Showing posts with label இடைத்தேர்தல். Show all posts
Showing posts with label இடைத்தேர்தல். Show all posts

Tuesday, September 29, 2026

ஆட்சி நிலைக்க இடைத்தேர்தல்களில் த.வெ.க.வாகை சூடட்டும்! – இலக்குவனார் திருவள்ளுவன்



வரும் அட்டோபர் 6 அன்று மதுராந்தகம், தாராபுரம் ஆகிய இரு தொகுதிகளிலும் சட்டமன்றத்திற்கான இடைத்தேர்தல் நடைபெற உள்ளது.  கடந்த தேர்தலில் பெற்ற வாக்குகள்அடிப்படையில் கணக்கிட்டு யார் வெற்றி பெறுவார் எனக் கணிப்பது வழக்கம். ஆனால் பொதுத்தேர்தலுக்கும்  இடைத்தேர்தலுக்கும் இடையில் கட்சி அணிகள் இடம் மாறியதால் அதற்கேற்பவே கணக்கிட வேண்டும்.

 பொதுத்தேர்தலின்போது இருந்த கூட்டணிக் கட்சிகள் இன்றைக்குத் தி.மு.க. கூட்டணியிலும் அதிமுக கூட்டணியிலும் இல்லை. அதே நேரம் த.வெ.க. கூட்டணி புதிய கட்சிகளை இணைத்துள்ளது. இதனால் அமைந்த மதச்சார்பற்ற சமூகநீதி வெற்றிக் கூட்டணி வலுவாக உள்ளது. இருப்பினும் மக்கள் மனநிலையை யாரே அறிவார்?

இச்சூழலில் யார் வெற்றி பெற வேண்டும் என்பது குறித்து ஆராய்ந்து பார்க்க வேண்டும். இரண்டுதொகுதிகளும் த.வெ.க. வென்ற தொகுதிகள் அல்ல. எனவே, முன்பை விட வாக்குகள் கூட பெற்றாலே அதற்கு வெற்றியாகத்தான் கருத வேண்டும். ஆனால் வெற்றிக்கனியைப் பறிக்காமல் விட்டு விட்டால் த.வெ.க.விற்கு மாபெரும் தோல்வி என்றுதான் ஊடகத்தினர் ஊதித் தள்ஞவார்கள். முதல்வர் ச.சோ.விசய்க்கு மாபெரும் தோல்வி என்று கூறி ஆட்சியைக் கலைக்க வேண்டும் அல்லது முதல்வர் பதவி விலக வேண்டும் என்று கூக்குரலிடுவார்கள்.

இது தமிழ்நாட்டின் அமைதியான சூழலுக்கு இடையூறாக அமையும்.  ஐந்தாண்டு முடிவின் பொழுதுதான் ஆட்சிக்கான முழுப் பருவத் தேர்வு நடைபெறும். அப்பொழுதுதான் மக்கள் ஆட்சியை அகற்றலாமா நீடிக்கச் செய்யலாமா என முடிவெடுப்பர். அதுவே இயற்கையாகும். ஆட்சியில் அமர்ந்த சில திங்களிலேயே ஆட்சி மா்றறம் பற்றிக் கூறுவது முறையல்ல. தான் பொதுத்தேர்தலில் வெற்றி பெறாததொகுதி என்றாலும் த.வெ.க.விற்குத் தோல்வி வந்தால் அவ்வாறு கூறாமல் அக்கட்சிக்கான மாபெரும் தோல்வி, விசய்க்கான வீழ்ச்சி, மக்கள் திருந்தி விட்டார்கள், மாயைஅகன்று விட்டது படச்சுருள்(ரீல்சு) சுருண்டு விட்டது, உண்மை (ரியல்) வெளிவந்து விட்டது என்றெல்லாம் பரப்புவார்கள். த.வெ.க. வெற்றி பெற்றாலும் உண்மையான வெற்றியாகக் குறிப்பிடாமல் அதிகார வலிமையால்  பெற்ற வெற்றி என்றுதான் கூறுவர். கூறிவிட்டுப் போகட்டும். ஆனால் ஆட்சிக் கலைப்பு என்ற கூக்குரல் சற்று அடங்கும். தமிழ்நாட்டின் நன்மைக்குத் தேவை நிலையான ஆட்சி. எனவே, இவ்விரு தொகுதிகளிலும்த.வெ.க. வெற்றி பெறுவதுதான் அதற்கு ஏற்ற வழியாகும்.

இத்தேர்தல்களில் பொதுவுடைமைக் கட்சிக்ள ஒவ்வொன்றும் ஆயிரம் வாக்குகள் அளவில்தான் பெறுவார்கள் என நம்பப்படுகிறது. ஒருவேளை தி.மு.க. வாக்குகள் கிடைத்தால் சில ஆயிரம் பெறலாம். இவ்வாறு அவர்கள் தோல்வியைத் தழுவுவதும் நிலையான ஆட்சிக்கான வழிதான். ஏனெனில் நடுநிலையாகக் கூறுவதாக விளம்பரப்படுத்திக் கொண்டு, இன்னும் பழைய கூட்டணியிலேயே இருக்கும் அவர்களை மக்கள் நம்பவில்லை. இதற்கு அவர்கள் முந்தைய கூட்டணியிலேயே இருந்திருக்கலாமே என்றுதான் கருதுகின்றனர். நாள்தோறும் – அதிலும் குறிப்பாக மார்க்குசியப் பொதுவுடைமைக் கட்சியின் அறிவிப்பு அல்லது செவ்வி வரும் பொழுது அதன் உண்மைத் தன்மையைப் பார்க்காமல் அக்கட்சிக்கு எதிரான எண்ணம்தான் மக்களிடையே எழுகிறது. எனவே, அவர்கள் மண்ணைக் கெளவுவதன் மூலம் அதற்கு விடை கொடுத்தாற்போல் அமையும். அதுவும் இத்தேர்தலின்  மக்கள் வெற்றியாக அமையும்.

இன்மை ஒருவற்கு இனிவன்று சால்பென்னும்

திண்மைஉண் டாகப் பெறின்.   (திருவள்ளுவர், திருக்குறள், ௯௱௮௰௮ – 988)

“மக்கள் ஆதரவின்மை  என்பது இழிவாகாது, சால்பு என்னும் வலிமைப் பண்பைப் பெற்றால்” என்பதைத் தி.மு.க.வும் உணரவேண்டும். தலைமைக்கு இருக்கும் ஆங்கிலப்பித்து, இந்தித்திணிப்பை எதிர்ப்பதாகக் கூறிக் கொண்டு தாங்கள் நடத்தும் கல்வி நிலையங்கள் மூலம் இந்தியைத் திணித்தல் போன்ற குறைகளை அகற்றச் சிந்தித்துத் தமிழ், தமிழர் நலன் குறித்துக் கூடுதலாகச் செயலாற்ற வாய்ப்பு வந்ததாகக் கருத வேண்டும். இன்னும் மூன்று ஆண்டுகளேனும் தேர்தலைப்பற்றி எண்ணாமல், அதற்கடுத்த தேர்தலுக்கு முந்தைய ஈராண்டுகளில் மட்டும் அது குறித்துச் சிந்தித்துச் செயலாற்றினால் நல்லன நடைபெறலாம்.

தான் வென்ற தொகுதிகளிலேயே வெற்றி வாய்ப்பை இழப்பது அதிமுகவின் தோல்வியல்ல, தலைமையின் தோல்வி என்பதை உணர்ந்து அதன் திறன்மிகு கட்சித் தலைமை தன்னைத் திருத்திக் கொள்ள வாய்ப்பாக அமையும்.

பா.ச.க.வும் தமிழ்நாட்டிற்கு எதிராகவும் இயற்கை நீதிக்கு மாறாகவும் உள்ள செயற்பாடுகளைக் களைய ஒரு வாய்ப்பு கிடைத்ததாக எண்ணி அது குறித்துச் சிந்திக்க வேண்டும்.

தி.மு.க.வும் அ.தி.மு.க.வும் ஒவ்வொரு தொகுதியை மற்ற கட்சிக்கு விட்டுக்கொடுத்தால் அது த.வெ.க.விற்குத்தான் பயன்தரும்.

குதிரை பேரம் என்னாவது என்கிறீர்களா? குதிரை பேரம் மூலம் ஆட்சிகளை அமைத்து நடத்திக் கொண்டிருக்கும் பாசகவும் அதன் தோழமைகளும் அதற்குக் கடுமையான எதிர்ப்பு தெரவித்து முற்றுப்புள்ளி வைக்காத பிற எதிர்க்கட்சிகளும் அதனைக் கூறத் தகுதியுண்டா?

தேர்தலில் போட்டியிட இருந்த த.வெ.க. வேட்பாளரையே குதிரை பேரத்தால் ஒளியச் செய்த அதிமுகவிற்கு இது குறித்து என்ன தகுதி உள்ளது?  மாற்றுக் கட்சியினரைத் தன் கட்சிச் சின்னத்தில் போட்டியிடச்செய்து அடக்கி ஒடுக்கி வைத்திருக்கும் திமுகவிற்கும் என்ன தகுதி உள்ளது? இதற்கு முந்தைய பல தேர்தல்களும் குதிரை பேர முன் வரலாற்றைக் கூறுமே!

த.வெ.க. வேட்பாளர்கள் இருவரும் கட்சி மாறி வாக்களிக்கவில்லை. கட்சியின் செயற்பாடு பிடிக்காமல் விலகி வந்துள்ளனர். இப்பொழுது மக்கள் அவர்களை வெற்றி பெறச்செய்தால் மக்கள் இவர்கள் செயற்பாடுகளை ஏற்றுக்கொண்டதாகும். அவ்வாறாயின் குதிரை பேரம் எங்கே வரும்?

வேட்பாளர்களைப் பொதுமக்கள் விரட்டியடிக்கிறார்கள் என்கிறீர்களா? பொதுமக்கள் போர்வையில் எதிர்க்கட்சியினர் விரட்டியடிக்கச் செய்வதும் ஆனால், விரட்டப்பட்டவர்கள் வெற்றி பெறுவதும் முந்தைய தேர்தல்களில் நாம் பார்த்தவைதாமே! இவற்றை யெல்லாம் பொருட்படுத்தவேண்டா!

 ஆக ஒட்டுமொத்தமாகத் த.வெ.க.வின் வெற்றி என்பது அனைத்துக் கட்சிகளுக்கும் நன்மையே விளைவிக்கும். எனவே, பொதுமக்கள் சிந்தித்து அளிக்கும் வாக்குகளால் த.வெ.க. வெற்றிக் கனிகளைப் பறித்து ஆட்சி நிலைப்பை உறுதி செய்யட்டும்!

  • இலக்குவனார் திருவள்ளுவன்
  • இதழுரை, அகரமுதல, புரட்டாசி 13, 2057 / 30.09.2026



Wednesday, April 12, 2017

தினகரன் வெற்றிவாய்ப்பால் நிறுத்தப்பட்ட இடைத்தேர்தல்! – இலக்குவனார் திருவள்ளுவன்

தினகரன் வெற்றிவாய்ப்பால் நிறுத்தப்பட்ட இடைத்தேர்தல்!

  அதிமுக தலைவி நலக்குறைவால் மருத்துவமனையில் சேர்க்கப்பட்டபொழுதே அடுத்த ஆட்சி தம்முடையதுதான் எனக் கனவு கண்டு தலை கால் புரியாமல் குதித்தன பாசகவின் தலைகள். அவர் மறைந்த பின்னர், உடனடியாகத் தம் கைப்பாவையான ஆட்சியை நிறுவினர்.  உண்மை புரிந்து ஆளுங்கட்சி விழித்துக்கொண்டு கைப்பாவையை மாற்றினர். அதன்பின்னரும் பாசக, ஆளுங்கட்சியில் பெரும்பிளவு ஏற்படும் எனக் கனவு கண்டு முயற்சியும் மேற்கொண்டு கானல்நீராய்ப் போனது. இருந்தும் ஆசை யாரை விட்டது? அதிகாரம் கையில் இருக்கும் பொழுது இது கூட முடியாவிட்டால்  இழுக்கென்று எண்ணிப் பலவழிகளில் ஈடுபட்டது. அவற்றில் சிலதான் கட்சிப்பெயரையும் கட்சிச் சின்னத்தையும் பயன்படுத்த விதித்த தடை.
  சசிகலா அணியைச் சேர்ந்த தினகரன் தோற்றுப்போவார் என்பதுபோல் ஊடகம் மூலம் பரப்பப்பட்டது. ஆனால், நாளொருமேனியும் பொழுதொரு வண்ணமும் தினகரனுக்குச் செல்வாக்கு கூடியது. பன்னீர் அணி வேட்பாளர் தெலுங்கர் என்றதும் அவர் பக்கம் இருந்த ஒரு பகுதியினர் நாம்தமிழர் கட்சி முதலான பிற கட்சிகள் பக்கம் செல்லத்  தொடங்கினர். பன்னீர் அணி வாக்கு பிணைத்தொகையைக்கூடப் பெறமுடியாமல் போகும் என்பது மட்டுமல்ல பாசகவின் வேட்பாளர் கங்கை அமரனும் பாசக எதிர்பார்த்தபடி இரண்டாவது அல்லது மூன்றாவது இடத்திற்கு வர முடியாது என்பதைப் புரிந்துகொண்டனர்.
  அரசியல் சதிராட்டத்தில் வல்லவர்கள், சதியாட்டத்தைத் தொடர்ந்தனர். சசிகலா அணி(தினகரன்) வென்றால் அவர் சார்ந்த அதிமுக தான் உண்மையான அதிமுக என்பது உறுதியாகிவிடுமே என்ற கவலை வந்தது.  எனவேதான் இராதாகிருட்டிணன் நகர் சட்டமன்றத் தொகுதி இடைத்தேர்தலை நிறுத்தச் செய்துவிட்டனர் எனப் பொது மக்கள் கருதுகின்றனர்.
  கோடிக்கணக்கான பணம்  விளையாடி இருக்கும் பொழுது் அதைத்தடுக்க எடுத்த நடவடிக்கையைப் பாராட்டாமல் ஊழல் பெருச்சாளிகளை ஆதரிக்கலாமா எனச் சிலர் எண்ணுவர்.
  நேர்மையான, ஊழலற்ற ஆட்சி வேண்டுமெனில் குறுக்குவழி வாக்கு வேட்டைகளுக்கு இடமில்லாத நேர்மையான தேர்தல் தான் தேவை. ஆனால், எல்லா இடங்களிலும் ஊழலுக்கு இடம் வகுத்துவிட்டுத் தன்னிடம் முழுமையாக அடிபணியாத காரணத்தால் அதைக்காரணமாகக் கூறி நடவடிக்கை எடுப்பது எப்படி நடுவுநிலையாகும்?
  நடந்து முடிந்த பொதுத்தேர்தலில் அனைத்துத் தொகுதிகளிலும் பணம் விளையாடினாலும், அரவக்குறிச்சி, தஞ்சாவூர் தொகுதிக்கான தேர்தல்கள்மட்டும் ஒத்திவைக்கப்பட்டன. ஆனால், மறு அறிவிப்பில் தேர்தல் நடந்தபோது, குற்றச்சாட்டுகளுக்கு உள்ளான வேட்பாளர்களுக்குத் தடைவிதிக்கவில்லை; அவர்களது கட்சிகளுக்கும் அத்தொகுதிகளில் தடை விதிக்கவில்லை. குற்றச்சாட்டிற்கு உள்ளானவர்களே தேர்தலில் வாகை சூடினர்.
  அதே நிலைதான் இங்கும் வரும் பொழுது தேர்தலை ஒத்திவைப்பதால் என்ன பயன்?
  ஒருவேளை கட்சிக்குத் தடைவிதித்தாலும் கட்சிசாராத் தனியராகக் கட்சியாளை நிறுத்தி கட்சியினர் வெற்றியை எட்டுவர்
  ஊழலுக்கு உடன்படாத கட்டுப்பாட்டுடன் வாழ்வதற்கு மக்களிடம் மாற்றம் ஏற்படாதவரை,  எந்தத் தேர்தல் திருத்தத்தாலும் பயனில்லை. 
  கடுமையான பாதுகாப்பு நடைமுறைகளையும்  கூடுதல் அலுவலர்கள் எண்ணிக்கையையும் கூடுதல் கண்காணிப்பையும் வைத்திருந்தும் வாக்கு வணிகம் நடைபெற்றுள்ளது எனில், தேர்தல் ஆணையம் எதற்கு? ஓர் இடைத்தேர்தலைக்கூட நடத்த துப்பு கெட்ட மத்திய அரசு எப்படி நாடுமுழுவதுமான தேர்தலை நேர்மையுடன் நடத்தும் என இப்பொழுது மக்கள் கேட்கத் தொடங்கிவிட்டனர்.
  ஒத்திவைக்கப்பட்டதால் இதுவரை ஆனத் தேர்தல் செலவும் இனித் தேர்தல் நடத்தும் பொழுது ஏற்படும் தேர்தல் செலவும் மக்கள் வரிப்பணத்தில்தானே வீணடிக்கப்படுகின்றன. பணமுடையவனே வாக்கு உடையவன் என்றால், ஒவ்வொரு தொகுதி்யையும் தனித்தனியே ஏலத்திற்கு விட்டுக்கிடைக்கும் பணத்தில் அந்தத் தொகுதியின் நலத் திட்டங்களை நிறைவேற்றலாமே! எதற்குத் தேர்தலுக்கான வீண் செலவு.
 அதே நேரம், ஆரிய ஆட்சியைத்திணிக்க முயலும் பாசகவின் கனவை நனவாக்கத் தமிழ்மக்கள் இடந்தரமாட்டார்கள். எனவே, பாசக குறுக்குவழிகளில் புகுவதைவிட்டுவிட்டு மக்கள்நலனில் கருத்து செலுத்தட்டும்!
 வேட்பாளர்களுக்கும் வேண்டுகோள்! வாக்காளர்களுக்கு மொத்தமாகக் கோடிக்கணக்கில் பணம்அல்லது பண மதிப்புஉள்ள பொருள்களைத் தரும் நீங்கள், அத் தொகையில் குறைந்த கட்டணத்தில் கல்விநிலையங்கள்,  மருத்துவமனைகள், வேலைவாய்ப்புகளுக்கான தொழிலகங்களைத் திறக்க ஆவன செய்வீரகளாக!
பேதைமையுள் எல்லாம் பேதைமை காதன்மை
 கையல்ல தன்கட் செயல். (திருவள்ளுவர், திருக்குறள் 832)
   [தன்னால் இயலாத செயல்களை விரும்பி, அவற்றில் தலையிடுவது, என்பது பேதைமைகளில் எல்லாம் மிகப்பெரிய பேதைமையாகும்.( கலைஞர் மு.கருணாநிதி உரை)]
– இலக்குவனார் திருவள்ளுவன்

Followers

Blog Archive