மனங்கவர் ‘மாங்கனி’ தந்த கண்ணதாசன் 1 – இலக்குவனார் திருவள்ளுவன்

இலக்குவனார் திருவள்ளுவன்      07 திசம்பர் 2014      கருத்திற்காக..

  கண்ணதாசன் என்றால் அனைவருக்கும் நினைவிற்கு வருவது அவரது திரைப்பாடல்கள்தாம். நம் வாழ்வில் பல்வேறு நிகழ்வுகளின் பொழுது நம்மோடு தொடர்புடையனவாக – நமக்கே என்று எழுதப்பட்டனவாக – அமைந்த பாடல்கள் வழி நாம் அவரை என்றும் நினைவில் கொள்கிறோம். ஆனால் அவர் பாடலாசிரியராக மாறும் முன்னரும் பின்னருமே கவிஞர், கதையாசிரியர், நாடக ஆசிரியர். இதழாசிரியர், திரைப்படக் கதைஉரையாடலாசிரியர், புதின எழுத்தாளர், காவிய ஆசிரியர், கட்டுரையாளர், எனப் பன்முகமும் கொண்டவர்.

பிறப்பும் சிறப்பும்

  கண்ணதாசன் ஆனி 10, 1958 / 24.6.1927 இல் சிறுகூடல்பட்டியில்சாத்தப்பன்-விசாலாட்சி இணையருக்கு மகனாகப் பிறந்தவர்.ஐப்பசி 1, தி.பி. 2012 /17.10.81இல் மறைந்தார். இவரது இயற்பெயர் முத்தையா; உடன்பிறந்தோர் எண்மர்; சிறுகூடல் பட்டியில் தொடக்கப்பள்ளி முடித்தபின்பு அமராவதிபுதூரில் எட்டாம் வகுப்புவரைதான் படித்துள்ளார். தன் பதினேழாம் அகவையில் (தி.பி.1975 /1944) ‘திருமகள்’ என்னும் இதழாசிரியராகத் தன் இலக்கியப்பணியையும் இதழ்ப்பணியையும் தொடங்கியுள்ளார். அதே ஆண்டிலேயே ‘முதற்கவிதை’ என்னும் தலைப்பில் தன் முதற்கவிதையை வெளியிட்டுக் கவி உலகில் அடி யெடுத்து வைத்தார். அடுத்து, திரை ஒலி (1945), மேதாவி (1946), சண்டமாருதம் (1949), தென்றல் (கிழமை இதழ், 1954 – 1962), சண்டமாருதம்(திங்களிருமுறை, 1954), தென்றல் திரை, முல்லை(1956), தென்றல்(நாளிதழ், 1960), தென்றல் திரை(நாளிதழ், 1961) கண்ணதாசன்(1968), கடிதம்(நாளிதழ்-1969)ஆகிய இதழ்களின் ஆசிரியராகப் பணியாற்றியுள்ளார். இவற்றுள் தென்றல், தென்றல்திரை, முல்லை, கண்ணதாசன் முதலிய கண்ணதாசனே வெளியிட்டவையாகும்.காரை முத்துப் புலவர், வணங்காமுடி, கமகப்பிரியா, பார்வதிநாதன், ஆரோக்கியசாமி என்னும் புனைபெயர்களிலும் எழுதி உள்ளார். சந்திரமோகன் என்னும் பெயரில் நடிப்பதற்கு வாய்ப்பு கேட்டும் முயன்றுள்ளார்.

  1949 இல் ‘கன்னியின் காதலி’ என்னும் திரைப்படத்திற்காகக் ‘கலங்காதிரு மனமே’ எனமுதல் பாடல் எழுதினார். தொடர்ந்து திரைப்பாடல்கள் எழுதி அவை, 5 தொகுதிகளாக வந்துள்ளன.இவை தவிர, கவிதைகள் 7 தொகுதிகள் வந்துள்ளன;கவிதைநூல்கள் 10 வந்துள்ளன. புதினங்கள் 21, குறும் புதினங்கள் 13, காப்பியங்கள் 9, சிற்றிலக்கியங்களும் பக்தி இலக்கியங்களும் 10, சிறுகதைத் தொகுப்பு 7, நாடகங்கள் 3, மேடை நாடகங்கள் 3 , கட்டுரை நூல்கள் 27, தத்துவ நூல்கள் 10, தன் வரலாறு 3, திரைக் கதை உரையாடல்கள் 12 திரைப்படங்கள என இவரது படைப்புப் பரப்பு (தரவு: த.இ.க.க.) அகன்றதும் ஆழமானதுமாகும்

கசப்பும் இனிப்பும்

  கண்ணதாசனைப்பற்றி என் உள்ளத்தில் காலத்திற்கேற்ற பல படிமங்கள் உருவாகியுள்ளன. பள்ளிப்பருவத்தில் எல்லாப் பாடல்களுமே கண்ணதாசன் எழுதியவை என எண்ணி வியப்பின் உச்சியில் அவரைக் கொண்டிருந்தேன். பள்ளிப் பருவ நிறைவிலேயே அவ்வாறு எண்ணிய சிறந்த பாடல்கள் பிறரால் எழுதப்பட்டன என அறிய வந்ததும் சற்றுச் சறுக்கல். மீண்டும் அன்றாட வாழ்விற்கேற்ற அவரது பாடல்கள் அவரை மேலும் உயர்த்தின. அடுத்து அவரைப்பற்றிய ஒரு தொடரைப்படித்ததும் இலக்கியப்பாடல்களைத் தம் பாடல்களாகக் காட்டியவர் என்றும் தம்மை நாடிக் கருத்து கேட்கும் வளரும் கவிஞர்களின் பாடல்களைத் தம் பாடல்களாக் காசாக்கியவர் என்றும் எண்ணம் எழுந்து மீண்டும் சறுக்கல். அடுத்து, எப்படியோ இலக்கியப் பாடல்களை எளிய வடிவில் மக்களிடம் அறிமுகம் செய்வது சிறப்புதானே! என்றும் அவரது சூழலுக்கேற்ற பாடல்களின் சிறப்பால் அப்படி ஒன்றும் திருடியிருக்கமாட்டார் என்றும் எண்ணம் ஆட்சி செய்தது. அவரது ‘அருத்தமுள்ள இந்துமதத்தின்’ சில பகுதிகளைப் படித்த பொழுது, ஒரு சாராரின் அளவு கடந்த பாராட்டுதலுக்கு உள்ளான இப்படைப்புகள் அவர் மீது வெறுப்பையே விளைவித்தன. ‘இயேசு காவியம்’ பற்றி அறிந்த பொழுது அவரது சமயப் பொறுமை புரிந்தது.

மறக்க முடியாத கவிஞர்

  இவ்வாறு வெவ்வேறு காலக்கட்டங்களில் கண்ணதாசன் பற்றிய வெவ்வேறு எண்ணங்கள் ஆட்சி செய்தன. உண்மையை உரைக்கின்றேன் எனத் தன்னுடைய குடிப்பழக்கம், விலைமகள் தொடர்பு முதலான தீய பழக்கங்களைப் பெருமையாகக் கூறிய பொழுது வெறுப்புதான் வந்தது.

ஒரு கோப்பையிலே என் குடியிருப்பு

ஒரு கோல மயில் என் துணையிருப்பு

என்றும், “குடிப்பதும், தவறுக்கென்றே தங்களை ஒப்புக்கொடுத்துவிட்ட பெண்களுடன் ஈடுபடுவதும், ஒரு தனி மனிதன் தன் உடல்நிலைக்கும் வசதிக்கும் ஏற்ப செய்யும் தவறுகளே தவிர, அதனால் சமுதாயத்தின் எந்த அங்கமும் பாதிக்கப்படுவதில்லை” என்று தனது தவறுகளைச் சரிஎன்பன போல் விளக்கம் அளிப்பதும் ஏற்கத்தக்கனவாக இல்லை. எனினும் அவரே, “வனவாசம், மனவாசம் இரண்டும் ஒருவன் எப்படி வாழக்கூடாது என்பதற்கான எடுத்துக்காட்டுகள். எப்படியெல்லாம் வாழக்கூடாதோ, அப்படியெல்லாம் வாழ்ந்திருக்கிறேன்”, என ஒப்புதல் வாக்குமூலம் கொடுப்பதையும் தன் படைப்புகளைப் பற்றி, “புத்தங்களைப் பின்பற்றுங்கள். அதன் ஆசிரியரைப் பின்பற்றாதீர்கள்!’ எனக் கூறியதையும் இன்றைய சூழலில் ஏற்கத்தான் வேண்டி உள்ளது.இதனால், இறுதியில் – குற்றத்தை ஒப்புக்கொள்ளாத பலரைப் போற்றும் பொழுது, குற்றங்களை வெளிப்படையாகக் கூறுவதாலேயே – அவரை வெறுக்க வேண்டுமா என்ற எண்ணம் எழுந்தது. ஆதலின் அவரது வாழ்க்கையை மீறிய அவரது பாத்திறனே மேலோங்கி நின்றது. கண்ணதாசன் என்னால் மறக்க முடியாத கவிஞராக இடம் பெற்றுவிட்டார்.

(தொடரும்)

 

அகரமுதல 56

அரசியலில் திரைப்புள்ளிகள் – இரசினி, குட்பு

இலக்குவனார் திருவள்ளுவன்      30 நவம்பர் 2014      கருத்திற்காக..

அரசியலில் திரைப்புள்ளிகள் – இரசினி, குட்பு

அரசியலில் பங்கேற்க யாவருக்கும் உரிமையுண்டு. பிற துறையைச் சேர்ந்தவர்கள் பங்கேற்பதுபோல் திரைத்துறையினருக்கும் அந்த உரிமையுண்டு. என்றாலும் நாட்டு மக்களுக்கு எத்தொண்டும் ஆற்றாமல், அவர்களின் சிக்கல்களைத் தீர்ப்பதற்காகக் குரல் கொடுக்காமல், அவர்களின் போராட்டக்களங்களில் தோள் கொடுக்காமல், நன்கறிநிலை(popularity) உள்ளதால் மட்டுமே அரசியல் தலைமையையும் நாட்டுத்தலைமையையும் எதிர்பார்த்து அரசியலில் காலடி எடுத்து வைப்பது என்பது வீண் கனவே!. அப்படி எந்த ஒரு துரும்பையும் மக்களுக்காக எடுத்துப் போடாதவர்களை அரிசியலில் இறங்கவும் முதல்வர் பதவியை அணி செய்யவும் சிலர் அழைக்கின்றார்கள் எனில், இச்செயல் அழைப்பவர்களின், துதிபாடி ஏதோ ஆற்றிக் கொள்ள விரும்பும் செயலாகவோ அறியாமையாகவோதான் இருக்கமுடியும்.

நடிப்பாலும் உழைப்பாலும் திரையுலகின் முன்னணி இடத்தைப்பிடித்திருப்பவர் இரசினிகாந்து.அவர் குறிப்பிட்டுச் சொல்லும் அளவிற்குத் தமிழ் நாட்டிற்கோ தமிழ் மக்களுக்கோ எத் தொண்டும் ஆற்றியவரல்லர். அவர் படம் சார்ந்த முத்திரைகளைப் பயன்படுத்தி ஆடைகள் அல்லது பிற பொருள்கள் விற்பதில் ஆர்வம் காட்டிய அவர் மனைவியின் வணிகச் செயலை நிறுத்தி அவரது நேயர்களின் பொறுப்பில்கூட அவர் விட்டவரல்லர். அவர் மனைவி நடத்தும் பள்ளிக்கூடமும் பிற கல்வி வணிகம் சார்ந்த கொள்ளைக்கூடம்போன்றதே யன்றி வேறல்ல.

   நாளும் அல்லலுறும் நாட்டு மக்களுக்காக எத்தொண்டும் ஆற்றாமையும் சிங்களவர்களால் நாளும் மடியும் தமிழக மீனவர்கள் துயர்கண்டு வருந்தாப் போக்கும் தமிழ்ஈழத்தில் நூறாயிரக்கணக்கான தமிழர்கள் வஞ்சகத்தில் கொலையுண்ட போது அமைதிகாத்த போக்கும் பாரறிந்தனவே! ஆனால், அவரை அரசியல் கட்சியில் சேர்க்கச் சில கட்சிகள் விரும்புகின்றன.அவர் மூலம் வாக்குகளை அறுவடை செய்யலாம் என்ற தவறான எண்ணத்தில் கட்சிகள் விரும்புவதால் நமக்கு ஒன்றும் இல்லை. ஆனால், அவரை முதல்வராகப் பொறுப்பேற்க வேண்டும் என்பதுபோல் சிலர் குரல் எழுப்புவதுதான் வேடிக்கையாக உள்ளது. தமிழன்பர்கள்போல் காட்டிக் கொண்டிருந்த இயக்குநர் சேரனும் இயக்குநர் அமீரும் இரசினிமுதல்வராக வரவேண்டும் என்று அண்மை நிகழ்வொன்றில்   வெளிப்படையாக வேண்டுகோள் விடுத்துள்ளனர். தமிழ்நாடு சட்டமன்றத்தில் பெருவாரியான சட்ட மன்ற உறுப்பினர்கள் அவரைத் தலைமைப்பொறுப்பேற்க அழைக்கும் சூழலில் அவர் மறுப்பதுபோல் இவர்கள் பேசுவது புரியவில்லை. அரசியல் இயக்கம் நடத்துங்கள் என வேண்டுகோள் விடுக்கலாம். அது தவறல்ல. திரையில் தோன்றியதும் முதல்வர் நாற்காலிக்கனவு காண்பதுபோல் இரசினி சார்பில் இவர்கள் கனவு கண்டு அக்கனவை அவரிடம் திணிக்கும் பொல்லாப்போக்குதான் புரியவில்லை.

இவ்வாறு இவர்கள் பிற மாநிலங்களுக்குச் சென்று அம்மாநிலத்தேசியத்தைச் சாராத ஒருவரை மாநிலத்தலைமைக்கு அழைக்க இயலுமா? தமிழ்நாடு எவ்வளவு காலத்திற்குத்தான் திறந்த வீடாக இருக்கப் போகின்றது?முதலில் இவ்வாறு கூக்குரலிடுவோர், தமிழ்நாட்டுத் தமிழர்களுக்காகவும் இந்தியக் கண்டத்தில் உள்ள தமிழர்களுக்காகவும் தமிழ்நாட்டிலுள்ள பிறருக்காகவும் ஈழத் தமிழர்களுக்காகவும் உலகத் தமிழர்களுக்காகவும் இரசினியைச்செயல்படச் சொல்லட்டும்! அல்லது இரசினியை அவர் பிறந்த அல்லது வளர்ந்த மாநிலத்தில் முதலமைச்சராகக் குரல் கொடுக்கட்டும்! (இதனை ஏற்க அம்மாநிலத்தவர்கள் இளித்தவாயர்களல் அல்லர் என்பது நாம் அறிந்ததே!) அவர் சிறந்ததற்குக்காரணமான தமிழ்நாட்டில் தொண்டாற்றத்தான் வேண்டுமே தவிர, வேறு எண்ணம் வரக்கூடாது.இதுவரையும் தமிழ்மக்கள் நலனுக்காக எதுவும் செய்யாத இரசினி, தன் உழைப்பை இனியாவது தமிழ் மக்களுக்காகவும் செலவிடட்டும்!

‘தமிழ்த்தேசியர்களே தமிழ்நாட்டை ஆளவேண்டும்‘ என்னும் உண்மையைத் தமிழக மக்களுக்கு விதைக்கட்டும்!

இரசினிபோன்று அல்லாமல் சில காலம் தி.மு.க.வில் இருந்து இப்பொழுது காங்.கில் இணைத்துக் கொண்ட நடிகை குட்பு பற்றியும் நாம் எழுதவேண்டி உள்ளது.

கடலில் மூழ்கும் ஓட்டைப்படகுபோன்ற காங்.கில் சேர்ந்த குட்பு தமிழ்நாட்டு மக்களால், தமிழர்களால் நன்கறிநிலை அடைந்தவர். எனினும் தமிழ்ப்பண்பாட்டிற்கு எதிராகக் குரல் கொடுத்துள்ளாரே தவிர, இதுவரை தமிழர் நலன்காக்க எதுவும் குரல் கொடுத்ததில்லை.

மக்களிடம் வரவேற்பு இழந்த கட்சி என்று புரிந்துகொள்ளாமல் அனைத்து இந்தியக்கட்சி தரும் வரவேற்பு கொண்டு மகிழ்கிறார்! மகிழட்டும்! ஆனால், அங்கு சேர்ந்தவர் தமிழ், தமிழர் நலனுக்காகக் குரல் கொடுத்தார் என்றால் பாராட்டலாம்! அவருக்கும் முதலமைச்சர் பதவிக்கனவு இருக்கக்கூடும்! அப்படிப்பட்டவர்க்கு இப்படிஎல்லாம் பேசினால்தான் காங்.கட்சி தனக்குப்பதவி யளிக்கும் என்ற எண்ணம் வந்திருக்கலாம்! ஆனால், அவர் சேர்ந்துள்ள கட்சி தமிழ்நாட்டில் விரட்டியடிக்கப்பட்ட பொன்விழாவைக் கொண்டாட உள்ள கட்சி என்பதை அவர் உணரவில்லை! ஆரவார மயக்கத்தில் மூழ்கித் தவறான கருத்தைத் தெரிவித்துள்ளார். அரச பயங்கரவாதத்தையும் அரசின் ஒடுக்குமுறையையும் சிங்கள இனத்தின் வஞ்சகக் கொடுஞ்செயல்களையும் கொலைகளையும் எதிர்த்து நிற்கும் ஓர் அமைப்பை அது குறித்த வரலாறு தெரியாமல் தவறாகக்சித்திரிக்கிறார்.  தமிழ்ஈழ விடுதலைப்புலிகள் அமைப்பு என்பது மக்களின் நலன்காக்கும் கேடயமாகவும் பகை வெல்லும் வாளாகவும் திகழும் மனிதநேயக் கட்சி. இந்தியாவில் பகத்சிங்கு முதலானோரைப்பாராட்டும் நாம், சுபாசுசந்திரபோசின் படைமுயற்சியைப் பாராட்டும் நாம், ஆங்கிலேயர்களை எதிர்க்கப் போராடியவர்களைப் பாராட்டும் நாம்,   இவை போன்ற செயல்களில் ஈடுபடும் எந்நாட்டவராக இருந்தாலும் அவர்களுக்காகக் குரல் கொடுக்கும் நாம், இவ்வாறு போரிடுபவர்கள் தமிழர்கள் என்ற ஒரே காரணத்திற்காக இந்திய அரசு எதிர்க்கும் மாயவலையில் சிக்கிக் கொண்டிருக்கிறோம்!

இதனை அறிந்தும் அறியாமலும் உள்ள குட்பூ தேவையற்று விடுதலைப் போராட்ட வீரர்களை வன்முறையாளர்களாகக் கூறியது கண்டிக்கத்தக்கது.

இனியேனும் அவர் தமிழ் ஈழ வரலாற்றைப் படிக்கட்டும்! நம் நாட்டு விடுதலைப் போராட்டங்களுடன் ஒப்பிட்டுப்பார்க்கட்டும்!சிங்களர்களால் தமிழினம் தொடர்ந்து அழிக்கப்பட்டு வருவதையும் ஐந்தாண்டுகளுக்கு முன்னர் இந்தியா முதலான பலநாடுகளின் துணை கொண்டும் வஞ்சகமாகவும் கொத்துக்குண்டுகளாலும் எரிகுண்டுகளாலும் ஏவுகணைகளாலும் ஈழத்தமிழ் மக்கள்அழிக்கப்பட்டதையும் அதற்குப் பின்னரும் எஞ்சியவர்கள் கடத்தப்பட்டும் கற்பழிக்கப்பட்டும் சிதைக்கப்பட்டும் கொல்லப்பட்டும் வரும் துயரச் சூழலையும் அறியட்டும்! தான் தவறாகத் தெரிவித்த கருத்திற்கு வருத்தம் தெரிவிக்கட்டும்! அதன்பின்னராவது அவர் காங்.கட்சியில் உண்மைக்காக மனித நேயத்துடன் குரல் கொடுக்கட்டும்! உணர்ச்சி வயப்படுவோர் கோவிலும் கட்டுவார்கள்! கல்லறையும் கட்டுவார்கள்! என்பதை உணரட்டும்!

தனக்கு வாழ்வளித்த தமிழ் மக்களுக்காகத் தான் சேர்ந்த கட்சித்தலைமையில் உரிமைக்குரல் எழுப்பட்டும்!

அதுவரை தமிழர் நலனுக்கு எதிராக யார் பேசினாலும் அவர்கள் தமிழக மேடைகளில் ஏறத் தகுதியற்றவர்களே!

அன்புடன் இலக்குவனார் திருவள்ளுவன்

இதழுரை

 கார்த்திகை 14, 2045 / நவம்பர் 30, 2014

அகரமுதல 55

பாடநூல்களில்பயன்பாட்டுத் தமிழ் – இலக்குவனார் திருவள்ளுவன்

இலக்குவனார் திருவள்ளுவன்      30 நவம்பர் 2014      கருத்திற்காக..

பயன்பாட்டுப் பார்வையில்துறைதோறும் தமிழ்

பன்னாட்டுக் கருத்தரங்கம் : கார்த்திகை 9, 10 – 2045 / நவம்பர் 25, 26 – 2014

எத்திராசு மகளிர் கல்லூரி, சென்னை

பாடநூல்களில்பயன்பாட்டுத் தமிழ்

இலக்குவனார் திருவள்ளுவன்

ஆசிரியர், அகரமுதல மின்னிதழ்

thiru2050@gmail.com

கலை, அறிவியல் படைப்புகள் யாவுமே பயன்பாட்டிற்குரியனவே. எனினும் தமிழ்வளர்ச்சி நோக்கில் பார்க்கும் பொழுது, கல்வியில் அன்றாடப் பயன்பாட்டிற்கு முதன்மை அளிக்க வேண்டும். ‘தமிழறிவியல்’ அல்லது ‘அறிவியல் தமிழ்’ எனத் தனியாகக் கற்பிக்கத் தேவையில்லை. முதல் வகுப்பிலிருந்தே பாடநூல்கள் வாயிலாகப் பயன்பாட்டு முறையில் கற்பிக்க வேண்டும். நல்ல தமிழ், பாடநூல்களில் சிறப்பாகப் பயன்படுத்தப்படுவதே பயன்பாட்டுத் தமிழின் தொடக்கச் சிறப்பாக அமையும்.பயன்பாட்டுத்தமிழ் மாணாக்கர்களின் பாடநூல்களில் எவ்வாறு இருக்க வேண்டும் என்பதுபற்றிச் சுருக்கமாகப் பார்ப்போம்!

மறுமலர்ச்சியுற தமிழ், பயன்படுமொழியாக வேண்டும்!

“தமிழ்மொழி இனிமையானது; தொன்மையானது; வளமானது; கற்பதற்கு எளிமையானது என்பனவெல்லாம் தமிழர்களேயறியார். தமிழ் இந்திய மொழிகளின் தாய்; ஏன், உலக மொழிகளின் தாய் என்ற உண்மையைத் தமிழர்களே அறிந்திலர். தமிழ்நாட்டளவிலும் எல்லாத் துறைகளிலும் பயன்படுகருவியாய் அஃது அமைந்திலது. அமைவதற்குரிய முயற்சியில் தமிழர்கள் ஈடுபடல் வேண்டும். தமிழ் மீண்டும் மலர்ச்சி பெறுவதற்குரிய வழி இதுதான்.”(பழந்தமிழ், பக்கம் 219) என்று தமிழ் பயன்பாட்டு மொழியாய் ஆனால்தான் மறுமலர்ச்சியுறும் என்பதைத் தமிழ்ப்போராளி பேராசிரியர் முனைவர் சி.இலக்குவனார் வழியுறுத்துகிறார். அதற்குரிய வழிகளாக, “கல்வி மொழியாகவும், கடவுள் வழிபாட்டு மொழியாகவும் அரசாள் மொழியாகவும் அறிவியல் மொழியாகவும் தமிழ் ஆகும் நாளே அது மீண்டும் மலர்ச்சி பெற்ற நாளாகும்.” (பழந்தமிழ், பக்கம் 219)என்றும் அவர் கூறுகிறார்.

இவற்றுள் கல்வித்துறையில் தமிழ் பயன்படு மொழியாக இருக்க வேண்டும் என்பதை வலியுறுத்தவும் அதற்குப் பாடநூல்களில் நற்றமிழே தவழ வேண்டும் என்பதை உரைக்கவும் இக்கட்டுரை வரையப்பட்டுள்ளது.

மழலை நிலையிலிருந்தே தொடங்குக!

தமிழில் எண்ணியும் தமிழில் எழுதியும் தமிழில் பெயர் சூட்டியும் தமிழ் மரபு போற்றியும் தமிழில் வணக்கமும் வாழ்த்தும் தெரிவித்தும் எந்நிலைக் கல்வியாயினும் தமிழ்நிலைக்கல்வியாகத் திகழச் செய்யவும் தமிழுணர்வை மழலைநிலையிலிருந்தே தொடங்க வேண்டும். இங்கே, தொடக்க நிலைப் பாடநூல்களில் இடம் பெற்றுள்ள செய்திகளின் அடிப்படையில் தமிழ் பயன்பாட்டுத் தமிழாக இருக்க வேண்டிய இன்றியமையாமையைக் காணலாம்.

தமிழ்ப்பெயர்களையே பயன்படுத்துக!

தமிழ்ப்பெயர் சூட்டினால்தான் தமிழ் வாழும்.அதனைப் படிக்கும் பொழுதே மாணாக்கர்களுக்குப் பயன்பாட்டு அடிப்படையில் உணர்த்த வேண்டும். அவர்கள் நல்ல தமிழ்ப் பெயர்களையே கேட்கவும் படிக்கவும் செய்தால் இயல்பாகவே தமிழ்ப்பெயர் சூட்ட வேண்டும் என்ற உணர்விற்கு ஆளாகுவர். ‘ராஜா’என்றெல்லாம் பாடங்களில் பெயர்கள் வருகின்றன. முன்பு நல்ல தமிழ்ப்பெயர்கள் மட்டுமே பாடநூல்களில் இடம் பெற்றன. இப்பொழுது பார்த்தால் சில இடங்கள் தவிர, அனைத்து இடங்களிலும் பிற மொழிப் பெயர்களே பயன்படுத்தப்படுகின்றன. பாடநூல் ஆசிரியர்களுக்குத் தக்க வழிகாட்டி, மொழி நூலாக இருந்தாலும் பிற நூலாக இருந்தாலும் தமிழ்ப் பெயர்களையே பயன்படுத்தச் செய்ய வேண்டும். அப்பொழுதுதான்

தமிழ்ப்பெயர் சூட்டுவோம்!

தமிழ்ப்பெயர் போற்றுவோம்!

என்ற உணர்வு படிக்கும்பொழுதே மாணாக்கர்களுக்குப் பதிவதுடன் வீட்டில் பாடம் கற்பிக்கும் பெற்றோர்களுக்கும் அவ்வுணர்வு ஏற்படும்.

தவறான தகவல்கள் கூடா !

மாணாக்கர்களுக்குத் தவறான தகவல்கள் அளிக்கப்படக்கூடா. பாடநூல் ஆசிரியரும் மேற்பார்ப்போரும் கல்வித்துறையினரும் இதில் கருத்து செலுத்த வேண்டும். சான்றாக இரண்டாம் வகுப்புப் பாடநூல் பக்கம் 88இல் விலங்குகள் துன்புறுவதைத் தடை செய்யும் அமைப்பு- ‘புளுகிராசு ‘ (blue cross) எனத் தெரிவிக்கப்பட்டுள்ளது. இதில் தமிழில் குறிக்கப்பட்டுள்ள அமைப்பு (Society for the Prevention of Cruelty to Animals) வேறு. ‘புளுகிராசு’ என்பது நீலச் சிலுவைச் சங்கம் ஆகும். இரண்டும் விலங்கின நலம் சார்ந்தன எனினும் உலகெங்கும் உள்ள தனித்தின அமைப்புகள் ஆகும். இவ்விரண்டையும் சரியான முறையில் விளக்க வேண்டும்.இல்லையேல் தமிழில் சரியாகச் சொல்ல இயலாது என்ற தவறான எண்ணத்தைப் படிக்கும் பொழுதே ஏற்படுத்தும்.

சொற்களைத் தமிழ் மரபிற்கேற்பக் குறிப்பிடுக!

எல்லா இடங்களிலும் தமிழ் மரபிற்கேற்பவே குறிப்பிட்டு, இயல்பாக அவ்வாறு எழுதும் பழக்கததை உணர்த்த வேண்டும். ஆனால், இரு வகையாகக் குறிக்கப் பெறுகின்றன. சான்றாகத் தமிழில் முதல் எழுத்தாக ர, ல,வரா; அவ்வாறு வருமிடங்களில் இகரம் சேர்க்கப் பெற வேண்டும். இரண்டாம் வகுப்பு பாடத்தில் ரம்பம்(54) என்றும் இரப்பர் வளையம் 72 என்றும் இடம் பெற்றுள்ளன.   அவ்வாறில்லாமல் எல்லா இடங்களிலும் தமிழ் மரபிற்கேற்பவே சொற்கள் இடம் பெற வேண்டும்.

இருமொழிப் பயன்பாடு வேண்டா!

சில இடங்களில் தமிழ்ச்சொற்களும் சில இடங்களில் அயற்சொற்களும் பயன்படுத்துவதால், மாணாக்கர் அயற்சொற்களையும் தமிழ்ச்சொற்கள் என்றே எண்ணிப் பயன்படுத்தும் நிலைக்குத் தள்ளப்படுகின்றனர்.இரண்டாம் வகுப்புநூலில் இரயில் நிலையம் (60) என்றும் மூன்றாம் வகுப்பில் தொடர்வண்டி(40) என்றும் உள்ளன.சுத்தம்(வகுப்பு 2, 57) தூய்மை(வகுப்பு 2, 58) என்ற இருவகைப் பயன்பாடின்றித் தூய்மையை மட்டும் குறிப்பின் நற்றமிழே மாணாக்கர் நாவில் நடமாடும்.

மூன்றாம் வகுப்பில் ஊடுகதிர் (ப.124), எக்சுகதிர் (ப.130) என உள்ளமையால் இவற்றை வெவ்வேறு என எண்ணவும் வாய்ப்பு உள்ளது. இத்தகைய குழப்பமும் மாணவர்களின் சிந்தனை வளர்ச்சியைத் தடை செய்யும். ஒரே இடத்தில் அடைப்பிற்குள் ஆங்கிலச் சொல்லை இடுவது என்பது வேறு. ஆனால், படிக்கும் பொழுது தமிழ்வழியாக எண்ணம் அமையும் வகையில் தமிழ்ப்பெயர்களைத்தான் குறிக்க வேண்டும். மூன்றாம் வகுப்பு பாடநூலில் ‘டீச்சர்’என்றே குறிக்கப்பட்டுள்ளதைப் போன்ற கொடுமை வேறல்ல. ஆசிரியரை அயல்மொழியில் குறிப்பதன்மூலம் அவர் அயல்மொழியில் சொல்லித்தருவதால் தவறல்ல என எண்ணுகிறார்களா?

அன்னைத்தமிழிருக்க ஆங்கிலப் பயன்பாடு எதற்கு?

இங்க்ஃபில்லர் (வகுப்பு 3, பருவம் 3, பக். 5,) பாக்கெட் (வகுப்பு 3, பருவம் 3, பக். 35) என ஆங்கிலச்சொற்கள் பயன்படுத்தும் பகுதிகளும் உள்ளன.   எல்லா இடங்களிலுமே அயற்சொல் நீக்கித் தமிழ்ச்சொல் பயன்பாட்டில் இருந்தால்தான் மாணாக்கரின் தமிழ்வழிச் சிந்தனை பெருகும்.

எண்ணைக் காப்போம்! எழுத்தைக் காப்போம்!

   உட்பிரிவு எண்களுக்காக உரோமன் எண்கள் பயன்படுத்தப்படுகின்றன; அவ்வாறு இல்லாமல் தமிழ் எண்களையும் தமிழ் எழுத்துகளையும் பயன்படுத்த வேண்டும். இதன் மூலம்இவற்றை நன்கு அறிந்து பயன்படுத்தும் வாய்ப்பு மாணாக்கர்களுக்குக் கிட்டும்.

அறிவியல் உண்மைகளையே குறித்திடுக!

பல்லி எப்போதும் நீர் அருந்துவதில்லை (104) எனக் குறிக்கப் பெறுகிறது. நீர் அருந்தாப் பபல்லிகளும் உள்ளன. நீர் அருந்தும் பல்லிகளும் உள்ளன. எனவே, பொதுவான நம்பிக்கையின்பாற்பட்ட செய்திகளைக் குறிக்காமல் அறிவியல் உண்மைகளையே பாடங்களில் குறிக்க வேண்டும். அப்பொழுதுதான் தமிழ் அறிவியல் என்பது உண்மையின்பாற்பட்டது என்ற நம்பிக்கை வரும்.

கிரந்தம் நமக்கு எமன்!

கிரந்த எழுத்துகளில் மாதங்களின் பெயர்கள்(19, 20, 21, 22) பண்டிகைகள் பெயர்கள்(24, 25), சில பெயர்ச்சொற்கள் குறிக்கப்படுகின்றன. எந்த இடமாயினும் கிரந்த எழுத்துகளைப் பயன்படுத்தாமல் படிக்கும் பொழுதே தமிழ் எழுத்துகளையும் தமிழ்ச் சொற்களையும் பயன்படுத்தவேண்டும் என்ற உணர்வை மாணாக்கர்க்கு விதைக்க வேண்டும். பாடநூல்களில் கிரந்தம் கற்பிக்கப்படாத நிலை உருவாக வேண்டும். உலகத்தில் அவரவர் மொழியை அவரவர் மொழி எழுத்துகளில் எழுதும் போது தொன்மையும் தாய்மையும் உடைய தமிழைத் தாய்மொழியாக உடைய நாம் மட்டும் பிற எழுத்துகளைப் பயன்படுத்துவது இழிவானது என்ற உணர்வு படிக்கும் பொழுதே தோன்றினால்தான் மொழிச்சிதைவில் இருந்து தமிழை நாம் காப்பாற்ற முடியும்.

தமிழ் முறையிலான தொடர்களையே பயன்படுத்துக!

மேலும் தமிழ் முறைக்கேற்பவே தொடர்கள் அமைகின்றன. கீழ்க்கண்டவாறு என்று நாம் பல இடங்களில் காண முடிகின்றது. மேலே பார்த்துமுடித்த பின், – கண்டுமுடித்தபின்- அதைக் குறிப்பதால் மேற்கண்டவாறு என்போம். ஆனால் இனிவருவனவற்றைக் கண்டவாறு எனக் குறுிப்பது எவ்வாறு பொருந்தும்- கீழ்க்காணுமாறு அல்லது பின்வருமாறு என்றுதான் குறிக்க வேண்டும். இவற்றையெல்லாம் பயன்பாட்டுமுறையில் மாணாக்கர்களுக்குக் கற்றுத் தரவேண்டும்.

தமிழ்க்கலைச்சொற்களையே அறிமுகப்படுத்துக!

மூன்றாம் வகுப்பு நூலில் “காதின் உள்ளே உள்ள ஃச்டே பஃச் (ஸ்டே பஸ்) என்ற எலும்பு மிகச் சிறியது(ப.125)” என்ற குறிப்பு உள்ளது. ‘stapes’ என்பதைத்தான் இவ்வாறு கிரந்தத்தைப் பயன்படுத்தித் தவறாகக் குறிக்கின்றனர். தமிழில் அங்கவடி எலும்பு அல்லது உறுப்படி எலும்பு எனக் குறிக்கின்றனர். தமிழில் குறிப்பிடாமல் ஆங்கிலத்தில் குறிப்பதால் தவறாகப் புரிந்து கொள்ளும் போக்குதான் ஏற்படும். கலைச்சொற்கள் யாவும் படிக்கும்பொழுதே தமிழில் அறிமுகப்படுத்தப்பட்டால்தான் அறிவியல் சிந்தனை வளரும் என்பதை நூலாசிரியர்களும் கல்வித்துறையும் உணர வேண்டும்.

தொல்தமிழர் அறிவியல் உண்மைகளையே உரைத்திடுக!

தமிழ் அறிவியல் எனத் தனியாக உள்ளது போல் இல்லாமல் அறிவியல் செய்திகளைக் கூறும் பொழுதே தமிழில் உள்ள அறிவியல் செய்திகளையும் இணைத்துச் சொல்ல வேண்டும். சான்றாக, நான்காம் வகுப்புப்பாடநூலில் ( பக்.127) தாவரங்களுக்கும் உயிர்உண்டு என்பதை அறிஞர் செகதீசு சந்திரபோசு கண்டறிந்ததாக உள்ளது. இதே இடத்திலேயே மூவாயிரம் ஆண்டுகளுக்கு முன்னரே தொல்காப்பியர், தம் நூலான தொல்காப்பியத்தில் தனக்கும் முன்னரே பயிர்களுக்கு உயிர் உள்ள உண்மையைக் குறிப்பிடுவதைக் கூற வேண்டும்.

“ஒன்றறிவதுவே உற்றறிவதுவே

இரண்டறிவதுவே அதனொடு நாவே

மூன்றறிவதுவே அவற்றொடு மூக்கே

நான்கறிவதுவே அவற்றொடு கண்ணே

ஐந்தறிவதுவே அவற்றொடு செவியே

ஆறறிவதுவே அவற்றொடு மனனே

நேரிதின் உணர்ந்தோர் நெறிப்படுத்தினரே”

- (தொல்காப்பியம்: பொருளதிகாரம்: 571)

என ஆறறிவு உயிர்களை வகைப்படுத்திய தொல்தமிழரின் அறிவியல் சிறப்பைக் குறிக்க வேண்டும்.

வான ஊர்தியைப்பற்றிக் குறிப்பிடும் பொழுது வலவன் ஏவா வானவூர்தி, தெர்மாசு குடுவையைக் குறிப்பிடும் பொழுது சேமச் செப்பு, ஃச்டெப்னி எனப்படும் மாற்றுச்சக்கரத்தைக் குறிப்பிடும் பொழுது சேம அச்சு, என்பன போன்று தொல்தமிழர்கள் உணர்ந்தறிந்த அறிவியல் உண்மைகளை எளிமையாகப் படிப்பிக்க வேண்டும்.(காண்க :அன்றே சொன்ன அறிவியல் – சங்கக்காலம்.)

விலங்கினங்கள், பறவைகள், கோள்கள் முதலானவற்றைக் குறிப்பிடும் பொழுது அவற்றின் அறிவியல் காரணப் பெயர்களைக் குறிப்பிடுவதன் மூலம் தமிழறிவியலை எளிமையாக மாணாக்கர்கள் உள்ளத்தில் பதிக்கலாம்.

‘தகவல் துளிகள்’ என்ற தலைப்பில் பல செய்திகள் பாடநூல்களில் இடம் பெறுகின்றன. இவற்றில் தமிழின் அறிவியல் சிறப்பு தெரிவிக்கப்பட வேண்டும்.

நிறைவுரை

சான்றுக்குச்சிலவே பார்த்துள்ளோம். தமிழ் பயன்படு மொழியாய்த் திகழ மழலை நிலையில் கற்பிக்கப்படும் பாடல்களிலிருந்து யாவும் தமிழாகவே மணக்க வேண்டும்! தமிழ் எல்லாத் துறைகளிலும் பயன்பாட்டு மொழியாக அமைய அடித்தளமாக அமைவது கல்வியே! ஆதலின் கல்வி மொழி முற்றிலும் தமிழாக இருத்தல் வேண்டும்! பசுமரத்தாணிபோல் பதியும் அகவையிலேயே பைந்தமிழ் பயன்படுமொழியாக இலங்கினால், தமிழ் என்றும் எங்கும் எதிலும் ஏற்றமுடன் இருக்கும் என்பதில் ஐயமில்லை.

தமிழே எங்கும் என்னும் தகைமையை உருவாக்குவோம்!

பைந்தமிழைப் பயன்படுமொழியாக்கிப் பாரினில் சிறப்போம்!

அகரமுதல 55