வரிவடிவப் பொருண்மையை நீக்கக் கணித்தமிழ்ச்சங்கத்திற்கு வேண்டுகோள்.

இலக்குவனார் திருவள்ளுவன்      04 October 2015      No Comment

வரிவடிவப் பொருண்மையை நீக்கக்

கணித்தமிழ்ச்சங்கத்திற்கு வேண்டுகோள்.

  தமிழ் எழுத்துருவியல் கருத்தரங்கம் நடத்தும் கணித்தமிழ்ச்சங்கத்தின் முயற்சி பெரிதும் பாராட்டிற்குரியது. இப்பொருண்மையிலான கருத்தரங்கம், இந்தியத் துணைக்கண்ட மொழிகளுள் முதலில்  தமிழில் நடத்துவது மகிழ்ச்சிக்குரியது. ஆனால், நெடுங்கணக்கில் இடம் பெறும் எழுத்துகளை வடிவமைப்புத் தோற்றத்திற்காக வெவ்வேறு வகையில் தரப்படும் எழுத்துருக்களைப் பற்றித்தான் இதன் ஆய்வு இருக்க வேண்டும். முன்னரே உத்தமம், கணித்தமிழ்ச்சங்கம் போன்ற கணிணி சார் அமைப்புகள் தமிழ் மொழி சார் ஆய்வில் ஈடுபட்டுத் தவறான கருத்துகளை ஊன்ற முயல்வது தவறெனச் சுட்டிக்காட்டியுள்ளோம். ஆனால், கருத்தரங்கத்தின் முதல் தலைப்பே,   ஓலைச் சுவடி முதல் கையகச் சாதனங்கள் வரை – தமிழ் வரிவடிவத்தின் படிநிலை வளர்ச்சி என உள்ளது.

  அடிப்படை வரிவடிவம்பற்றிக்கூற வேண்டிய தேவையும் இல்லை. கணிணியர்கள் இதற்குத் தக்கவர்களும் அல்லர்.

  எழுத்து தொடர்பான அடிப்படையை நாம் புரிந்து கொண்டு சரியான சொல்லாட்சியைக் கையாண்டால் இச்சிக்கல் வராது என எண்ணுகிறேன். நெடுங்கணக்கில் உள்ளவைதாம் எழுத்துகள். அச்சு எழுத்து வந்த காலத்தில் எழுத்துகளுக்கான அச்சுருக்கள் உருவாக்கப்பட்டன. எனவே, இவை எழுத்துரு என்று சொல்லப்பட்டன. வணிக நோக்கிலும் வடிவமைப்பு நோக்கிலும் வெவ்வேறு எழுத்துரு வகைகள் அறிமுகப்படுத்தப்பட்டுப் பயன்பாட்டிற்கு வந்தன. இப்பொழுது கணிணியூழியில் வாழ்கிறோம். கணிணியில் பயன்படுத்தப்பெறும் எழுத்து வகைகளை எழுத்துருக்கள் என்பது பொருந்தாது. எழுத்துத் தோரணைகள் என வேண்டும்.

  எழுத்து(letter)வேறு; எழுத்துத் தோரணை (font-style of letter) வேறு. ஆங்கிலத்தில் எத்தனைத் தோரணைகள் உருவாக்கப்பட்டாலும் அடிப்படையான 26 எழுத்துகளில் மாற்றமில்லை. (A font is a style of lettering. There are hundreds of different fonts, but (at least in English) there are only 26 letters- Mamie; Letters: A,B,C etc. The font is the style the letters are written in. – Harmonic : Yahoo answers). பிற மொழிகளிலும் அவ்வாறுதான். ஆனால், தமிழில் மட்டும், வரிவடிவ வளர்ச்சி என்ற பெயரில் வடிவடிவச்சிதைவு முயற்சிகளுக்கு ஊக்கம் கொடுப்பது ஏன என்றுதான் புரியவில்லை.

  வரிவடிவ முயற்சிகளுக்குத் தமிழறிஞர்கள் தொடர்ந்து எதிர்ப்பு தெரிவத்து வருகின்றனர். தந்தை பெரியாருடன் மிக நெருக்கமாக இருந்தாலும் பேராசிரியர் சி.இலக்குவனார், வரிவடிவ முயற்சிகளுக்குக் கடுமையாக எதிர்ப்பு தெரிவித்து அவ்வப்பொழுது தோன்றிய சிதைவுகளைத் தடுத்து வந்துள்ளார். (இலக்குவனார் திருவள்ளுவன் ஆகிய) நானும் கடந்த 25 ஆண்டுகளுக்கு மேலாகக் கருத்தரங்கங்கள், இதழ்கள், தொலைக்காட்சிகள் ஊடாக வரரிவடிவச்சிதைவு முயற்சிகளுக்கு எதிராகக் குரல் கொடுத்து வருகின்றேன். தமிழ்க்காப்புக்கழகத்தின் சார்பிலும் வரிவடிவச்சிதைவு முயற்சிகளுக்கு எதிர்ப்பு தெரிவிக்கப்பட்டு வருகிறது.

  கோவையில் செம்மொழி மாநாடு நடைபெற்றபொழுது தமிழ்க்காப்புக் கழகத்தின் முயற்சியால், கருத்தரங்கத் தலைப்புகளில் இருந்து வரிவடிவச் சீர்திருத்தம் அகற்றப்பட்டது. மேலும், வரிவடிவச் சீர்திருத்தம் என்ற பெயரில் சிதைவு முயற்சிக்கு அரசேற்பு வழங்கப்பெற்று அறிவிப்பு வரும் என்ற சூழல் இருந்தது. வெவ்வேறு தளத்தில் இருந்து குரல் கொடுத்து வந்த பலரும் ஒன்றிணைந்து தமிழ் எழுத்துப்பாதுகாப்பு இயக்கம் என்ற பெயரில் இணைந்து எதிர்ப்பை வலுவாக்கினோம்.

  தமிழ்நாடு, புதுச்சேரி, மலேசியா, சிங்கப்பூர் முதலான பகுதிகளில் வரிவடிவச் சிதைவு முயற்சிகளுக்கு எதிராகக் கூட்டங்களும் கருத்தரங்கங்களும் நடைபெற்றன. முதுமுனைவர் இரா.இளங்குமரனார், பேராசிரியர் ம.இல.தங்கப்பா, மறைந்த அறிஞர் வெ.கோவலங்கண்ணன், அறிஞர் ஔவை நடராசன், பேராசிரியர் இ.மறைமலை, பேராசிரியர் பா.இறையரசன், கணிஞர் மு. மணிவண்ணன், பொறிஞர் இராமகிருட்டிணன், முனைவர் நாக. இளங்கோவன், அறிஞர் க.சி.அறிவுடைநம்பி, மறைந்த அறிஞர் சீனிநைனா மொகமது, பேராசிரியர் செல்வகுமார், அறிஞர் சுப.நற்குணன், அறிஞர் பெரியண்ணன் சந்திரசேகரன் அன்றில் இறையெழிலன்,   புதுவை சுகுமாறன் முதலிய பலரும் பல்வேறு தமிழ் அமைப்பினரும் வரிவடிவச் சிதைவு முயற்சிகளில் இருந்து தமிழைக் காப்பாற்ற குரல் கொடுத்துள்ளனர்; இப்பொழுதும் தமிழ் வரிவடிவம் காக்கக் குரல் கொடுப்பவர்களே இவர்கள். இவர்களில் பெரும்பான்மையரைக் கொண்டு அமைக்கப்பட்டதே தமிழ் எழுத்துப்பாதுகாப்பு இயக்கம்.

  மாநாட்டமர்வு அரங்குகளில் பொதுவாகக் குறைவான கூட்டம் இருந்தாலும், எழுத்துச் சிதைவு எதிர்ப்பு முழங்கிய அரங்கில் நிற்கக்கூட இடமில்லாமல் அரங்கு நிறைந்து வழிந்தது.

  தமிழ் எழுத்துப் பாதுகாப்பியக்கம் சார்பில் கையெழுத்து இயக்கமும் நடத்தினோம். அது குறித்துக் கேள்விப்பட்ட அப்போதைய முதல்வர் கலைஞர், சிதைவு முயற்சிக்கு அரசு துணைபோகாது, அவ்வாறு வருவதாகச் சொல்லப்படும் அறிவிப்பு வராது ஆதலின் கையெழுத்து இயக்கம் தேவையில்லை என்பதைக் கூறச்செய்தபின் கையெழுத்தியக்கம் நிறுத்தப்பட்டது. உறுதி சொன்னவாறே தமிழ் நெடுங்கணக்கும்   காப்பாற்றப்பட்டது.

  அரசின் நிறுவனமான தமிழ் இணையக்கல்விக்கழகத்தில் தமிழ்ச்சிதைவை ஊக்கப்படுத்தும் காணொளியுரை தொடர்ந்து இடம் பெற்று வந்தது. தமிழ்க்காப்புக்கழகத்தில் தொடர் வேண்டுகோளுக்கிணங்கப் புரட்சித் தலைவியின் தலைமையிலான இப்போதைய அரசும் அதனை நீக்கி விட்டது.

  என்றாலும் வெற்றி பெற்று விட்டோம் என்று நாம்   வாளாவிருந்துவிடக் கூடாது என்பதற்காகத்தான் அவ்வப்பொழுது எழுத்துச் சிதைவைச் சிலர் தூண்டி விட்டுக் கொண்டுள்ளார்கள்.

இறந்த வெகுளியின் தீதே சிறந்த
உவகை மகிழ்ச்சியிற் சோர்வு. (திருவள்ளுவர், திருக்குறள் 531)

என்பதை நமக்கு நினைவூட்டிக் கொண்டுள்ளார்கள்.

  இத்தகைய தவறான முயற்சிகளுக்குக் கணித்தமிழ்ச்சங்கம் துணை நிற்கக்கூடாது என அன்புடன் வேண்டுகிறோம். எனவே, கொடுக்கப்பட்ட தலைப்புகளில் ‘தமிழ் வரிவடிவத்தின் படிநிலை வளர்ச்சி’ என்பது தொடர்பான தலைப்பை நீக்குமாறு அன்புடன் வேண்டுகின்றோம்.

  தேவைப்பட்டால் கருத்தரங்கத்தின் பெயரை ‘எழுத்துத் தோரணைக் கருத்தரங்கம் 2015’ எனத் திருத்திக் கொள்ளுமாறும் வேண்டுகின்றோம்.

  தமிழில் கணிணி அறிவியல் சிறப்பாக வளரவேண்டும் என்னும் தளரா ஆர்வம் கொண்ட கணித்தமிழ்ச்சங்கம் நம் வேண்டுகோளை ஏற்றுத் தலைப்பை நீக்கவும் இயலுமெனில் கருத்தரங்கப் பெயரை மாற்றவும் வேண்டுகிறோம்.

அன்புடன் இலக்குவனார் திருவள்ளுவன்
தமிழே விழி! தமிழா விழி!
எழுத்தைக் காப்போம்! மொழியைக் காப்போம்! இனத்தைக் காப்போம்!
அகரமுதல 99, புரட்டாசி 17, 2046 / அக்.04, 2015: இதழுரை

(அகரமுதல 99,  புரட்டாசி 17,2046 / அக்.04, 2015)

தமிழ் இந்துவே! தமிழ் அழிப்பு வேலையை நிறுத்து! இல்லையேல் உன் இதழை நிறுத்து!

தமிழ் இந்துவே! தமிழ் அழிப்பு வேலையை நிறுத்து! இல்லையேல் உன் இதழை நிறுத்து!

- இலக்குவனார் திருவள்ளுவன், தலைவர், தமிழ்க்காப்புக்கழகம்

ஒருங்கிணைப்பாளர், இலக்குவனார் இலக்கிய இணையம்,

அமைப்பாளர், தமிழ்க்கூட்டமைப்புகள்

    

இந்து நிறுவனத்தார் தமிழ் முறைக்கு மாறான முறையில் பெயரைச் சூட்டிக் கொண்டு தமிழில் நாளிதழ் நடத்துகின்றனர். இதன் நோக்கம், தமிழ் வளர்ச்சியல்ல; தமிழ்வாசகர்கள் மூலம் பணம் பெருக்குவதே! ஆனால், அதே நேரம் தமிழ் வாசகர்களுக்கு எதிரான பணியில் ஈடுபட்டுவருவதுதான் கண்டனத்திற்கு உரியதாக உள்ளது.

   ஆங்கிலப் பெயர் கொண்ட தமிழ் நாளிதழில் பல்துறைக் கட்டுரைகள் வெளிவந்தாலும், அவற்றின் நடை தமிழைச் சிதைப்பாகவே உள்ளன. இவ்வாறு தான் நடத்தும் ஆங்கில இதழில் ஆங்கில நடையைச் சிதைத்து எழுத முன்வருமா இவ்விதழ்? வராது! அங்கே, நல்ல ஆங்கிலத்தில் புதிய புதிய சொற்களைப் பயன்படுத்தி ஆங்கிலக் காவலராக விளங்குவதிலேயே பெருமை கொள்கிறது. இதே அளவுகோலைப் பயன்படுத்தித் தமிழ்க்காவலராகவும் விளங்கலாமே! ஏன், அவ்வாறு விளங்காமல் தமிழ் அழிப்பு வேலைகளில் ஈடுபட்டு வருகிறது? மக்களால் விரட்டியடிக்கப்படும்வரை மோதிப்பார்ப்போம் என்கிறதா? இத்தகைய இதன்  தமிழ் அழிப்புப் பணிகளில் ஒன்றுதான் தமிழறிவற்ற கதையாளர் ஒருவரைக் கொண்டு, “ஆங்கில எழுத்துருவில் தமிழை எழுதினால் என்ன?” என வந்துள்ள கட்டுரை.

 கட்டுரைப் பிதற்றலில் உள்ள சில வரிகள் பற்றிப் பார்ப்போம்!

   “தாய்மொழியைத் தேர்வுகளில் எளிதாக வெல்வதற்கு மட்டுமே தட்டுத்தடுமாறி வாசிக்கவும் ஓரளவு எழுதவும் கற்கின்றனர். . . .  கல்விக்கு உதவாமல் வெறுமே மொழியறிவுக்காக மட்டுமே கற்கப்படும் இரண்டாம் மொழியை விட்டுவிடுகிறார்கள்”   என்கிறார் இவர். தாய்மொழி மட்டுமல்ல, எல்லாப் பாடங்களுமே தேர்வு நோக்கில் கற்கும் வகையில்தான் நம் கல்விமுறை உள்ளது. மாற்ற வேண்டியது கல்வி முறையைத்தான்.  தாய்மொழிக்கல்வியை அல்ல! தமிழ்வழியில் அனைத்துக் கல்வியும் அமைந்தால் தமிழ் நிலைக்கத்தானே செய்யும்!

  

 “மொழிக்கும் எழுத்துருவுக்குமான உறவு என்பது ஒரு மனப்பயிற்சிதான் என்பதை நினைவில் கொள்ள வேண்டும். . . . . குழந்தைகள் மிகக் கடினமான ஈராண்டுப் பயிற்சி வழியாகவே அந்தப் பயிற்சியை அடைகின்றன” என்பது மற்றோர் உளறல். இந்த மனப்பயிற்சி என்பது ஆங்கிலத்திற்கும் பொருந்தும் அல்லவா? அயல் மொழியில் மேற்கொள்ள வேண்டிய கடினமான பயிற்சியைவிடத் தாய்மொழியில் எளிதில் பயிற்சி மேற்கொண்டால் போதுமல்லவா?

  “மலாய் போன்ற பல மொழிகள் இன்று ஆங்கில எழுத்துருக்களிலேயே எழுதப்படுகின்றன. அந்த மக்கள் ஆங்கிலம் கற்பது எளிதாகிறது” எனக் கதை சொல்வது மிகவும் தவறான வாதம். மலாய் மக்களில் பொது இடங்களில் பணியாற்றுபவர்களுக்குக்கூடப் பேருந்து எண்கள், நேரங்கள், கட்டண விவரங்கள், உணவுப் பொருள்கள் விலைகள், பிற பொருள்களின் விலைகள், முதலான பயணத்திற்குத் தேவையான எவ்விவரத்தையும் ஆங்கிலத்தில் சொல்லத் தெரியவில்லை. (ஆங்கிலம் தெரிந்திருந்தால்தானே இவற்றைப் புரியவும் சொல்லவும் முடியும்.) எனவே, ஒரு வரிவடிவில் மற்றொரு மொழியைப் படிப்பதால் அம் மொழியையும் அறிந்தவர் ஆவோம் என்பது அறியாமையே!

 “இந்தியாவில் உள்ள மொழிகள் அனைத்தும் ஆங்கில எழுத்துருக்களில் எழுதப்பட்டால் பெரும்பாலான மொழிகளை மிகச் சில நாட்களிலேயே வாசித்துப் புரிந்துகொள்ள முடியும்” எனச் சரடு விடுகிறார். வரிவடிம்தான் மொழியின் அடையாளம். அவ்வாறிருக்க  ஆங்கில எழுத்துரு எனச்  சொல்லப்படும் உரோமன் எழுத்தில்  படிக்கும் பொழுது, எந்த மொழி என எவ்வாறு அறிய இயலும்?  மேய்ச்சலைக்குறிக்கும் ‘மேய்’ என்பதை ஆங்கில எழுத்தில் எழுதினால், அதனை மே மாதம் என்றாவது ஆங்கிலத்தில் உள்ள துணை வினை என்றாவது அறிவார்களே தவிர, தமிழ்ச்சொல் என எங்ஙனம் உணர்வார்கள்? தமிழே தெரியாமல் தமிழ்ச் சொற்களை ஆங்கில எழுத்தில் படித்தால் எங்ஙனம் தமிழ் எனப் புரிந்து கொள்வார்கள்?

 தமிழ் எழுத்துகள் அறிவியல் முறையில் அமைந்தவை. தமிழ் உயிர்மெய்யெழுத்துகள் எளிதில் சொற்களைப் படிக்கவும் புரிந்து கொள்ளவும் உதவுவன. ‘த’, ‘மி’, ‘ழ்’ என மூன்றெழுத்தைச் சேர்த்தால் தமிழ் என வாசித்து விடலாம். ஆனால், ஆங்கிலத்தில் எழுதினால்,  ‘டி’, ‘எச்’, ‘ஏ’ - த, ‘எம்’, ‘ஐ’ - மி, ‘இசட்’, ‘எச்’ - ழ் > தமிழ் என எழுத்துக் கூட்டிவரும் எழுத்துகளைச் சேர்த்து வாசிக்க வேண்டும்.  தேவையற்ற உழைப்பும் நேரமும் இதில் செலவாகாதா?

  “மொழிக்கு அடிப்படை ஒலியே என்றும் வரிவடிவம் மாறுவதால் மொழி அழியாது என்றும் சிலர் கூறி வரி வடிவத்தைச் சிதைப்பதற்கு ஆதரவு திரட்டுகின்றனர். எழுத்தாகிய உடல் இல்லையேல் மொழியாகிய உயிர் அழியும் எனப் பேராசிரியர் முனைவர் சி.இலக்குவனார் தெளிவுபடுத்தியுள்ளார். எழுத்தாகிய உடல் சிதைந்தமையால், மொழியாகிய உயிர் தங்குவதற்கு இடமின்றி அழிந்துள்ளதை வரலாறு காட்டுகின்றது. பரதகண்டம் முழுமையும் வழங்கி வந்த தமிழ் மொழி,  புதிய புதிய வரி வடிவங்களுக்கு இடம் அளித்ததால்தான் பிறமொழிச் சொற்களும் உள்ளே புகுந்து இக் கண்டம் முழுவதும் புதுப்புது மொழிகள் தோன்றின. எனவே, இப்பொழுது மேற்கொள்ளும் எழுத்துச்சிதைவு முயற்சி எஞ்சியுள்ள தமிழ்நிலத்தையும் இல்லாதாக்குவதற்கான முயற்சியே அன்றி வேறு இல்லை.” (எழுத்தைக் காப்போம் ! இனத்தைக் காப்போம்!- பக்கம் 6)

  “எழுத்துருக்கள் மொழியின் மாறாத அடையாளங்கள் அல்ல” என்று வரிவடிவ அழிப்பிற்குச் சப்பைக்கட்டு கட்டுகின்றார். இதற்குப் பின் வரும் குறிப்புகளைக் கவனத்திற்குக் கொண்டுவர விழைகிறேன்.

  “கல்விக்கு அடிப்படையாய் அமைவன எண்ணும் எழுத்துமாய குறியீடுகள் என்பதை உணர்த்தவே எண்ணையும் எழுத்தையும் கண்களாகக் கூறுகிறார் தெய்வப்புலவர் திருவள்ளுவர்.

  

  இதனை நன்குணர்ந்த நம் முன்னோர் எண் எழுத்து உருக்களைப் பேணி வந்துள்ளனர். கல்வெட்டுகளில் உள்ள மாற்றங்களுக்கும் தமிழ் மொழி எழுத்து வளர்ச்சிக்கும் தொடர்பில்லை என்பதை உணர்ந்தால் தமிழ் எழுத்து மாறா வடிவுடன் நிலைத்து வருவதை உணரலாம். எனவேதான்

“தொல்லை வடிவின எல்லா எழுத்தும்”

என்கிறது நன்னூல். அதனை, அதற்கு 1000 ஆண்டுகளுக்குப் பின் வந்த இலக்கண விளக்கமும் வழி மொழிகின்றது. (நன்னூல்: எழுத்ததிகாரம்: 5.உருவம்: நூற்பா 98 - இலக்கண விளக்கம்: எழுத்தியல்: நூற்பா 23) அஃதாவது எல்லா எழுத்துமே மிகத் தொன்மையான காலத்தில் இருந்துமாறாமல் வருகின்றன என இலக்கண நூல்கள் கூறுகின்றன.

  காலந்தோறும் சிலர் எழுத்து வடிவங்களில் குறை கண்டு மாற்ற வேண்டும் என்று துடித்ததால்தான்

“எண்ணெழுத்து இகழேல்” (ஆத்திச்சூடி 7)

என்று ஔவையார் தெளிவாகவே கூறிச் சென்றுள்ளார்.

  எண், எழுத்து வடிவங்களில் சிதைவு உண்டானால் அவை வெளிப்படுத்தும் அறிவு வளத்திலும் சிதைவு ஏற்படும் என்பதை உணர்ந்தே இவற்றை நம் முன்னோர் போற்றி உள்ளனர். மொழி வழித் தேசிய இனம் அழியாமல் இருக்க மொழி அழியாமல் காக்கப்படவேண்டும்; மொழி காக்கப்பட அதன் இலக்கியங்கள் பேணப்பட வேண்டும்; இலக்கியங்கள் போற்றப்பட மொழியின் எண்ணும் எழுத்தும் காப்பாற்றப்பட வேண்டும். இஃது எல்லா மொழிகளுக்கும் பொருந்தும்.

  இந்திய அரசியல் யாப்பும் (Constitution of India: பிரிவு 29(1))   இதை உணர்ந்தே எழுத்து வடிவங்கள் காக்கப்பட வேண்டும் என விதி வகுத்துள்ளது. ஆனால், நடைமுறையில் தேவநாகரியையும் கிரந்தத்தையும் புகுத்திப் பிற தேசிய மொழிகளை அழிக்கும் முயற்சியில் ஈடுபட்டு வருகிறது. (எழுத்தைக் காப்போம் - இலக்குவனார் திருவள்ளுவன், நட்பு இதழ்)

  1950 இல்   உரோமன் எழுத்துகளில் தமிழை எழுத வேண்டும் என ஆங்கில நாளிதழ் ஒன்றின் வழிச் சிலர் முயன்றனர்.  பேராசிரியர் சி.இலக்குவனார் முதலானவர்கள் முயற்சியால் அதற்கு முடிவுரை கட்டப்பட்டது. இப்பொழுது மீண்டும் அம் முயற்சியில் 'இந்து' இதழ் இறங்கி மூக்குடைபடுவது தேவைதானா?

எழுத்தைக் கொல்வது மொழியைக் கொல்வதே!

மொழியைக் கொல்வது இலக்கியம் கொல்வதே!

இலக்கியம் கொல்வதோ இனத்தைக் கொல்வதே!

என்னும் பாவேந்தர் பாரதிதாசன் முழக்கங்களை ஏற்று

நம் தமிழ் மொழியின் எண்ணையும் எழுத்தையும் காக்கப் பெரும்திரளாய்த் தமிழன்பர்கள் உள்ளனர்.

 எனவே,

தமிழ் இந்துவே,

           மொழிக் கொலையை நிறுத்திக்கொள்!

    தமிழ் அழிப்பு முயற்சிக்கான கட்டுரையை இணையப் பக்கத்தில் இருந்து எடுத்துவிடு!         

            தமிழால் பெட்டியை நிரப்பும் இந்துவே!

தமிழைக்காக்காவிட்டாலும் தமிழ் அழிப்பு முயற்சியில் ஈடுபடாதே!

அல்லது 

          உன் தமிழ்ப்பதிப்பை நிறுத்திவிடு! நிறுத்திவிடு! நிறுத்திவிடு!

மக்களெல்லாம் தாய்மொழியைக் கற்பதற்கு

மடத்தனமாய்க் கற்பிக்கும் முறையை மாற்றிச்

சிக்கலின்றித் தெளிவாக உணருவதற்குச்

செம்மைநிலை காணாத ஆங்கிலத்தால்

தக்கஒரு தகுதியினைப் பெற்றாற் போன்று

தமக்குள்தாம் பெரியார் என எண்ணிக்கொண்டு

தக்கைகளாய்த் தலைநிமிர்ந்து ஆடல்வேண்டா

 (- பாவேந்தர் பாரதிதாசன்)

==0==