பாரதியாரின் வாழ்வியல் கட்டளைகள்: 16 வழி நடத்தித் தலைமை தாங்கு! – இலக்குவனார் திருவள்ளுவன்

இலக்குவனார் திருவள்ளுவன்      24 சூலை 2016      கருத்திற்காக..

(பாரதியாரின் வாழ்வியல் கட்டளைகள்: 15 தொடர்ச்சி)

பாரதியாரின் வாழ்வியல் கட்டளைகள் 16

வழி நடத்தித் தலைமை தாங்கு!

  வாழ்வியல் கடமைகளாகப் பலவற்றைக் கூறும் மாபெரும் கவிஞர் பாரதியார் தலைமைப் பண்பையும் வலியுறுத்துகிறார்.

        “உன்னைக் கோடிமுறை தொழுதேன் – இனி

                வையத் தலைமையெனக்கு அருள்வாய்” (பக்கம் 133 | யோக சித்தி)

என்பதன் மூலம் கல்வி, தொழில், பண்பு முதலானவற்றில் சிறந்திருக்க வேண்டிய நம் இலக்கு ‘வையத் தலைமையே’ என்பதை அடையாளம் காட்டுகிறார். எனவே, பொறுப்பு கண்டு அஞ்சக்கூடாது என்பதற்காகச் ‘சுமையினுக்கு இளைத்திடேல்’ (ஆ.சூ 29) என்கிறார். ஒருமையுள் ஆமை போல் ஐம்புலன் அடக்கி ஆளுமைத் திறன் பெற ‘ஐம்பொறி ஆட்சி கொள்’ (ஆ.சூ 9) என்கிறார். பின், ‘வையத்தலைமை கொள்’ (ஆ.சூ 109) எனக் கட்டளையிடுகிறார். ஆனால் உலகெங்கும், வையத் தலைமை கொள்வோர் பொருளாசையில் நெறி பிறழும் நிகழ்வுகள் நடந்து வருவதால் ‘புதிய ஆத்திசூடி’யின் முத்தாய்ப்பாக ‘வௌவுதல் நீக்கு’ (ஆ.சூ 110) என்கிறார். எனவே, பிறர் பொருள் விழையா நல்லுள்ளத்துடன் வையத்தில் தலைமை ஏற்பதையே வாழ்வின் நோக்கமாக ஒவ்வொருவரும் கொள்ள வேண்டும்.

பாரதியார் உணர்த்தும் வாழ்வியல் கடமைகளை விரிப்பின் பெருகும். எனவே, அவற்றின் சுருக்கக் கட்டளைகளாக அவர் அளித்துள்ள புதிய ஆத்திசூடியின் அடிப்படையில் மட்டுமே அவை தொகுக்கப்பட்டன. இவற்றை மட்டுமே பின்பற்றும் ஒவ்வொருவருமே உயர்நிலை பெறலாம்.

பாரதியார் புகழ்பாடிப் பைந்தமிழ் வளர்ப்போம்!

(நிறைவு)

இலக்குவனார் திருவள்ளுவன்

பின் குறிப்பு :  பத்தாண்டுகளுக்கு முன்னர் எழுதிய கட்டுரை. இக்கட்டுரையைப் படித்த பாரதியார் குடும்பத்தைச்சேர்ந்த முதியவர் ஒருவர் தொலைபேசி வழி ஏறத்தாழ  ஒரு மணி நேரம் பாராட்டிப் பேசினார். “ஆத்திசூடி மிக எளிமையானது; அக்கருத்து பாரதியார் கவிதைகளில் பரவி உள்ளது என அளித்திருப்பது பாரதியாரின் உள்ளத்தைப் படம்பிடிப்பதாகவும் அவரது கவிதைகளின் சாறாகவும் அமைந்துள்ளது; பாரதியாரின் கவிதைகளையும் கருத்துகளையும் அவரது கவிதைகளுடனும் கருத்துகளுடனும் ஒப்பிட்டு இதுவரை யாரும் ஆராய்ந்ததில்லை” என்பனவே அவரது பேச்சின் மையப்பொருள். இருப்பினும் பாரதியாரின் பேத்திவழி உறவுப் பெண்  என எண்ணுகிறேன். அவர் இதனை ஏற்கவில்லை. ஆத்திசூடிக்கு எதற்கு விளக்கம் என்றும் வெவ்வேறு படைப்புகளை ஏன் இணைக்க வேண்டும் என்றும் கருதினார். நம் கருத்தை அனைவரும்  ஏற்க வேண்டும் என எதிர்பார்ப்பது தவறல்லவா?  என்றாலும் பாரதியின் ஆழ்மன அறவுணர்வுகளை எதிரொலிப்பதாக ஆத்திசூடி அமைந்துள்ளதாகக் கருதியதால், தொடராக ‘அகரமுதல’ இதழில் வெளியிட்டுள்ளேன். சில இடங்களில் இன்னும் விளக்கமாக எழுதியிருக்கலாமோ என இப்பொழுது தோன்றினாலும் குறையாகத் தெரியவில்லை. அவ்வப்பொழுது இக்கட்டுரைபற்றிய  நல்லுரை வழங்கிய நண்பர்களுக்கு நன்றி. அன்புடன் இலக்குவனார் திருவள்ளுவன் /  தமிழே விழி! தமிழா விழி!/

பாரதியாரின் வாழ்வியல் கட்டளைகள்: 12 – இலக்குவனார் திருவள்ளுவன்

அகரமுதல 140, ஆனி12,2047 / சூன் 26,2016

இலக்குவனார் திருவள்ளுவன்      26 சூன் 2016      கருத்திற்காக..

(பாரதியாரின் வாழ்வியல் கட்டளைகள்: 11 தொடர்ச்சி)

பாரதியாரின் வாழ்வியல் கட்டளைகள்: 12

பயனில நீக்கிப் பண்புடன் வாழ்க!

“அன்பு சிவம்! உலகத்துயர் யாவையும்

அன்பினில் போகும்”

(பாரதியார் கவிதைகள் :பக்கம் 26 | பாரதமாதா)

என்று புத்தர் மொழியாக அன்பை வற்புறுத்துபவர் பாரதியார்.

“பொலிவிலா முகத்தினாய் போ போ போ

… … … … … … …

… … … … … … …

சூழ்ந்த மாசு போன்றனை போ போ போ

ஒளி படைத்த கண்ணினாய் வா வா வா

… … … … … … …

ஒரு பெருஞ்செயல் செய்வாய் வா வா வா

(பாரதியார் கவிதைகள்: பக்கம் 38-40 | போகின்ற பாரதமும் வருகின்ற பாரதமும்)

என அமையும் பாடலில் மக்கள் விலக்க வேண்டிய பண்புகளையும், பெருக்க வேண்டிய பண்புகளையும் விளக்குகிறார்.

“விதியே விதியே தமிழச் சாதியை

என் செய நினைத்தாய் எனக்குரையாயோ” (பாரதியார் கவிதைகள்: பக்கம் 48 | தமிழச்சாதி)

எனப் பாரதியார் துயரம் கொண்டு நையும் உள்ளம் நாமும் பிறர் துன்ப நிலை கண்டு இரங்க வேண்டும் என உணர்த்துகிறது. மேலும், தமிழ்ச்சுற்றத்தார் உலகெங்கும் படும் துயரங்களைக் களைவதற்காகச்

“சொல்லில் உயர்வு தமிழ்ச் சொல்லே – அதைத்

தொழுது படித்திடடி பாப்பா (பாரதியார் கவிதைகள்: பக்கம் 203 | பாப்பாப் பாட்டு)

என்றும்,

        “தேமதுரத் தமிழோசை உலகமெல்லாம்

        பரவும் வகை செய்தல் வேண்டும்”

 (பாரதியார் கவிதைகள் :பக்கம் 46 | தமிழ்)

என்றும் பாரதியார், இட்ட கட்டளைகளை நிறைவேற்ற வேண்டும்

“ஒழுக்கமும் நடையும் கிரியையும் கொள்கையும்

ஆங்கவர் காட்டிய அவ்வப்படியே

தழுவிடின் வாழ்வு தமிழர்க்குண்டு

(பாரதியார் கவிதைகள் : பக்கம் 51 | தமிழச்சாதி)

எனத் தமிழர் வாழ முன்னவரின் தமிழ்க் கொள்கைகளைப் பின்பற்ற வேண்டும் என்கிறார் பாரதியார்.

        “நன்மை வந்தெய்துக, தீ தெல்லாம் நலிக

        அறம் வளர்ந் திடுக மறம்மடி வுறுக”

(பாரதியார் கவிதைகள் : பக்கம் 51 | வாழிய செந்தமிழ்)

என வாழ்ந்து

        “யார்க்கும் எளியனாய் யார்க்கும் வலியனாய்

        யார்க்கும் அன்பனாய் யார்க்கும் இனியனாய்”

(பாரதியார் கவிதைகள் : பக்கம் 95 | விநாயகர் நான்மணிமாலை)

அனைவரும் திகழ வேண்டும் என்கிறார் பாரதியார்.

“சிறுமைகள் என்னிடமிருந்தால் விடுக்க வேண்டும்” (பாரதியார் கவிதைகள் : பக்கம் 125 | பேதை நெஞ்சே) எனச் சிறுமைகளை நீக்க வேண்டுகிறார். எனவே, ‘புதிய ஆத்திசூடி’யிலும் அல்லன நீக்கி நல்லன பேணுதற்குரிய கட்டளைகளை வழங்குகிறார்.

 செல்வச் செருக்கு வந்தால் செல்வம் இல்லாரைத் தூற்றும் பழக்கம் வந்துவிடலாம்; பேச்சில் நேர்மை தவறும் போக்கு வந்துவிடலாம். எனவே, பாரதியார் ‘நேர்படப் பேசு’ (ஆ.சூ 61) ‘தூற்றுதல் ஒழி’ (ஆ.சூ 47) ‘பொய்ம்மை இகழ்’ (ஆ.சூ 73) ‘மௌட்டியந் தனைக் கொல்’ (ஆ.சூ 85) ‘யாவரையும் மதித்து வாழ்’ (ஆ.சூ 87) எனக் கட்டளையிடுகிறார். உலக நடைமுறையையும் மீறக் கூடாது என்பதற்காக ‘நீதி தவறேல்’ (ஆ.சூ 91) ‘இலௌகிகம் ஆற்று’ (ஆ.சூ 102) என்கிறார்.

  இதனால் அற்பர்களையும் நாம் மதிக்கலாமா? கூடாது! அவ்வாறு மதித்தால் அவர்களின் அழிவிற்கு மட்டும் அல்ல பிறரின் அழிவிற்கும் நாம் காரணமாவோம். அற்பர்களை ஒதுக்கித் தள்ளினால்தான் திருந்திய பாதையில் செல்ல முடியும். எனவே ‘(உ)ரோதனம் தவிர்’ (ஆ.சூ 95) ‘(உ)லுத்தரை இகழ்’ (ஆ.சூ 100) என்கிறார்.

  மேலும், “கற்பனையூர்” பாட்டின் குறிப்பில், “கவலைகளை முற்றுந் துறந்து விட்டு உலகத்தை வெறுமே லீலையாகக் கருதினாலன்றி மோட்சம் எய்தப்படாது” என்கிறார் பாரதியார் (பாரதியார் கவிதைகள் : பக்கம் 198). ஆகவே, ‘(இ)லீலை இவ்வுலகு’ (ஆ.சூ 99) என்கிறார். இவற்றிற்கெல்லாம் அடிப்படைப் பண்பு தவ உணர்வு ஆகும். எனவே, ‘தவத்தினை நிதம்புரி’ (ஆ.சூ 53) ‘நோற்பது கைவிடேல்’ (ஆ.சூ 64) ‘மொய்ம்புறத் தவஞ் செய்’ (ஆ.சூ 83) ‘மோனம் போற்று’ (ஆ.சூ 84) எனத் தவ அமைதியை வேண்டுகிறார்.

– இலக்குவனார் திருவள்ளுவன்

பாரதியாரின் வாழ்வியல் கட்டளைகள் 10 – இலக்குவனார் திருவள்ளுவன்

அகரமுதல 138, வைகாசி 30,2047 / சூன் 12, 2016

இலக்குவனார் திருவள்ளுவன்      12 சூன் 2016      கருத்திற்காக..

(பாரதியாரின் வாழ்வியல் கட்டளைகள் 09 தொடர்ச்சி)

பாரதியாரின் வாழ்வியல் கட்டளைகள்:

10.
முயற்சியால் துன்பம் வென்று இன்பம் காண்க!

  பணத்தினைப் பெருக்கி வாழ்வில் உயர என்ன செய்ய வேண்டும்? கல்வியறிவும், தொழில் ஈடுபாடும் இருந்தால் மட்டும் போதுமா? “நல்லன எண்ண வேண்டும்”, “எண்ணிய முடிய சோம்பலை நீக்க வேண்டும்”, முயற்சி வேண்டும்; காலம் அறிந்து செயல்பட வேண்டும்; முடியும் மட்டும் வினையாற்ற வேண்டும் அல்லவா? இவற்றைப் பல பாடல்கள் வழி வலியுறுத்துபவர்தானே பாரதியார்!

“எடுத்த காரியம் யாவினும் வெற்றி

எங்கு நோக்கினும் வெற்றி

… … …

எண்ணும் எண்ணங்கள் யாவினும் வெற்றி

எங்கும் வெற்றி எதனினும் வெற்றி”

(பாரதியார் கவிதைகள் :  பக்கம் 138-139 வெற்றி)

“எண்ணிய எண்ணம் எல்லாம் எளிதிலே வெற்றி யெய்தும்” ( பாரதியார் கவிதைகள்:  பக்கம் 169 : ஞானபாநு)

என எண்ணிய எண்ணியாங்கு எய்த திண்ணிய எண்ணம் வேண்டுமென உயர் தமிழ்ப்புலவர் திருவள்ளுவர் வழி உணர்த்துகிறார் பாரதியார்.

“துன்பமும் நோயும் மிடிமையும் தீர்த்துச்

சுகமருளல் வேண்டும்”

“துன்பம் இனியில்லை சோர்வில்லை தோற்பில்லை”

“இன்று எமை வருத்தும் இன்னல்கள் மாய்க” ( பாரதியார் கவிதைகள்: பக்கம் 51: வாழிய செந்தமிழ்)

“துயர்கள் தொலைந்திடுக

கவலைப்படுதலே கருநாகமாம்,

கவலையற்றிருத்தலே முக்தி

துன்பமே இயற்கை யெனும்

சொல்லை மறந்திடுவோம்

இன்பமே வேண்டி நிற்போம்”

எனத் துன்பத்தைத் தொலைத்திடப் பலவாறாக வேண்டுகிறார் பாரதியார். சோம்பி இருந்தால் துன்பத்தைத் தொலைக்க முடியுமா?

“ஓடி விளையாடு பாப்பா – நீ

ஓய்ந்திருக்க லாகாது பாப்பா” (பாரதியார் கவிதைகள் : பக்கம் 202 :பாப்பாப் பாட்டு)

“துன்பம் நெருங்கி வந்த போதும் – நாம்

சோர்ந்து விடலாகாது பாப்பா” (பாரதியார் கவிதைகள் : பக்கம் 203 : பாப்பாப் பாட்டு)

“சோம்பல் மிகக் கெடுதி பாப்பா” (பாரதியார் கவிதைகள் : பக்கம் 203 : பாப்பாப் பாட்டு)

எனச் சோம்பலையும் சோர்வையும் விரட்ட பாப்பாவிற்கே அல்லவா பாரதியார் அறிவுறுத்துகிறார்!

இவ்வாறு சோம்பலை நீக்கி முயற்சி கொண்டு, துன்பங் கண்டு தளராமல் இருக்க உயர்வான எண்ணத்தை வலியுறுத்தும் பாரதியார் ‘புதிய ஆத்திசூடி’யிலும் கட்டளையிடத் தவறவில்லை. ‘எண்ணுவது உயர்வு’ (7) ‘கெடுப்பது சோர்வு’ (19) ‘கேட்டிலும் துணிந்து நில்’ (20) ‘ஓய்தல் ஒழி’ (11) ‘சிதையா நெஞ்சுகொள்’ (27) ‘செய்வது துணிந்து செய்’ (31) ‘கவ்வியதை விடேல்’ (24) ‘நன்று கருது’ (54) ‘நினைப்பது முடியும்’ (56) ‘நுனியளவு செல்’ (58) ‘நாளெல்லாம் வினை செய்’ (55) ‘நையப் புடை’ (62) ‘நொந்தது சாகும்’ (63) ‘மிடிமையில் அழிந்திடேல்’ (77) ‘பீழைக்கு இடங்கொடேல்’ (68) ‘யவனர்போல் முயற்சி செய்’ (86) ‘துன்பம் மறந்திடு’ (46) ‘முனையிலே முகத்து நில்’ (79) ‘வீரியம் பெருக்கு’ (106) ‘காலம் அழியேல்’ (14) ‘தோல்வியிற் கலங்கேல்’ (52) ‘நெற்றி சுருக்கிடேல்’ (60) ‘மீளுமாறு உணர்ந்து கொள்’ (78) ‘சௌரியந் தவறேல்’ (36) ‘சேர்க்கை அழியேல்’ (32).

இவ்வாறு கால மேலாண்மை, வினைத்திட்பம், வினை செயல் வகை முதலியனவெல்லாம் அடங்கும் வண்ணம் துன்பந் தொலைத்து இன்பங்காண செயல்திறனுக்கான கட்டளைகளை வழங்கியுள்ளார் பாரதியார்.

– இலக்குவனார் திருவள்ளுவன்

பாரதியாரின் வாழ்வியல் கட்டளைகள் 09 – இலக்குவனார் திருவள்ளுவன்

அகரமுதல 137, வைகாசி 23, 2047 /சூன் 05,2016

இலக்குவனார் திருவள்ளுவன்      05 சூன் 2016      கருத்திற்காக..

(பாரதியாரின் வாழ்வியல் கட்டளைகள் 08 தொடர்ச்சி)

பாரதியாரின் வாழ்வியல் கட்டளைகள்

09.  பணத்தினைப் பெருக்கு!

தொழில் நோக்கமும், தொழிலுக்கு அடிப்படைத் தேவையும் என்ன?  பொருளிலார்க்கு இவ்வுலகம் இல்லை அன்றோ?

“பொருளில்லார்க்கிலை யிவ்வுலகு என்றநம்

புலவர்தம்மொழி, பொய்ம்மொழி யன்றுகாண்

பொருளி லார்க்கின மில்லை, துணையில்லை

                பொழு தெலாமிடர் வெள்ளம்வந் தெற்றுமால்

பொருளி லார்பொருள் செய்தல் முதற்கடன்”

(பக்கம் 255 / சுயசரிதை)

எனும் பொய்யாமொழிப் புலவரைப் போன்று ‘செய்க பொருள்’ என்கிறார். பொருள் எதற்கு?

“இல்லாமையை இல்லாமல் ஆக்குக

இல்லை என்ற கொடுமை உலகில் இல்லையாக வைப்பேன்” (பக்கம் 152 / பாரதியார் கவிதைகள்  – திருவே பகை)

“தனியொருவனுக்குணவிலை யெனில்

சகத்தினை அழித்திடுவோம்” (பக்கம் 41 /   பாரதியார் கவிதைகள்  – பாரத சமுதாயம்)

எனப் புரட்சிக் குரல் கொடுத்து

“வறுமை என்பதை மண்மிசைமாய்ப்பேன் (பக்கம் 137 / பாரதியார் கவிதைகள்  – ஏ காளீ)

என வறுமைக்கு எதிராகப் போர்க்குரல் கொடுத்தவர் அல்லவா பாரதியார்!

        “ஓவிலாத செல்வம் இன்னும்

                ஓங்கும் அன்னை வாழ்கவே!” (பக்கம் 25 /பாரதியார் கவிதைகள்  – சயபாரத)

எனச் செல்வத்தை வேண்டும் பாரதியார்,

“பணத்தினைப் பெருக்கு” (65) எனக் கட்டளையிடுகிறார்

 – இலக்குவனார் திருவள்ளுவன்