்யத் தகாதவற்றைச் செய்தும் பணியாற்றக் கூடாது. (௪௱௬௰௬ – 466)

 இறங்கியபின் சிந்திக்கலாம் என எண்ணாமல் நன்கு சிந்தித்து முடிவெடுத்த பின்பே செயலில் இறங்க வேண்டும். (௪௱௬௰௭ – 467)

முடிக்கும் வழியறியாமல் செயலில் இறங்கக் கூடாது. (௪௱௬௰௮ – 468)முறையறிந்து மேற்கொள்ளாத முயற்சியில் இறங்கக் கூடாது. (௪௱௬௰௯ – 469)

இகழ்ச்சி வராதபடிச் சிந்தித்தே செயலாற்ற வேண்டும். (௪௱௭௰ – 470)

செயற்கரிய செயல் எனச் சோர்ந்து விடாமல் முயன்று பெருமை காண வேண்டும். (௬௱௰௧ – 611)

எந்தச் செயலாக இருந்தாலும் முழுமையாக முடிக்க வேண்டும். (௬௱௰௨ – 612)

மனையிலும் பணியிலும் உடனிருப்போர் துயர்துடைக்கும் தூணாக இருக்க வேண்டும்.  (௬௱௰௩ – 613) சிறப்பான செயற்பாடுகள் அமைய முயற்சி மேற்கொள்ள வேண்டும்.( (௬௱௰௪ – 614)

ஊழையும் தோல்வியடையச் செய்யும் வகையில் தளராமல் முயல வேண்டும். (௬௱௨௰ – 620) அஞ்சாமையைத் துணையாகக் கொண்டு, செயலுக்குரிய வழி முறைகளைக் குறையின்றிச் சிந்தித்துச் செய்ய வேண்டும். (௪௱௯௰௭ – 497)

இவ்வாறாகத் தெய்வப்புலவர் திருவள்ளுவர் மக்கட் பணியாற்றுவதற்குரிய பதவிகளில் அமர்வோர் பின்பற்ற வேண்டிய மேலாண்மைக் கருத்துகளை இன்றைக்கும் பொருந்தும் வகையில் திறம்படக் கூறியுள்ளார்.

– இலக்குவனார் திருவள்ளுவன்

thiru2050@gmail.com  98844 81652

வள்ளுவர் கோட்டத் திருக்குறள் உயராய்வரங்கு

மாற்றுப் பொருள் சொற்கள் 1/2 இலக்குவனார் திருவள்ளுவன்

ஃஃஃ   இலக்குவனார் திருவள்ளுவன்      30 October 2026      அகரமுதல

மாற்றுப் பொருள் சொற்கள்  1/2

கலைச்சொற்கள், துறைச்சொற்கள், தொழில் நுட்பச்சொற்கள், சிறப்புச் சொற்கள் என்றெல்லாம் சொல்கிறோம். ஆனால், கலைச்சொல் என்று எந்த ஓர் சொல்லும் இல்லை. ஒரு சொல் பயன்படும் இடத்திற்கேற்பக் கலைச்சொல்லாகவோ துறைச்சொல்லாகவோ சிறப்புச் சொல்லாகவோ திகழ்ந்து அதற்கேற்ற பொருளைத் தருகிறது. எனவேதான், கலைச்சொல் என்று குறிப்பிடவில்லை.

உவமைக் கவிஞர் சுரதாவின் ‘தமிழ்ச் சொல்லாக்கம்’ நூலில் இதழகள், நூல்கள் பலவற்றில் இடம் பெற்றுள்ள அயற்சொற்களுக்கு மாற்றான தமிழ்ச்சொற்களைத்தொகுத்துத் தந்துள்ளா். இந்நூலின் பதிப்புரையில், வெள்ளையாம்பட்டு சுந்தரம், “சொல், மொழிமாற்றம் பெற்ற சுவடுகளை அடையாளங்காட்டும் அரிய தொகுப்பு” எனக் குறிப்பிட்டிருப்பார். இவற்றின் அடிப்படையில்  இயல்பான சொல் ஒன்று  குறிப்பிட்ட இடத்தில் அல்லது துறையில் வேறு பொருளில் பயன்படுத்தப்படுவதைக் கலைச்சொல் எனக் குறிப்பதைவிடப் பொருள் மாற்றச் சொற்கள் எனலாம். இவற்றையே மாற்றுப் பொருள் சொற்கள் என இங்கே குறித்துள் ளோம்.

ஒரு சொல்லின் பல்வேறு பொருள்களையும் துறைச்சொல்லாகப் பயன்படும்  இடத்தில் உள்ள மாற்றுப் பொருளையும் விளக்குவதே இக்கட்டுரை. இதற்குச் சான்றாகச் சட்டத்துறையில் பயன்படுத்தப்படும் சில சொற்கள் எடுத்தாளப்படுகின்றன.

1. Instrument – காவணம்

instrument என்றால் பொதுவாகக் கருவி என்றே நாம் கருதுகிறோம். அதற்கு வேறு பொருள்களும் உள்ளன. ஆட்சியியல், வேதியியல், பொறியியல், வங்கியியல், மனையியல், இயற்பியல், கால்நடை அறிவியல், முதலிய துறைகளில் கருவி என்றே குறிக்கின்றனர். மனையியலில் அளவுக்கருவி என்கின்றனர். கால்நடை அறிவியலில் ஆயுதம் என்கின்றனர். ஆட்சித்துறையில் செயற்கருவி என்று குறிக்கின்றனர். வங்கியியலிலும், சட்டத்துறையிலும் முறையாவணம் என்கின்றனர்.

மேலும், துணைக்கலம், துணைப்பொருள், கருவியாக உதவும் சாதனம், கருவியாககப் பயன்படுபவர், கையாள், இசைக்கருவி, இசையொலி எழுப்பும் சாதனம், ஒப்பந்தப்பத்திரம், பதிவேடு, பத்திரம், (வினை) இசைக்கருவிக்குரிய பாடற்பகுதி அமை ஆவணம், இயங்கு கருவி, இயந்திரம், கருவி, துணைக்கருவி, சாசனம், கருவியாகப் பயன்படுதல், உபகரணம்;, இயற்றனம், முட்டு, வித்து, கதி, இரும்பு, துப்பு, ஆயுதம், கரணம், படை, இயற்கை, எத்தனம், உடல், கருவிக்கருத்தன், ஆய்தம், எலிவாலரம் எனப் பல பொருள்கள் பயன்பாட்டில் உள்ளன.

சட்டத்துறையில் சிலர் தவறுதலாகக் கருவி என்றே குறிக்கின்றனர். இணைய வழி மொழிபெயர்ப்பிலும் அவ்வாறே வருகிறது. 

எழுதப்பட்ட சட்டமுறைப் பதிவே ஆவணமாகும். இது சட்டப்பூர்வமாக செயல்படுத்தக்கூடிய செயல்கள் அல்லது ஒப்பந்தங்களின் முறையான நிறைவேற்றத்தைப் பதிவு செய்கிறது. மேலும் அவற்றுடன் தொடர்புடைய சட்ட உரிமைகள், கடமைகள், சட்டப்பிணைப்புகளைப் பாதுகாக்கிறது. ஒப்பந்தங்கள், விருப்பமுறிகள், உறுதிமொழிப் பத்திரங்கள், ஆவணங்கள், பத்திரங்கள், தகுதிவாய்ந்த சட்டமன்றங்களால் நிறைவேற்றப்பட்ட சட்டங்கள் ஆகியவை சட்ட ஆவணங்களுக்கு எடுத்துக்காட்டுகளாகும்.

Deed – ஆவணம் என்கிறோம். எனவே instrument- ஆவணம் என்பதில் குழப்பம் ஏற்படும். இதனை முறையாவணம் என்கின்றர் சிலர். அதுபோல் முறைமையம் எனலாம்; அஃதாவது சட்டமுறைமைப்படியான ஆவணம் என்பதால் முறைமையாவணம் எனலாமா எனக் கருதிப் பார்த்தேன். நீளமாகவும் இரு சொல்லாகவும் உள்ளது. சுருக்கமாக முறைமையம் எனலாமா என்றும் கருதிப் பார்தேன். முறையாக இருக்க வேண்டிய பிறவற்றையும் இச்சொல் குறிக்கும்.

 கடைத்தெரு, பந்தல், புனர்பூச நட்சத்திரம் முதலிய பொருள்களையுடைய ஆவணம் என்னும் சொல் காவணம் என்னும் சொல்லில் இருந்துதான் வந்தது. காத்தற்குரிய ஆவணம் காவணம் என்றும் சொல்லலாம். அப்படியானால் பிற காத்தற்குரியன அல்லவா என எண்ணக்கூடாது. பொதுவான பொருள் சில இடங்களில் சிறப்பாகப் பயன்படுத்தப்படுவது வழக்கம். அப்படிக் கருதலாம். எவ்வாறிருப்பினும் ஆவணம்  என்பதிலிருந்து வேறுபடுத்த  காவணம் எனலாம்.

• Action – வழக்குப்பாடு

  செயல்(ஆட்சித்துறை, வேளாண்மை, மனையியல், கணக்கு, குமுகவியல், கால்நடை அறிவியல்),  வினை(பொறியியல், மனையியல், கணக்கு, குமுகவியல், கால்நடை அறிவியல்),  வழக்கு(மனையியல்), நடவடிக்கை(மனையியல்),  விசை (கணக்கு), தாக்கம்(கால்நடை அறிவியல்).  செயல்வினை எனத் துறை வாரியாகப் பொருள்கள் கூறப்படுகின்றன.

வழக்கு நடைமுறை, செயற்படுமுறை, வழக்கு மூலம், செயல்,  வினையாற்றுதல், நடவடிக்கை, போர்வினை, வழக்கு நடவடிக்கை, நாடகம் புதினம் முதலியவற்றின் நிகழ்ச்சிப்போக்கு, நடிப்பு செயலாய்வு, கருமம், தொழில், அமைதி, புரிவு, தொழிற்பண்பு, செய்தொழில், சேட்டை, வண்ணம், புணர்ப்பு, ஆட்டம், வினையம், செய், செயற்கை, நடவடிக்கை, வினை, கூத்து, கிரியை, வழக்கு, விசை, தாக்கம், செயல்வினை, செய்கை, அதிரடி எனவும் கூறுகின்றனர். .

Action Committee – நடவடிக்கைக் குழு, Action Plan – செயற் திட்டம் எனவும் இடத்திற்கேற்பப் பொருள்கள் வழங்கப்பெறுகின்றன.

வீரதீரச் சண்டைப்படங்களை அதிரடிப்படம் (Action film) என்பர். அதிரடிப்பட நாயக, நாயகியரை முறையே அதிரடி நாயகர்(Action hero), அதிரடி நாயகி(Action heroine) என்பர்.

நீதித்துறையில் இச்சொல், ஒருவர் அல்லது ஒரு தரப்பு தன் அல்லது தம் உரிமையை நிலைநாட்ட அல்லது பிறரால் ஏற்படும் தீங்கிழைப்பைத் தடுக்க நீதி மன்றத்தின் முன் கொண்டு வரும் நடவடிக்கையைக் குறிக்கிறது. அஃதாவது, உரிமையியல் குற்றவியல் வழக்கின் சட்ட நடவடிக்கையைக் குறிக்கிறது.

வழக்கு என்னும் பொழுது case- வழக்கு என்பதை நினைவில் கொள்ள வேண்டும். எனவே, செயற்பாடு, வினைப்பாடு என்பதுபோல் Action -வழக்குப்பாடு எனலாம்.

• Achromatic – எழுதா ஆவணம்

பயிரியலில் நிறமிலா; பொறியியலில் நிறநீக்கு, நிறமற்ற; மனையியலில் நிறம்சேரா, நிறம்பிரியா; கால்நடை அறிவியலில் நிறமற்ற எனப் பொருள்கள் வழங்குகின்றன. சாயல் மற்றும் செறிவு இல்லா என்றும் கூறுகின்றனர்.

இப்பொருள்கள் சட்டத்துறையில் பொருந்தி வராது. இச்சொல் சட்டத்தில் எழுத்தாவணமற்ற வாய்மொழிக் கூற்றைக் குறிக்கிறது. எனவே, எழுதப்பெறா ஆவணம் > எழுதா ஆவணம் எனலாம்.

-இலக்குவனார் திருவள்ளுவன்

(தொடரும்)

திருக்குறளில் பதவி மேலாண்மை 1/2 – இலக்குவனார் திருவள்ளுவன்

இலக்குவனார் திருவள்ளுவன்      30 October 2026      No Comment

திருக்குறளில் பதவி மேலாண்மை 1/2

திருவள்ளுவர் எக்காலத்திற்கும் எத்துறைக்கும் பொருந்தும் வகையில் திருக்குறளை நமக்கு அளித்துள்ளார். எனவேதான் பாவேந்தர் பாரதிதாசன்

“இல்லாத தில்லை இணையில்லை முப்பாலுக் கிந்நிலத்தே”

என்றார். சில குறட்பாக்கள் நேரடியாகவே நாம் வேண்டிய தலைப்பிற்குப் பொருந்தும் வகையில் இருக்கும். சில குறட்பாக்கள் பொதுவாக இருப்பினும் நமக்குத் தேவைப்படும் கருத்திற்கு ஏற்ற விளக்கமாக இயைந்து வரும். அந்த வகையில் நேரடியாகவும் உட்பொருளாகவும்  விளக்க வகையிலும் பதவி மேலாண்மை குறித்த குறட்கருத்துகளைப் பார்ப்போம்.

மேலாண்மை என்றால் என்ன?

மேலாண்மை (Management) என்பது ஒரு நிறுவனத்தின் அல்லது இலக்கின் நோக்கங்களை வெற்றிகரமாக அடைய, மனித வளங்கள், பிற வளங்களை சரியாகத் திட்டமிட்டு, ஒருங்கிணைத்து, வழிநடத்திக் கட்டுப்படுத்தும் செயல் முறையாகும். இதனையே, பெரும்பாலும் மனித வளங்கள், நிதி வளங்கள், தொழில்நுட்ப வளங்கள், இயற்கை வளங்களின் வரிசைப்படுத்தல், கையாளுதல் என்று விளக்குவர்.

பதவி என்றால் என்ன?

ஒரு வேலைக்கு ஊதியம் கொடுத்து அவ்வேலைக்குப் பெயரையும் குறிப்பிடுகையில் அது பதவி ஆகிறது. சான்றாக ஒருவர் ஓர் இடத்திலோ ஒரு கட்டடத்திலோ கூட்டி அதற்கு எவ்வகைப் பணப்பயனும் அல்லது பிற பயனும் பெறவில்லை என்றாலோ கூலி பெறுகிறார் என்றாலோ அது கூட்டும் வேலையாகிறது. அவ்வேலைக்கே ஊதியம் வழங்கி வரை முறைக்குள் கொண்டு வந்து கூட்டுநர் என்று பெயரும் இட்டால் அது பதவியாகிறது. 

ஓர் அலுவலகத்திலோ துறையிலோ நிறுவனத்திலோ ஒரே ஒரு பதவி மட்டும் இருக்காது. அடிப்படைப் பணியைச் செய்பவர், அப்பணியை மேற்பார்வை யிடுபவர் அல்லது கண்காணிப்பவர் அப்பதவிக்குரிய சம்பளம் முதலியவற்றை வழங்குபவர், அப்பதவிக்குரிய அமர்த்தல் ஆணை, ஊதிய ஆணை, பணி விலக்க ஆணை, பணி நீக்க ஆணை, பணி முடிவு ஆணை முதலான பணியமைப்பு தொடர்பான பணிகளுக்குப் பொறுப்பானவர் எனப் பல்வேறு பதவி நிலைகள் இருப்பதே வழக்கம்.

பதவி மேலாண்மை என்றால் என்ன?

ஓர் அமைப்பில் பல்வேறு நிலைகளில் பதவிகள் இருந்தாலும் எல்லாவற்றிற்கும் தலைமையாக அவற்றை இயக்கும் பதவி ஒன்று இருக்கும் அல்லவா? அப்பதவியில் உள்ளவர் பணியாளர்களை எவ்வகையில் நடத்துகிறார், பணிகளை எவ்வகையில் செயற்படுத்துகிறார், பணிப் பொறுப்பகளை எவ்வகையில் திறம்படக் கையாளுகிறார் என்பனவற்றைக் குறிப்பதே பதவி மேலாண்மை ஆகிறது. தான் பணியாற்றும் துறை, நிறுவனம், அமைப்பு போன்றவற்றில் எவ்வாறு ஆதாயம் விளைவிக்கிறார், இழப்பு ஏற்பட்டால் எங்ஙனம் இழப்பைச் சமாளிக்கிறார், தன் பணித்திறமையை வளர்த்துக் கொள்வதுடன் தன் கீழ்ப் பணியாற்றுநரின் பணித்திறமைகளையும் வளர்க்கிறார் என்பனவற்றின் பணி ஆளுமையே பதவி மேலாண்மையாகிறது. பதவி நிலைகள் அல்லது பதவியின் தன்மைகள் வெவ்வேறாக இருப்பினும் பணி ஆளுமைத் திறன் என்பது பொதுவானதே. எனவே, பதவி மேலாண்மையைப் பொதுவானதாகவே கருத வேண்டும்.

திருவள்ளுவர் அரசர்க்குக் கூறும் தகுதிகள் யாவும் தலைமைப் பொறுப்பில் உள்ளவர்களுக்கானவையாகக் கருத வேண்டும். திருவள்ளுவர் அமைச்சருக்குக் கூறும் இலக்கணம் யாவும் இன்றைய அமைச்சர்களுக்கும் பொருந்தும்; ஒரு தலைமையின் கீழ்ப் பிறரை இயக்கும் நிலையில் உள்ள பதவியாளர்களுக்கும் பொருந்தும். அவ்வகையில் நாம் திருக்குறட் கருத்துகள் குறிப்பிடும் பதவி மேலாண்மை குறித்துப் பார்ப்போம். இவற்றை இன்றைய அறிஞர்களின் கருத்துகளுடன் ஒப்பிட்டுக் காண்கையில் திருக்குறளின் சிறப்பு நமக்கு ஒளிவிடும்.

“ஒரு மேலாளரின் முதல் பணி ஊக்கமளிப்பதல்ல, மாறாகத் தடைகளை அகற்றுவதே ஆகும்” என்கிறார் இசுகாத்து இரய்மாண்டு ஆடம் (Scott Raymond Adams: June 8, 1957 – January 13, 2026). பணிகளை நிறைவேற்றும் பொழுது தடைகள், குறுக்கீடுகள், இடையூறுகள் இருப்பின் ஊக்கச் சொற்களால் பயனில்லை. அத்தடைகளை உடைத்தெறியச் செய்ய வேண்டும். அதன்பின்பே பணியைத் தொடருவதற்கான ஊக்க உரைகளை வழங்க வேண்டும் என்கிறார் அவர். எனவே, அவர் தடைகளைக் கண்டு பின்வாங்காதே என்கிறார்.

இடும்பைக்கு இடும்பை படுப்பர் இடும்பைக்கு

இடும்பை படாஅ தவர். (குறள்: (௬௱௨௰௩ – 623) என்கிறார் திருவள்ளுவர்.

        துன்பம் அல்லது தடை வரும்போது மனச்சோர்வு அடையாமல் இருப்பவர்களே, அந்தத் துன்பத்திற்கே துன்பம் உண்டாக்கி அதனை ஓடச் செய்துவிடுவார்கள் என்கிறார் திருவள்ளுவர். எனவே, பதவியருக்கு வேண்டிய மேலாண்மைப் பண்பைத் திருவள்ளுவர் நமக்கு உணர்த்துகிறார் எனலாம்.

பணித் தடைகளை உடைக்க  ஓயா உழைப்பு மேற்கொள்ள வேண்டும்.

ஊழையும் உப்பக்கம் காண்பர் உலைவின்றித்

தாழாது உஞற்று பவர். (குறள்: (௬௱௨௰ – 620)

எனச் சோர்வின்றித், தொடர்ந்து முயன்று உழைப்பவர்கள், தங்களுக்குத் தடையாக வரும் விதியையும்  முதுகுகாட்டி ஓடச் செய்யும் வல்லமையாளர்களாகத் திகழ்வர் என்கிறார்.

“தான் செய்ய விரும்பும் செயல்களை ஆற்ற நல்ல மனிதர்களைத் தேர்ந்தெடுக்கும் அறிவும், அவர்கள் அதைச் செய்யும்போது தலையிடாமல் இருக்கும் தற்கட்டுப்பாடும் கொண்டவரே சிறந்த செயன்மையர் ஆவார்.” என்கிறார் தியோடர் உரூசுவெலுட்டு( Theodore Roosevelt Jr.-October 27, 1858 – January 6, 1919)

எவ்வாறு தேர்ந்தெடுக்க வேண்டும் என்பதற்குத் திருவள்ளுவர்,

இதனை இதனால் இவன்முடிக்கும் என்றாய்ந்து

அதனை அவன்கண் விடல்.   (திருக்குறள், ௫௱௰௭ – 517)

என்கிறார்.

ஒரு செயலை ஒருவர் எப்படிச் செய்து முடிப்பார் என்று ஆராய்ந்து அதற்குத் தகுதியுடையவர் எனக் கண்டறிந்த பின்பே அச்செயலை அத் தகுதியானவரிடம் ஒப்படைக்க வேண்டும். இல்லையேல் ஒப்படைக்கக்கூடாது என அறிவுறுத்துகிறார் திருவள்ளுவர்.

வினைக்குரிமை நாடிய பின்றை அவனை

அதற்குரிய னாகச் செயல்.   (திருக்குறள், ௫௱௰௮ – 518)

எனத் திருவள்ளுவர், ஒருவரிடம் அவரது தகுதிக்கேற்ற வேலையை ஒப்படைத்த பின்பு குறுக்கீடு எதுவும் செய்யாமல் அவர் முழுமையாக வேலையில் ஈடுபடும் வண்ணம் அதற்குரியவராக ஆக்க வேண்டும் என்கிறார்.

“காலத்தை நம்மால் கையாளக் கற்றுக் கொள்ளும் வரை, வேறு எதையும் நம்மால் கையாள முடியாது.” என்கிறார்  பீட்டர் திரக்கர்(Peter Ferdinand Drucker – 19 November 1909 – 11 November 2005). திருவள்ளுவர் ‘காலமறிதல்’ என்னும் அதிகாரம் மூலம் இதைத்தான் வலியுறுத்துகிறார். பதவி மேலாண்மைக்கு வேண்டிய அடிப்படைப்பண்புகளில் ஒன்று காலமறிதலாகும்.

ஞாலம் கருதினுங் கைகூடுங் காலம்

கருதி இடத்தாற் செயின்.   (திருக்குறள், ௪௱௮௰௪ – 484)

ஞாலத்தையும் வெல்லலாம் காலத்தை யறிந்து செயற்பட்டால் என்கிறார் அவர்.

உங்கள் எண்ணங்கள் அனைத்தையும் நீங்கள் செய்யும் வேலையில் ஒருமுகப்படுத்துங்கள். சூரியனின் கதிர்கள் ஒருமுகப்படுத்தப்படும் வரை சுடுவதில்லை. என்று அலெக்குசாண்டர் கிரகாம் பெல் ( Alexander Graham Bell, மார்ச்சு 3, 1847 – ஆகத்து 2, 1922), வேலையை வெல்ல ஒருமுக எண்ணம் தேவை என்கிறார்.

• இலக்குவனார் திருவள்ளுவன்
• வள்ளுவர் கோட்டத் திருக்குறள் உயராய்வரங்குகள் -1174          
• திருவள்ளுவரின் மேலாண்மையியல் சிந்தனைகள் – 4