Showing posts with label சட்டச் சொற்கள் விளக்கம். Show all posts
Showing posts with label சட்டச் சொற்கள் விளக்கம். Show all posts

Monday, June 8, 2026

சட்டச் சொற்கள் விளக்கம் 1061-1065: இலக்குவனார் திருவள்ளுவன்

      09 June 2026      



(சட்டச் சொற்கள் விளக்கம் 1056-1060: தொடர்ச்சி)

1061. Appropriate levels  தக்க நிலைகள்

பொருத்தமான நிலைகள்

உரிய நிலைகள்

சட்டச் சொல்லாடலில், “பொருத்தமான நிலைகள்” (appropriate levels) என்றால் பொதுவாகச் சட்ட முறையிலான தரநிலைகள் அல்லது அதிகார வரம்புப் படிநிலைகளை அஃதாவது வழக்கை விசாரித்துத் தீர்ப்பளிக்கும் நீதிமன்றங்களின் நிலைகளைக் குறிக்கிறது. சட்ட நடைமுறைகளைச் சரியாகக் கையாள்வதற்கு, ஒரு வழக்கு எந்த நிலையில் உள்ளது என்பதையும், அதில் எதை மெய்ப்பிக்க வேண்டும் என்பதையும் புரிந்துகொள்வது மிக இன்றியமையாததாகும்.
1062. Appropriate proceedings  தக்க செயலாணைகள்‌

பொருத்தமான செயல்முறைகள்‌

உரிய நடவடிக்கைகள்‌


சட்டமுறையிலான, பொருத்தமான தக்க  செயலாணை என்பது  உரிமையை நிலைநாட்ட, தகராற்றை முடிவாக்க அல்லது ஒரு வழக்கைத் தீர்வு செய்யத் தேவைப்படும் சரியான, சட்டப்பூர்வமாக ஏற்கப்பெற்ற சட்ட நடவடிக்கை, தீர்ப்பாயச் செயல்முறை அல்லது வழிமுறையைக் குறிக்கிறது.


சரியான அதிகார வரம்பு, நடைமுறை விதிகளைக் கொண்ட தக்க நீதிமன்றம் அல்லது ஒழுங்குமுறை அமைப்பைத் தரப்பினர் பயன்படுத்துவதை உறுதி செய்கிறது.

மண விலக்கிற்காக உரிமையியல் நீதி மன்றததை நாடாமல் குடும்பநல மீதி மன்றத்தை நாடுவது போன்று தக்க நடவடிக்கையைத் தேர்ந்தெடுத்தல்.
1063. Appropriation Bill  நிதி ஒதுக்களிப்பு வரைவம்

நிதி ஒதுக்களிப்புச்‌ சட்ட முன்வடிவு

நிதி ஒதுக்க முற்சட்டம்

Bill என்பதற்கு வேறு சொற்களைக் கையாள்வதை விட வரைவம் என்றே சொல்லலாம்.

ஒதுக்கீட்டு வரைவம் (சட்ட வரைவு) என்பது, ஒரு நிதியாண்டிற்கான ஏற்கப்பெற்ற செலவினங்களை  எதிர்கொள்வதற்காக, அரசாங்கம் தனது பொதுக் கருவூலத்திலிருந்து நிதியை எடுத்துச் செலவிட அதிகாரம் அளிக்கும் முன்மொழியப்பட்ட சட்ட நடவடிக்கையாகும்.  

இந்தச் சட்ட ஆவணம் நிறைவேற்றப்படாமல், பணிஆளுமை (நிருவாகம்) பொது நிதியைச் சட்டமுறைப்படி எடுக்க முடியாது.
1064. Approval    ஏற்பு

ஒப்பு

சட்டத்தில், ஒப்புதல் என்பது ஒரு செயல் அல்லது ஒப்பந்தத்தைச் சரிபார்ப்பதற்காக, அதிகாரமளிக்கப்பெற்ற தரப்பு, நீதிமன்றம் அல்லது ஒழுங்குமுறை அமைப்பால் வழங்கப்படும் முறையான உறுதிப்படுத்தல், ஏற்பு அல்லது வெளிப்படையான இசைவு ஆகும். ஒரு குறிப்பிட்ட முடிவு சட்டமுறையில் ஏற்றுக் கொள்ளப்படுவதற்கு முன்பு, அது மதிப்பாய்வு செய்யப்பட்டு, ஏற்கப்பெற்று, சட்டப்படி மனநிறைவுடன் ஏற்றுக்கொள்ளப்பட்டுள்ளது என்பதை இது குறிக்கிறது.

இது பல குறிப்பிட்ட செயற்பாடுகளையும் சூழல் களையும் உள்ளடக்கியது. மத்திய வருவாய் வாரியங்கள் சட்டம், 1963-இன் பிரிவு 8(2) (S. 8(2) CBRA, 1963 – Section 8(2) of the Central Boards of Revenue Act, 1963) ஒரு காப்பு விதியாகும்(saving clause). இவ்விதியில் ஏற்பு குறித்துத் தெரிவிக்கப்பட்டுள்ளது.
1065. Approved    ஒப்பேற்பளிக்கப்பட்ட

ஏற்பளிக்கப்பட்ட

சட்டத்தில், ” ஒப்பேற்பளிக்கப்பட்டது” அல்லது “ஏற்பளிக்கப்பட்டது” என்றால்,   ஒரு செயல், ஆவணம் அல்லது ஒப்பந்தத்தை ஒரு தகுதிவாய்ந்த அதிகார அமைப்பு ஏற்றுக் கொண்டுள்ளது, அல்லது உறுதிப்படுத்தியுள்ளது என்பதாகும். ஒரு முன்மொழிவு , தேவையான அனைத்துச் சட்டத் தரநிலைகளையும் பூர்த்திசெய்து, செயல்படுத்துவதற்கோ கட்டுப்படுத்தும் பயத்தலுக்கோ (effect) சரிபார்க்கப்பட்டுள்ளது என்பதை இது குறிக்கிறது. Effect = விளைவு என்றால் தீய விளைவு என்றே பெரும்பாலு ம் பொருள் கொள்ளப்படுகிறது. எனவே, இந்த இடத்தில் தவறான பொருள் தரலாம். Effect என்பதற்குப் பயன் தருதல், நன்மை பயத்தல் என்றும் பொருள்கள் உள்ளன. வியத்தல் அடிப்படையில் வியப்பு என்பது போல், பயத்தல் அடிப்படையில் பயப்பு என்பர். பயப்பே பயன் ஆம் (தொல்காப்பியம், நூற்பா 790) என்கிறார் தொல்காப்பியர். எனவே effect என்பதற்குப் பயப்பு என்ற சொல்லைப் பயன்படுத்தலாம்.

Thursday, May 7, 2026

சட்டச் சொற்கள் விளக்கம் 1056-1060: இலக்குவனார் திருவள்ளுவன்



(சட்டச் சொற்கள் விளக்கம் 1051-1055 தொடர்ச்சி)

1056. Appropriate allocation     உரிய ஒதுக்கீடு
உரியவாறு ஒதுக்கீடு செய்தல்


சட்டப்பணிகள் ஆளாண்மைச் சட்டம்1987, பிரிவு 4இல்(S. 4(c) LSAA,1987 – Section 4 in The Legal Services Authorities Act, 1987) தம் முடிவிற்கேற்ப நிதிகளைப் பயன்படுத்தவும் மாநில அதிகாரர்களுக்கும் மாவட்ட அதிகாரர்களுக்கும் உரியவாறு நிதி ஒதுக்கீடு செய்வது குறித்தும் தெரிவிக்கப்பட்டுள்ளது.

authority என்பது அதிகாரம் உள்ள அமைப்பு. அதிகாரி என்றும் குறிப்பிடுவர். அதிகாரம் உள்ள ஆளை அதிகாரன் என்று முன்னர்க் குறிப்பிட்டுள்ளனர். அதிகாரம் உள்ளவர்களைக் குறிப்பதாயின் அதிகாரர்கள் எனலாம். அதிகாரம் உள்ள ஆளுமை அமைப்பைக் குறிப்பதாயின் ஆளாண்மை எனலாம்.
1057. Appropriate authorityஉரிய ஆளாண்மை
உரிய அதிகார அமைப்பு
உரிய அதிகாரி


உரிய அதிகாரன் ஊர், நகரம், அல்லது நாட்டின் ஆளுகைக் குழுவே தக்க ஆளாண்மையாகும்.  
விதிமீறல் தொடர்பில் ஒழுங்கு நடவடிக்கை எடுப்பது தொடர்பில் அதிகாரம் மிக்க அமைப்பு இதன் தொடர்பில் தக்க ஆளாண்மையாகும்.
காண்க: Appropriate
1058. Appropriate case   பொருத்தமான வழக்கு
உரிய நேர்வு
தக்க நேர்வு
உகந்த நேர்வு  

வாதுரையின் பொழுது முன் நிகழ்வைக் குறிப்பதாயின் பொருத்தமான வழக்கையே குறிப்பிட வேண்டும். தொடர்பில்லாத வழக்கைக் குறிப்பின் நீதிமன்றத்தால் எடுத்துக் கொள்ளப்படமாட்டாது.

காண்க: Appropriate
1059. Appropriate forum  தக்க அமைப்பு
உரிய அமைப்பு
உகந்த அமைப்பு


அதிகாரம் செலுத்துவதற்குரிய அல்லது அதிகாரத்தைப் பயன்படுத்துவதற்குரிய அல்லது நிதியைப் பயன்படுத்துவதற்குரிய அல்லது வழக்கைத் தொடுப்பதற்குரிய அல்லது வழக்கை எதிர்கொள்வதற்குரிய தக்க அமைப்பு.
1060. Appropriate government   உரிய அரசு

ஒரு நாட்டை அல்லது மாநிலத்தை ஆளுவதற்கு முறைப்படியான அதிகாரம் படைத்த அரசு.

மரணத்தண்டனையைச் செயற்படுத்துவதற்கு அல்லது மரணத்தண்டனைய மன்னித்துக் குற்றவாளியின் தண்டனையைக் குறைப்பதற்கு அல்லது நீக்கி விடுதலை செய்வதற்கு அல்லது பிற தண்டனைகளை மாற்றுவதற்கு அல்லது நீக்குவதற்கு அதிகாரம் உள்ள அரசு

Friday, April 24, 2026

சட்டச் சொற்கள் விளக்கம் 1051-1055: இலக்குவனார் திருவள்ளுவன்

      25 April 2026      



(சட்டச் சொற்கள் விளக்கம் 1047-1050: தொடர்ச்சி)

1051. Apprentice at lawபயிற்சி வழக்குரைஞர்

வழக்குமுறைப் பயிலுநர்‌  

 பயிற்சிச் சட்டம், 1961  இந்தியாவில் பயிற்சிப் பருவத்தைக் ஒழுங்குபடுத்துகிறது. இதில் பணிப்பயிலுநர்களுக்கும் பணியாளர்களுக்கும் உள்ள உரிமைகள், கடமைகள், பாதுகாப்புகள் வரையறுக்கப்படுகின்றன. இச்சட்டம் மைய அரசால் அறிவிக்கப்பட்ட, இசைவளிக்கப்பட்ட அனைத்துத் தொழில்களுக்கும் பொருந்தும். இது வேண்டப்படும் சிறப்புப் பணிப்பயிற்சித் திட்டங்களுக்கு இசைவை வழங்குகிறது.
1052. Apprenticeship     பயிற்சிப் பருவம்

பணிப்பயிற்சி

தொழிற்  பயிற்சிநிலை

மீன்பிடித்தல், கைவினை, தையல், ஊர்திப் பழுது, எந்திரப் பணி முதலான பணிகளில் புதியதாகச் சேரும் பொழுது அவற்றில் தகுதி பெறுவதற்காக அளிக்கப்படும் பயிற்சிக்கான காலம்.  

ஒரு பதவியில்  சேர்ந்ததும் அதற்குரிய  தகுதிபெற்று அதன் தகுதி நிலையை அறிய உதவும் பயிற்சிக்காலமே தகுதிகாண் பருவம்(Probation Period). ஒரு குறிப்பிட்ட தொழில் அல்லது கைவினையில் தேர்ச்சி பெறுவதற்காக அளிக்கப்படும் பயிற்சியே தொழிற்பயிற்சி.

தகுதிகாண் பருவம் என்பது சில திங்களில் இருந்து ஈராண்டு வரை இருக்கலாம். ஆனால் தொழிற்பயிற்சி என்பது ஈராண்டிற்கும் மேல் இருக்கலாம்.
1053. Approbate and reprobateஏற்றலும் மறுத்தலும்

ஏற்கவும்‌ மறுக்கவும்‌  

ஏற்றலும் மறுத்தலும் கோட்பாடு சட்ட ஆவணத்தின் பயன்மைகளை ஏற்பதிலிருந்து ஒரு தரப்பாரைத் தடுப்பது ஆகும். அதே நேரம், சட்டக் கோரல்களில் நிலைத்தன்மையை உறுதிப்படுத்தும் வகையில் இதன் சுமையை மறுப்பதாகும்.  

ஏற்கவும் மறுக்கவும் என்பது சட்டக் கோட்பாடு ஆகும். இதன்படி ஒருவர் ஒரே நேரத்தில் ஒன்றை ஏற்கவும் மறுக்கவும் முடியாது. “ஒருவரால் இன்மாவை(cake) தின்று தீர்க்கவும் அப்படியே வைத்திருக்கவும் முடியாது” என்னும் தொடர் இதற்கான விளக்கமாகும்.

quod approbo non reprobo என்னும் இதன் இலத்தீன் தொடரின் பொருள் நான் எதை ஏற்கிறேனோ அதை மறுக்க முடியாது என்பதாகும்.

ஒரு தரப்பு சட்டஆவணத்தை முதலில் ஏற்றுவிட்டுப் பின்னர் மறுக்கலாம் என்ற எண்ணப்போக்குக் கொள்ளக் கூடாது என்பதற்காக இது சொல்லப்படுகிறது. இது வணிமாற்றத்தின் (transaction) மூலம் ஆதாயம் காணும் தரப்பு, அதனுடன் தொடர்புடைய கடப்பாடுகளையும் ஏற்றுக்கொள்ள வேண்டும் என்பதை அடிப்படையாகக் கொண்டது.
1054. Approbation  ஒப்புதல்

ஏற்பு

ஒரு தரப்பு தரும் ஆவணத்தை மறு தரப்பார் ஏற்றுக் கொள்ளல் அல்லது நீதித்துறை ஒப்புக் கொள்ளுதல் என்பதை இது குறிக்கிறது.

‘Approbation’ ஒப்புதல் என்னும் பொருளைத் தரும் பிரெஞ்சு இலத்தீன் சொல்லாகும்.
1055. Appropriate  தக்க

பொருத்தமான

தனதாக்கு

உரிய ஒதுக்கு

ஒதுக்கியளி


பணியாட்சித் தீர்ப்பாயச் சட்டம் 1985(THE ADMINISTRATIVE TRIBUNALS ACT, 1985) கூறு 36, விதிகளை உருவாக்குவதற்கான அதிகாரம் உடைய உரிய அரசு(Power of the appropriate Government to make rules) குறித்துக் கூறுகிறது.

authority என்பது அதிகாரம் உள்ள அமைப்பு. அதிகாரி என்றும் குறிப்பிடுவர். அதிகாரம் உள்ள ஆளை அதிகாரன் என்று முன்னர்க் குறிப்பிட்டுள்ளனர். அதிகாரம் உள்ளவர்களைக் குறிப்பதாயின் அதிகாரர்கள் எனலாம். அதிகாரம் உள்ள ஆளுமை அமைப்பைக் குறிப்பதாயின் ஆளாண்மை எனலாம்.

Tuesday, April 21, 2026

சட்டச் சொற்கள் விளக்கம் 1047-1050: இலக்குவனார் திருவள்ளுவன்

      22 April 2026      



(சட்டச் சொற்கள் விளக்கம் 1043-1046 தொடர்ச்சி)

1047. Appreciationஆராய்தல்‌;
பாராட்டுதல்‌;
மதிப்பிடுதல்‌;
விளங்கிக்‌ கொள்ளுதல்‌

சட்டத்தில் மதிப்பீடு என்பது நீதிமன்றங்கள் முறையீட்டின் போது வழங்கப்பட்ட ஆதாரத்தை மதிப்பீடு செய்து ஆராய்ந்து பார்க்கும் செயல்முறையைக் குறிக்கும்.

இது நீதித்துறை எடுத்துரைப்பு, முழு நம்பகம், நிகழ்தகவு விதி, நீதித்துறை தவறாக செயல்படுவதைத் தடுத்தல் முதலியவற்றை உள்ளடக்கியது.
1048. Appreciation of evidenceசான்றின்‌ மதிப்பீடு

சட்டத்தில் சான்றின் அல்லது ஆதாரத்தின் மதிப்பீடு என்பது நீதிமன்றங்கள்.

சட்டநடவடிக்கைகளின் போது அளிக்கப்பட்ட ஆதாரத்தின் ஏற்கத்தக்க தன்மை, நம்பகத்தன்மை ஆகியவற்றை ஆராய்ந்து மதிப்பீடு செய்யும் செயல்முறையைக் குறிக்கும்.
1049. Apprehend  அச்சத்தோடு எதிர்பார்
தளையிடு
கைது செய்
புரிந்துகொள்  

பெரும்பாலும் குற்ற வழக்குகளில், சட்ட அதிகாரத்தினால் ஒருவரைப் பிடித்தல் அல்லது தளையிடுதல் என்பதைக் குறிக்கிறது.  இது குற்றவாளியைக் கையோடு பிடிப்பதைக் குறிக்கும்.

இது பெரும்பாலும் காவல் அறிக்கைகளிலும், தளையாணைகளிலும் பதிவு செய்யப்படுகிறது.
1050. Apprentice  தொழில் பயிலுநர்

விற்பனை மேம்பாட்டு பணியாளர்கள் (சேவை நிபந்தனைகள்) விதிகள், 1976, பிரிவு 2.ஈ. [The Sales Promotion Employees (Conditions Of Service) Rules, 1976,Sec. 2(d)] பணியாளர்களுள் தொழில் பயிலுநர்களும் அடக்கம் எனக் குறிக்கிறது. (S. 2(d) SPE(CS)A, 1976)

Friday, April 17, 2026

சட்டச் சொற்கள் விளக்கம் 1043-1046: இலக்குவனார் திருவள்ளுவன்

      18 April 2026      


(சட்டச் சொற்கள் விளக்கம் 1041-1042: தொடர்ச்சி)

1043. Axiomஏற்புடைமை சான்று தேவையில்லாமல்  மெய்யாக அறியப்படும்  வெள்ளிடையுண்மை; பரவலாக ஏற்றுக் கொள்ளப் படுவது. ஏற்புடைமை அடிப்படை யிலேயே வாதங்கள் எழுவதால் அடிப்படைக் கோட்பாடு எனக் கொள்ளப்படுகிறது.   சட்டம் சார்ந்த வாதத்திற்கான அடிப்படைத் தளமாகவும் செயல்படுகிறது.  சான்றாக, ஒப்பந்தச் சட்டத்தில்,  ஒப்பந்தத்திற்கு இரு தரப்பின் ஒப்புமை தேவை என்பது அடிப்படைக் கோட்பாடாக பரவலாக ஏற்றுக் கொள்ளப்படுகிறது.
1044. Axiomatic    வெளிப்படையாகத் தெரிந்த மூதுரையார்ந்த தானே தெளிவான, ஐயத்திற்கு இடமில்லாத(சந்தேகமில்லாத), மறுக்க முடியாத, புரிந்து கொள்ளப்பட்ட, கொடுக்கப்பட்ட, அறிந்தேற்பு பெற்ற, உறுதியான, திருத்தத் தேவையில்லாத அடிப்படைக் கருத்தாகும். இவை சட்ட ஏரணங்களில் (legal reasoning)அடிப்படைக் கூறுகளாகச் செயற்படுகின்றன. காண்க  Axiom-ஏற்புடைமை
1045. Axionமறுக்கொணா உண்மை பெச்சி-குயின் கோட்பாடு(Roberto Peccei and Helen Quinn in 1977) என்பதன் அடிப்படைக் கூறு ஆகும். இவ்வாறு தொழில் நுட்பம் சார்ந்த விளக்கமே பெரிதாகக் கையாளப்படுகிறது. ஆனால், சட்டத்துறையில் ஒரு சான்று அல்லது வாதம் வேறு எவ்வகை ஆதாரமும் தேவையின்றி மறுக்க இயலாத மெய்மையாக உள்ளதைக் குறிக்கிறது.
1046. Ayacut         ஆயக்கட்டு “ஆயக்கட்டு” (Ayacut) என்பது,  நீர்ப்பாசனத் திட்டத்தின் கீழ்ப் பாசன வசதி பெற உரிமையுள்ள நிலங்களைக் குறிக்கிறது. குறிப்பாக, 1908-ஆம் ஆண்டின் சென்னை பண்ணை நிலச் சட்டத்தின் பிரிவு 136அ-இல் இது வரையறுக்கப்பட்டுள்ளது; இப்பிரிவின்படி, ஒரு நீர்ப்பாசனத் திட்டத்தின் ஆயக்கட்டு என்பது, அந்தத் திட்டத்தின் கீழ்ப் பாசனம் பெறும் அனைத்து நிலங்களையும் உள்ளடக்கியதாகும்.

Friday, April 10, 2026

சட்டச் சொற்கள் விளக்கம் 1041-1042: இலக்குவனார் திருவள்ளுவன்

      11 April 2026      அகரமுதல



(சட்டச் சொற்கள் விளக்கம் 1036-1040 : தொடர்ச்சி)

1041. Awareness  விழிப்புணர்வு

சட்ட விழிப்புணர்வு . தனி விழிப்புணர்வு, குமுக விழிப்புணர்வு, பண்பாட்டு விழிப்புணர்வு, உணர்வு விழிப்புணர்வு, அமைப்பு விழிப்புணர்வு, உறவு விழிப்புணர்வு, குடிமை விழிப்புணர்வு, தொழில்நுட்ப விழிப்புணர்வு, நலவாழ்வு விழிப்புணர்வு, மனநல விழிப்புணர்வு மன்பதை விழிப்புணர்வு, ஊடக விழிப்புணர்வு, சுற்றுப்புற விழிப்புணர்வு, வரலாற்று விழிப்புணர்வு, முதலீட்டு விழிப்புணர்வு, சேமிப்பு விழிப்புணர்வு, அரசியல் விழிப்புணர்வு முதலியவாறாகப் பலவகைப்படும்.

தொடர்பான சிக்கல்கள் வழக்குகளில் இடம் பெறும்பொழுது தொடர்புடைய சொற்கள் சட்டச் சொற்கள் ஆகின்றன.

சட்ட விழிப்புணர்வு (Legal awarness) என்பது பொது மக்களுக்கான சட்டக் கல்வி அல்லது சட்ட நூலறிவு என்றும் அழைக்கப்படுகிறது; சில நேரங்களில் குடிமக்களின் கல்வி எனவும் குறிக்கப் பெறுகிறது.

இது தனியர்களைச் சட்ட அமைப்பில் வலுப்படுத்தும் வகையில் சட்டங்கள், உரிமைகள், சட்ட செயல்பாடுகளைப் புரிந்து கொள்வதைக் குறிக்கிறது.

சட்டம், நீதிமன்ற அமைப்புகளுக்குத்  தொடர்புடைய பொதுப் பலன்களையும் திறன்களையும் மேம்படுத்துவதற்காக நோக்கப்பட்ட பல்வேறு செயல்பாடுகளை இது கொண்டுள்ளது. மேலும் அந்தச் செயல்பாடுகளுடன் தொடர்புடைய நடைமுறை, படிப்புத்துறைகளையும், சட்டம் பற்றிய அறிவை  மக்களுக்கு வழங்குவதில் குமுகாய- தொழில்முறை இயக்கத்தையும் குறிக்கிறது.

அமெரிக்கர்சட்ட உரைஞர் சங்கம்(American Bar Association) சட்ட விழிப்புணர்வுஎன்றால் . குறையாய்வுத் தீர்ப்புகள் குறித்த சட்டப் பொருண்மைகள், சட்ட வழிமுறை, வாய்ப்புள்ள சட்ட வளங்கள் முதலியவற்றைப் பயன்படுத்தவும் மேம்படுத்தவும் உள்ள வழிகளையும் உத்திகளையும் வெளிப்படுத்தவும் வழிகாட்டுவது என்கிறது.

மனித உரிமைகள் பாதுகாப்புச் சட்டம், (PHRA) 1993 பொது மக்களுக்கு மனித உரிமைகள் குறித்தும் தொடர்பான சட்டங்கள் குறித்தும் விழிப்புணர்வு தேவை என்பதற்காக இயற்றப்பட்டது.
1042. Axe to grindமறைமுக நோக்கம்   

கூறியதையே திரும்பத் திரும்பக்‌ கூறுதல் என்பது நேர் பொருள். சட்டத் துறையில் மறைநோக்கத்தை – அஃதாவது மறைமுக நோக்கத்தைக் குறிப்பது. மறை நோக்கம் என்றால் தவறாகப் பொருள் கொள்ளலாம் என்பதால் மறைமுக நோக்கம் எனக் குறிக்கப்பெற்றுள்ளது. எனினும் நாளடைவில் மறை நோக்கம் என்றே பயன்படுத்தலாம்.

இத் தொடர் ஒருவர், தூய பொதுநலத்தின் அடிப்படையில் செயல்படாமல், மாறாக ஒரு குறிப்பிட்ட ஆதாயத்தைப் பெறுவதற்காக அல்லது பழிவாங்கும் நோக்கத்துடன் செயல்படுகிறார் என்பதை உணர்த்துகிறது.

தனியரின் நோக்கங்கள் வெளிப்படையானவை அல்ல என்றும், அவை தனிப்பட்ட மனக்குறைகள் அல்லது மறைமுக நலன்களால் உந்தப்பட்டிருக்கலாம் என்றும் இத்தொடர் சுட்டிக்காட்டுகிறது.

Followers

Blog Archive