பயன்பாட்டு அடிப்படையில் கலைச்சொற்கள் 6/7 – – இலக்குவனார் திருவள்ளுவன்

 

ஃஃஃ    இலக்குவனார் திருவள்ளுவன்      18 February 2024      அகரமுதல

(பயன்பாட்டு அடிப்படையில் கலைச்சொற்கள் 5/7 – இலக்குவனார் திருவள்ளுவன் – தொடர்ச்சி)

பன்னாட்டுத் தமிழ்மொழி பண்பாட்டுக் கல்விக் கழகம்

சென்னை வளர்ச்சிக் கழகம்

தமிழ்நாடு திறந்த நிலைப் பல்கலைக்கழகம்

முதல் உலகத் தமிழ் வளர்ச்சி மாநாடு

பயன்பாட்டு அடிப்படையில்

கலைச்சொற்கள்

6/7

Act Of Legislature – சட்டமன்றச் செயன்மை

மாநிலங்களின் சட்டப் பேரவைகளால்(சட்டமன்றக்கீழவை, மேலவைகளால்) இயற்றி ஏற்கப்பெறும் செயன்மைகளைக் குறிக்கும்.

இங்கு Act என்பதன் பயன்பாட்டுப் பொருள் செயன்மை என்பதாகும்.

Act of misconduct – தீய நடத்தை

தனித்தோ பிறருடன் சேர்ந்தோ உயர் அதிகாரியின் சட்டபூர்வமான முறையான ஆணைக்கு வேண்டுமென்றே கீழ்ப்படியாமை அல்லது பணியாமை. முதலாளியின் வணிகம் அல்லது சொத்து தொடர்பில் இரண்டகம், நேர்மையின்மை, நம்பிக்கையின்மை, நாணயமின்மை, திருட்டு, மோசடி யுடன் செயற்படல்.

வெறுப்பு நடத்தை, சேதம், திருட்டு, பாதுகாப்பற்ற நடத்தை, பொதுக்கொள்கை மீறல்கள் ஆகியன முதன்மையான தீய நடத்தைகளாகும்.

சட்டத்தொழிலில், அதில் ஈடுபடுவோரால் வேண்டுமென்றே தவறான நோக்கத்தில் செயற்படல். அஃதாவது, தன்னல நோக்கங்களுக்காகத் தொழில் நெறிகளை மீறும் செயல்.

இங்கு Act என்பதன் பயன்பாட்டுப் பொருள் நடத்தை என்பதாகும்.

Act of parliament – நாடாளுமன்றச் செயன்மை

நாடாளுமன்றச் சட்டங்கள், சட்ட அதிகாரத்தின் சட்டவாக்க அவையால் (மக்களவை, மாநிலங்களைவயால்/ நாடாளுமன்றத்தால்) நிறைவேற்றப்படும் சட்ட வரைவுகளைக் குறிக்கும்.

சில சமயங்களில் முதன்மைச் சட்டம் (primary legislation) என்றும் குறிப்பிடப்படுகின்றன.

இங்கு Act என்பதன் பயன்பாட்டுப் பொருள் செயன்மை என்பதாகும்.

Act Of Parties –     தரப்பினரின் செயல்

எந்த ஒரு செயல், நிகழ்ப்பாடு(விவகாரம்), ஒப்பந்தம், வணிகப் பரிமாற்றம் அல்லது சட்ட நடவடிக்கைகளில் நேரடியாக ஈடுபாடுள்ள அல்லது ஆர்வமுள்ளவர்கள் தரப்பினர் எனப்படுகின்றனர்.

வழக்காடியின் எதிர்நிலையில் உள்ளவரும் தரப்பார் எனப்படுகின்றனர்.

 சிலர் குறிப்பதுபோல் கட்சியினர் என்றால் அரசியல் கட்சியைச் சார்ந்தவர் எனப் பொருள் வரும் . எனவே, அச்சொல்லைப் பயன்படுத்த வேண்டா.

ஒப்பந்தம் அ்ல்லது வணிகப் பரிமாற்றத்தில் ஈடுபடுநர் உடன்படிக்கையின் தரப்பாராகக் கருதப்படுவர். பூசல் அல்லது தகராறு,  வழக்காக மாறும் பொழுது வழக்காடிகள் வழக்கின் தரப்பினர் என அழைக்கப் படுகின்றனர்.

 வழக்கு தொடுக்கப்பட்ட பின்பு கூடுதல் தரப்பினர் சேர்க்கப் படலாம்.

நீதிமன்ற நடவடிக்கைகளில் வழக்கு தரப்பினர் பொதுவான சொற்களால் அழைக்கப் படுகின்றனர். உரிமை வழக்கில், வழக்கு தொடுப்பவர் வாதி என்றும் வழக்கிற்கு ஆளாகிறவர் எதிர்வாதி என்றும் அழைக்கப்படுகின்றனர்.

குற்ற வழக்குகளில் அரசாங்கத் தரப்பு அரசு என்றும் எதிர்த்தரப்பு எதிரர்/எதிர்வாதி என்றும் அழைக்கப்படுகின்றனர்.

மேல்முறையீடு செய்பவர் மேல் முறையீட்டாளர் என்றும் அதற்கு உள்ளாகிறவர் மேல்முறை யீட்டு எதிரர் எனவும் அழைக்கப் படுகின்றனர்.

இங்கு Act என்பதன் பயன்பாட்டுப் பொருள் செயல் என்பதாகும்.

Act of public enemy  – பொது எதிரியின்  செயல்

குமுகாயத்திற்கு அச்சுறுத்தலாக உள்ள ஆளின் செயல்.

“பொது எதிரி” என்பது 1930 களில் அமெரிக்காவில் முதன்முதலில் பரவலாகப் பயன்படுத்தப்பட்ட ஒரு சொல்.

குமுகாயத்திற்கு மிகவும் தீங்கு விளைவிக்கும், குற்றச் செயல்கள் புரிவோரையும் சட்ட முரண் செயல்களைச் செய்வோரையும் குறிப்பது.

இங்கு Act என்பதன் பயன்பாட்டுப் பொருள் செயல் என்பதாகும்.

Act Of State –    அரசுச் செயல்

கொள்கை அல்லது அரசின் தேவைக்காக இறையாண்மை அதிகாரத்தைப் பயன்படுத்துவதைக் குறிக்கிறது. எனவே, இறையாண்மை சார் செயல் என்றும் கூறுகின்றனர்.

இறையாண்மை சார் செயல் அல்லது இறைமை நிலைச் செயல் என்பதன் மூலம், ஒரு நாடு தன்னுடைய இறைமை நிலையில் மற்றோர் இறையாண்மை நாட்டுடன் அல்லது அம்மக்களுடன் மேற்கொள்ளும் செயலைக் குறிக்கின்றனர். இச்செயல் அந்நாட்டின் செயலாண்மைப் பணியிலிருந்து – நிருவாகச் செயலிலிருந்து – வேறுபட்டது. இது குறித்து எந்த நீதிமன்றத்திலும் வழக்கிட முடியாது.

அரசுச்செயலால் ஏற்படும் பாதிப்புகளுக்கு அச்செயலைச் செய்தவர் பொறுப்பாக மாட்டார். சான்றாகப் பொதுநலன் கருதி சாலையை அகலப்படுத்துதல், பாலம் அமைத்தல், போன்ற நலப்பணிகளைப் புரிய நிலத்தைக் கையகப்படுத்தும் அரசின் செயலைப் புரியும் சட்ட முறைமையான அதிகாரி குற்றவாளியாக மாட்டார்.

அஃதாவது, இறையாண்மை அதிகாரத்தைப் பயன்படுத்துகையில் யாருக்கும் பாதிப்பு ஏற்பட்டால் உரிய சட்டப்படியான அதிகாரி பொறுப்பாக மாட்டார். ஆனால், உரிய சட்டத்தில் இழப்பீடு குறிக்கப்பட்டிருந்தால் மட்டும் பாதிக்கப்பட்டவருக்கு இழப்பீடு வழங்கப்படும்.

அரசின் அனைத்துச் செயல்களையும் குறிப்பிடாமல், சட்டத்தால் உருவாக்கப்பட்ட தனி விலக்குரிமைகள், தடைகள், வழக்காய்வு செய்யலாகாது என நீதிமன்றத்தைக் கட்டுப்படுத்தும் அதிகாரமுறை விளம்புரைகள் ஆகிய சிலவற்றைச் சுட்டும் செய்கை. (சவுராட்டிர அரசு எதிர் ஃகாசி இசுமாயில் 1960 உ.நீ.அ.(SCR) 537).

இங்கு Act என்பதன் பயன்பாட்டுப் பொருள் செயல் என்பதாகும்.

Act of terrorism – வன் செயல்

பயங்க வாதம் என்கிறோம். வாதம் என்றால் ஒன்றிற்காக வாதிடுவதைத்தான் குறிக்கிறது. வன்முறைப் போக்கிற்காகப் பேசுவதுடன் வன்முறைச் செயல்களில் ஈடுபடுவதையும் குறிக்கிறது. எனவே, வன்முறைச் செயல் > வன் செயல் என்றே சொல்லலாம்.

இதனைத் தன்னாட்டு வன்முறை என்றும் பன்னாட்டு வன்முறை என்றும் கூறலாம்.

தன்னாட்டு வன்முறை அல்லது உள்நாட்டு வன்முறை என்பது அரசியல், சமயம், குமுகம், இனம் அல்லது சுற்றுச்சூழல் இயல்பு போன்ற உள்நாட்டுத் தாக்கங்களிலிருந்து மேலும் கருத்தியல் இலக்குகளுக்காக தனியர்கள்,  குழுக்களால் செய்யப்படும் வன்முறை, குற்றச் செயல்கள்.

பன்னாட்டு வன்முறை என்பது வெளிநாட்டு வன்முறைக் குழுக்களால் அல்லது வன்செயல் ஆதரவு நாடுகளால், ஈர்க்கப்பட்ட அல்லது அவற்றுடன் தொடர்புடைய தனியர் அலலது குழுக்களால் மேற்கொள்ளப்படும் வன்செயல்கள்; பிற நாட்டு வன்முறைக் குழுக்களுடன் தொடர்புடையவர்களின் வன் செயல்கள்.

வன்செயல்களுக்கான திட்டமிடல், பரப்புரையும் குண்டு வெடிப்பு, கொலை, கொள்ளை, தொடரிகளைக் கவிழ்த்தல் போன்ற வன்முறைகளை விளைவிப்பதால் வன் செயலே.

இங்கு Act என்பதன் பயன்பாட்டுப் பொருள் செயல் என்பதாகும்.

– இலக்குவனார் திருவள்ளுவன்

(தொடரும்)

பயன்பாட்டு அடிப்படையில் கலைச்சொற்கள் 5/7 – இலக்குவனார் திருவள்ளுவன்

 

ஃஃஃ     இலக்குவனார் திருவள்ளுவன்      11 February 2024      அகரமுதல

(பயன்பாட்டு அடிப்படையில் கலைச்சொற்கள் 4/7 – இலக்குவனார் திருவள்ளுவன்- தொடர்ச்சி)

பன்னாட்டுத் தமிழ்மொழி பண்பாட்டுக் கல்விக் கழகம்

சென்னை வளர்ச்சிக் கழகம்

தமிழ்நாடு திறந்த நிலைப் பல்கலைக்கழகம்

முதல் உலகத் தமிழ் வளர்ச்சி மாநாடு

பயன்பாட்டு அடிப்படையில் கலைச்சொற்கள்

5/7

Act of bad faith – நம்பிக்கை வஞ்சச் செயல்

தீங்கெண்ணச் செயல்

நம்பிக்கை வருவதுபோல் வஞ்சகமாக நடந்து கொண்டு ஏமாற்றும் இரண்டகச் செயல்.

இங்கு Act என்பதன் பயன்பாட்டுப் பொருள் செயல் என்பதாகும்.

Act of bad faith for benefit of a person without consent – ஒருவரின் ஆதாயத்திற்காக இசைவின்றிச் செய்யப்படும் தீச் செயல்

ஒருவர், தனக்கு அல்லது தன்னைச் சார்ந்தவருக்கு ஆதாயம் ஏற்படுவதற்காகத் தீய நோக்குடன் செய்யும் செயல்.

இங்கு Act என்பதன் பயன்பாட்டுப் பொருள் செயல் என்பதாகும்.

Act of conveyance – மாற்றளிப்புச் செயல்

உடைமையின் உரிமைப்பட்டயம், உரிமை,  நலன்களை ஒருவரிடமிருந்து மற்றொருவருக்கு மாற்றுதல்.

இங்கு Act என்பதன் பயன்பாட்டுப் பொருள் செயல் என்பதாகும்.

Act of cruelty – கொடுஞ்செயல்

மனிதர்களுக்கோ பிற உயிரினங்களுக்கோ வலி, துன்பம், ஊறு, உயிரிழப்பு நேர்விக்கும் வன்மையான செயல்.

ஒரு பெண்ணிற்கு அவள் கணவனோ கணவனின் உறவினர்களோ கொடுமை இழைத்தால் மூன்று ஆண்டுகள் வரை நீட்டிக்கக்கூடிய சிறைத்தண்டனை, ஒறுப்புத் தொகை விதிக்கப்படும். (இ.த.தொ. பிரிவு 498.அ.)

சட்டப்புறம்பான கோரிக்கை மூலமோ தாங்க இயலாக கொடுமை இழைப்பின் மூலமோ பெண்ணின் மரணத்திற்கு அல்லது தற்கொலை முயற்சிக்குக் காரணமானவர்கள், உயிரிழப்பிற்குக் காரணமான அல்லது கொலை முயற்சிக்கான குற்றமிழைத்தவர்களே. கணவனைக் கொடுமைப்படுத்தினால் அதற்குக் காரணமானவர்களுக்கும் இது பொருந்தும். விலங்குகளுக்குக் கொடுமை இழைப்பதிலிருந்து காப்பாற்ற விலங்குகள் மீதான வன்கொடுமைத் தடுப்புச் சட்டம், 1960(The Prevention Of Cruelty To Animals Act, 1960) உள்ளது.

இங்கு Act என்பதன் பயன்பாட்டுப் பொருள் செயல் என்பதாகும்.

Act Of God –இயற்கைச் செயல்

இறைமைச் செயல் / தெய்வச் செயல்

நிலநடுக்கம், கடல்கோள், போன்ற இயற்கைச் சீற்றங்களால் ஏற்படும் பேரிடர் அலலது பெருமிழப்பு. இவை மக்களின் கட்டுப்பாட்டிற்கு அப்பாற்பட்டதாக உள்ளதால் இறைமைச் செயல் அல்லது இயற்கைச் செயல் எனப்படுகிறது.

இங்கு Act என்பது செயல் என்னும் பொருளில் வந்துள்ளது . Act என்பதைச் சட்டம் என்று கையாள்வதை விடச் செயல் என்பதே ஏற்றதாகும்.

இயற்கை இடர்களையெல்லாம் சட்டமாகக் கூறுவது பொருந்தாது அல்லவா?

Act of grace – அருட் செயல்

சட்டச் செயற்பாடு அல்லது தண்டிப்பு நோக்கில் மட்டும் செயலபடாமல் பரிவுக் கண்ணோட்டத்துடன் குற்றவாளியை அணுகுவது அருட் செயலாகும்.

இங்கு Act என்பதன் பயன்பாட்டுப் பொருள் செயல் என்பதாகும்.

Act of honour – நன்மதிப்புச் செயல்

நன்மதிப்புச் செயலுக்குக் குந்தகம் விளைவிக்கும் வண்ணம் பேசுவதும் செயற்படுவதும் தண்டிப்பிற்குரிய குற்றமாகும்.

இங்கு Act என்பது செயல் என்னும் பொருளில் வந்துள்ளது.

Act Of Indemnity – இழப்பீட்டுச் செயன்மை

இழப்பீட்டு ஒப்பந்தம்; வழுவேற்புச் செயன்மை

ஈட்டுறுதிச் செயல் எனச் சிலர் குறிப்பது தவறு. இங்கே act என்பது செய் சட்டத்தை > செயன்மையைக் குறிக்கிறது; செயலை அல்ல.

வாக்குறுதியளிப்பவரின் அல்லது வேறு ஒருவரின் நடவடிக்கையால்  ஏற்படும் இழப்பிலிருந்து மற்றவரைக் காப்பாற்ற ஒரு தரப்பினர் உறுதியளிக்கும் ஒப்பந்தம் இழப்பீட்டு ஒப்பந்தம் எனப்படுகிறது.

இழப்பீடுகள் ‘தீங்கற்ற ஒப்பந்தங்கள்’ என்றும் குறிப்பிடப்படுகின்றன.

மற்றொரு தரப்பினரால் ஏற்படும் இழப்புகள், சேதங்கள் அல்லது கடன் பொறுப்புகளுக்கு இழப்பீடு வழங்கும் ஒப்பந்தங்கள் இழப்பீட்டு ஒப்பந்தங்கள் என்றும் கூறலாம்.

சட்டத்திற்குப் புறம்பானவையாக நிகழ்பவற்றைச் சட்ட முறையாக்கவோ பொதுப்பணியாற்றுங்கால் தொழில்நுட்ப அளவில் சட்டத்தை மீறிச் செயற்படுவோருக்குத் தண்டனையிலிருந்து அல்லது ஒறுப்புத் தொகையிலிருந்து விலக்களிப்பதற்கோ இயற்றப்படும் சட்டம்  வழுவேற்புச் செயன்மை எனப்படுகிறது. வழுவமைப்புச் சட்டம் எனச் சிலர் குறிப்பிடுவதைவிட வழுவேற்புச் செயன்மை என்பதுதான் சரியாக இருக்கும்.

இந்த ஒரே தொடரே பயன்படும் இடத்திற்கு ஏற்பச் செயன்மை, ஒப்பந்தம், எனப் பொருள் கொள்ளப்படுகிறது.

Act of insolvency – நொடிப்புச் செயன்மை / நொடிப்புச்  செயல்

நொடிப்பு நிலை குறித்த சட்டம் நொடிப்புச் செயன்மை.

நொடிப்பு என்பது பொருளறு நிலை – பொருள் இல்லாமல் அற்றுப்போன நிலை – யாகும்.

நடைமுறையிலுள்ள சட்டப்படி ஒருரை நொடித்தவராகத் தீர்ப்பளிப்பதற்குரிய யாதேனும் ஒரு செயல் நொடிப்புச் செயலாகும்.

திவால் என்பது உருதுச்சொல்.

நொடிப்பொழுது அல்லது கணப்பொழுது எடுக்கப்படும் திரைக்காட்சியை(screen shot)யும் நொடிப்பு என்பர்.

இங்கு Act என்பதன் பயன்பாட்டுப் பொருள் செயன்மை / செயல் .

act of law – சட்ட விதியம்

விதியத்திற்கான சட்டம்

சட்ட விளைவுச் செயல்

சட்ட நடவடிக்கை, சட்டச் செயல் என்கின்றனர். இங்கே  act என்பதைச் செயல் அல்லது நடவடிக்கை என்னும் பொருளில் பார்க்கக் கூடாது. Act என்பது சட்ட அமைப்பால் – நாடாளுமன்றம் அல்லது சட்டமன்றத்தால் – செயப்படும் சட்டம் > செயன்மை.  Law  என்பது சட்டத்தை நிறைவேற்றுவதற்குரிய ஒழுங்குமுறை விதிகளை அரசு இயற்றுவது. எனவே (சட்ட)விதியம் எனலாம்.

 உரியவரது இசைவின்றியே  சட்டம் செயற்படுவதன் மூலம் ஓர் உரிமை எழுதல், அழிதல் அல்லது மாறுதல் என்பதைக் குறிப்பது சடட விளைவுச் செயல் ஆகும்.

இங்கு Act என்பதன் பயன்பாட்டுப் பொருள் விதியம் என்பதாகும்.

– இலக்குவனார் திருவள்ளுவன்

(தொடரும்)

பயன்பாட்டு அடிப்படையில் கலைச்சொற்கள் 4/7 – இலக்குவனார் திருவள்ளுவன்

 

ஃஃஃ     இலக்குவனார் திருவள்ளுவன்      04 February 2024      அகரமுதல

(பயன்பாட்டு அடிப்படையில் கலைச்சொற்கள் 3/7 – இலக்குவனார் திருவள்ளுவன் – தொடர்ச்சி)

பன்னாட்டுத் தமிழ்மொழி பண்பாட்டுக் கல்விக் கழகம்

சென்னை வளர்ச்சிக் கழகம்

தமிழ்நாடு திறந்த நிலைப் பல்கலைக்கழகம்

முதல் உலகத் தமிழ் வளர்ச்சி மாநாடு

பயன்பாட்டு அடிப்படையில் கலைச்சொற்கள்

4/7

Act Done Under Colour Of Office

பதவியைச் சாக்கிட்டு எதனையும் செய்தல் / பதவியின் உருவில்  அதிகாரப் போர்வைச் செயல்

எத்தகைய அரசாங்கப் பொறுப்பும் இல்லாத ஒருவர், ஒரு பொது ஊழியராகப் பணிபுரிவதாக நடிப்பதும் குற்றமாகும். அப்படிப் பொறுப்பில் இல்லாத போது, பொறுப்பில் உள்ள ஒரு பொது ஊழியரைப் போல் ஆள் மாறாட்டம் செய்வதும் குற்றமாகும். இப்படிப் பொறுப்பில் இருப்பது போல நடித்து எத்தகைய செயல் செய்தாலும் அல்லது செய்ய முயன்றாலும் குற்றமாகும்.

இ.த.தொ.பிரிவு 170 இன் கீழ் இக்குற்றம் ஈராண்டு வரை சிறைத்தண்டனை அல்லது ஒறுப்புத் தொகை அல்லது இரண்டும் சேர்த்து விதிக்கப்படும் தண்டனைக்குரியது.

ஒரு பொது ஊழியர், தனக்குரியதல்லாத பொறுப்பில் இருப்பதாக நடித்துத் தவறான அதிகாரத்தைச் செயல்படுத்துவதும் தண்டனைக்குரிய ஆள்மாறாட்டமே.

இதனைக் குறிப்பதே இத்தொடர். இங்கு Act என்பதன் பயன்பாட்டுப் பொருள் செயல் என்பதாகும்.

Act Done Without Criminal Intent And To Prevent Other Harms  –

குற்ற நோக்கின்றியும் பிற தீமைகளைத் தடுப்பதற்காகவும் செய்யப்படும் செயல்

இந்தியத் தண்டிப்புத் தொகையம், பிரிவு 81 இன்படி தீங்கு நேர்விக்கும் செயல், ஆனால், தீங்கு விளைவிக்கும் எந்தக் குற்ற நோக்கமுமின்றி அச்செயல் செய்யப்பட்டிருப்பின் அது குற்றமாகாது என்கிறது. இச்செயல் நன்னோக்கத்தில், தனியருக்கோ உடைமைக்கோ தீங்கு நேர்வதைத் தவிர்ப்பதாகவோ தடுப்பதாகவோ இருக்க வேண்டும்.

எடுத்துக்காட்டாகத் தீ பரவி வரும் இடத்தில், அத்  தீ பிற இடங்களில் பரவுவதை, அதனால் பிற உயிருக்கோ உடைமைக்கோ தீங்கு நேர்வதைத் தடுக்கும் நோக்கத்துடன்,  அந்த இடத்திலோ அருகிலோ உள்ள வீட்டிலுள்ளவரை/ வீட்டில் உள்ளவர்களை அல்லது உடைமைகளை வெளியே இழுத்துப் போட்டாலும்  அதனால் தனியருக்கோ உடைமைக்கோ சேதம் ஏற்பட்டாலும் அது குற்றமாகாது.

இங்கு Act என்பதன் பயன்பாட்டுப் பொருள் செயல் என்பதாகும்.

Act, Entitled to – செயற்பாட்டு உரிமையர் / செயற்பாட்டுத்  தகுதியர்

உரிமைக்குரிய சட்டம் என்று குறிப்பது தவறாகும். உரிமையுரை சட்டம் என்று வேண்டுமானால் சொல்லலாம்.

இங்கு Act என்பதன் பயன்பாட்டுப் பொருள் ‘செயற்பா(ட்)டு’ என்பதாகும்.

Act in his application to a district – உரிய மாவட்டத்திற்குரிய செயற் பயன்பாடு

மாவட்டத்திற்குப் பொருந்தும் வகையிலான செயல் என்பதைக் குறிக்கிறது. இதனை உரிய மாவட்டத்திற்குரிய செயற் பயன்பாடு எனலாம்.

இங்கு Act என்பதன் பயன்பாட்டுப் பொருள் செயற் பயன்பாடு என்பதாகும்.

Act in his  discretion, to – சதுரப்பாட்டிற்குரிய செயல்

மனத்தேர்விற்குரிய செயல் என்பர்.

குடியரசுத்தலைவர், ஆளுநர், முடிவெடுக்க வேண்டிய நிலையில் உள்ளவர்கள், முடிவெடுக்க இயலாச் சூழல் இருக்கும் பொழுது மனத்தேர்விற்கேற்பச் செயல்பட உரிமையுடையவர்கள். விருப்புரிமை என்பது விருப்பு வெறுப்பு அடிப்படையிலான முடிவு எனப் பொருள்பட வாய்ப்பு உள்ளது. விருப்புரிமை என்றால் விருப்பம்போல் அல்லது ஒற்றையா இரட்டையா பார்ப்பதுபோல் முடிவெடுக்க இயலாது. அறிவுக்கூர்மையைப் பயன்படுத்தியே தன்முடிவைத் தெரிவு செய்ய வேண்டும்.  எனவே, சதுரப்பாடு எனக் குறிக்கப்பட்டது.

இங்கு Act என்பதன் பயன்பாட்டுப் பொருள் செயல் என்பதாகும்..

discretion என்பது விருப்பப்படித் தீர்மானிக்கும் உரிமையை  விருப்புரிமையைக் குறிக்கிறது. உசிதம் என்னும் திசைச்சொல்லும் இதற்கு ஏற்றதே.

discertion எனச் சில நூலில் இடம் பெற்றுள்ளது அச்சுப்பிழையாகும்.

Act in operation – செயற்பாட்டிலுள்ள சட்டம்

வெவ்வேறு காலக்கட்டத்தில் ஒரு பொருள் குறித்துச் சட்டங்கள் இயற்றப்பட்டுள்ள நேர்வில் நடைமுறையில் உள்ள சட்டத்தைக் குறிப்பது.

சட்டம் காலாவதியாகவில்லை. நடைமுறைப் பயன்பாட்டில் உள்ளது என்பதைக் குறிப்பது.

இங்கு Act என்பதன் பயன்பாட்டுப் பொருள் சட்டம் என்பதாகும்; செயன்மை என்னும் பொருளிலும் பயன்படுத்தப்படுகிறது.

operation என்பதைப் பொதுவாக அறுவை மருத்துவம் அல்லது அறுவைப் பண்டுவம்(சிகிச்சை) எனப் பொருள் கொள்கிறோம். எனினும் சட்டத்துறையில் நடவடிக்கை அல்லது செயற்பாடு எனப் பொருளாகிறது.

Act judicially – நீதித்துறைச் செயன்மை

வெவ்வேறு துறைகளுக்கான சட்டங்கள் இயற்றப்படுகின்றன. இங்கே நீதித்துறைச் செயற்பாட்டிற்காக இயற்றப்படும் செயன்மைகளைக் குறிக்கிறது.

இங்கு Act என்பதன் பயன்பாட்டுப் பொருள் செயன்மை என்பதாகும்.

Act making an offence – குற்றம் விளைவிக்கும் செயல்

குற்றம் விளையக் காரணமாகும் எச்செயலும்.

சட்டம், வழக்காறு, விதி போன்றவற்றை மீறல் அல்லது குலைத்தல் குற்றம் நேரக் காரணமாவதால் குற்றச் செயலாகிறது.

இங்கு Act என்பதன் பயன்பாட்டுப் பொருள் செயல் என்பதாகும்.

Act of a child under seven years of age – ஏழு அகவைக்குட்பட்ட குழந்தையின் செயல்

இந்தியத் தண்டிப்புப் தொகுப்பு, பிரிவு 82 இன்படி 7 அகவைக்குட்பட்ட குழந்தையின் செயல் எதுவும் குற்றமாகாது. எத்தீங்கும் செய்ய மாட்டாமை(doli incapax) என்னும் இலத்தீன் தொடரில் இருந்து இக்கருத்தாக்கம் உருவானது.

இங்கு Act என்பதன் பயன்பாட்டுப் பொருள் செயல் என்பதாகும்.

Act of a person of unsound mind – மன நலமற்றவரின் செயல்

செயலின் தன்மையைப் புரிந்து கொள்ள இயலாத அல்லது தான் செய்யும் செயல் தீங்கானது அல்லது சட்டத்திற்கு முரணானது என உணர்ந்து கொள்ள இயலாத சூழலில் மன நலம் குன்றியவர் செய்யும் எச்செயலும் குற்றமாகாது என இந்தியத் தண்டிப்புத் தொகுப்பு, பிரிவு 84 கூறுகிறது.

இங்கு Act என்பதன் பயன்பாட்டுப் பொருள் செயல் என்பதாகும்.

– இலக்குவனார் திருவள்ளுவன்

(தொடரும்)

பயன்பாட்டு அடிப்படையில் கலைச்சொற்கள் 3/7 – இலக்குவனார் திருவள்ளுவன்

 

ஃஃஃஃ    இலக்குவனார் திருவள்ளுவன்      28 January 2024      அகரமுதல

(பயன்பாட்டு அடிப்படையில் கலைச்சொற்கள் 2/7 – இலக்குவனார் திருவள்ளுவன் – தொடர்ச்சி)

பன்னாட்டுத் தமிழ்மொழி பண்பாட்டுக் கல்விக் கழகம்

சென்னை வளர்ச்சிக் கழகம்

தமிழ்நாடு திறந்த நிலைப் பல்கலைக்கழகம்

முதல் உலகத் தமிழ் வளர்ச்சி மாநாடு

பயன்பாட்டு அடிப்படையில் கலைச்சொற்கள் 3/7

Instrument – ஆவணம் / பத்திரம்

instrument – கருவி என்பதே பொதுவழக்கில் பயன்படுத்தப்படும் சொல்லாகும்.

துணைப்பொருள், கருவியாக உதவும் சாதனம், கருவியாகப் பயன்படுபவர், கையாள், இசையொலி எழுப்பும் சாதனம், ஒப்பந்தப்பத்திரம், பதிவேடு, இசைக்கருவிக்குரிய பாடற்பகுதி அமை, துணைக்கலம்; கருவியாகப் பயன்படுதல், உபகரணம்; கருவி, பத்திரம், துணைக்கலம், கருவியாகப் பயன்படுதல், முறை ஆவணம், இயற்றனம், முட்டு, வித்து, கதி, இரும்பு, துப்பு, ஆயுதம், கரணம், படை, இயற்கை, எத்தனம், உடல், கருவிக்கருத்தன், ஆய்தம், எலிவாலரம் எனப் பல பொருள்களை அகராதிகளில் காணலாம்.

சட்டப்படி செயற்படுத்துவதற்குரிய சட்டங்கள், உடன்படிக்கைகள் முதலியவற்றைப் பதிவு செய்யும் சட்டப்படியான ஆவணமே இது. இது தொடர்புடைய சட்ட உரிமைகள், கடமைகள் ஆகியவற்றைப் பாதுகாக்கிறது.  எனவே, நேர் பொருளாகத் தெரிய வரும் கருவி என்பதற்கு மாற்றாக பயன்பாட்டிற்கேற்ப ஆவணம் அல்லது பத்திரம் எனலாம்.

Indian penal code – இந்தியத் தண்டிப்புத் தொகையம்

Indian penal code என்பதை இந்தியக் குற்றவியல் தொகுப்புச் சட்டம், இந்தியக் குற்றத் தண்டனை விதித்தொகுப்பு, இந்தியத் தண்டனைத் தொகுப்புச்சட்டம், இந்தியக் குற்றவியல் சட்டம், இந்திய ஒறுப்புமுறைச் சட்டத்தொகுப்பு என்கின்றனர்.

 criminal procedure code என்பதைக்  குற்றவியல் நடைமுறை விதித்தொகுப்பு, குற்றவியல் நடைமுறைத் தொகுப்பு என்கின்றனர்.  Indian penal code என்பதையும் இந்தியக் குற்றவியல் சட்டம் என்னும் பொழுது குழப்பம் நேர்கிறது.

 code என்றால், விதித்தொகுப்பு, குறிமுறை, ஒழுங்குமுறை, குழூஉக்குறி, நெறிமுறைத் தொகுப்பு, குறியம், குறி முறை நெறித் தொகுப்பு, குறியீடு என்கின்றனர்.  சட்டநெறி, முறைநெறி,  குறியீட்டெண், குறிப்பீடு, ஒழுங்குமுறை என இப்பொழுது குறிக்கின்றனர். மரத்தின் அடிப்பகுதி அல்லது தண்டையும் குறிக்கும். மரத்தின் அடிப்பகுதியில் மெழுகு தடவி எழுதப் பயன்படுத்தினர். எனவே, code என்பது எழுத்தையும் குறிக்கலாயிற்று. பின் எழுத்துகளின் தொகுப்பையும் குறித்தது.

ஒரு சொல்லிற்கு ஒரு பொருள்தான் வழங்க வேண்டும். ஆனால், பயன்பாட்டு அடிப்படையில் வெவ்வேறிடங்களி்ல் வெவ்வேறு பொருள் வருவதால் பல சொற்கள் அமைகின்றன. எனினும் குறிப்பிட்ட நேர்வில் குறிப்பிட்ட சொல்லிற்கு ஒரே ஒரு பொருளையே வரையறுத்துக் கொள்ள  வேண்டும்.

editing என்பதைத் தொகுப்பு என்பதால் இங்கே அதனைப் பயன்படுத்துவதைத் தவிர்க்க வேண்டும். தொகுக்கப்பட்ட நூல்களை நாம் தொகை என்கிறோம். எனவே, தொகுக்கப்படும் விதிகளை அல்லது சட்டங்களை நாம் தொகை என்றே கூறலாம். இந்த இடத்தில் தொகை என்றால் பணத்தொகை (amount) எனக் கருதக்கூடாது. ஆனால் தொகை என்பதை  amount எனக் கருதலாம். எனவே, தொகையம் எனலாம்.

penal என்றாலும் punishment என்றாலும் நாம் தண்டனை என்றே குறிக்கிறோம். எனவேதான் Indian penal code   என்றால் இந்தியத் தண்டனைச் சட்டம் என்கிறோம். அகராதிகளில் penal -தண்டனைக்குரிய என்னும் பொருள் தரப்படுகிறது. punishment என்பது தண்டனையைக் குறிக்கிறது. எதற்கு எவ்வாறு தண்டிக்க வேண்டும் என்பதை வரையறுப்பது penal ஆகும். எனவே, இதனைத் தண்டிப்பு முறை > தண்டிப்பு எனலாம்.

எனவே,  Indian penal code – இந்தியத் தண்டிப்புத் தொகையம் எனலாம்.

Act – செயன்மை

அடுத்து act  என்னும் சொல் குறித்தும் இதனடிப்பிறந்த Action சொல் குறித்தும் பார்ப்போம்.

act   என்றால் பொதுவாக நடி, என்று பார்க்கிறாம். அகராதிகளில் act   என்பதற்குக்,

காரியம், செயல்படுதல், செயல், சட்டமன்றச் சட்டம், கட்டளைக்கோல், கட்டளைச்சட்டம், நடந்துகொள், செயலாற்று, பாசாங்கு செய், நாடகத்தில் நடி, வேறொருவருக்குப் பதிலாகப் பணிபுரி, நிகழ்ச்சி, பாராளுமன்றச் சட்டம், நாடகக் காட்சி, நாடகத்தில் நடித்தல், செய்தல், பாசாங்கு செய்தல், அவிநயம், அவினயம், நடிப்பு, நாடகக் களம்,  மாற்றாள் வேலை பார்த்தல், தற்காலிகமாகப் பணிபுரிகிற செயல், செயல் தூண்டும் செயற்குறிப்பு, வழக்கு நடவடிக்கை, இயக்கம், செயலாற்றத் தூண்டு, செயற்படுத்தல், சுறுசுறுப்பான, செயலாற்றும் திறமையுள்ள, விரைவாகச் செல்லும் திறமையுள்ள, விழிப்பான, சுறுசுறுப்பாக, செய்வினை, கொள்கைகளைச் செயற்படுத்து, இணங்க நடந்துகொள், தாக்குதல், சட்டகை, செயலுறல், பணியாற்று, வினையாற்று, செய்கை; செயல், சட்டம் செய்சட்டம், தொழில், அமல், செய், செய்காரியம், கள்ளத்தொழில், அங்கம், செய்கை, வினை, கிரியை, கம், கிருத்தியம், செயல், சட்டம், நாடகக் களம் (வி), செய், நடி, எனப் பல  பொருள்கள் கூறப்படுகின்றன.

இவற்றுள் சட்டம் என்பதே சட்டத்துறையில் பயன்படுத்தப்படுவது.

law  என்றாலும் சட்டம் என்கிறோம். இதனால் act- செய்சட்டம் என இப்போது கூறுகின்றனர்.

Act என்பது செயலைக் குறிப்பது. செய்யவேண்டியது அதன் முறைமை முதலானவை பற்றி இயற்றப்படுவதே சட்டப்படிச் செய்ய வேண்டியதைக் குறிப்பதாகும். எழுத்துவடிவிலான சட்டம் யாவும் செய்சட்டம்தான். எனவே பொதுவான அச்சொல்லால் குறிப்பதைத் தவிர்க்கலாம். சட்டப்படிச் செய்யவேண்டிய செயலைக் குறிப்பதால் செயன்மை எனலாம்.

Tamilnadu Children Act – தமிழ்நாடு சிறார் செயன்மை

Probationers of offenders Act – குற்றவாளிகள் நன்னடத்தைச் செயன்மை

என்பனபோல் பயன்படுத்தினால் செயன்மை என்பது எளிய சொல்லாக மாறிவிடும். இரட்டைச் சொல்லைத்தவிர்கக் வேண்டும் என்பதற்காகவே இவ்வொற்றைச் சொல்லைப் பயன்படுத்த வேண்டும்.

– இலக்குவனார் திருவள்ளுவன்

(தொடரும்)

பயன்பாட்டு அடிப்படையில் கலைச்சொற்கள் 2/7 – இலக்குவனார் திருவள்ளுவன்

 

ஃஃஃ     இலக்குவனார் திருவள்ளுவன்      21 January 2024      அகரமுதல

(பயன்பாட்டு அடிப்படையில் கலைச்சொற்கள் – இலக்குவனார் திருவள்ளுவன் – தொடர்ச்சி)

பன்னாட்டுத் தமிழ்மொழி பண்பாட்டுக் கல்விக் கழகம்

சென்னை வளர்ச்சிக் கழகம்

தமிழ்நாடு திறந்த நிலைப் பல்கலைக்கழகம்

முதல் உலகத் தமிழ் வளர்ச்சி மாநாடு

பயன்பாட்டு அடிப்படையில் கலைச்சொற்கள் 2/7

Alimony-துணைமைப்படி/துணைமைத் தொகை

ஊட்ட உணவு, ஊட்டச்சத்து, ஊட்டமளித்தல் என்னும் பொருள் கொண்ட alimōnia  என்னும் இலத்தீன் சொல்லில் இருந்து alimony சொல் வந்தது.

வாழ்க்கைப்படி, பேணற்படி, ஊட்டம், வாழ்க்கைப் படி, பிரிமனைப் படி, வாழ்க்கைப்படி, வாழ்க்கைப் பொருளுதவி, வாழ்க்கைப் படி. சீவனாம்சம் எனப் பலவாறாகச் சொல்லப்படுகிறது. சீவனாம்சம் தமிழல்ல. பொதுவாகக் கணவன் பிரியும் நிலைக்கு மனைவிக்குத் தரும் வாழ்க்கைப்படியாக உள்ளது.

மணவிலக்கிற்குப் பின்னர், மனைவியின் உண்டி, உறையுள்,  உடை  பிற தேவைகளை நிறைவேற்றுவதற்காக உதவும் தொகை. மனைவியுடன் குழந்தை அல்லது குழந்தைகள் இருப்பின் அவர்களுக்கும் சேர்த்து வழங்கப்டுவது.

எனினும் சில நேர்வுகளில் மனைவியும் கணவனுக்குப் பேணல்படி வழங்கும் நிலையும் உள்ளது.

துணையைப் பிரிந்து வாழ்தல் அல்லது மணவிலக்கு பெற்று வாழ்தல்  என்னும் ஒப்பந்த அடிப்படையில் துணைவருக்கு அல்லது முன்னாள் துணைவருக்குக் கொடுக்கப்பட வேண்டியது என நீதிமன்றத்தால் வரையறுக்குப்படும் தொகையாகும்.

குறைந்த வருவாய் அல்லது வருமானமின்மையால் துணைவர் அல்லலுறக்கூடாது என்பதற்காக இது வழங்கப்படுகிறது.

பொதுவாக வாழ்க்கைத் துணைவர் ஒருவர் இல்லற வாழ்க்கையிலிருந்து பிரியும் பொழுது  மற்றொரு துணைவருக்கு அளிப்பது என்பதால் துணைமைப்படி எனலாம். படி என்று சொல்வதன் காரணம் திங்கள் தோறும் அளிக்கப்படுவதால். ஒட்டு மொத்தத் தொகை ஒரே தவணையில் வழங்கினால் துணைமைத் தொகை எனலாம். 

divorce என்றால் மண முறிவு அல்லது மண விலக்கு என்னும் பொருள்களிலேயே பார்க்கிறோம். 1990களில் ஒரு பையன் தன் பெற்றோரிடம் இருந்து divorce கேட்டு வழக்கு தொடுத்தான். அப்பொழுதுதான் உறவு முறிவு அல்லது உறவு விலக்கு என்பதே பொருத்தமாக இருக்கும் என்று தோன்றியது. இத்தகைய நேர்வில் வழங்கப்படும் படி பேணற்படியாகும். எனினும் வாழ்க்கைக்குத் துணையாகச் செலவுத் தொகையாக அல்லது பேணல் தொகையாக வழங்கப்டுவதால் துணைமைப்படி என்பதை இதற்கும் பொருத்தமாகக் கருதலாம்.

alibi, plea of – அயலிருப்பு   முறைப்பாடு

alibī என்னும் இலத்தீன் சொல்லில் இருந்து உருவானது.  இதன் பொருள்கள் வேறோர் இடத்தில் அல்லது மற்றோர் இடத்தில் என்பனவாகும்.

வேற்றிட வாதம் என்கின்றனர்.  அயலிடத்தில் இருப்பதாகத் தெரிவிப்பதால் alibi – அயலிட இருப்பு > அயலிருப்பு எனலாம். குற்றம் நடந்ததாகச் சொல்லப்படும் நேரத்தில் குற்றத்திற்குத் தொடர்பில்லாத அயலிடத்தில் இருந்ததாக முறையிடுவதால் அயலிருப்பு முறையீடு ஆகிறது.

வழக்குரை, வேண்டுகோள், வேண்டுதல், எதிருரை, வாதுரை, சுர, நியாயம், வழக்கு, முறையீடு, வழக்கு, இரைஞ்சல், முறையீடு, வழக்குரை, வாதம், இரைஞ்சல், பிராது, புகார் எனப் பலவும் plea  என்பதற்குத் தமிழில் பயன்படுத்தப்படுகின்றன.

இவற்றுள் பிராது என்பது உருதுமொழியி்ல் இருந்து வந்த சொல்.

பிற  Plaint,  request, Rejoinder, complaint போன்ற பிற சொற்கள் வரும் இடங்களில் பயன்படுத்தப்படுவதால் முறைப்பாடு எனலாம்.

குற்றஞ் சாட்டப்படுநர், அல்லது குற்றவாளி என ஐயப்படுபவர், குற்றம் நடந்த இடத்தில், குற்றம் நிகழ்ந்த நேரத்தில் இல்லை என முறையிடுவதே அயலிட முறைப்பாடு >  அயலிருப்பு முறைப்பாடு

குற்றவழக்குச்சட்டத்தின்படிக் குற்றம் நடந்த இடத்தில்  தான் இல்லை என மெய்ப்பிக்க வேண்டிய பொறுப்பு குற்றஞ் சாட்டப்பட்டவருடையதே.

 amicus curiae, amica curiae – ஆற்றுநர்

amicus curiae  ஆண் உதவியாளரையும்   amica curiae பெண் உதவியாளரையும் குறிக்கிறது.

amīcus, cūria, cūriae என்னும் இலத்தீன் சொற்களின் பொருள்கள் முறையே நண்பன், நீதி மன்றம், நீதிமன்றத்தின் என்பனவாகும்.

amica என்பது பெண் உதவியரைக் குறிக்கும். பால் வேறுபாடின்றி இருபாலினரையும் நீதிமன்ற உதவுநர் எனலாம். நீதிமன்றத்தில் நீதியை எடுத்துக்கூறும் நடுநிலை அறிவுரையாளர் என்பர்.

 சட்ட வழக்கில் தரப்பினராக இல்லாமல், முறைமன்றத்திற்குத் தகவல், வல்லமைக் குறிப்பு அல்லது நுண்ணறிவை  வழங்கி உதவும் தனியாள் அல்லது அமைப்பு.  எனினும் மன்ற உதவுநர் கருத்தைக் கருதிப்பார்க்க வேண்டுமா இல்லையா என்பது முறைமன்றத்தின் முடிவுரிமைக்கு உட்பட்டது.

ஆனால், உதவியாளர்/ உதவுநர் என்னும் பொழுது அலுவலகப் பணிக்கான உதவியாளா் அல்லது எழுத்துப்பணிக்கான உதவியாளர் எனப்பொருள் கொள்ளவே நேரிடும். ஏனெனில் அலுவலக உதவியாளர்,இளநிலை உதவியாளர், உதவியாளர் எனப் பதவிகள் உள்ளன. எனவே, அவர்களிலிருந்து வேறுபடுத்த வேறு சொல் கையாள வேண்டும்.

ஆற்றுதல் என்பது வழிகாட்டி உதவுவதைத் குறிக்கும். எனவேதான் அவ்வாறு வழிகாட்டும் நூலை ஆற்றுப்படை என்றனர்.

    “ஒருவீ ரொருவீர்க் காற்றுதிர்”  என்கிறார் காவிரிப்பூம்பட்டினத்துக் காரிக்கண்ணனார் (புறநானூறு 58, அடி 20,) இவ்வாறு உதவுதல் என்னும் பொருளில் வந்தாலும் வழிநடத்துதல் என்னும் பொருளே மிக்கிருக்கிறது.

அறத்தாற்றின் இல்வாழ்க்கை ஆற்றின் புறத்தாற்றில்

போஒய்ப் பெறுவ தெவன் என்கிறார் திருவள்ளுவர் (திருக்குறள் 46)

அறத்தாற்றின் – அறவழியில், இல்வாழ்க்கை ஆற்றின் – இல்லறத்தை நடத்திச் சென்றால் எனப் பொருள்கள்.

ஆற்றின் – ஆற்றுதல் – வலியடைதல்; கூடியதாதல்; போதியதாதல்; உய்தல், உவமையாதல்; செய்தல், தேடுதல், உதவுதல், நடத்துதல், கூட்டுதல், சுமத்தல், பசி முதலியன தணித்தல்; துன்பம் முதலியன தணித்தல்; சூடு தணித்தல்; ஈரமுலர்த்துதல்; நூல் முறுக்காற்றுதல்; நீக்குதல் எனப்பொருள்கள்.

எனவே, வழி நடத்துநரை ஆற்றுநர் எனலாம்.

எனவே, முறை மன்றத்தில் வழக்கு தொடர்பான வழி நடத்துவதற்காக ஆற்றுப்படுத்துபவரை ஆற்றுநர் எனலாம். எனவே, முறைமன்ற ஆற்றுநர் > முறை யாற்றுநர் > ஆற்றுநர் எனலாம். ஆண் பெண் இருபாலராக இருப்பினும் ஆண் உதவியாளர் பெண் உதவியாளர் என்பதுபோல் குறிக்காமல் ஆற்றுநர் என்றே குறிப்பிடலாம்.

– இலக்குவனார் திருவள்ளுவன்

(தொடரும்)