சட்டச் சொற்கள் விளக்கம் 821-830 : இலக்குவனார் திருவள்ளுவன்

 

   ஃஃஃ    இலக்குவனார் திருவள்ளுவன்      30 September 2024      அகரமுதல

(சட்டச் சொற்கள் விளக்கம் 811-820 : இலக்குவனார் திருவள்ளுவன் – தொடர்ச்சி)

821. Adopted Child	மகற்கோடல்  குழந்தை   மகற்கோடல்  என்பது உணர்ச்சி சார்ந்த மன்பதை, சட்டபூர்வச் செயல்முறையாகும்.   இதன் மூலம், பெற்றெடுத்த பெற்றோரால் வளர்க்கப்படாத குழந்தைகள் மற்றொரு குடும்பத்தின் முழுமையான நிலையான சட்ட உறுப்பினர்களாக மாறுகிறார்கள். அஃதாவது மகற்கோடல்  குழந்தையின் அனைத்து உரிமைகளும் பொறுப்புகளும் மகற்கோடல்  பெற்றோருக்கு நிலையாக மாறும். மகற் கோடல் என்பது மகவைக் கொண்ட என்றும் மகவாகக் கொள்ளப்பட்ட என்றும் இரு பொருளாகப் பயன்படுத்தப்படுகிறது. காண்க: Adoption
822. Adoption	கோடல்   மகற்கோடல்   மகவேற்பு   மற்றொருவருக்குரியதைத் தனதாகக் கொள்ளுதல் கோடல் ஆகும்.   கோடல் என்பது உரிமையாகக் கொள்தைக் குறிப்பதால் இயல்பான ஏற்பு என்பதை விட ஏற்ற சொல்லாகக் கருதப்படுகிறது. ஒருவர், பெரும்பாலும் ஒரு குழந்தை, புதிய குடும்பமொன்றின் சட்டபூர்வமான அங்கத்தவராக ஏற்றுக்கொள்ளப்படும் நடைமுறை மகற்கோடல் ஆகும். கோடல் முடிவு செய்யப்பட்டதன் பின்னர் அக்குழந்தை மகற்கோடிய / மகற்கோடல் பெற்றோரின் சட்டபூர்வமான குழந்தையாவார்.  அந்தவேளை உயிரியற்/இயற்கையான பெற்றோரின் பெற்றோருக்குரிய உரிமைகள் முடிவிற்கு வரும்.   தத்து என்பது திசைச்சொல்லா எனத் தெரியவில்லை. கோடல் என்றால் கொள்ளுதல் எனப் பொருள். இன்னொருவரின் வழி முறையினராக அவரின் உரிமையராக இருந்த ஒரு குழந்தையை மற்றொருவர் மகன் அல்லத மகளாக ஏற்றுத் தனது உரிமையாகக் கொள்ளுதல். மகற்கோடல் எனலாம்.
823. Adoptive Father	மகற்கோடல்  தந்தை   ஓர் உயிரியல் தந்தைக்கு மாற்றாகச் சட்டமுறைப்படி ஒரு குழந்தையைத் தன் உரிமையாகக் கொள்ளும் ஆண்.   Adoption என்பதை மகவேற்பு என்றும் சொல்வதால், ஏற்புத்தந்தை என்றும் குறிப்பிடுகின்றனர்.   காண்க: Adoption; Adoptive Mother
824. Adoptive Mother	மகற்கோடல்  தாய்   ஓர் உயிரியல் தாய்க்கு மாற்றாகச் சட்டமுறைப்படி ஒரு குழந்தையைத் தன் உரிமையாகக் கொள்ளும்  பெண். Adoption என்பதை மகவேற்பு என்றும் சொல்வதால், ஏற்புத்தாய் என்றும் குறிப்பிடுகின்றனர்.   காண்க: Adoption; Adoptive Father
825. Adult	அகவை முதிர்ந்தோர், உரிமை அகவையர், பருவமெய்தியவர், முதியோர்   இடத்திற்கேற்றாற்போல் முதிர் உயிரி, முழு வளர்ச்சியடைந்த பூச்சி என்றும் சொல்லப்படும்.   பரத்தை/வேசி என்னும் பொருளுமுண்டு.   பெரும்பாலான நாடுகளில் 18 அகவை எட்டியவர்கள் அகவை/வயது வந்தோர் (Major) எனக் குறிக்கப்படுகின்றனர். பிற நாடுகளில் 14 முதல் 21 வரை இவ்வரம்பு மாறுபடுகிறது.
826. Adulterant	கலப்படப் பொருள் கலப்படம்   உணவுப் பொருட்கள், மருந்து, ஒப்பனைப் பொருட்கள், அல்லது பிற பொருட்களில் சேர்க்க வேண்டிய உரிய மூலப் பொருள் அல்லது பொருட்களுக்கு மாற்றாக ஈடு செய்யும் வகையில் சேர்க்கப்படும் வேறு பொருளாகும்.   சேர்க்கை தேவையில்லா விட்டாலும் பாலுடன் தண்ணீர் கலப்பதுபோல், வேறு பொருளைக் கலப்பதும் கலப்படமே. இது சட்டப்படிக் குற்றச் செயலாகும்.
827. Adulterous Intercourse	பிறன்மனை புணர்தல்   பிறன்மனை புணர்தல் அல்லது முறைபிறழ்புணர்ச்சி (adultery) என்பது திருமணமானவர் அவரின் இணையில்லாத மற்றொருவருடன் கொள்ளும் பாலுறவு ஆகும். கூடா ஒழுக்கம், கூடா நடத்தை, கள்ள நடத்தை, கூடாப்பாலுறவு, பிறன்மனை சேரல், பிறன்மனை நயத்தல், பிறன்மனை நாடல், பிறன் மனை விழைதல், பிறன் இல் விழைதல்,  பிறர்மனை உறவு எனப் பலவகையாக இது கூறப்படுகிறது.   மேற்கு நாடுகளில் திருமணமானவர் மட்டுமே முறை தவறி உறவு கொண்டதாகக் கருதப்படுவர். சில நாடுகள் ஒரு மணமான பெண் முறை தவறி உறவு கொண்டால் மட்டுமே முறைபிறழ்புணர்ச்சி என்கின்றனர். இங்கு ஆணுக்கு அவ்வாறான கட்டுப்பாடு எதுவும் இல்லை.     பிறன் இல் விழையாமையைத் தமிழர் அறநெறியாகக் கருதிப்போற்றினர். திருவள்ளுவர், திருக்குறளில் இதற்கெனத்தனி ஓர் அதிகாரமே(எண் 15) அமைத்துள்ளார். எனவே, ஆடவர்களுக்கான கற்புநெறியையும் தமிழர்கள் போற்றி வந்துள்ளனர் என அறியலாம்.   கிறித்தவச் சமயத்தின் பத்துக் கட்டளைகளுள் “பிறர் மனைவியை விரும்பாதிருப்பாயாக” என ஏழாவது கட்டளை கூறுகிறது. இதை மீறியவர்களுக்கு மரணத்தண்டனை என்று விவிலியம்(பைபிள்) கூறுகிறது. இங்கும் ஆடவர் கற்பு வலியுறுத்தப்படுகிறது. இங்குத் திருமணமான பெண்ணோடு உடலுறவு கொண்டால் மட்டுமே தண்டனைக்கு உரிய குற்றம். மாற்றாக ஆண் பரந்தமையுடன் அல்லது திருமணமாகாத பெண்ணுடன் உடலுறவு கொண்டால் அது குற்றம் அல்ல.   இந்தியாவில்  பரத்தமைத் தடுப்புச்சட்டடத்தில் பெண்கள் தண்டிக்கப்படும் அளவிற்கு ஆண்கள் தண்டிக்கப்படுவதில்லை. மருத்துவர்கள் முறை தவறி நடப்பது மன்னிக்க முடியாத தொழில்முறைக் குற்றம் ஆகும்.   இசுலாமிய சமயத்தில் முறைபிறழ் புணர்ச்சி தடை செய்யப்பட்டுள்ளது. திருமணமானவர் அல்லது திருமணமாகாத ஒருவர் இவ்வாறான புணர்ச்சியில் ஈடுபடுவது குற்றச் செயலாகும். திருமணமானவர் இப்புணரச்சியில் ஈடுபட்டால். இசுலாமியத் தண்டனையின்படி கல்லால் அடித்துக் கொலை செய்யப்படுவார், திருமணமாகாதவர் இதில் ஈடுபட்டால் அவர், நூறு கசையடிகள்  வழங்கப்பட வேண்டும்.
828. Adultery	பிறன்மனை சேரல்   மேலே பிறன்மனை புணர்தலில்(adulterous intercourse) கூறியதைக் காண்க.
829. Advance	முன்பணம், மேம்படுத்து   முன்பணம் என்பது உரிய நாளுக்கு முன்கூட்டியே தரப்படும் ஒரு வகையான கடன் அல்லது பணம் செலுத்துதல் ஆகும்.   ஒருவருக்கு அவருடைய சம்பளத்திலிருந்து ஒரு பகுதியை அல்லது முழுப்பகுதியை முன்னதாக அளிப்பது, பயணத்திற்கு எதிர்நோக்கும் செலவினத்திலிருந்து ஒரு பகுதியை முன்னதாக வழங்குதல், பொருட்களை வாங்கிவிட்டு அதற்கு உரிய தொகையில் ஒரு பகுதியை முன்னதாக வழங்கிவிட்டு எஞ்சியதைப் பின்னர் முழுமையாக அல்லது தவணை முறையில் அளித்தல்; மனை, நில விற்பனை முதலியவற்றில் சட்ட முறையான பதிவிற்கு முன்னரே ஒரு பகுதியை அளித்தல்;   முன்பணம் பெறும் தரப்பினர் உரிய காலத்தில் திருப்பிச் செலுத்துவார் அல்லது கணக்கினைச் சரி செய்வார் என்ற நம்பிக்கையில் அளிப்பது.   அறிவிக்கப்பட்ட வழக்கு/கேட்பு நாளுக்கு முன்னதாகவே வழக்கை எடுத்துக் கொள்வது(advance hearing).   படை முன்னேறிச் செல்வதையும் குறிக்கும்.
830. Advance Tax	முன் வரி   முற்செலுத்தும் வரி/ முன்செலுத்தும் வரி என்பனவற்றின் சுருக்கமே முன்வரி என்பது.   ஆண்டு இறுதியில் மொத்தமாகச் செலுத்த வேண்டிய வருமான வரியைக் கணக்கிட்டு அதனை முன்னதாகச் செலுத்துதல். வருமான வரித்துறையால் முடிவெடுக்கப்படும் வரித்தொகையை முன்னதாகத் தவணை முறையில் செலுத்துவது வழக்கம்.   வீட்டுவரி, சொத்துவரி, தொழில் வரி முதலான பிற வரிகளையும் – பெரும்பாலும் இணைய வழியில் – முன்னதாகச் செலுத்துவது.   முன்கூட்டிச் செலுத்தப்படும் தொகை செலுத்த வேண்டிய தொகையைவிடக் கூடுதலாகப்போனால், இத்தொகை கணக்கில் சரி செய்யப்படும் அல்லது திருப்பித் தரப்படும்.

(தொடரும்)
இலக்குவனார் திருவள்ளுவன்

சட்டச் சொற்கள் விளக்கம் 811-820 : இலக்குவனார் திருவள்ளுவன்

 

    ஃஃஃ     இலக்குவனார் திருவள்ளுவன்      27 September 2024      அகரமுதல

(சட்டச் சொற்கள் விளக்கம் 801-810 : இலக்குவனார் திருவள்ளுவன் – தொடர்ச்சி)

சட்டச் சொற்கள் விளக்கம் 811-820

811. Admiralty Jurisdiction	கடலாண்மைப் பணி வரம்பு.   கடல்சார் உரிமை கோரல்கள் தொடர்பான பணியாட்சி வரம்பு தொடர்புடைய நீதிமன்றங்களுக்கு இருக்கும்.  கடலாண்மைப் பணிவரம்பு என்பது கடல்நீர் எல்லை வரை இருக்கும்.
812. Admissibility	ஏற்புடைமை   ஏற்புத்தன்மை   ஏற்கத்தக்கத்தன்மை;   ஒன்றை – குறிப்பாகச் சான்றினை – நீதிமன்றத்தால் அல்லது உரிய அலுவலரால் ஏற்றுக் கொள்ளக்கூடிய தன்மை.
813. Admissibility Of Document	ஆவண ஏற்புடைமை   ஆவணங்கள் நீதிமன்றத்தால் ஏற்பதற்குரிய ஆவணம், சான்றுரை, தெளிவான சான்று முதலானவற்றின் தகுதித்தன்மையைக் குறிப்பது.   எல்லா ஆதாரங்களும் நீதி மன்றத்தால் ஏற்கப்படா. நம்பகமானவையும் பொருத்தமானவையும் மட்டுமே நீதி மன்றங்களில் ஏற்கப்படும்.   நீதிமன்றத்தால் ஏற்கப்படும் அல்லது ஒப்புக்கொள்ளப்படும் தகுதியுடைமையையே இது குறிக்கிறது.   பல்கலைக்கழகத்தில் சேரும் பொழுது பல்கலைக்கழகத்தால் ஏற்கப்படும் ஆவணத் தகுதியுடைமையயும் இது குறிக்கிறது.
814. Admissible	ஏற்றுக்கொள்ளத்தக்க, அனுமதிக்கத்தக்க ஏற்கத்தக்க   முறையிடப்படும் விண்ணப்பம் அல்லது மேல்முறையீடு ஏற்கத்தக்கது. சான்றுக்கு அளிக்கப்படும் ஆதாரம்/ஆதாரங்கள் ஏற்கத்தக்கது/ன.   நீதிபதி குறிப்பிட்ட சான்று அல்லது ஆதாரம் ஏற்றுக்கொள்ளத்தக்கது; எனவே, அனுமதிக்கத் தக்கது எனல். எ.கா. நீதிபதி, அளிக்கப்பட்ட ஒலியிழை ஆதாரமாக ஏற்கத்தக்கது எனத் தீர்ப்பளித்தார்.   முறை மன்றத்தால் வழக்காளி வழக்கிற்கான புதிய சான்றினை அளிக்கையில்   ஏற்கத்தக்கது என முடிவெடுக்கலாம்.   admissible என்னும் பிரெஞ்சுச் சொல்லின் பொருள் ஏற்பதற்குத் தகுதியுடையது.
815. Admissible Evidence	ஏற்கத்தக்க சான்று   நீதிமன்றத்தில் ஏற்கப்பெறும் வழக்கு உசாவுநருக்கு உதவுவதாகக் கருதப்படும் அல்லது வழக்கினை முடிவுகட்டுவதற்கு வாய்ப்பாக  அமையும் சான்று.
816. Admission	ஏற்கை ஒப்புகை, சேர்த்தல், அனுமதித்தல் முதலான வேறு சில பொருட்கள் இருப்பினும் இந்த இடத்தில் குற்றத்தை ஏற்றுக் கொள்ளுதலையே-ஏற்கையையே குறிக்கிறது.   வழக்கு தரப்பார், அவர்/அவர்களுக்கு எதிராக அளிக்கப்பட்ட  உண்மை அறிக்கையை ஒப்புக் கொண்டு ஏற்பது. சில சூழல்களில் அமைதிகாப்பதும் அறிக்கையை ஏற்பதாகும்.   மற்றொரு தரப்பாரின் கருத்திற்கு எதிர்ப்பு தெரிவிக்காமல் இருப்பது, எதிர்ப்பதற்கு ஒன்றுமில்லை என்பதால் ஏற்றுக் கொள்வதாகிறது.   சான்று சட்டத்தில் ஏற்கை என்பது எதிர்த்தரப்பாரின் முன் அறிக்கையாகும். இது செவிவழி மறுப்பின் மீது ஆதாரமாக ஏற்றுக் கொள்ளப்படலாம். பொதுவாக, குற்ற ஏற்கை  குற்ற வழக்கிலும் உரிமை வழக்கிலும் ஏற்கப்படுகிறது.   வழக்காற்றுச் சட்டத்தில்(Common Law) ஏற்கை ஏற்கப்படுகிறது. ஆனால், இக்கூற்றுரை, விருப்பமற்றது, நேர்மையற்றது, கூற்றுரை பெறப்பட்ட சூழல் முறையற்றது அல்லது சட்ட முரணானது என்றால்  இது விலக்கப்படும்.   சட்டக்கோட்பாட்டியலில் முன்தீர்ப்புகள் அடிப்படையிலான நடைமுறை விதிகளையே எழுதப் பெறாத சட்டங்கள் என்கின்றனர். எழுதப்பெறாத சட்டங்கள் என்பதை விட வழக்கத்தில் பயன்படுத்துவதால் வழக்காற்றுச் சட்டம் என்பது ஏற்றதாக இருக்கும்.
817. Admission Committee	ஏற்கைக் குழு   சேர்க்கைக் குழு என்பது பொதுவாகக் கல்வி நிலையங்களில் குறிப்பிட்ட படிப்பிற்காக, நுழைவுத்தேர்வு இருப்பின் அதன் அடிப்படையில் அல்லது வேறுவகையில் தகுதியை அறிந்து தக்கவரைச் சேர்த்துக் கொள்வதற்கு ஆராய அமைக்கப்படும் சேர்க்கைக் குழுவாகும்.   வழக்கு மன்றங்களில் பதியப்படும் வழக்குகளை ஏற்பது குறித்து ஆராய்ந்து முடிவெடுக்கக் குழுக்கள் இருப்பின் அவற்றை ஏற்கைக் குழுக்கள் எனலாம்.   கல்வித்துறையில் Admission – சேர்க்கை எனப் பயன்படுத்தப்பட்டாலும் கல்வித் துறையிலும் சட்டத்துறையிலும் பொதுவாக இருக்க வேண்டும் என்பதற்காக ஏற்கை எனக் குறிக்கப்பட்டது.
818. Admission Fee	அனுமதிக் கட்டணம் சேர்க்கைக்கட்டணம் நுழைவுக் கட்டணம்   வரைபடம் போன்றவற்றின் அனுமதிக்காக, கல்வி நிலையத்தில் சேருவதற்காக, காட்சியகம் போன்றவற்றில் நுழைவதற்காகச் செலுத்த வேண்டிய கட்டணம். அனுமதி தமிழ்ச்சொல்லே எனச் செ.சொ.பி.அகரமுதலி விளக்குகிறது.
819. Admission Form	சேர்க்கைப் படிவம் கல்வியகத்தில் அல்லது வேறு நிலையத்தில் அல்லது அமைப்பில் அல்லது குழுவில்  சேருவதற்காகக் கோரப்படும் விவரங்கள் அடங்கிய படிவம்.
820. Admission Of Guilt	குற்ற ஏற்புரை   குற்றப்பாடு ஒப்புதல் / ஏற்பு குற்றத்தை ஒப்புக் கொள்வது என்பது குற்றம் சாட்டப்பட்ட ஒருவரின் சொற்களில் இருந்து , ஆம், நான் குற்றவாளி போன்ற தெளிவான சொற்கள் இடம் பெறாவிட்டாலும் குற்றச்செயலை ஏற்றுக் கொள்ளுதல்.

(தொடரும்)

இலக்குவனார் திருவள்ளுவன்

சட்டச் சொற்கள் விளக்கம் 801-810 : இலக்குவனார் திருவள்ளுவன்

   ஃஃஃ   இலக்குவனார் திருவள்ளுவன்      25 September 2024      அகரமுதல

(சட்டச் சொற்கள் விளக்கம் 791-800 : இலக்குவனார் திருவள்ளுவன்- தொடர்ச்சி)

சட்டச் சொற்கள் விளக்கம் 801-810

801. Administrative Machinery	பணியாண்மை இயங்கமைவு   Machinery என்றால் இயந்திரம் என நேர் பொருளில் சொல்வதை விட இயந்திரத்தின் இயக்கம் போன்று இயங்கு நிலையைக் குறிப்பதால் இயங்கமைவு எனலாம்.   பணியாண்மைக்கான செயற்தொகுதியைக் குறிப்பதே பணியாண்மை இயங்கமைவு ஆகும்.
802. Administrative Office	பணியாண்மை அலுவலகம்   ஒரு துறை அல்லது ஓர் இயக்ககம் அல்லது ஒரு செயலகம் அல்லது ஒரு நிறுவனம் அல்லது ஓர் அமைப்பு போன்றவற்றின் அன்றாடப் பணிகளைப் பார்க்கும் அலுவல் அமைப்பே பணியாண்மை அலுவலக மாகும்.
803. Administrative Power	பணியாண்மை அதிகாரம்   ஒரு துறை அல்லது ஓர் இயக்ககம் அல்லது ஒரு செயலகம் அல்லது ஒரு நிறுவனம் அல்லது ஓர் அமைப்பு போன்றவற்றின் அன்றாடப் பணிகளின் ஆளுமைகளையும் பணியாளர்களின் செயற்பாடுகளைக் கட்டுப்படுத்துவதற்கும் உடைய அதிகாரம் பணியாண்மை அதிகாரம் ஆகும். பணியாளர்களின் செயற்பாடுகளைக் கட்டுப்படுத்தல் என்னும் பொழுது பணியாளர்களின் ஊதியம், விடுப்பு முதலிய பணியாளர் நலன்களை வழங்குதல், நிறுத்தி வைத்தல், நீக்குதல், பணியிடங்களை நீக்குதல்  அல்லது மாற்றியமைத்தல் ஆகியவற்றிற்கான அதிகாரம் அல்லது இவற்றிற்கான அதிகாரம் உடைய மேலலுவலர்க்குப் பரிந்துரைத்தல்,  தவறு அல்லது குற்றம் புரியும் பணியாளர்களை உசாவுதல் (விசாரித்தல்) தண்டித்தல், மன்னித்தல் அல்லது இவற்றிற்கான அதிகாரம் உடைய மேலலுவலர்க்குப் பரிந்துரைத்தல் ஆகியனவும் அடங்கும்.
804. Administrative Procedure	பணியாண்மை நடைமுறை   அரசு அல்லது தனியார் நிறுவனத்தின் மேலாண்மை அதிகாரங்களைச் செயற்படுத்தும் பாங்கு அலுவலக நடைமுறையாகும்.   பணியாளர் அல்லது அதிகாரி தனக்கு ஒதுக்கப்பட்ட பணிகளை அல்லது அதிகாரத்திற்கு உட்பட்ட செயல்களை நடைமுறைப்படுத்துவதையும் குறிக்கிறது.
805. Administrative Reforms Commission	பணியாண்மைச் சீர்திருத்த ஆணையம்   பணிகள், பணியாளர்களிடையே உள்ள குறைகளைக் களைதற்கும் செயற்பாடுகளைத் தரப்படுத்துதற்கும் உயர்த்துவதற்கும் அமைக்கப்படும் குழுவே பணியாண்மைச் சீர்திருத்த ஆணையம் ஆகும்.   இந்தியப் பொதுப்பணியாண்மையை மதிப்பாய்வு செய்வதற்கு முதலில் 05.01.1966 இல் பணியாண்மைச் சீர்திருத்த ஆணையம்(ப.சீ.ஆ.) அமைக்கப்பட்டது. மொரார்சி தேசாய் இதன் தலைவராக முதலில் இருந்தார். அவர் துணைத் தலைமையமைச்சராக ஆன பின்பு அனுமந்தையா இதன் தலைவரானார். 37.08.2005இல் வீரப்ப மொய்லி தலைமையில் இரண்டாவது பணியாண்மைச் சீர்திருத்த ஆணையம் அமைக்கப்பட்டது.   மாநில அரசுகள், தேர்தல் ஆணையம், தேர்வாணையம் முதலான தன்னாட்சி அமைப்புகள் தத்தம் அதிகார வரம்பிற்குட்பட் பணிகளில் சீர்திருத்தம் காணவும் தனித்தனிச் சீர்திருத்த ஆணையம் அமைக்கலாம்.   சிறைத்துறைச் சீர்திருத்த ஆணையம், காவல் துறைச் சீர்திருத்த ஆணையம் எனத் தனித்தனியே துறைகளின் பணிகளை மேம்படுத்துவதற்காகவும் பணியாண்மைச் சீர்திருத்த ஆணையங்கள் அமைக்கப்படுகின்றன.
806. Administrative Remedies	பணியாண்மைத் தீர்வுகள்   நிறுவனம், வாரியம், முகவாண்மை, ஆணையம் முதலியவற்றால் வழங்கப்படும் நீதித்துறை சாராத பணியாண்மை முறையிலான தீர்வு பணியாண்மைத் தீர்வாகும்.
807. Administrative Tribunal	பணியாண்மைத் தீர்ப்பாயம்   பணியாண்மைத் தீர்ப்பாயம் என்பது நீதித்துறை அதிகாரங்களை வழங்கிச் சட்டப்படி அமைக்கப்படும் பணியாளர்களுக்குத் தீர்வு வழங்கும் அமைப்பாகும்.   எல்லாப் பொருண்மைகளிலும் நீதிமன்றத்திற்குப் பொது அதிகார வரம்பு உள்ளது. தீர்ப்பாயம் பணித் தொகுதிச் சிக்கல்களைக் கையாளுகிறது. பணியாண்மைத் தீர்ப்பாயம் குறிப்பிட்ட சிக்கலைத் தீர்ப்பதற்கு வரம்பிற்குட்பட்ட அதிகாரம் உடையது.
808. Administrator (Also Estate Trustee)	பணியாட்சி அலுவலர்   நிருவாக அலுவலர் சட்ட உரித்தாளர் உரியர்   இறுதிமுறி இல்லாமல் இறந்த ஒருவரின் அல்லது இறுதிமுறியில் பெயர் குறிப்பிடப்பட்ட நிறைவேற்றுபவரின் சொத்துகளை பணியாட்சி /நிருவாகம் செய்ய நீதிமன்றத்தால் நியமிக்கப்படுபவர்.   பணியாட்சி /நிருவாக அலுவலர் இப்போது (காலமானவரின்) உடைமைப் பொறுப்பாளர் / சட்ட உரித்தாளர் என அழைக்கப்படுகிறார்.   இறப்பிற்குப் பின் முடிவெடுப்பதைத் தத்துவமாகக் கருதித் தத்துவகாரர் என்று அழைத்துள்ளனர்.
809. Admiralty Action	கடலாண்மை நடவடிக்கை கடல் எல்லை, பன்னாட்டு நீர்ப்பயன்பாடு, கப்பல் பயணம், மீன்பிடித்தல் முதலியவற்றைக் கையாளும் பன்னாட்டுச் சட்டத்தின் கிளை கடற்சட்டமாகும். இது தொடர்பான நடவடிக்கைகள் கடலாண்மை நடவடிக்கை ஆகும்.
810. Admiralty Court	கடலாண்மை தீர்ப்பாயம்   கடலாண்மை நீதிமன்றம் என்பது கடல்சார் தீர்ப்பாயம்/ நீதிமன்றம் (maritime court)என்றும் அழைக்கப்படுகிறது.   கடற்சட்டம், கடல், கப்பல், கடற்சட்டம் தொடர்பான வழக்குகள் மீதான பணிவரம்பு கொண்ட தீர்ப்பாயம் ஆகும். முன்பு நீதிமன்ற அமைப்பின் தனிப்பகுதியாகவே கடல்சார் தீர்ப்பாயங்கள் இருந்தன.  அப்பொழுது நீதிமன்றம் எனக் குறிப்பது பொருத்தமாக இருந்தது. இப்போது, நீதிமன்றம் எனப் பெயரில் இருந்தாலும் பணியமைப்பு அடிப்படையில் தீர்ப்பாயம் என்பது சாலப் பொருத்தமாக அமையும்.

(தொடரும்)
இலக்குவனார் திருவள்ளுவன்