தேர்தல் ஆணையமே! முடிவை மாற்றிக்கொள்! – இலக்குவனார் திருவள்ளுவன்

அகரமுதல 190, வைகாசி 28, 2048 / சூன் 11, 2017

இலக்குவனார் திருவள்ளுவன்      11 சூன் 2017      கருத்திற்காக..

தேர்தல் ஆணையமே! முடிவை மாற்றிக்கொள்!

  பா.ச.க.வின் கைப்பாவையாக இந்தியத் தேர்தல்ஆணையம் செயல்படுவது அனைவரும் அறிந்ததே! இதன் காரணமாகத் தமிழ்நாட்டின்  ஆட்சியில் தடுமாற்றமும் தமிழக அரசியலில் குழப்பமும் ஏற்பட்டுள்ளன. கட்சிகளில் பிளவு என்பது ஒன்றும் புதியதல்ல. ஆனால், கட்சியின் தலைமையை முடிவு செய்பவர்களாக மக்கள்தாம் இருந்துள்ளார்கள்! தேர்தல் ஆணையம் அல்ல! பேராய(காங்கிரசு)க் கட்சியில் பிளவு பட்ட பொழுது இந்திரா காந்தியின் தலைமைக்கு  ஏற்பளித்தவர்கள் மக்கள்தாம், தேர்தல் ஆணையம் அல்ல!

  தி.மு.க.வில் பிளவு வந்தபொழுது அதிமுகவிற்கு ஏற்பளித்தவர்களும் மக்கள்தாம்! தேர்தல் ஆணையம் அல்ல! தி.மு.க.வில் வைகோ நீக்கத்தால் கட்சி உடைந்த பொழுது தி.மு.க.வின்பக்கம் ஏற்பை வழங்கியவர்கள் மக்கள்தானே தவிரத் தேர்தல் ஆணையமல்ல. பிற மாநிலக் கட்சிப்பிளவுகளுக்கும் இது பொருந்தும்.

  தேர்தல் ஆணையத்தின் அதிகார  வரம்பிற்குள் வரக்கூடாத இது வந்து விட்டது. அப்பொழுதும் உ.பி.யில் தந்தை மகன் பிரிந்து பட்டு நின்ற பொழுது தேர்தல் ஆணையம்,  மக்கள்ஆதரவு யார் பக்கம் என ஊகத்தின் பெயரிலோ ஊடகத்தின் இட்டுக்கட்டிலோ சிக்காமல் பொறுப்பாளர்கள் யார் பக்கம் நின்றார்களோ அவர்பக்கம்தான் தீர்ப்பு வழங்கியது.

  தமிழ்நாட்டில் மாறுபட்டநி்லைமைக்குக் காரணம்,  தேர்தல் ஆணையம் பா.ச.க.வின் கட்டுப்பாட்டிற்குள் வந்ததுதான் என்பது வெள்ளிடை மலை. இது குறித்த செய்திகள்  வந்த பின்னரும் தேர்தல் ஆணையர்கள் வெட்கப்படவில்லை!

  தேர்தல் ஆணையம் குறுக்கிட்டிருக்காவிட்டால் இராதாகிருட்டிணன் நகர் இடைத் தேர்தல் நடந்திருக்கும். இரட்டை இலையைப்பறித்தும் தொப்பி செல்வாக்கு பெற்றிருக்கும்! தினகரன் வெற்றி பெற்றிருப்பார்!  ஆனால், பா.ச.க. கலங்கியிருக்கும்.  இதனைத் தாங்கிக் கொள்ள அடிமைகளுக்கு மனமிருந்திருக்காதே!  ஆனால், தமிழக அரசு தடுமாற்றத்தில் சிக்கியிராது.

  தேர்தல் ஆணையம் கடமையைச் சரியாகச் செய்து அத்து மீறலை  அரங்கேற்றியிருக்காவிட்டால், பொதுத்தேர்தலில் அ.தி.மு.க. வெற்றி வாய்ப்பை இழந்திருக்க வாய்ப்புண்டு! ஆனால் அப்பொழுது வெற்றிக்கனியைத்தி.மு.க.தானே சுவைத்திருக்கும்! பா.ச.க அல்லவே!

  ஒரு வேளை, ஈழத்தமிழர் படுகொலைகளுக்குக் காரணமான தி.மு.க.-பேராய(காங்.)கூட்டணி வெறுப்பு; செயலலிதாவின் வழி எனச் சொல்லிக் கொண்டாலும் அவருக்கு மாறாகக் காட்சிக்கு எளிமை, இதனால், கோப்புகளில் தேக்கமின்மை, திட்டங்களில் சுறுசுறுப்பு போன்றவற்றால் அ.தி.மு.க. மீண்டும் ஆட்சியைத் தொடர்ந்திருக்கும். அப்பொழுதும் பா.ச.க.விற்குப் பயனில்லையே!

 தமிழ்நாட்டு முதன்மைக் கட்சியினரை  மிரட்டியும் ஒடுக்கியும்  மறைமுக ஆட்சி புரியவும் முறையற்ற பேரத்தால் கணிசமான தொகுதிகளைப் பெற்றுச் சட்ட மன்றத்தில் நுழையவும் பா.ச.க. கச்சிதமாகத் திட்டமிட்டுச் செயல்படுகிறது. அதற்கு மத்திய அரசின் துறைகளைப் பயன்படுத்துகிறது. தேர்தல் ஆணையமும் அதற்குத் துணைபுரிகிறது.

  பா.ச.க.வின் குறுக்கு முயற்சிகள் அதனைச் சரிவுப்பாதையில்தான் தள்ளும். அதன்  அசைவிற்கெல்லாம் தேர்தல் ஆணையம் ஆடுவது சரியல்ல.

    ஆக்கம் கருதி முதலிழக்கும் செய்வினை

    ஊக்கார் அறிவுடை யார். (திருவள்ளுவர், திருக்குறள் 463)

என்பது உலகப் பொது நெறி!

படிச்சவன் சூதும் பாவமும் பண்ணினால்,

போவான், போவான், ஐயோவென்று போவான்!

 என்கிறார் புரட்சிப்புலவர் பாரதியார்.

அது மட்டுமல்ல! அதிகாரத்தைப் பயன்படுத்தி வஞ்சகம் புரிபவர்கள்

நலிந்து போவார்கள்! நாசமாய்ப் போவார்கள்!

நாதியற்றுப் போவார்கள்! நரகத்திற்குப் போவார்கள்!

என்பது  அறவோர் கருத்து.

இவற்றைத் தேர்தல்  ஆணையத்திற்கு யாரும் எடுத்துச் சொன்னால் நன்று.

  தேர்தல் ஆணையம் தான் செய்த தவற்றைத் திருத்திக் கொள்ள வாய்ப்பு உள்ளது. இப்பொழுது அ.தி.மு.க.வின் பெரும்பான்மை அணியினரும் மீச்சிறுபான்மை எண்ணிக்கையினரும் ஆவணப்பத்திரங்களை அளிப்பதாக நூறாயிரக் கணக்கில் பத்திரங்களை அளித்து வருகிறார்கள். பொதுவாகவே தேர்தல் வழக்கு என்று வந்தாலே மறு தேர்தல் வரையும் தீர்ப்பு வராமையே நம் நாட்டு வழக்கம். ஆனால், இந் நேர்வில் வாணாள் முடிவதற்குள் தீர்ப்பு சொல்ல முடியுமா எனத் தெரியவில்லை. எனவே, ஒவ்வோர் ஆவணத்தையும் சரியார்ப்பதற்குப் போதிய வாய்ப்பு இல்லை என்பதை ஒப்புக்கொண்டு இப்போதைய நிலையே தொடரட்டும்! மக்கள் தேர்தல் மூலம்உரிய நடவடிக்கை எடுக்கட்டும் என்று அறிவித்தால் போதும்.

 ஆவணங்களைச் சரிபார்க்கவும், தொடர்பாக இனி வரும் முறையீடுகளை உசாவவும் இப்பணிகளை மட்டுமே பார்க்கத்தான் தேர்தல் ஆணையத்திற்கு நேரமிருக்குமே  தவிரப் பிற வேலைகளைப் பார்க்க இயலாது எனக் கூறித் தேர்தல் ஆணையம் ஒதுங்கிக் கொள்வது அதற்கும் நல்லது! நாட்டிற்கும் நல்லது! தன்னைத் திருத்திக் கொள்ள நல்வாய்ப்பாகக் கருதித் தேர்தல் ஆணையம், மக்களாட்சியின் மாண்பைக் காக்கட்டும்!

– இலக்குவனார் திருவள்ளுவன்

மரபு விளையாட்டுகளைப் பாடத்திட்டத்தில் சேர்க்க வேண்டும்! – இலக்குவனார் திருவள்ளுவன்

அகரமுதல 190, வைகாசி 28, 2048 / சூன் 11, 2017

இலக்குவனார் திருவள்ளுவன்      11 சூன் 2017      கருத்திற்காக..

மரபு விளையாட்டுகளைப் பாடத்திட்டத்தில் சேர்க்க வேண்டும்!

 செல்வம் புலனே புணர்வு விளையாட்டு என்று

அல்லல் நீத்த உவகை நான்கே

(தொல்காப்பியர்,  தொல்காப்பியம், மெய்ப்பாட்டியல் 11)

எனத் தொல்காப்பியர், துன்பம் போக்கும் உவகைகளில் ஒன்றாக விளையாட்டைக் குறிப்பிட்டுள்ளார். இப்பொழுது நம் நாட்டில் விளையாட்டில் ஆர்வம் காட்டி வந்தாலும் வல்லவர்களை உருவாக்கும் வண்ணம் போதிய கருத்து செலுத்துவதில்லை. புதிய விளையாட்டுகளில் கருத்து செலுத்தும் நாம் மனத்திற்கும் உடலுக்கும் வலுவைச்சேர்க்கும் பரம்பரை விளையாட்டுகளைப் புறக்கணிக்கின்றோம். அவ்வாறில்லாமல் மரபு விளையாட்டுகளுக்கு முதன்மை அளிக்க வேண்டும்.

  பள்ளிக்கல்வித்துறையில் பல்வேறு மாற்றங்கள் நிகழ்ந்து வருவது மகிழ்ச்சிக்குரியது. இவற்றுள் ஒன்றாகப் பள்ளிகளில் மரபு விளையாட்டுகளைச் சேர்ப்பதும் ஒன்றாக இருக்க வேண்டும். பாடத்திட்டத்தில் மரபு விளையாட்டுகள் பெயர்களையும் விளையாடும் முறைகளையும்  வகுப்பிற்கேற்ப சேர்த்துக் கற்பிக்க வேண்டும்.

  கல்வி வாழ்க்கை தொடங்கும் பொழுதிருந்தே விளையாட்டுகளை ஆடும் வகையில் விளையாட்டுப் பாடங்கள் இருத்தல் வேண்டும்.

சிறுவர், சிறுமி விளையாட்டுகள்,

மகளிர் விளையாட்டுகள்

ஆடுவர் விளையாட்டுகள்

இரு பாலர் விளையாட்டுகள்

முதியோர் விளையாட்டுகள்

நீர் விளையாட்டுகள்

மனையக வியைாட்டுகள்

வீர விளையாட்டுகள்

ஆடற்கலை சார்ந்த விளையாட்டுகள்

எனப் பல வகைகளாகப் பிரிக்கலாம்.

  பழந்தமிழர் விளையாட்டுகள் என்றால் எப்பொழுதோ விளையாடிய விளையாட்டு என்று எண்ண வேண்டாம்.  பழந்தமிழர் விளையாட்டுகள் என்றாலும் கடந்த நூற்றாண்டு தொடக்கத்திலும் விளையாடப்பட்ட விளையாட்டுகள் இவை.  செக்கிழுத்த செம்மல் தமிழறிஞர் வ.உ.சிதம்பரனார் அவர்கள், தாம் ஆடிய விளையாட்டுகளாகப் பல விளையாட்டுகளைக் குறிப்பிட்டிருப்பார். அவ்வாறு கடந்த நூற்றாண்டில் பள்ளியில் சிறாருக்கேற்ற மரபார்ந்த விளையாட்டுகள் பயிற்றுவிக்கப்பட்டன.

  காலங்காலமாக நாம்ஆடிவந்த விளையாட்டுகளில்  சிலவற்றைப் பார்க்கலாம்.

  இவை மட்டுமல்ல, வீர விளையாட்டுகள் முதலான தலைப்புகளின் கீழ் நாம் பார்த்தால்  மேலும் நூற்றுக்கணக்கான விளையாட்டுகளை அறிய இயலும்.

  இவற்றுள் இளஞ்சிறார் விளையாட்டுகளைத் தொடக்கத்தில் கற்றுத்தர வேண்டும். உச்சரிப்பு விளையாட்டு, வினா விடை விளையாட்டு முதலான மொழி சார்விளையாட்டுகள், மாணாக்கர்களின் அறிவுத்திறனையும் நிறைவாற்றலையும் வளர்ப்பன. அவற்றைத் தொடக்கப்பள்ளியிலேயே கற்றுத் தர வேண்டும். மாணாக்கர்களின் அகவைக்கேற்ற விளையாட்டுகளைப் பகுத்து விளையாட்டுப் பயிற்சி அளிக்கப் பள்ளிக்கல்வித்துறை ஆவன செய்ய வேண்டும்.

  விளையாட்டு என்பது  உடற்பயிற்சிக்கானதும் பொழுதுபோக்கிற்கானது மட்டுமன்று. வாணாள் முழுவதும் சிறப்பு  தரும் கல்வியுமாகும்.

  அக்கல்வியைத் தரும் தமிழக அரசு, மரபு விளையாட்டுகளுக்கு முதன்மை அளிக்க வேண்டுகிறோம்

    ஒருமைக்கண் தான்கற்ற கல்வி ஒருவற்கு

    எழுமையும் ஏமாப் புடைத்து. (திருவள்ளுவர், திருக்குறள் 396)

அன்புடன் இலக்குவனார் திருவள்ளுவன்

இதழுரை அகரமுதல 189, வைகாசி 28, 2048 / சூன் 11, 2017

நன்றி: சிறகு மின்னிதழ், பனிவெளி வலைப்பூ, விக்கிபீடியா, http://rinakhan1990.blogspot.com/2012/10/blog-post_3.html

அமைதியின் காரணம் ஆழ்மனத் துயரமோ? – இலக்குவனார் திருவள்ளுவன்

அகரமுதல 189, வைகாசி 21, 2048 / சூன் 04, 2017

இலக்குவனார் திருவள்ளுவன்      04 சூன் 2017      கருத்திற்காக..

அமைதியின் காரணம்  ஆழ்மனத் துயரமோ?

சொலல் வல்லர் சோர்விலர் இன்று

சொல்லவும் இயலவில்லை! சோர்வும் விடவில்லை!

கலைஞர்களைத் தன்  சொல்லோவியங்களால் உருவாக்கிய

கலைஞர் கருணாநிதியின் சொல்ல முடியா

அமைதியின் காரணம் ஆழ்மனத் துயரமோ?

ஆட்சிச்சிறையில் இல்லாத பொழுது

உரிமையுடன் முழங்க முடிந்தது!

சிறைச்சாலையைப் பூஞ்சோலையாய்க் கருத முடிந்தது!

தமி்ழ் தமிழ் என்று தாளமிட முடிந்தது!

ஆட்சியில் குமுக நலன்களுக்குத் தீர்வு கண்டு

பெண்ணுரிமை பேண முடிந்தது!

சமத்துவம் காண முடிந்தது!

ஆரியத்துடன் இணையவும் முடிந்தது!

அன்னைத்தமிழை மறக்கவும் முடிந்தது!

கல்விநிலையங்களில் விரட்டப்படும் தமிழால்

வெல்லும் தமிழ் இல்லாது போனது!

பயன்பாட்டு நிலையில் தமிழை இழந்து

துயர்பட்டுப்போனாள் தமிழன்னை!

செல்வச்சங்கிலியில் பிணைப்புண்டு போனமையால்,

செல்வத்தமிழைப் பிணைத்ததோர்  அவலம்!

தொப்புள்கொடியினரை மறந்ததோர் அவலம்!

தப்பறியா மக்களை அடக்கியதோர் அவலம்!

இத்தனை அவலத்தால் ஆழ் மனம்அழுகிறதோ!

முசிபூர் இரகுமானாய் மகிழ்ந்தது ஒரு காலம்!

அமைதிப்படையை ஏற்காதது ஒரு காலம்!

தனி்யாட்சி  கேட்டு முழங்கியது ஒரு காலம்!

இத்தனைக்காலமும் கனவாய்ப்போனது இக்காலம்!

ஈழத்தமிழருக்காகக் குரல் கொடுத்தது ஒரு காலம்!

ஈழத்தமிழருக்காகச் சிறை சென்றது ஒரு காலம்!

ஈழத்தமிழருக்காகப் பதவி இழந்தது ஒரு காலம்!

இத்தனைக் காலமும் கனவாய்ப்போனதும் ஒரு காலம்!

பாசங்கொண்டு மக்கள் நலம்கண்டவர்

பாசம்மிகுந்து தன்மக்களையே போற்றினார்!

பாசச்சங்கிலியில் பிணைத்துக் கொண்டமையால்

பாசம் தமிழர் மீது இல்லாமல் போனதே!

பாசம்போனதால் பதைபதைத்துப் போனாரோ!

பாசத்தைத் தொலைத்ததால் துயருற்றுப் போனாரோ!

ஒரு வேளை உணவை ஒத்தி வைத்ததை

ஓருணர்வும் இன்றி உண்ணாநோன்பு என்றாரே!

கொலைகளைக் கண்டால் கொதித்தெழுபவர்

கொலைகாரப்பேயைத் தங்கத்தாய் என்றாரே!

போரில் இறத்தல்  இயற்கை என்றதற்குப் பொங்கியவர்

பாரில் இனப்படுகொலையை நிலையாமை என்றாரே!

தன்சொல் கேட்கத் தரணி காத்திருந்தும்

தன் சொல் மறந்து அழிவிற்குத் துணைபோனாரே!

எல்லாம் சேர்ந்து உள்ளத்தை அழுத்தியதோ!

சொல்ல மறந்து சோர்வுறச்செய்தனவோ!

மன்னிப்பு கேட்க ஒருமனம் துடித்து,

மன்னிப்பு கேட்காதே என மறுமனம் அடித்து

உள்ளமும் உள்ளமும் சண்டையிட்டதால்

உள்ளம் அழுது உரைக்க மறந்ததோ!

தோழனாய் எண்ணியவர்க்குக்

காலனாய் மாறியதால்

காலனுக்கு அஞ்சி

நாளும் அழுகிறாரோ!

மன்னிப்பு கேட்காவிட்டாலும்

மன்னித்து விட்டோம்!

மன்பதை காக்க

மனம் திறந்து பேசுக!

கழுவாய் காண

எழுவீர் எழுச்சியுடன்

இனியேனும்  தமிழ் காக்கும்

துணிவோடு ஈழம்காக்கும்

தன்னிகரில்லாத் தலைவனாய்

மீண்டு வருக! மீண்டும் வருக!

அன்புடன் இலக்குவனார் திருவள்ளுவன்

இதழுரை: அகரமுதல 189, வைகாசி 21, 2048 / சூன் 04, 2017