சட்டச்சொற்கள் விளக்கம் 116-120 : இலக்குவனார் திருவள்ளுவன்

 ஃஃஃ     இலக்குவனார் திருவள்ளுவன்      18 January 2024      அகரமுதல

(சட்டச்சொற்கள் விளக்கம் 111-115 : இலக்குவனார் திருவள்ளுவன் – தொடர்ச்சி)

சட்டச்சொற்கள் விளக்கம் 116-120

116. Able	வல்லமையுள்ள   ஒரு செயலைச் செய்வதற்குரிய அல்லது சிக்கலைத் தீர்ப்பதற்குரிய ஆற்றல் அல்லது திறன் அல்லது போதுமான வளங்களைக் கொண்டிருத்தல்.   ஒரு திட்டத்தை நிறைவேற்றுவதற்குரிய போதுமான வளங்களையும் அதிகாரங்களையும் கொண்டிருத்தல்.
117. Able bodied	வல்லமையர்   உடல் திறனாளர் என நேர் பொருளாக இருந்தாலும் உடலாலும் உள்ளத்தாலும் வலிமையானவரையே குறிக்கும்.   உடல், உள்ள வலிமை என்பது, ஒரு வேலையைச் செய்து அல்லது தொழிலில் ஈடுபட்டு வருவாய் ஈட்டுவது.   வாழ்வுப்படி/பிரிந்துறை உதவி என அழைக்கப்பெறும் துணைமைத் தொகையைச் செலுத்தும் திறனையும்  குழந்தைக்கு ஆதரவாக இருக்க இயலுவதையும் குறிப்பது.   ஒருவர் மக்களிடையே இயல்பாகச் செயல்படுகிறார், உடல் ஊனமோ மன ஊனமோ அவருக்கு இல்லை என்பதையே வல்லமையாளர் / உடல் திறன் உடையவர் என்பது குறிக்கிறது.
118. ABLPL	மு.பி.வி.   முன்பிணை விண்ணப்பம்   கைது செய்யப்படுவதை எதிர்நோக்கி அதைனத் தடுக்கும் முகமாக அளிக்கும் அனைத்துப் பிணை விண்ணப்பங்களும் இதில் அடங்கும். இதனால் எதிர்நோக்குப் பிணை விண்ணப்பம் என்றும் அழைப்பர்.   கைது செய்யப்படுவதற்கு முன்பே பிணைக்கு விண்ணப்பிப்பதால் முன் பிணை விண்ணப்பம் எனப்படுகிறது.
119. Ablush	நாணமுறல்   எ.கா.புகழ்ச்சியுரைகள் அவரை நாணமுறச் செய்தன.
120. Ably	திறம்பட   செயலாற்றல் கொண்டு திறம்படச் செய்தல்.

(தொடரும்)

இலக்குவனார் திருவள்ளுவன்

சட்டச்சொற்கள் விளக்கம் 111-115 : இலக்குவனார் திருவள்ளுவன்

 

ஃஃஃ     இலக்குவனார் திருவள்ளுவன்      15 January 2024      அகரமுதல

(சட்டச்சொற்கள் விளக்கம் 106-110 : இலக்குவனார் திருவள்ளுவன் – தொடர்ச்சி)

சட்டச்சொற்கள் விளக்கம் 111-115

111. Abjection	இழிநிலை   இழிதகவு   இழிதகையான நிலைமையக் குறிப்பது   இலக்கியத் திறனாய்வுக் கோட்பாட்டில் புறக்கணிப்பு என்னும் கருத்தாக்கத்தையும் இது குறிக்கும்.
112. Abjure	கைவிடு   விட்டொழி   முற்றோக ஒழித்தல் ஆணையிட்டொழி; (சத்தியஞ்செய்து விட்டொழி) ஏற்கெனவே மேற்கொண்ட சூளுரை அல்லது உறுதிமொழியைக் கைவிடுதல். கொள்கைக் கடப்பாட்டினைக் கைவிடுவதையும் குறிக்கும்.   ஆணையிட்டொழி (சத்தியத்தை விட்டொழி) என்னும் பொருளடைய abiūrō என்னும் இலத்தீன் சொல்லில் இருந்து  Abjure உருவானது. இந்திய யாப்புரை, பிரிவு 51 (அ)
113. Abkari	மதுத்தொழில் போதையூட்டும் மதுபானங்கள் அல்லது போதைப்பொருட்களின் உற்பத்தி அல்லது விற்பனையைக் குறிக்கிறது.
114. Ablation	அகற்றுதல்   உடலின் ஒரு பகுதியை அல்லது மெய்ம்மியை(tissue) அல்லது இதன் செயல்பாட்டை அகற்றுவது அல்லது அழித்தலைக் குறிக்கும்.   புவியியலில் சூரியன், காற்று, மழையின் செயல்பாடடால், பனி அல்லது பாறையின் ஒரு பகுதி இழப்பைக் குறிக்கும்.   ஆட்சித்துறையில் பணியகற்றைத்தையும் குறிக்கப் பயன்படுத்துகின்றனர்.
115. Ablaze	எரிதல்   ஒளிவீச்சு     கொழுந்து விட்டு எரிவதையும் ஒளிமையத்தையும் குறிக்கிறது.

(தொடரும்)

இலக்குவனார் திருவள்ளுவன்

சட்டச்சொற்கள் விளக்கம் 106-110 : இலக்குவனார் திருவள்ளுவன்

 

ஃஃஃ      இலக்குவனார் திருவள்ளுவன்      11 January 2024      அகரமுதல

(சட்டச்சொற்கள் விளக்கம் 101-105 : இலக்குவனார் திருவள்ளுவன் – தொடர்ச்சி)

சட்டச்சொற்கள் விளக்கம் 106-110 : இலக்குவனார் திருவள்ளுவன்

106. Abiding	கீழ்ப்படிகின்ற கடைப்பிடிக்கின்ற   நெறிமுறைக்கு அல்லது விதிமுறைக்குக் கீழ்ப்படிகின்ற அல்லது அதனைக் கடைப்பிடிக்கின்ற செயல்.
107. Abiding interest	நிலை நலன்   நிலையான அக்கறை அல்லது நிலையான ஆர்வம் கொண்டிருத்தலைக் குறிக்கிறது.   ஒரிசா குத்தகைச் சட்டம், சொத்தில் நிலையான ஆர்வம் கொண்டவர், உறுதியாக .. . . .  எப்போதும் நிலத்தில் நிலையான ஆர்வம் கொண்டவராக இருக்க வேண்டும் என்பதில்லை  என்கிறது. – இராதாமணி திப்பையா மற்றும் பிறர் எதிர் பிரசா மோகன் பிசுவால் மற்றும் பிறர் (Radhamani Dibya And Ors. Vs Braja Mohan Biswal And Ors. On 29 October, 1983)(AIR 1984 Ori 77, 1984 I OLR 72)
108. Abidingly	நிலையான அக்கறை தொடர்ந்த ஆர்வம்   நீண்டகாலமாகத் தொடரும் வகையில் அமைவது.
109. Ability	திறமை வல்லமை, ஆற்றல்   ‘சக்தி’ என்றும் சொல்லுவர். ‘க்’ மெய்யெழுத்து அடுத்த ‘க’ வரிசை எழுத்து தவிரப் பிற மெய்யெழுத்துகள் வருவதில்லை. எனவே, ‘சக்தி’ என்பது தமிழ்ச்சொல்லல்ல. பொறுப்பை ஏற்றுச் சுமப்பவர்களை(நிருவகிப்பவர்களை) ஆட்டாளி என்பர். உங்கள் காரியங்களுக் கெல்லாம் நான் ஆட்டாளியா? என்பது மக்கள் வழக்கு.   நொய்ப்பம்  என்பதும் வல்லமையைக் குறிக்கும் சொல். “மரக்கலம் அலையாதபடி கடைந்த நொய்ப்பம்” (நாலாயிர திவ்யப்பிரபந்தம். திருப்பாவை . 30,  254) என இலக்கியத்தில் வருகிறது.   எப்பதவியாயினும் அதற்குரிய தகுதியுடையவரை அமர்த்த வேண்டும் என பதவிக்குரிய விதிகள் கூறும்.

110.    Ability Test

திறனறி தேர்வு
 
ஆற்றலறி தேர்வு
 
திறனறி தேர்வு

வெவ்வேறு வேலை தொடர்பான இடுபணிகள்(tasks) அல்லது சூழ்நிலைகளில் ஒருவரின் செயல்திறனை மதிப்பிடுவதற்கான தரப்படுத்தப்பட்ட முறையாகும். ஒருவரின் ஏட்டுக்கல்வியைவிட உள்ளார்ந்த ஆற்றலை அளவிடுகின்றது. வேலைஅமைப்பில் ஒருவரின் செயல்திறனை அறிய பணியமர்த்துநரால் அவ்வப்பொழுது நடத்தப்படும் தேர்வாகும்.
 
இப்பொழுது மாணாக்கர்களிடையேயும் அவர்களின் தகுதிறனை அறிய திறனறி தேர்வுகள் நடத்தப்படுகின்றன.

+++++++++++++++++++++++++++++++++++++++++++++++++++++++++++

(தொடரும்)

இலக்குவனார் திருவள்ளுவன்

சட்டச்சொற்கள் விளக்கம் 101-105 : இலக்குவனார் திருவள்ளுவன்

 

ஃஃஃ       இலக்குவனார் திருவள்ளுவன்      08 January 2024      அகரமுதல

(சட்டச்சொற்கள் விளக்கம் 96-100 : இலக்குவனார் திருவள்ளுவன் – தொடர்ச்சி)

சட்டச்சொற்கள் விளக்கம் 101-105

101. abide by arbitration	பொதுவர்  தீர்ப்புக்கு இணங்கு   Abide – அமைந்தொழுகு, மதித்து நடத்தல்; எனினும் இணங்கு என்னும் சுருக்கச்சொல் பயன்படுத்தப்பட்டுள்ளது.   arbitration என்றால் நடுத்தீர்ப்பு என்கின்றனர். தீர்ப்பு என்றாலே நடுநிலையில்தான் இருக்க வேண்டும். நடுவர் தீர்ப்பு என்றும் சொல்கின்றனர். magistrate என்பவரை நடுவர் என்பதால் வேறுபாடு காட்ட வேண்டி உள்ளது. இரு தரப்பிற்கும் ஒத்திசைவு காண்பதற்குரிய பொதுவானவர் என்ற பெயரில் பொதுவர் எனலாம்.   இந்திய யாப்பு,பிரிவுரை 51 (அ)
102. Abide by	இணங்கி ஒழுகு   கடைப்பிடி பின்பற்று உண்மையாக நிறைவேற்று
103. Abide by rules	விதிகளைக் கடைப்பிடி விதிகளைப் பின்பற்று விதிகளுக்கிணங்க ஒழுகு விதிகளுக்கு இணங்கி நட   கடைப்பிடித்தல் என்பது நூலில் கூறும் விதிகளைக் கடைப்பிடித்தலையும் குறிக்கும். “நாட்டிய நல் நூல் நன்கு கடைப்பிடித்து” (சிலப்பதிகாரம், அரங்கேற்றுக்காதை, 40) “நாட்டிய நல் நூல் நன்கு கடைப்பிடித்துக் காட்டினள்” (சிலப்பதிகாரம், அரங்கேற்றுக்காதை, 158-159) என நாட்டிய நன்னூலில் குறிப்பிட்டுள்ள நாட்டிய இலக்கணத்தை மாதவி பின்பற்றியதை இளங்கோ அடிகள் குறிப்பிடுகிறார்.
104. Abide by the Constitution	அரசியல் யாப்பைக் கடைப்பிடி அரசியல் யாப்பைப் பின்பற்று அரசமைப்‌பின்‌ படி ஒழுகு/ நட,   காத்திரு, ஏற்க அல்லது அளிக்க, பொறுத்துக் கொள்ள அல்லது தாங்க, கடைப்பிடிப்பது, செயல்படுத்துவது, கீழ்ப்படிவது, நிறைவேற்றுவது அல்லது அதற்கு இணங்கச் செல்படுவது, தங்கியிருத்தல், உறைதல், வதிதல், குடியிருத்தல், சில, அழியாத, நிலையான, உறுதியான, மாறாத, தடுமாறாத, அசைக்கமுடியாத, முதல் செயலிலிருந்து, தொடக்கத்திலிருந்து, ஒருவரின் உருவாக்கம் அல்லது தொடக்கத்திற்குத் திரும்ப
105. Abide by the results of the appeal, it shall	மேல்முறையீட்டின் முடிவுகளுக்குக் கட்டுப்பட வேண்டும்.   மேல்முறையீடு அல்லது சீராய்வு விண்ணப்பம்  அளித்த பின், அதற்கான முடிவு வரும் வரையில் மேல்முறையீட்டிற்குரிய தீர்ப்பிற்குக் கட்டுப்பட வேண்டும்.   (குற்ற நடைமுைறத் தொகுப்பு, பிரிவு 344.4)

(தொடரும்)

இலக்குவனார் திருவள்ளுவன்

சட்டச்சொற்கள் விளக்கம் 96-100 : இலக்குவனார் திருவள்ளுவன்

 

இலக்குவனார் திருவள்ளுவன்      04 January 2024      No Comment

(சட்டச்சொற்கள் விளக்கம் 91 – 95 : இலக்குவனார் திருவள்ளுவன் – தொடர்ச்சி)

சட்டச்சொற்கள் விளக்கம் 96-100

96. Abeyance	செயலற்ற தன்மை இடைநிறுத்தம்   செயல்நிறுத்தம் நிறுத்தி வைத்தல்   உரியரிலாநிலை   காலவரையறையற்ற அல்லது இடைக்கால செயலற்றநிலையைக் குறிப்பது.   இடைநீக்கம் என்கின்றனர். அவ்வாறு சொன்னால் suspension எனத் தவறான பொருள் கொள்ள நேரலாம். ஆங்கிலத்தில் பொருள் சரிதான். ஆனால், தமிழ் வழக்கில் இடையில் விலக்கி வைப்பது வேறு. முடிவு காண வழியில்லாமல் செயல்பாடின்றி ஒத்தி வைப்பது வேறு. ஒரு கோப்பு நடவடிக்கையை அல்லது வழக்கு நடவடிக்கையை மேற்கொண்டு உடன்தொடராச் சூழல் இருக்கையில் அத்தகைய சூழல் வரும் வரை இடைக்காலமாக நிறுத்தி வைத்தல். பல நேரங்களில் இடை நிறுத்தப்படுவதே மேல் நடவடிக்கையின்றி முற்றாக்கப்படுவதும் உண்டு உண்மையான சொத்து அல்லது தகைமை அல்லது பதவியின் உரிமை யாருக்கும் வழங்கப்படாத நிலையில் அதன் இருப்புநிலை எனவும் பொருள் உண்டு.   Abeër என்னும் பழம் பிரெஞ்சுச்சொல்லின் பொருள் இடைவெளி. இதிலிருந்து விருப்பம் என்னும் பொருளில் abeance என்னும் சொல் உருவானது. இதிலிருந்து ( ஆங்கில நார்மன் சொல்லான சட்ட எதிர்பார்ப்பு என்னும் பொருளிலான abeiance) abeyance வந்திருந்தாலும் இதன் பொருள் இடை வெளி விடுதல். அஃதாவது செயல்பாட்டில் இடைவெளி விடுதல். எனவே, தற்காலிகமாக நிறுத்தி வை (hold in abeyance) என்கின்றனர். தற்காலிகம் என்பது தவறான சொல்லாட்சியாக இடம் பெற்றுவிட்டது. தள்ளிப்போடு எனலாம். நிறுத்தி வை / இருத்தி வை (keep in abeyance), நிலுவையில் வை (put in abeyance) எனச் சொல்லப்படுகின்றன. உரியரிலாநிலை என்றால் உரிமை கோருநர் இல்லாத சொத்தின் நிலை எனப் பொருள்.
97. Abeyance, keep in	நிறுத்திவைத்தல் செயலற்ற தன்மையில் வைத்தல் உடந்தை   கிடப்பில் போடுவது என்றும் சொல்வார்கள்   ஏதேனும் செயல்பாட்டை  இடைக்காலமாக நிறுத்தி வைப்பது. இதுவே முழுமையான நிறுத்தமாகவும் மாறலாம்.   கோப்பின் மீதான நடவடிக்கை, திட்டத்தைச் செயல்படுத்தல், தீர்மானத்தை நிறைவேற்றல் போன்ற எதுவாக இருந்தாலும் தொடக்க நடவடிக்கை அல்லது தொடர் நடவடிக்கை எடுக்காமல் ஆறப்போடுதல்(விட்டுவிடுதல்)
98. abhor	வெறு, ஒதுக்கு அருவரு   இச்சொல்லின் மூலச்சொல்லான abhorrere என்னும் இலத்தீன் சொல்லின் பொருள் திகிலில் பின் வாங்குதல். இதனால் வெறுப்பு அல்லது அருவருப்பை வெளிப்படுத்தல்.
99. abhorrence	பெருவெறுப்பு அருவருப்பு   எதையாவது அல்லது யாரையாவது வெறுக்கும் அல்லது இகழும் செயல்.
100. Abide	கடைப்பிடித்தல்   பின்பற்றுதல் மதித்து நடத்தல்‌ பணிந்தொழுகு, இணங்கியொழுகு   சட்டம் ஏற்காத எதையும் செய்யாதிருத்தல்.   இந்நாட்டின் சட்டத்தை மதிக்கும் மக்கள் சரியான நீதியை நாடுகின்றனர்.

(தொடரும்)

இலக்குவனார் திருவள்ளுவன்

சட்டச்சொற்கள் விளக்கம் 91 – 95 : இலக்குவனார் திருவள்ளுவன்

ஃஃஃ   இலக்குவனார் திருவள்ளுவன்      01 January 2024      அகரமுதல

(சட்டச்சொற்கள் விளக்கம் 86-90 : இலக்குவனார் திருவள்ளுவன் – தொடர்ச்சி)

சட்டச்சொற்கள் விளக்கம் 91 – 95

91. Abetment of suicide of child	குழந்தைத் தற்கொலைக்கு உடந்தை   குழந்தை அல்லது இளவர் தற்கொலை புரிந்துகொண்டால் அதற்கு உதவிய அல்லது உடந்தையாக இருந்து அல்லது தூண்டுதலாக இருந்தவர் தண்டிக்கப்படுவார்.   18 அகவைக்குட்பட்ட / மனநலங் குன்றிய/பிற ழ் மனம் உடைய/மடமை மிகுந்த/போதையில் உள்ள/ எவரேனும் தற்கொலை புரிந்து கொண்டால், இதற்கு உடந்தையாக இருப்பவர் மரணத் தண்டனை அல்லது வாணாள் தண்டனை அல்லது பத்தாண்டுத் தண்டனையும் ஒறுப்புத்தொகையும் விதிப்பதற்குரியவர். (இ.த.ச.305/IPC 305)
92. Abetment of suicide	தற்கொலைக்கு உடந்தை   ஒருவர் தன்னுயிரைப் போக்குவதற்கு உதவும் வகையில் அவருக்கு உயிர்போக்கும் நஞ்சு, தூக்குக்கயிறு உயிர்போக்குவதற்குரிய வேறு பொருள் முதலியவற்றை வாங்கித் தருதல் அல்லது வாங்குவதற்கான வழிமுறை கூறுதல் அல்லது உயிர்போக்கும் செயலுக்குத் துணையாக இருத்தல். ‌அத்தகையவர் உடந்தைக் குற்றவாளி அல்லது குற்ற உடந்தையர் எனப்படுவார்.
93. Abetting	தூண்டுதல் குற்றம் புரியத் தூண்டுதல்   போதைப்பொருட்களை விற்பதற்கு அல்லது உட்கொள்வதற்குத் தூண்டுதல்   போதைப் பொருட்கள் – மனநோய் சார்ந்த பொருட்களில் சட்ட முரண் போக்குவரத்தைத் தடுக்கும் சட்டம், 1988 பிரிவு 2
94. Abetting of waging war	போர் நடத்த உடந்தை   (இந்திய அரசிற்கு எதிராகப்) போரை நடத்துபவர், அல்லது அத்தகைய போரை நடத்த முயல்பவர் அல்லது அத்தகைய போர் நிகழ உடந்தையாக இருப்பவர், மரணத்தண்டனை அல்லது வாணாள் தண்டனையுடன்  ஒறுப்புத் தொகை விதிப்பதற்குஉரியவர்.   (இ.த.ச.பிரிவு 121)
95. Abettor	உடந்தைக் குற்றவாளி, குற்ற உடந்தையர் குற்றவுடந்தையர்   உடந்தையாளர் தற்கொலைக்கு உடந்தை   குற்றத்திற்கு உடந்தையாக இருப்பவர் ஒருவர் குற்றச்செயல் புரிவதற்குச் செயல் வகையிலோ பொருள்வகையிலோ அறிவுரை வகையிலோ உதவுநராகவோ தூண்டுநராகவோத்  துணைநிற்பவர்.   தூண்டுதல் (ஊழல் தடுப்புச் சட்டம் 1988, பிரிவு 3. 1. ஆ.. /S. 3(1)(b) PCA, 1988) குற்ற உடந்தை (கொத்தடிமைத் தொழிலாளர் முறை (அழித்தல்) சட்டம், 1976/S. 20 BLS(A)A, 1976) உடந்தையாயிருத்தல் (போதை மருந்துகள் உளப்பாதிப்புப் பொருள்கள் தடுப்புச்சட்டம், 1985 பிரிவு 29 / S. 29 NDPSA,1985) தற்கொலைக்கு உடந்தையாக இருத்தல்‌ (உடன்கட்டைத் தடுப்புச்சட்டம் 1987, பிரிவு  4 / S. 4 COS(P)A,1987)  தூண்டுதல் (போதை மருந்துகள் உளப்பாதிப்புப் பொருள்கள் போக்குவரத்துத் தடுப்புச்சட்டம், 1988, பிரிவு 2./S. 2 PIT NDPS, 1988)

(தொடரும்)

இலக்குவனார் திருவள்ளுவன்

சட்டச்சொற்கள் விளக்கம் 86-90 : இலக்குவனார் திருவள்ளுவன்

•  ஃஃஃ     இலக்குவனார் திருவள்ளுவன்      28 December 2023      அகரமுதல

(சட்டச்சொற்கள் விளக்கம் 81-85 தொடர்ச்சி)

சட்டச்சொற்கள் விளக்கம் 86-90

86. Abetment of assault	தாக்குதலுக்கான / தாக்க முனைதலுக்கான உடந்தை   திடீரென, கடுமையான ஆத்திர மூட்டலினாலின்றித்,   தாக்குதல் நடத்துதல் அல்லது குற்ற வன்முறையைப் பயன்படுத்தல் இ.த.ச.பிரிவு 134 இன் கீழ்க் குற்றமாகும்.   தரைப்படையில் அல்லது கப்பற்படையில் அல்லது வான்படையில் உள்ள அதிகாரியோ வீரரோ மீகாமரோ(கப்பலோட்டி வீரர்) வான்படைஞரோ அலுவற்பொறுப்பை நிறைவேற்றும் எந்த ஓர் உயர் அதிகாரியைத் தாக்கினாலும் அஃது ஏழாண்டு வரையிலான சிறைத்தண்டனைக்கும் தண்டத்தொகை விதிப்பிற்கும் உரியது.   தாவு/தாக்கு  பொருள் கொண்ட இலத்தீன் சொல்லான assiliō  இருந்து assault உருவானது. மக்கள் பேச்சு வழக்கில் assault என்றால் அலட்சியம் என்று பொருள் கொண்டு பயன்படுத்துகின்றனர்.
87. Abetment of desertion of soldier, sailor or airman.	தரைப்படை, கப்பற்படை, வான்படை விரர்கள் வெளியேறத் தூண்டுதல்   முப்படையைச் சேர்ந்தவர்களைத் தம் பணிப்பொறுப்புகளைக் கைவிட்டு ஓடுவதற்குத் தூண்டுதலாக இருப்பது இ.த.ச. பிரிவு 135 இன் கீழ் ஈராண்டு வரையிலான சிறைத்தண்டனை அல்லது ஒறுப்புத்தொகை விதிப்பு அல்லது இரண்டுமான தண்டனைக்குரிய குற்றமாகும்.
88. Abetment of escape of persons arrested	தளையிடப்பட்டவர்கள் தப்பியோட உடந்தை   கைது செய்யப்பட்டவர்கள் தப்பிச் செல்வதற்குத் தூண்டுதலாகவோ உடந்தையாகவோ இருப்பவர்களும் குற்றவாளிகளே.
89. Abetment of insubordination	கீழ்ப்படியாமைக்கு உடந்தை   கீழ்ப்படியாமை என்பது கட்டளைகளுக்குக் கீழ்ப்படிய மறுப்பதைக் குறிக்கிறது. இ.த.ச.பிரிவு 138 இது குறித்துக் கூறுகிறது.    தரைப்படை, வான்படை, கப்பற்படையைச் சேர்ந்த எந்த ஒருவரும் பணிப்பொறுப்பிலிருந்து தப்பி ஓடினால்,- பணியைக் கைவிட்டு ஓடினால், அத்தகைய செயலுக்கு உடந்தையாக இருப்பவரும் தண்டனைக்குரியவரே.   படைஞர், மேலலுலவர்களின் அல்லது படைத்துறையின் கட்டளைக்கு அடிபணிய மறுப்பதற்குத் தூண்டுதலாக அல்லது உடந்தையாக இருப்பவர், 6 மாதம்வரையிலான  சிறைத்தண்டனை அல்லது ஒறுப்புத் தொகை அல்லது இரண்டும் விதிக்கப்படுவதற்கு உரியவர்.
90. Abetment of mutiny	கலகத்தைத் தூண்டுதல்   படைஞர் அல்லது படைத்துறை அலுவலர் தம் பணியிலிருந்து கடமை தவற ஈர்ப்பவர் அல்லது கலவரம் செய்யத் தூண்டுபவர், வாணாள் சிறைத்தண்டணைக்கு அல்லது பத்தாண்டு வரையிலான தண்டனையும் ஒறுப்புத்தொகையும் விதிப்பதற்கு உரியவராவார்(இ.த.ச.பிரிவு 131).   இத்தூண்டுதலால் கலகம் நேர்ந்தது எனில் அதற்குக் காரணமானவர், மரணத்தண்டனை அல்லது வாணாள் தண்டனை அல்லது பத்தாண்டுகாலத் தண்டனை அல்லது சிறைத்தண்டனையுடன்   ஒறுப்புத்தொகையும் தண்டனையாக விதிப்பதற்குரியவராவார். (இ.த.ச.பிரிவு 132)   mutiny  என்றால் ஆட்சி எதிர்ப்புக்கிளர்ச்சி, படைவீரர் கலகம், கலகம், கிளர்ச்சி, கலவரம், சட்டப்படியான அதிகாரத்தை வெளிப்படையாகப் புறக்கணிக்குங் கலகம், படைத் தலைவர்களுக்கு எதிரிடையாகப் படைவீரர்கள் செய்யுங் கலகம் எனப் பலவாறாகக் கூறப்படுகிறது. இங்கே படைஞர்கள் செய்யும் கலவரத்தைக் குறிக்கிறது.

(தொடரும்)

இலக்குவனார் திருவள்ளுவன்

சட்டச்சொற்கள் விளக்கம் 81-85 : இலக்குவனார் திருவள்ளுவன்

 ஃஃஃ    இலக்குவனார் திருவள்ளுவன்      25 December 2023      அகரமுதல

(சட்டச்சொற்கள் விளக்கம் 71-80 : இலக்குவனார் திருவள்ளுவன் – தொகுப்பு)

சட்டச்சொற்கள் விளக்கம் 81-85

81. Abetment by aid	தூண்டல் உதவி   குற்ற உடந்தை உதவி – குற்றவாளி, குற்றம் புரிவதற்கு வேண்டுமென்றே உதவி, தூண்டுதலாக இருப்பது.   குற்றம் புரிய அல்லது குற்றச் செய்கையை எளிமையாக்கத் தூண்டுநர் உதவுகையை இது குறிக்கிறது. குற்றவாளிக்கு உதவும் எண்ணம் இருப்பதே முதன்மையானது.   தூண்டுதல் என்பது, குற்றவாளி குற்றத்தைச் செய்யும்போது, குற்றம் புரிய ஏவுதல் அல்லது சொல்லிக் கொடுத்தல் அல்லது ஊக்குவித்தல் அல்லது வழிகாட்டுதல் என்பன அடிப்படைப் பொருள்களாகும். குற்றவாளி ஒரு குற்றத்தைச் செய்யும்போது அவருக்கு உதவுவதையும் இது குறிக்கும்.   இந்தியத் தண்டிப்புச்சட்டம் பிரிவு 107(IPC Section 107)குற்ற உடந்தை பற்றி உரைக்கிறது.
82. Abetment by conspiracy	சதி உடந்தை   குற்றச் சதி வாயிலான உடந்தை   ஒரு குற்றச் செயல் நடைபெறுவதற்கு அதற்கான சதியில் கருத்துரை வழங்கியோ அக்குற்றச் செயலுக்குரிய உதவுநராக இருந்தோ உடந்தையாயிருத்தல்.     Cōnspīrātiō என்னும் இலத்தீன் சொல்லின் பொருள் இரட்டிப்புச்சதி.
83. Abetment by defamation	அவதூறு வாயிலாக உடந்தையாக இருத்தல்   இணையத் தளங்களில் சொற்போருக்கு இடந்தரும் கருத்துகளை எழுதுபவர்கள் மீது,கடும் நடவடிக்கை எடுப்பதற்கு எதிராக உச்சநீதிமன்றம் தீர்ப்பு வழங்கியது. இதனால், இ.த.ச. பிரிவுகள் 499-502 அவதூறு தொடர்பானவை; பேச்சு உரிமை, கருத்துரிமை,தன்னுரிமையான சிந்தனை ஆகியற்றிற்கு எதிராக இப்பிரிவுகள் உள்ளனவாகக் கூறி இவற்றை நீக்க வேண்டும் என்ற கருத்து பரவி வருகிறது.
84. Abetment by instigation	தூண்டுதல் வாயிலாக உடந்தையாயிருத்தல்   இ.த.ச.107 இன்கீழ்க் குற்றத்தைச் செய்வதில், மறைமுகமாகப் பங்கேற்பது தண்டனைக்குரிய குற்றமாகும்.   இதன்படிக் குற்றச் செயலைச் செய்யத் தூண்டுதலாக இருத்தல், சதி செய்தல், உடந்தையாக இருத்தல் முதலியன தண்டனைக்குரிய குற்றச் செயலாகிறது.
85. Abetment of a thing	ஒன்றைச் செய்யத் தூண்டுதல்   ஒரு குற்றச் செயலைச் செய்யத் தூண்டுதல்.   ஒருவர் அல்லது ஒருவருக்கு மேற்பட்டவர்களுடன் சேர்ந்து சதி செய்து சட்டச்செயலை விடுத்தல் அல்லது சட்ட முரண் செயலைச் செய்தல்.   ஒன்றைவேண்டுமென்றே சித்திரிப்பதன் மூலம் அல்லது அவர் வெளிப்படுத்த வேண்டிய ஒரு பொருளை மறைப்பதன் மூலம் அல்லது குற்றச் செயல் ஒன்றைச் செய்விப்பதன் அல்லது அடைவதன் மூலம் அல்லது செய்யவோ அடையவோ முயல்வதன் மூலம் குற்ற உடந்தையாளர் ஆகிறார்.

(தொடரும்)

இலக்குவனார் திருவள்ளுவன்