சட்டச் சொற்கள் விளக்கம் 501-510 : இலக்குவனார் திருவள்ளுவன்

 

ஃஃஃ     இலக்குவனார் திருவள்ளுவன்      17 July 2024      அகரமுதல

(சட்டச் சொற்கள் விளக்கம் 491-500 : இலக்குவனார் திருவள்ளுவன்-தொடர்ச்சி)

சட்டச் சொற்கள் விளக்கம் 501-510

501. acknowledge, doctrine of – ஒப்புகைக் கோட்பாடு

இசுலாமியர் சட்டத்தில் இது தந்தைமை ஒப்புகையைக் குறிக்கிறது.

மகவேற்புச்சட்டத்தில், ஏற்கப்பெற்ற குழந்தையின் பெற்றோரிடையே சட்டபூர்வச் சேர்க்கை இரு்நததாகக் கருதுவதன்அடிப்படையில் ஒப்புகைக் கோட்பாடு உள்ளது. இருப்பினும் உரிய குழந்தையின் பெற்றோரிடையே சட்டபூர்வச் சேர்க்கையின்றித் தகாப் புணர்ச்சியிலோ பரத்தமையிலோ பிறந்ததாயின் இது பொருந்தாது.

502. acknowledgement – ஏற்கை

ஒப்புகை

பெறுகை ஒப்பம்
ஒப்புகைசீட்டு
ஏற்றுக்கோடல்

ஒன்றின் முதன்மையை அல்லது சிறப்பை அல்லது ஒருவரின் நன்றிக்குரிய செயற்பாட்டை ஏற்பது.

ஒப்புகையையும் குறிக்கும்; பெற்றுக்கொண்டேன் என ஒப்புகையின் அடையாளமாகக் கையொப்பம்/கைநாட்டு இடுவதையும் குறிக்கும்; பெற்றதற்கான ஒப்புகையைத் தெரிவிக்கும் சீட்டையும் குறிக்கும்.

சட்டத்தில் ஒப்புகை என்பது தகுதிறமுள்ள அலுவலர் அல்லது நீதிமன்றத்தினர் முன்னிலையில் ஒப்பாவணத்தையோ முறையாவணத்தையோ நிறைவேற்றுவதாகத் தெரிவிக்கும் உறுதியுரை யாகும்.

எதையாவது இருப்பதை அல்லது உண்மையை ஏற்றுக்கொள்வது, அங்கீகரிப்பது, உறுதிப்படுத்துவது அல்லது ஒப்புக்கொள்வது.

வரம்புச் சட்டம் 1963, பிரிவு 18 வரம்புக் காலம் நீட்டிக்கப்படுவதற்கு மாற்றாக,ஏற்கெனவே உள்ள பொறுப்பை ஏற்றுக்கொள்வதைக் குறிக்கிறது.

ஒப்புதல் அளித்தல் எனக் கருதி ஒப்பளிப்பு எனக் குறிக்கின்றனர். அவ்வாறு சொல்வது Sanction என்று தவறாகக் கருத இடமளிக்கும்.

காண்க: Acknowledge

503. Acknowledgement Of allegiance or adherence to a foreign state – அயல் நாட்டுடன் பற்றுறுதி அல்லது பற்றுமை கொண்டிருத்தல்

அயல்நாட்டிற்குக் கடமைப்பட்டவர்கள் அல்லது பற்றுறுதியுடன் உள்ளவர்கள் இந்திய நாட்டின் நாடாளுமன்ற அவை எதிலும் உறுப்பினராக முடியாது. இந்திய அரசியல் யாப்பு 102 ஆம் பிரிவு 1.ஈ. அயல்நாட்டுடனான பற்றுறுதியை ஏற்பவர் நாடாளுமன்ற எந்த அவையிலும் உறுப்பினராக இருக்க முடியாது என்கிறது.

504. Acknowledgement Of Consent – உடன்பாட்டு ஒப்புகை

ஒப்புகையும் ஒப்புதலும் பிணைப்பத்திரத்திலும் இணை உடன்படிக்கையிலும் இணைக்கப்பட்ட படிவத்தில் கடன் ஆவணங்களில் உள்ள கூட்டுக் குறிப்பீடாகும்.

505. Acknowledgement Of Debt- கடன் ஒப்புகை

கடனொப்புகை
கடனை ஒப்புதல்

கொடுக்கப்பட வேண்டிய கடன் நிலுவையை அல்லது கடன் பொறுப்பு உண்டென்று எழுத்து மூலமாக ஒப்புக் கொள்ளுதல்.

அலுவல் முறை ஆவணம், அதில் யாரோ ஒருவருக்கு ஒரு குறிப்பிட்ட தொகையைச் செலுத்த வேண்டியிருப்பது தெரிவிக்கப்படுகிறது. சான்றாக நுகரப்படும் எரிவாயுக்கான கடனை ஒப்புக்கொள்கையில் கையெழுத்திடும் போது, வாடிக்கையாளர் இறுதிப் பணம் செலுத்தும் வரை காலத்தாழ்ச்சிக்கான வட்டி பெறப்படும்.

506. Acknowledgement Of Legitimacy, Doctrine Of – முறைமைப் பிறப்பு ஒப்புகைக் கோட்பாடு

முறைமணப் பிறப்பு ஒப்புகைக் கோட்பாடு

முறைமைப் பிறப்பு என்பது சட்டமுறையான திருமண உறவில் நேரும் மகப்பேற்றினைக் குறிக்கிறது.

திருமணத்திற்கு நேரடி ஆதாரம் இருக்கும் பொழுது அத்திருமண உறவில் பிறக்கும் குழந்தைக்கு ஒப்புகை தேவையில்லை. நேரடி ஆதாரம் இல்லையென்றால் மறைமுக ஆதாரம் போதுமானது. இதுவே ஒப்புகை எனப்படுகிறது.

முறைமைப் பிறப்பில் ஐயப்பாடு எழும் நேர்வுகளில் மட்டுமே முறைமைப்பிறப்பு ஒப்புகைக் கோட்பாடு பயன்தேவையாகும்.

507. Acknowledgement Of Liability – கடப்பாட்டு ஒப்புகை
பொறுப்பு ஒப்புகை

பொறுப்படைவு, பொறுப்புப் பரிமாற்றம், கடப்பாடு, பொறுப்பு,
கடன் பொறுப்பு, கடன் திருப்புப் பொறுப்பு, சட்டக்கடப்பாடு,
கடன் தொகை செலுத்தும் கடப்பாடு, கொடுக்க வேண்டியவை, தொகை செலுத்தும் பொறுப்பு

கடன்பாடு, கடம்பாடு, கடப்பாடு, கடன் திருப்புப் பொறுப்பு என liability என்பதற்குப் பல பொருள்கள். இத்தகைய பொறுப்பை ஒப்புக்கொள்வதையே இது குறிக்கிறது.

இதன் உட்கிடை, ஒப்புக் கொள்பவர், உரிய உடைமையின் / சொத்தின் உரிமையாளராக இருக்கிறார் என்பதாகும்.

உடைமையின் உரிமையல்லாத அயலர், சொத்தின் பயனுரிமை குறித்து அறிக்கை வெளியிட்டால், சொத்திற்குச் சொந்தமானவராகவோ ஏற்பிற்குரியவராகவோ இல்லாத காரணத்தால், ஒப்புகை தர இயலாது. – நல்லதம்பி நாடார் செல்லக் கண்ணு எதிர் அம்மாள் நடச்சி செல்லத்தங்கம் வழக்கு 26.07.1963

508. Acknowledgement Of Paternity – தந்தைமை ஒப்புகை

ஒப்புகை என்பது ஒன்றின் இருப்பை ஏற்பது அல்லது ஒப்புக் கொள்வது;

தந்தைமை என்பது ஒருவரின் தந்தையாக இருக்கும் நிலையைக் குறிப்பது.

தந்தைமையின் ஏற்பு என்பது மணமாகாத் தாயாலும் தந்தையாலும் குழந்தையின் தந்தை நிலையை அடையாளம் காட்டும் சட்ட ஆவணமாகும்.
மணமான தந்தை தாயரிடையே இத்தகைய சிக்கல் எழாது. எனினும் தாயை ஒழுக்கக் கேடாகக் குறிப்பிடும் ஐய நேர்வுகளிலும் தந்தைமை அடையாளம் காட்டப்பட வேண்டியுள்ளது.

509.Acknowledgement Of Payee – பெறுநர் ஒப்புகை

தொகை பெறுபவர் ஒப்புகை

எதன் பொருட்டாவது வழங்கப்பெறும் தொகையை அதற்குரியவர் பெற்றுக் கொண்டதற்குத் தரும் ஒப்புகை.

ஊதியம், மிகை ஊதியம், விடுப்பு ஊதியம் போன்ற ஊதிய வகைகள் அல்லது தொடர்பான பணத்தைப் பெற்றுக் கொண்டதற்கான ஒப்புதலாகவோ பொருளின் விலை அல்லது முன்பணத்தைப் பெற்றுக் கொண்டதற்கான ஒப்புதலாகவோ வைப்புத்தொகை, வட்டி போன்ற ஏதேனும் ஒரு தொகை அல்லது கடன் பெறும் பொழுது அல்லது கடனைத் திருப்பித் தரும் பொழுது கடன்பத்திரத்தில் முழுத் தொகை அல்லது பகுதித் தொகை பெற்றுக் கொண்டதற்கான ஒப்புதலாகவோ, அதனைப் பெறுபவர் பெற்றுக்கொண்டமையை ஒப்புக்கொள்ளும் ஒப்புகையாகவோ அல்லது எதன் பொருட்டேனும் பணத்தைப் பெற்றுக் கொண்டதாகத் தரப்படும் ஒப்புதலாகவோ இருக்கலாம்.

510.Acknowledgement of Service-
சேர்ப்பு ஒப்புகை

அழைப்பாணை அல்லது பிற வழக்காவணம் ஒருவரிடம் சேர்க்கப்பட்டதும் அதனைப் பெற்றதற்கான ஒப்புகை அளித்தல்.

இந்த இடத்தில் பெற்றுக்கொண்டதற்கான ஒப்புகை என்பதை விட நீதிமன்றம் உரிய ஆவணத்தைச் சேர்த்ததா இல்லையா என்பதே முதன்மையாகிறது. எனவே, பெறுகை ஒப்புகை எனக் குறிக்காமல் சேர்ப்பு ஒப்புகை எனப்படுகிறது.

மடல், ஆணை, அறிவிக்கை அல்லது பிற அலுவலாவணத்தை மற்றவருக்குச் சேர்ப்பதைச் சார்வு என்பர். எடுத்துக் காட்டாக,
service by post : அஞ்சல்வழிச் சார்வு, அஞ்சல்வழிச் சேவை
service of summons : அழைப்பாணை சார்வு செய்தல்
எனலாம். எனவே, சார்வு ஒப்புகை என்றும் சொல்லலாம். எனினும்
dependency : சார்வு எனப்படுவதால் இங்கே தவிர்க்கப்பட்டுள்ளது.

(தொடரும்)

இலக்குவனார் திருவள்ளுவன்

சட்டச் சொற்கள் விளக்கம் 491- 500 : இலக்குவனார் திருவள்ளுவன்

 

            ஃஃஃ     இலக்குவனார் திருவள்ளுவன்      15 July 2024      அகரமுதல

(சட்டச் சொற்கள் விளக்கம் 481-490 : இலக்குவனார் திருவள்ளுவன்-தொடர்ச்சி)

சட்டச் சொற்கள் விளக்கம் 491- 500

491. Achromatic (achromatically)	எழுதப்பெறா   வாய்மொழியான எழுத்தில் வராததான நிறமற்ற சாயல் மற்றும் செறிவு இல்லா   இச்சொல் சட்டத்தில் எழுத்தாவணமற்ற வாய்மொழிக் கூற்றைக் குறிக்கிறது. எனவே, எழுதப்பெறா ஆவணம் எனலாம்.
492. Acid	எரி நீர்மம் எரிமம்   புளிமம் காடிப் பொருள்   அமிலம்     இந்தியத் தண்டனைச் சட்டம், 1860 குற்றவியல் சட்டம் (திருத்தச்) சட்டம், 2013 இன் பிரிவு 326(ஆ) இன் விளக்கம் 1 இன் கீழ், எரிமம்  பின்வருமாறு வரையறுக்கப்பட்டுள்ளது: ” காடித்தன்மை அல்லது அரிக்கும் தன்மை அல்லது எரியும் தன்மை கொண்ட எந்தப் பொருளும், உடல் காயத்தை உண்டாக்கும் திறன் கொண்டது; வடுக்கள் அல்லது சிதைவு அல்லது தற்காலிக அல்லது நிரந்தர ஊனம் ஏற்படுத்துவது”.
493. Acid attack	எரிமத்தாக்குதல்   எரிமத் தாக்குதல்கள் / எரிமம் என்ற சொற்கள் “(எரிமவழிக்) குற்றங்களைத் தடுக்கும்  சட்டம் 2008” (பெண்களுக்கான தேசிய ஆணையம் – முன் வரைவு)  மூலம் வரையறுக்கப்பட்டுள்ளது. “எரிமத்தாக்குதல்” என்பது, ஒருவர் மற்றவருக்கு நிலையான அல்லது பகுதியளவு சேதம் அல்லது சிதைவு அல்லது சிதைவை ஏற்படுத்தக்கூடும் என்ற நோக்கத்துடன் அல்லது தெரிந்தே அவர் உடல் மீது எந்த வகையிலும் எரிமத்தை (அமிலத்தை) வீசுவது அல்லது எரிமத்தைப் பயன்படுத்துவது. பிரிவு 326 அ, நிலையான  அல்லது பகுதியளவு தீங்கு, சிதைவு, உருக்குலைவு, தீக்காயங்கள் அல்லது இயலாமை ஆகியவற்றை வேண்டுமென்றே ஏற்படுத்த  எரிமத்தை வேண்டுமென்றே பயன்படுத்துவதைக் குறிக்கிறது   ‘நிருபயா’ கூட்டு வன்புணர்ச்சி வழக்கு, 2013இல் நீதிபதி வருமா ஆணைய அறிக்கையைத் தொடர்ந்து, ஒன்றிய அரசு இந்திய தண்டனைச் சட்டத்தில் திருத்தம் செய்து, எரிம வீச்சுகளைத் தனி குற்றமாக அங்கீகரித்து குறைந்தது 10 ஆண்டுகள் தண்டனையும், அதிக அளவு ஆயுள் தண்டனையும் விதிக்க வகைசெய்யப்பட்டது.   பாதிக்கப்பட்டவரின் மருத்துவச்செலவை ஈடுகட்டும் வகையில் இழப்பீட்டுத் தொகையை ஒறுப்புத் தொகையாக விதிததலும் ஆகும்.   இந்தியத் தண்டிப்புத் தொகுப்பு, பிரிவு 326 (ஆ) இன் கீழ்த் தானாக முன்வந்து எரிமத்தை  வீசுவது அல்லது வீச முயல்வது குற்றமாகும். குற்றவாளிக்கு குறைந்தது  ஐந்து ஆண்டுகள் சிறைத்தண்டனை விதிக்கப்படும், அஃது ஏழு ஆண்டுகளாக அதிகரிக்கப்படலாம். ஒறுப்புத் தொகையும் விதிக்கலாம்.   குற்றவியல் நடைமுறைச் சட்டப் பிரிவு 357- (ஆ) பின்வருமாறு கூறுகிறது: “பிரிவு 357 (அ) இன் கீழ் மாநில அரசு செலுத்த வேண்டிய இழப்பீடு, இந்திய தண்டனைச் சட்டப் பிரிவு 326(இ) அல்லது பிரிவு 376(ஈ) இன் கீழ் விதிக்கப்படும் ஒறுப்புத் தொகையுடன் கூடுதலாக அரசும் இழப்பீடு செலுத்த வேண்டும். ”   குற்றவியல் நடைமுறைச் சட்டம் பிரிவு 357-(இ) பின்வருமாறு கூறுகிறது: மத்திய அரசு, மாநில அரசு, உள்ளாட்சி அமைப்புகள் அல்லது வேறு எந்த ஒருவராலும் நடத்தப்படும் அனைத்துப் பொது அல்லது தனியார் மருத்துவமனைகளும், இந்தியத் தண்டிப்புச் சட்டத்தின் பிரிவு 326(அ), 376, 376(அ), 376(ஆ), 376(இ), 376(ஈ) அல்லது பிரிவு 376(உ) ஆகியவற்றின் கீழ் வரும் எந்தவொரு குற்றத்திலும் பாதிக்கப்பட்டவர்களுக்கு உடனடியாக முதலுதவி அல்லது மருத்துவப் பண்டுவத்தை(சிகிச்சையை) இலவசமாக வழங்க வேண்டும்.
494. Acid oil	எரிம எண்ணெய்   காடி எண்ணெய் எரிம நெய் வழலை நெய்   தூய்மைப்படுத்து நிலைய எண்ணெய்   காடி எண்ணெய் தரங்குறித்து பல வழக்குகளில் தீர்ப்புகள் வழங்கப்பட்டுள்ளன,
495. Acid test	கடுந்தேர்வு   புளிம ஆய்வு, எரிமச்சோதனை என்பன நேர் பொருளாக இருந்தாலும் பயன்பாட்டில் கடுந்தேர்வு எனப் பொருள் படுகிறது.   தீத் தேர்வு(அக்கினிப் பரீட்சை) என்றும் சொல்லலாம்.   ஒப்பந்தங்களில் கடுந்தேர்வு(எரிம ஆய்வு):  மேட்சு எதிர் தலைமை வழக்குரைஞர்(Meates v Attorney-General)வழக்கில்  நீதிபதி குக்கின்(Cooke) கூற்றுப்படி, சலுகை, ஏற்பு அடையாளம் காண முடியாத ஒரு வழக்கில் கடுந்தேர்வு(எரிம ஆய்வு) என்பது, “இரு தரப்பிலும் உள்ள நியாயமான ஆட்களின் கண்ணோட்டத்தில் ஒட்டுமொத்தமாகவும் புறநிலையாகவும் பார்க்கும்போது, கொடுக்கல் வாங்கல்கள் ஒரு முடிவுற்ற பேரத்தைக் காட்டுகின்றனவா என்பதாகும்.”
496. Acidification	எரிமமாக்கம் காடியாக்கம்   பெருங்கடல் காடிமயமாக்கல் – கடல், அதன் வனவிலங்குகள், அவை வழங்கும் பொருட்கள், அவை வழங்கும் ஊழியங்களுக்குப் பெரும் அச்சுறுத்தலாக உள்ளது. பன்னாட்டுக் குமுகம் நிலையான வளர்ச்சி இலக்குகளின் ஒரு பகுதியாக கடல் காடிமயமாக்கலை ‘குறைக்கவும் சரி செய்யவும் நிவர்த்தி செய்ய’ உறுதியளித்துள்ள நிலையில், இஃது எவ்வாறு நிறைவேற்றப்பட வேண்டும் என்பது தெளிவாக இல்லை. குறிப்பாக இந்தச் சிக்கலைச் சமாளிக்க வெளிப்படையாக வடிவமைக்கப்பட்ட பன்னாட்டு  ஒப்பந்தங்கள் எதுவும் இல்லை.
497. Acido meter / acidimeter	எரிமமானி   காடிமானி புளிமமானி   ஒரு காடிக்  கரைசலின் ஒப்பீட்டு அடர்த்தியை அளவிடுவதற்கான ஒரு வகை நீர்மமானி.
498. Acifidifying agent	எரிம ஊக்கி   காடி ஊக்கி   காடியாக்கிகள் கனிம வேதிமங்கள் ஆகும். அவை ஒரு மனித (அல்லது பிற பாலூட்டி) உடலில் வைக்கப்படுகின்றன, அவை காடியை உருவாக்குகின்றன அல்லது காடியாக மாறுகின்றன.  இந்த வேதிமங்கள் உட்கொள்ளப்படும்போது வயிற்றில் இரைப்பைக் காடியின்  அளவை -திறன் நீரகம் அல்லது ஆற்றல் நீரகம் (pH=potential of hydrogen or power of hydrogen) அளவை அதிகரிக்கின்றன.
499. Acknowledge	ஒப்புகை   ஒப்புக்கொள் ஏற்றுக்கொள்   உண்மையென்று ஏற்றுக்கொள், ‘எனது’ என்று ஒப்புக்கொள். நன்றியோடு ஏற்றுக்கொள், பெற்றுக்கொண்டதைத் தெரிவி, பிறர் உடைமையை அல்லது உரிமையை ஒப்புக்கொள், சட்ட முறைப்படி ஒப்புக்கொள் என இடத்திற்கேற்பப் பொருள் படும்.   சட்டத்தில் ஒப்புதல் என்பது சட்டம் செல்லுபடி ஆவதற்குரிய ஒருவரின் சொந்தச் செயலின் அறிவிப்பு அல்லது ஏற்பு ஆகும். இது, தவறான ஆவணங்கள் அல்லது மோசடியான தண்டனைகளைப் பதிவதைத் தடுக்கும். சட்டப்படி பிணைப்பு / செல்லுபடியாகும் என ஏற்றுக்கொள்ளுதல்.    (யாரொருவராலோ) உரிமை கோரப்படுவதை ஏற்றுக்கொள் அல்லது அவரது அதிகாரத்தையும் அதிகாரத்தையும் ஏற்றுக்கொள். காண்க Acknowledgement
500. acknowledge due, by registered post	பதிவஞ்சல் ஒப்புகையுடன்   ஒருவருக்கு மடலை அல்லது ஆவணத்தை அல்லது வழக்குக் கேட்பு விவரத்தை அல்லது குற்ற உரையை அல்லது வாதுரையை அல்லது எதிர் வாதுரையை அல்லது அழைப்பாணையை அல்லது  ஏதேனும் ஒன்றை அஞ்சல் பெட்டியில் இடாமல் அஞ்சலகத்தில் அஞ்சற் பணியாளரிடம் பதிந்து அனுப்பிய பின், முகவரியாளரிடம் அது சேரும் பொழுது அதனைப் பெறுபவர் பெற்றதற்கு அடையாளமாக ஒப்புகையைக் கையொப்பமிட்டு அல்லது கைநாட்டிட்டுத் தெரிவிக்கும் அட்டையை இணைத்து அனுப்புதல்.

(தொடரும்)

இலக்குவனார் திருவள்ளுவன்

சட்டச் சொற்கள் விளக்கம் 481-490 : இலக்குவனார் திருவள்ளுவன்

 

ஃஃஃ     இலக்குவனார் திருவள்ளுவன்      12 July 2024      அகரமுதல

(சட்டச் சொற்கள் விளக்கம் 471-480 : இலக்குவனார் திருவள்ளுவன்- தொடர்ச்சி)

சட்டச் சொற்கள் விளக்கம் 481-490

481.  accusation	குற்றச்சாற்று குற்றச்சாட்டு   குற்றம் சுமத்தல்   சட்ட நடவடிக்கைக்குரிய தீங்கையோ குற்றத்தையோ ஒருவர் செய்திருக்கிறார் அல்லது சட்டப்படி செய்யவேண்டியதைச் செய்யாதிருக்கிறார் என அவர்மீது சாட்டுவதே குற்றச்சாட்டுரை அல்லது குற்றச்சாட்டுரை ஆகும். பொதுவாகக் குற்றஞ்சாட்டப்பட்டவரைக் குற்றவாளி என்றே எழுதியும் பேசியும் வருகின்றனர். குற்றஞ்சாட்டப்படுநரையும் குற்றம் மெய்ப்பிக்கப்பெற்றுத் தண்டனைபெற்ற தண்டனையரையும் இணையாகக் கருதக்கூடாது.
482. Accused appears to be in sound mind	உசாவலின்(விசாரணையின்) பொழுது  குற்றஞ்சாட்டப்பட்டவர் நல்ல மனநிலையில் இருப்பதாகத் தோன்றும் பொழுது………..   Accused  -ஐ எதிரி எனக் குறிக்கக்கூடாது. வழக்கில் எத்தகைய நிலையினர் எனக் குறிப்பிடத் தேவை யிருப்பின் எதிரர் எனலாம்.
483. Accused in any offense	எந்தக் குற்றத்திலேனும் குற்றம் சாட்டப்பட்டவர்   குறிப்பிட்ட குற்றம் அல்லது வழக்கு என்றில்லாமல் பொதுவாகக் குறிக்கப் பெறுபவர்.
484. Accused of any offence	ஏதாவது ஒரு குற்றத்திற்குக் குற்றம் சாட்டப்பட்டவர்   ஏதேனும் ஒரு குற்றத்திற்காகக் கைது செய்யப்பட்ட அல்லது முறையாகக் குற்றம் சாட்டப்பட்ட ஒருவர்
485. Accused/ Accused person	சாட்டாளர்   குற்றஞ்சாற்றப்பட்டவர், குற்றஞ்சாட்டப்பட்டவர்           குற்றம்சாட்டப்பட்ட ஆள்  (குற்றவழக்கில்) எதிரர்; குற்றம்‌ சுமத்தப்பட்டவர்‌   சாட்டாளர்(accused) என்னும் சொல் குற்ற வழக்கு நடைமுறைத்தொகுப்பு 1973இல் எங்கும் வரையறுக்கப்படவில்லை. எனினும் பொதுவாகச் சட்டமீறல் செய்பவராகக் கருதப்படுகிறது. என்றாலும் இருப்புப்பாதைச் சொத்து(சட்டமீறல் உடைமை) சட்டம் 1966, பிரிவு 8 குற்றஞ்சாட்டப்படும் ஆள்  குறித்துக் கூறுகிறது.   காண்க:     accusation- குற்றச்சாற்று
486. Accuser	சாட்டுநர் குற்றஞ்சுமத்துநர்   குற்றஞ்சாற்றுபவர் குற்றஞ்சாற்றுநர்     குற்றம் புரிந்தார் என மற்றொருவர்மீது சாட்டுரை செய்யும் ஒருவர்.   ஒருவர் அறமுறைக்கு மாறான, சட்டத்திற்கு எதிரான, இரக்கமற்றதான செயலைச் செய்ததாக அல்லது குற்றச்செயல் புரிந்ததாகக் குற்றஞ்சாற்றுபவர்.
487. Accustom	பழக்கு பயிற்று   ஒன்றை/ ஒரு சூழல் அல்லது நிலைப்பாட்டுக்குப் பழக்கமாக்கிக் கொள்வது அல்லது வழக்கமாக்கிக் கொள்வது.

488. Acetone – படிகநீர்மம்
 
நுண்ணுயிரி நீர்மம்
படிகநீர்மம் (அசிட்டோன் /Acetone) ஒரு கரிம வேதியியல் சேர்மமாகும்.

489. Achieve – செய்துமுடி
முயன்றுஅடை.
 
கடின உழைப்பாலும் திறமையாலும் ஒரு செயலைச் செய்துமுடிக்கும் அருவினையைக் குறிக்கிறது.

490. Achievement – செய்துமுடித்தல்
 
இலக்கு அடைவு
 
ஒன்றை முயன்று அடைந்து வெற்றி காணல்.
அருவினை(சாதனை) ஆற்றி முடித்தல்.

(தொடரும்)

இலக்குவனார் திருவள்ளுவன்

சட்டச் சொற்கள் விளக்கம் 461-470 : இலக்குவனார் திருவள்ளுவன்

 

இலக்குவனார் திருவள்ளுவன்      10 July 2024      No Comment

(சட்டச் சொற்கள் விளக்கம் 451-460 : இலக்குவனார் திருவள்ளுவன்- தொடர்ச்சி)

சட்டச் சொற்கள் விளக்கம் 461-470

461. accrue   –  உறு, சிறுகச் சிறுகத் தொகு

 சேர்வுறு

அடைவுறு

 சேர்ந்தடை

 வந்துறு

உரிமையாகு

உறு என்னும் சொல்லுக்கே மேற்குறித்த பொருள்கள் உள்ளன. இருப்பினும் உறுதல் என்பதை இணைப்புச்சொல்லாகவே பயன்படுத்துகிறாேம்.

திரட்டல் மூலம்  அல்லது  காலப்போக்கில் அல்லது நிதிப் பரிமாற்றம் காரணமாகப் பொருள் நிலை உயர்வது.

திரட்டலுக்கு இரண்டு பொதுவான வரையறைகள் உள்ளன.

சேமிப்பிற்கான வட்டி, வருமானம் அல்லது செலவுகளின் குவிப்பு. சட்டமுறைக் காரணம் அல்லது சட்டமுறைக் கோரிக்கை நடைமுறைக்கு வரும்போது வரவு அல்லது செலவு குவிதல்

462. accrued – சேர்ந்தடைந்த

 திரண்ட

ஒரு நிறுவனம் அல்லது தனியர் தம் வழக்கமான செயல்பாடுகள் மூலம் உருவாகும் ஆனால் இதுவரை செலுத்தப்படாத அல்லது பட்டியலிடப்படாத பணம் திரட்டப்பட்ட வருமானம் என்று குறிப்பிடப்படுகிறது.

இது திரட்டல் கணக்கியல் முறையைப் பயன்படுத்தி, வருவாயையும் செலவுகளையும் அவை நிகழும் சரியான தருணத்தில் உரிய நாளிட்டு இருப்புநிலைக் கணக்கில் சொத்தாகக் காட்டப்படுவது.

463. accrued income – திரள் வருமானம்

 சேர்ந்தடை வருமானம்

திரட்டப்பட்ட வருமானம்

திரண்டு சேர்ந்த வருமானம்

திரள் வருமானம் என்பது ஒரு நிறுவனம் இயல்பான வணிகப் போக்கில் சம்பாதித்த பணமாகும். ஆனால் இன்னும் பெறப்படாத அதற்கான பணப்பட்டியல் வாடிக்கையாளருக்கு அளிக்கப்படாத பணமாகும்.

மாற்றுப் பகிர் நிதியம்(Mutual fund) அல்லது பிற சொத்துகள் ஒரு குறிப்பிட்ட காலப்பகுதியில் வருமானத்தைக் குவிக்கும். வருமானம் வர, வர அளிக்காமல், பங்குதாரர்களுக்கு வருடத்திற்கு ஒருமுறை மட்டுமே செலுத்தும்-வரையறைக்குட்பட்டு அவர்களுக்கு வருமானத்தை அளிக்கிறது.

இவ்வாறு ஈட்டப்பட்டும் பெறப்படாத வருமானமே திரள் வருமானமாகும்.

464. accrued interest – திரள் வட்டி

சேர்ந்தடைந்த வட்டி 

திரட்டப்பட்ட வட்டி

கணக்கியலில், திரள் வட்டி / திரட்டப்பட்ட வட்டி என்பது ஒரு குறிப்பிட்ட நாளில், கடன் அல்லது பிற நிதிக் கடமைகளில் செலுத்தப்பட்ட வட்டியின் அளவைக் குறிக்கிறது.   திரள் வட்டி / திரட்டப்பட்ட வட்டி கடன் வழங்குபவருக்கு வருவாயாகவோ கடன் வாங்குபவருக்குச் செலவாகவோ இருக்கலாம்.

465. accrued of arises – திரள் மிகுதி

வந்தடைகிற மிகுதி

சட்டமுறைப்படி, செயல்படுத்தக்கூடிய உரிமைகோரலாக நடைமுறைக்கு வருதல்.

  இயற்கையான வளர்ச்சி, அதிகரிப்பு அல்லது நன்மையாக மிகுந்து  வருதல்.

arise என்பதை நேர் பொருளாக எழுதல் என்றோ தோன்றுதல் என்றோ குறிப்பிடாமல் மிகுதல் என்றே குறித்தல் வேண்டும்.

466. accrued right – திரள் உரிமைகள்

திரட்டப்பட்ட உரிமைகள்

தொழில்சார் ஓய்வூதியத் திட்டத்தின் கீழ், ஓர் உறுப்பினருக்கு உரிமையுள்ள நன்மைகள், அத்தகைய உரிமைகளில் ஏற்கெனவே பெறப்பட்ட ஓய்வூதியத் தொகைகள், ஒரு குறிப்பிட்ட ஓய்வூதிய அகவையின் அடிப்படையில் இதுவரை கட்டமைக்கப்பட்ட ஓய்வூதிய சேவை ஆகியவை அடங்கும்.

467. accruing – திரளும்

சேர்ந்தடையும்

ஆதாயமோ பங்கோ உடனுக்குடன் வழங்கப்படா நிலையில் திரண்டு சேர்வது.

468. Accumulated profit – திரள் ஆதாயம்

குவிந்த ஆதாயம்

உறுபயன்

ஆதாயத் தொகை உரியவருக்கு வழங்கப்படாமல் திரண்டு சேரும் நிலை.

469.  accumulative sentence  தொடர் தண்டனை

அடுத்தடுத்த தண்டனை அல்லது தொடர் தண்டனை என்பது முந்தைய தண்டனை முடியும் வரை செயற்படத் தொடங்காத ஒன்றாகும். உடன்நிகழ்வாகத் துயக்க வேண்டிய தண்டனைபோலன்றி,  ஒன்றுக்கு அடுத்து மற்றொன்றாகத் தொடர்ந்து துய்க்க வேண்டிய தண்டனையாகும்.

470. accumulation –  குவிப்பு

அறிவோ பொருளோ பணமோ வேறு எதுவோ குவிக்கப்படுவது.

காலப்போக்கில் படிப்படியாக இணைந்து சேர்வது குவியலாகிறது.

குவியல் என்னும் பொருள்கொண்ட இலத்தீன் சொல்லில் இருந்து இச்சொல் உருவானது.

வங்கியில் சேமிப்பைச் செலுத்திக் கொண்டிருந்தால் சேமிப்பு திரட்சியாகும். அவற்றுக்கான வட்டியும் எடுக்கப்படாமல் திரள்வதால், திரள் வட்டியாகிறது

குறிப்பு:

ஆங்கில அகராதிகளில் accrue என்பதன் வினை வடிவங்களுக்குத் தனித்தனியே பொருள் தரப்படுவதால் இங்கேயும் அவ்வாறே தரப்பட்டுள்ளது.

(தொடரும்)

இலக்குவனார் திருவள்ளுவன்