விருதாளர்களைப் போற்றுவதுதானே சிறப்பித்தலாகும்! – இலக்குவனார் திருவள்ளுவன்

அகரமுதல 169, தை 02, 2048 / சனவரி15, 2017

இலக்குவனார் திருவள்ளுவன்      15 சனவரி 2017      கருத்திற்காக..

விருதாளர்களைப் போற்றுவதுதானே சிறப்பித்தலாகும்!

  புதிய அரசின் முதல் விழா, திருவள்ளுவர் திருநாளாகவும் அறிஞர்களையும் ஆன்றோர்களையும் விருதுகள் அளித்துப் போற்றும் விழாவாகவும் நடைபெற்றது மகிழ்ச்சிக்குரியது.

  இன்று (தை 02, 2048 / சனவரி 15, 2017) சென்னை, கலைவாணர் அரங்கத்தில் தமிழ்வளர்ச்சித்துறையின் திருவள்ளுவர் திருநாள் – விருதுகள் வழங்கும் விழா சிறப்பாக நடைபெற்றது. செய்தித்துறையினர் கட்டுக்கோப்பான முறையில் நடத்தினர். காவல்துறையினரும் கெடுபிடித் தொந்தரவு இன்றி,  அமைதியான  சூழலை உருவாக்கியிருந்தனர். அரங்கத்தில் இடமின்றித் திருப்பி அனுப்பவேண்டிய  சூழல் வரும்வரை அனைவரையும் உள்ளே அனுப்பிக்கொண்டுதானிருந்தனர். அரங்கத்தில் சிறப்பிக்கப்படுநரின் குடும்பத்தினர் ஒளிப்படம் எடுக்கும்பொழுதுதான் வழக்கம்போல் துரத்திவிட்டனர்.

  தனிப்பட்ட முறையில் ஒளிப்படங்கள் எடுக்கக்கூடாது என்றால் எப்படி ஒளிப்படங்களைப் பெறுவதாம்! ஒளிப்படக்கலைஞர் விருதாளர்களிடமும் நலிந்த தமிழறிஞர்கள் ஐம்பதின்மரிடமும் தொலைபேசி வழி தொடர்பு கொண்டு கட்டணத்தைத் தெரிவிப்பாராம். அவர் சொல்லும் முறையில்  கட்டணத்தை வழங்கியபின்னர் ஒளிப்படங்கள் அவர்களுக்கு அனுப்பி வைக்கப்பெறுமாம். பங்கேற்பாளர்களுக்கான ஒளிப்படங்களை விழா ஏற்பாட்டாளர்கள்  தங்கள் பொறுப்பில் பெற்று அனுப்பி வைப்பதுதானே அவர்களைச் சிறப்பிப்பதாகும்.

  இனி வரும் விழாக்களில் விழா நடத்தும் துறையினரே தங்கள் செலவில் ஒளிப்படங்களை உரியவர்களுக்கு அனுப்ப வேண்டும். அல்லது அவர்கள் தத்தம் பொறுப்பில் ஒளிப்படங்கள் எடுக்க இசைவு தர வேண்டும்.

  ஆட்சித்தலைமையும் கட்சித் தலைமையும் ஒருவரிடமே இருக்க வேண்டும் என்பதற்கு உ.பி.மாநிலத்தில் தந்தை மகன் கருத்துமாறுபாடும் கட்சிப்பிளவும் எடுத்துக்காட்டாகக் கூறப்படும். ஆனால், இரண்டும் ஒருவரிடமே இன்மையால் கட்சிக்கொடிகள், கட்சித் தோரணங்கள் முதலான ஆரவாரம் இன்றி இயல்பாக இருந்தது. இயல்பாகவே  முதல்வர் பன்னீர்செல்வம்  எளிமையானவர்  என்பதால், இச்சூழல் எளிமைக்கு  எளிமை சேர்த்து அழகூட்டியது.

  தமிழறிஞர்கள் சிறப்பிக்கப்பெறும் விழா என்பதால்,  தவறாகப் பேசிவிடுவோமோ என்ற அச்சத்தில் பெரியார் விருதாளர் பண்ருட்டி இராமச்சந்திரன் நீங்கலான – வரவேற்புரை யாற்றிய தலைமைச்செயலர்  முதற்கொண்டு அமைச்சர் பெருமக்கள் – அனைவரும் பேசாமல் எழுதிவந்து வாசித்தனர். அரசியல் மேடைகளில் ஆர்ப்பரிக்கின்ற அமைச்சர்கள் இங்கே வாசித்ததுபோல்,  பாடியும் கதைசொல்லியும் அவையைக் கவர்ந்த முதல்வர் பன்னீர்செல்வமும் கண்களை நிமிர்த்தாமல் வாசித்தார். இனி,  இவர்கள் வரும் விழாக்களில் உரையாற்றிச் சிறப்பினைச் சேர்க்க வேண்டும்.

  சிறப்பாக விழா நடைபெற்றாலும் விருதாளர்கள் தக்க  முறையில் சிறப்பிக்கப்பெறவில்லை. தக்கமுறையில் தங்க வைத்தும் ஊர்திகள் அனுப்பி அழைத்தும் விழா முடிந்ததும் அனுப்பி வைத்தும் தமிழ்வளர்ச்சி இயக்ககத்தினர் விருந்தோம்பலில் குறை வைக்கவில்லை. அப்படி என்றால் என்ன குறைபாடு என்கின்றீர்களா?

  அறிஞர்களுக்கும் ஆன்றோர்களுக்கும்  பொன்னாடை அணிவித்து, விருது அளித்து, உரூபாய் நூறாயிரத்திற்கான காசோலை வழங்கியதுடன்,  அவரவர்க்குரிய தகுதியுரையையும் அப்படியே வழங்கி விட்டனர்.  பொதுவாகத் தகுதியுரை வாசித்து விருதாளர்களைப் பெருமைப்படுத்தித்தான் விருது வழங்குவதே முறையாகும். ஆனால், விழா அரங்கத்தைச் செய்தித்துறையினர் தங்கள் கட்டுப்பாட்டிற்குள் கொண்டுவந்தமையால், மேடை ஒழுங்கில் மட்டுமே கருத்து செலுத்தினர். தகுதியுரையை வாசித்து வழங்காமல் எல்லார்க்கும் தொகுப்பாளரைக்கொண்டு ஆற்றிய தமிழ்ப்பணிக்காக விருது வழங்கப்படுவதாக அறிவிக்கச் செய்தனர். விருதாளர்களுக்கும் விருதாளர்களின் குடும்பத்தினருக்கும் மட்டுமல்லாமல் வந்திருந்த தமிழன்பர்களுக்கும் இது வருத்தமளிப்பதாக இருந்தது. தங்களைப்பற்றிய சிறப்பினைக்கூறி அதற்குஅவையோர் கைதட்டி மகிழ்ச்சியை வெளிப்படுத்தும்பொழுது விருது வாங்குவதுதானே விருதாளர்களுக்கு உண்மையான உவகையாக இருக்கும்!

  எந்தச் சிறப்புகளின் அடிப்படையில் விருதுகள் வழங்கப்பட்டன என அறியும் பொருட்டு,  “இவருக்கு எதற்காக வழங்கப்பட்டது” என ஒவ்வொருவர் குறித்த விருது அறிவிப்பின்பொழுதும் அவையோர் அடுத்தவரிடம் கேட்டது, “இவருக்குப்போய் எதற்காகக் கொடுத்தார்கள்” என்ற தொனிபோல் மாறிவிட்டது.

  செயலத்துறையைப் பொருத்தவரை, தமிழ்வளர்ச்சித்துறையும் செய்தித்துறையும் இணைந்த திணைக்களம்தான். தமிழ்வளர்ச்சித் துறையுடன் இணைந்து விழாவைச் சிறப்புற நடத்த வேண்டுமே தவிர, தமிழ்வளர்ச்சித் துறையைப் புறக்கணிக்கக்கூடாது. தமிழ்வளர்ச்சி இயக்குநரே சுவரோரமாக,  வாயிலருகே நின்று கொண்டிருந்தார். இதுவரை இல்லாத வகையில் அகவை முதிர்ந்த தமிழறிஞர்கள் ஐம்பதின்மருக்குத் திங்கள்தோறுமான பொருளுதவி ஆணைகள் வழங்கப்பெற்றன. அவர்கள் தமிழ்வளர்ச்சி இயக்குநரைத்தான் அறிவார்கள். அவரை விழாவில் புறக்கணித்துள்ளார்களே எனப் பலரும் வருத்தப்பட்டார்கள்.

 தமிழ்வளர்ச்சித்துறையினருடன் இணைந்து நடத்தியிருந்தால். விருதாளர்களுக்கான தகுதியுரை வாசிக்கப்பெற்று விருதாளர்கள் பெருமைப்படுத்தப்பட்டிருப்பர். தகுதியுரையை வாசிக்கும் வகையில் தமிழ்வளர்ச்சி இயக்குநருக்கும் பிற அலுவலர்களுக்கும் பங்களிப்பு இருந்திருக்கும்.

  ஆனால், அவ்வாறு தகுதியுரை வாசிப்பதே முறை எனத் தமிழ்வளர்ச்சித்துறையினர் மன்றாடியும் மறுக்கப்பட்டதாக அறிய வந்தோம். துறையமைச்சரிடமோ முதல்வரிடமோ செயலர் தெரிவித்திருந்தால், அவர்களே  தகுதியுரை வாசிக்கப்பெற்று விருது வழங்கலே முறை என்று சொல்லியிருப்பர். ஆனால், முடிவு எடுத்தவர்கள் தங்கள் அளவில் தவறான முடிவெடுத்து விழாவிற்குக் களங்கம் சேர்த்து விட்டனர்.

  போனது போகட்டும்! இனியாவது விருது வழங்கும்பொழுது விருதாளர்களுக்கான தகுதியுரைகளை வாசித்துப் பெருமைபடுத்தி விருதுகளை வழங்க வேண்டும் என்பதில் கருத்து செலுத்தட்டும்! தமிழ்வளர்ச்சித்துறையைக் கிள்ளளுக்கீரையாக எண்ணாமல் மதிப்பதன் மூலம் தமிழறிஞர்களையும் மதிக்கட்டும்!

பொதுநோக்கான் வேந்தன் வரிசையா நோக்கின்

அதுநோக்கி வாழ்வார் பலர். (திருவள்ளுவர், திருக்குறள் 528)

அன்புடன் இலக்குவனார் திருவள்ளுவன்

இதழுரை  அகரமுதல 169, தை 02, 2048 / சனவரி15, 2017

தமிழ்ச்சாலை எனப் பெயர் சூட்டிய முதல்வருக்கு நன்றியும் வேண்டுகோளும்

இலக்குவனார் திருவள்ளுவன்      25 அக்தோபர் 2015      கருத்திற்காக..

தமிழ்ச்சாலை எனப் பெயர் சூட்டிய

முதல்வருக்கு நன்றியும் வேண்டுகோளும்

  எழும்பூர் ஆல்சு சாலையின் பெயரைத் ‘தமிழ்ச்சாலை’ என மாற்றி அதற்கான  பெயர்ப் பலகையைக் கடந்த திங்கள் முதல்வர் திறந்து வைத்தார்.

  நாம் இதற்காக நன்றியையும் மேற்கொண்டு வேண்டுகோளையும் தெரிவிக்கிறோம்.

  திரு மா.சுப்பிரமணியன் சென்னை மாநகரத் தலைவராக இருந்த பொழுது, பெயர்ப்பலகைகள் தமிழில் அமைய நடவடிக்கை எடுத்தார். அத்துடன் நீண்ட காலமாகத் தமிழமைப்பினர் வேண்டுகோள் விட்டவாறு தெருக்களுக்குத் தமிழறிஞர்கள் பெயர் சூட்டவும் முயற்சி மேற்கொண்டார்.

 அப்பொழுது, அவருக்குத் ‘தமிழ்க்காப்புக்கழகம்’ சார்பில் பின்வரும் வேண்டுகோள்கள் விடுக்கப்பட்டன.

1. தமிழ்வளர்ச்சி வளாகம் அமைந்துள்ள ஆல்சு சாலைக்குத் ‘தமிழ்ச்சாலை’ எனப் பெயர் சூட்ட வேண்டும்.

2. தலைமைச் செயலகம் அமைந்துள்ள பகுதி சியார்சு கோட்டை என்றே அழைக்கப்படுகிறது. இதற்கு ‘ஐந்திணைக்கோட்டை’ என்று பெயர் சூட்ட வேண்டும்.

3. பெரும்பாலான அமைச்சர்கள் குடியிருக்கும் தெருவான ’கீரீன்வேய்சு சாலை’ என்பதைப் ‘பைந்தமிழ்ச்சாலை’ என்று மாற்ற வேண்டும்.

4. ஒயிட்சு தெரு, பிளாக்கர்சு தெரு, முதலானவற்றை மாற்றி வெள்ளிவீதியார் தெரு, வெள்ளை நாகனார் தெரு, கார்நாற்பது தெரு எனப் புலவர்கள் நூல்கள் பெயர்களைச் சூட்ட வேண்டும்.

5. இன்னும் பொருத்தம் இல்லாத பெயர்கள் உள்ளன. ‘காவல் ஆணையர் அலுவலகத் தெரு’வில் அவ்வலுவலகமே இப்பொழுது இல்லை. சங்கப்புலவர் காவற்பெண்டு பெயரைச் சூட்ட வேண்டும்.

6. தமிழறிஞர்கள் வாழ்ந்த தெருவிற்குத் தமிழறிஞர்கள் பெயரைச் சூட்ட வேண்டும்.

சான்றாகத் திருவல்லிக்கேணி பெரிய தெரு என்பது   ஒரு புறத்தில் அருணாசலம் தெரு எனத் தொடங்கி மறு புறம் வேறு பெயரில் முடிந்து பெரிய தெரு என அழைக்கப்பெறுகிறது. தமிழ்ப்போராளி பேராசியர் சி. இலக்குவனார்   பேரறிஞர் அண்ணா ஆட்சிஅமைத்த பொழுது பெரியதெருவில்தான் குடியிருந்தார். இதைச் சுட்டிக்காட்டி பெரிய தெருவிற்கு இலக்குவனார் தெரு எனப் பெயர் சூட்டவும் இதுபோல் தமிழறிஞர்கள் வாழ்ந்த தெருக்களின் பெயர்களை அந்தந்த அறிஞர்களின் பெயர்களில் அழைக்குமாறு மாற்ற வேண்டும் என்றும் வேண்டியிருந்தோம்.

  அதே நேரம், திருக்குறள் அறிஞர் எல்லீசு பெயரில் அமைந்த எல்லீசு சாலையை அயல்நாட்டவர் பெயரில் இருப்பதாகக் கருதி மாற்றக்கூடாது எனவும் பொருத்தமில்லாப் பெயர்களையும் அடிமைத்தனத்தின் அடையாளமாக இருக்கும் பெயர்களையும் மாற்ற வேண்டும் என்றும் தமிழ்க்காப்புக்கழகம், இலக்குவனார் இலக்கிய இணையம் சார்பில் வேண்டுகோள் விடுத்திருந்தோம்.

  இது தொடர்பிலான மடல் அனுப்பியபிறகு தொடர்பு கொண்ட பொழுது பல்வேறு தரப்பினரிடமிருந்தும் பெயர்களைப் பரிந்துரைத்து முறையீடுகள் வந்துள்ளன என்றும் அவற்றைத் தொகுத்து ஏற்றவாறான பெயர்களைத் தேர்ந்தெடுக்க இருப்பதாகவும் தெரிவித்தார்கள். முடிவு எடுக்கக்காலத் தாழ்ச்சியும் முடிவெடுத்த பின்னர், அரசுத் தரப்பில் காலத்தாழ்ச்சி ஆனதாகவும் தெரியவந்தது.

  மாநகராட்சியிலும் ஆட்சியிலும் தி.மு.க.தான் இருந்ததால் உண்மையான காலத்தாழ்ச்சிக்குக் காரணம் தெரியவில்லை.

  ஆனால், இப்போதைய ஆட்சியில் நடவடிக்கை எடுத்தது மகிழ்ச்சி தருகிறது.

  தமிழ்ச்சாலையைப் பொருத்தவரை, தமிழ்வளர்ச்சித்துறையின் முன்னெடுப்பால் நிறைவேறியதாகத்தான்கொள்ள வேண்டும். தமிழ் வளர்ச்சித்துறையின் இயக்குநர் முனைவர் கா.மு. சேகர், தொடக்கத்தில் நடவடிக்கை எடுத்து வருவதாகத் தெரிவித்தார். பின்னர் உரியவாறு பெயர் மாற்றத்திற்கு அரசின் ஒப்புதல் கிடைத்து விட்டதாகவும் உரிய முறைப்படியான செயல்பாட்டிற்குக் காலம் பிடிக்கும் என்றும் தெரிவித்தார். அதற்கேற்ப, 2013-2014 ஆம் ஆண்டிற்கான தமிழ்வளர்ச்சித்துறையின் நல்கைக் கோரிக்கையின் பொழுது, தமிழ் வளர்ச்சித்துறை, கலைபண்பாட்டுத்துறை, தொல்லியல் துறை ஆகிய அலுவலகங்கள் அடங்கிய தமிழ் வளர்ச்சி வளாகம் அமைந்துள்ள ஆல்சு சாலைக்குத்தமிழ்ச்சாலை எனப் பெயர் சூட்டப்படும் என அறிவிக்கப்பட்டது. புரட்டாசி 03, 2046 / செப்.20இல் பெயர்ப்பலகை திறந்து வைக்கப்பட்டுள்ளது. தமிழ்வளர்ச்சி -செய்தித்துறையின் அரசு செயலர் முனைவர் மூ.இராசாராம், த.வ.இயக்குநர் முனைவர் கா.மு.சேகர் ஆகியோருக்கு நன்றி.

  பொதுவாக மாநகராட்சிக்கு வேண்டுகோள் விடுத்ததில் இருந்தே அஞ்சல்களில் தமிழ்ச்சாலை எனக் குறித்தே தமிழ்க்காப்புக் கழகம் சார்பிலான மடல்களை அனுப்பி உரியவாறு அவை சேர்ந்தும் வந்தன.(துறையின் பெயர் இருப்பதால் சிக்கல் எழவில்லை.)

  இவ்வறிப்பின் படி, அரசாணை (நிலை) எண் 20 நகராசட்சி நிருவாகம் – குடிநீர் வழங்கல் துறை நாள்   தை 21, 2046 / 04 02.2015 இல் பெயர் மாற்ற ஆணை வழங்கப்பட்டது.

  கடந்த ஆண்டு அறிவிப்பிற்கு இவ்வாண்டு ஆணை பிறப்பிக்கப்பெற்று பெயர்ப்பலகை அண்மையில் திறக்கப்பட்டுள்ளது.

  இனி, சாலைகளின் பெயர்மாற்றங்களுக்கும்உரிய ஏற்புகளுக்கும் உள்ளாட்சி அமைப்புகளுக்கு உரிய அதிகாரம் வழங்கி விரைவில் செயல்பட வகை செய்ய வேண்டும். சாதிப் பெயர்களை வால்களாகக் கொண்டல்ல, சாதிப்பெயர்களையே பெருப்பெயர்களாகக் கொண்டுள்ள தெருக்கள் இன்னும் உள்ளன. இவற்றை அகற்றியும் தமிழ் காக்க இன்னுயிர் நீத்தவர்கள், தமிழ்வாழ வாழ்ந்த தமிழறிஞர்கள் பெயர்களைச் சூட்டவும் அடைமொழிகளுடன்வைத்து அவற்றை ஆங்கிலச்சுருக்கெழுத்தில் குறிப்பிட வாய்ப்பு ஏற்படுத்தாமல் உரிய பெயர்களை மட்டும் சூட்டவும் வகை செய்ய வேண்டும். (மகாகவி பாரதியார் நகர்  எனச்சூட்டி விட்டுச் சுருக்கமாக எம்.பி.நகர் என அழைக்கும் அவலம் கூடாது.)

 நகராட்சி பணியாட்சித்துறையினர் உள்ளாட்சி அமைப்புகளை விரைவுபடுத்தி சாலைகளில் தமிழ்ப்பெயர் மணக்கவும் பெயர்ப்பலககைளில் தமிழ் வீற்றிருக்கவும் நடவடிக்கை எடுக்க வேண்டும்.

“தமிழ்நாட்டின் தமிழ்த்தெருவில் தமிழ்தான் இல்லை”  

என்னும் நிலையை மாற்ற வேண்டும்.

படியுடையார் பற்றமைந்தக் கண்ணும் மடியுடையார்

மாண்பயன் எய்தல் அரிது. (திருவள்ளுவர், திருக்குறள் 606)

அன்புடன் இலக்குவனார் திருவள்ளுவன்
இதழுரை

அகரமுதல 102, ஐப்பசி 08, 2046 / அக். 25.10.2015

ஒலி பெயர்ப்பு வரையறைக் குழு அமைக்க அரசிற்கு வேண்டுகோள்!

இலக்குவனார் திருவள்ளுவன்      10 May 2015      No Comment

சீரான ஒலிபெயர்ப்பை நடைமுறைப்படுத்த

 தமிழக அரசிற்குத் தமிழறிஞர்களின் வேண்டுகோள்

  மூல மொழிச் சொற்களை உள்ளவாறு உணர்வதற்கு உதவுவது ஒலிபெயர்ப்பு. அந்த வகையில் தமிழ்ச்சொற்களைப் பிற மொழியினர் அறிய உதவுவது ஒலி பெயர்ப்பு. பொதுவாக உரோமன்/ஆங்கில எழுத்துகளில் தமிழுக்கான ஒலிபெயர்ப்பு மிகுதியாகப் பயன்படுத்தப்படுகின்றன. [பிற மொழியாளர்கள் புரிதலுக்காகத்தான் ஒலி பெயர்ப்பே தவிர, தமிழில் ஒலி பெயர்ப்பு முறையில் பிற மொழிச்சொற்களைக் கலக்கக்கூடாது.] ஐரோப்பியர் வருகைக்கு முன்னர், எத்தகைய ஒலி பெயர்ப்பு முறைகளைப் பிற மொழியினர் கையாண்டிருந்தனர் என நமக்குத் தெரியவில்லை. ஐரோப்பியர் வருகைக்குப்பின்னரே தமிழ் மொழிக்கான ஆங்கில ஒலி பெயர்ப்பு பரவலாகப் பயன்பாட்டிற்கு வந்தது.

  இன்றைக்கு வெவ்வேறு வகை ஒலி பெயர்ப்பு முறைகள் பயன்பாட்டில் உள்ளன. ஒவ்வொருவரும் ஒவ்வோர் ஒலி பெயர்ப்பு முறையைப் பின்பற்றும் போக்கும் உருவாகிறது. எனவே, தமிழக அரசு ஒலிபெயர்ப்பு வரையறை ஆணை ஒன்றை வெளியிட வேண்டும்.

  ஒலி பெயர்ப்பு ஆணையை வெளியிடும் முன்னர் ஒலி பெயர்ப்பு வரையறைக் குழு ஒன்றைத் தமிழக அரசு அமைக்க வேண்டும்.

 “தமிழ் எழுத்துகளுக்கான ஆங்கில ஒலி பெயர்ப்பு குறித்துத் தனிப்பட்டவர்கள் முடிவெடுப்பது ஏற்கத் தக்கதல்ல. தமிழக அரசே, தமிழ் வளர்ச்சித்துறை மூலமாகத் தமிழுக்கான ஆங்கில ஒலிபெயர்ப்பு தரப்படுத்தும் குழு ஒன்றை அமைத்து, அக்குழு பட்டறிவு மிக்க, மொழிபெயர்ப்பில் ஈடுபாடு கொண்ட தமிழறிஞர்கள் கருத்துகளைக் கேட்டறிந்து பரிந்துரைப்பதன் அடிப்படையில் அரசே தக்க ஆணை பிறப்பிக்க வேண்டும். தொழில் நுட்பர்கள் தமிழ்த் தேவையை நிறைவேற்றும் பணிதான் ஆற்ற வேண்டுமே தவிர, இம் முடிவில் தலையிடக்கூடாது. தமிழ் மரபறியா பிற மொழியாளர்களும் இதில் தலையிடக் கூடாது.”   என மடல் எண் 107/2045 நாள் 04.03.2045 / 18.03.2014 மூலம் முன்னரே தமிழக அரசிற்குத் தமிழ்க்காப்புக் கழகம் தெரிவித்துள்ளது.

மடல் எண்120/2045 நாள் ஆவணி 10, 2045 / 26.08.2014 மடல் மூலம், “தமிழ் இணையக்கல்விக் கழகம் தமிழ் தொடர்பான கருத்துகளை முடிவெடுக்கவோ முன்மொழியவோ ஏற்ற அமைப்பல்ல. “தமிழை வளர்ப்பதற்கான அமைப்பு; ஆதலின் தமிழ்ப்புலமை உடையவர்களே இதன் இயக்குநராக இருக்க வேண்டும்” என்னும் பொழுது இஃது இணைய அமைப்பு என்பதாகத் தவறாகக் கூறி அதற்கேற்ப விதிமுறைகளிலும் புனைவாவணம் உருவாக்கப்பட்டுள்ளதை முன்னரே தங்கள் கருத்திற்குக் கொண்டு வந்துள்ளேன். ஆனால், இப்பொழுது தமிழ்பற்றிக் கருத்து தெரிவிக்க வேண்டும் என்றால் தமிழ் அமைப்பு எனக் கூறிக் கொள்வது இரட்டை வேடமன்றி வேறல்ல. தமிழ்ப்புலமையாளர் தலைமையில் இயங்காத,   ஓர் அமைப்பு தமிழ் தொடர்பில் அரசிற்குக் கருத்து கூறுவதோ அதன் முடிவை அரசு ஏற்பதோ தமிழுக்குக் கேடுதருவதாக அமையும்.”   என்றும் அரசிற்குத் தமிழ்க்காப்புக் கழகம் தெரிவித்துள்ளது.

  தமிழ் வளர்ச்சி – செய்தித்துறையின் செயலர் முனைவர் மு.இராசாராம் இ.ஆ.ப., ஒரு நாளின் பெரும் பொழுதை அலுவலகப் பணிக்காகவே செலவிடும் உழைப்பாளி. எனினும் ஒலி பெயர்ப்பு தொடர்பான பொருண்மை முதலில் தகவல் தொழில்நுட்பத்துறையில் எழுப்பப்பட்டுள்ளதால், அது குறித்த முடிவு எடுத்தலை அடுத்து துறையின் பணியில்தலையிடவதாகக் கருதுகிறார் போலும். இந்த எண்ணம் தவறானது. எனவே, தமிழ் வளர்ச்சித்துறையின் பணி என்பதை உணர்ந்து இது குறித்து விரைவில் முடிவெடுத்துத் தக்க அரசாணை பிறப்பிக்க நடவடிக்கை எடுக்க வேண்டும்.

 இப்பொழுது ஒருங்குகுறிச் சேர்த்தியம் முன்வைக்கப்பட்டுள்ள பின்னங்கள், குறியீடுகள் முன்மொழிவு தொடர்பில் சுவடு முதலான சொற்களுக்கு ஒலிபெயர்ப்பு தேவைப்படுகின்றது. அதற்கெனத் தனியாகத் தகவல் தொழில் நுட்பக் குழுவில் குழு அமைக்க வேண்டிய தேவையில்லை. முன்மொழிவின் பிற பொருண்மைகள் பற்றி மட்டும் முடிவெடுத்தால் போதுமானது. நமது வேண்டுகோளுக்கிணங்க ஒருங்குகுறி தொடர்பான நடவடிக்கை எடுத்து வரும் தகவல் தொழில்நுட்பச் செயலர் திரு தா.கி.இராமச்சந்திரன் இ.ஆ.ப., இது தொடர்பான குழுவை அமைக்க நடவடிக்கை எடுத்து வருகிறார். இதில் ஒலி பெயர்ப்பு தொடர்பான உட்குழுவை அமைக்காமல் தமிழ் வளர்ச்சித்துறையின் பொறுப்பில் விட்டுவிட்டு அதன் அடிப்படையிலான முடிவைச் செயல்படுத்துவதே சிறப்பாக அமையும். தமிழ் வளர்ச்சித்துறையும் தமிழுக்கான ஒலி பெயர்ப்பு வரையறை ஆணை பிறப்பிக்கப்பட்ட பின்னர் இதனடிப்படையில் முடிவெடுக்குமாறு தொழில்நுட்பத்துறைக்கு அறிவுறுத்தி, இதற்கெனத் தனியே குழு அமைப்பதை நிறுத்த வேண்டும்.

எனவே,

• தமிழ்வளர்ச்சித்திணைக்களத்தின் – அஃதாவது செயலகத்துறையின் – செயலர் கட்டுப்பாட்டில் இக்குழு அமைதல் வேண்டும்.
• தமிழ்வளர்ச்சி இயக்குநர், உலகத்தமிழாராய்ச்சி நிறுவன இயக்குநர் ஆகியோரை இக்குழுவின் ஒருங்கிணைப்பாளராக அமர்த்துதல் தமிழறிஞர்களைத் தெரிவு செய்ய எளிமையாக இருக்கும்.
• இக்குழுவில் தமிழ்ப்பற்று மிக்க தமிழறிஞர்களையும்   தமிழிலக்கியமொழிபெயர்ப்பு படைப்பாளர்களையும் உறுப்பினராகச் சேர்க்க வேண்டும்.
• மொழி பெயர்ப்பு நூல்கள் வெளியிடும் தமிழ்ப்பல்கலைக்கழகம் முதலான பல்கலைக்கழகங்கள், செம்மொழித் தமிழாய்வு மத்திய நிறுவனம், சாகித்ய அகாதமி, ஆசியவியல் நிறுவனம் முதலான நிறுவனங்கள், தமிழ்க்காப்பு அமைப்புகள் ஆகியவற்றின் சார்பாளர்களையும் உறுப்பினர்களாகச் சேர்க்க வேண்டும்.
• குழுவின் நோக்கம், உறுப்பினர்கள் விவரம் முதலியவற்றை அரசு வெளிப்படையாக அறிவிக்க வேண்டும்.
• இப்போது நடைமுறையில் உள்ள ஒலி பெயர்ப்பு முறைகளை அட்டவணைப்படுத்தி, செய்தித்தாள்களில் விளம்பரமாக வெளியிட்டும் இணையத்தளங்கள் வழியாகப் பகிர்ந்தும் உலகத் தமிழறிஞர்களின் கருத்துகளைக் கேட்க வேண்டும். தொடர்பான கருத்து தெரிவிப்பவர்கள் கட்டுரையாக அளிக்காமல், தேவைப்படும் மாற்றங்களைக் குறிப்பிட்டுத் தொடர்பான குறிப்புகள் அளி்த்தால் போதுமானது என்றும் தெரிவிக்க வேண்டும்.
• இவ்வாறு பெறப்படும் கருத்துகளைத் தொகுத்து ஒலி பெயர்ப்பு வரையறைக் குழு ‘ஒலிபெயர்ப்புத் தெரிவு அட்டவணையை’ உருவாக்க வேண்டும்.
•  ஒலி பெயர்ப்புத் தெரிவு அட்டவைணையை விளம்பரங்கள் இணையப் பகிர்வுகள் மூலம் மீண்டும் மக்கள் முன்னிலையில் வைக்க வேண்டும்.

• இவ்வாறு பெறப்படும் கருத்துகளின் அடிப்படையில் ஒலிபெயர்ப்பு வரையறைக் குழுவானது ‘ஒலிபெயர்ப்பு வரையறை ஆணை வரைவை’ உருவாக்க வேண்டும்.

• இவ்வரைவாணையை மீண்டும் மக்கள் முன்னிலையில் தெரிவித்து நிறைவுக் கருத்து எதுவும் இருப்பின் பெற வேண்டும்.

• அதன்பின்னர், தமிழக அரசு தமிழுக்கான ஒலி பெயர்ப்பு வரையறை ஆணையை வெளியிட வேண்டும்.

எனவே, ஒலிபெயர்ப்பில் சீர்மை நிலவுவதற்காகவும் தனிப்பட்டவர்கள் இது தொடர்பில் தத்தம் விருப்பம்போல் முடிவெடுப்பதை நிறுத்துவதற்காகவும் தமிழக அரசு உடனே தமிழுக்கான ஒலி பெயர்ப்பு வரையறைக் குழுவை அமர்த்திச் சீரான ஒலி   பெயர்ப்புகளுக்கான ஆணையைப் பிறப்பிக்க வேண்டுகிறோம்.

அன்புடன் இலக்குவனார் திருவள்ளுவன்

இதழுரை

அகரமுதல 78 சித்திரை 27, 2046, மே 10, 2015

 

தமிழ் ஆட்சிமொழிச் செயலாக்கம் – ஓர் இனிய கனவு: 5 : இலக்குவனார் திருவள்ளுவன்

இலக்குவனார் திருவள்ளுவன்      22 March 2015      No Comment

 

(பங்குனி 1, 2046 / மார்ச்சு 15, 2015 தொடர்ச்சி)

[புதுவை மொழியியல் பண்பாட்டு ஆராய்ச்சி நிறுவனம்
2027 ஐப்பசி 18-20 / 1996 நவம்பர் 3-5 இல்
“தமிழ் ஆட்சிமொழி சிக்கல்களும் தீர்வுகளும்”
என்னும் தலைப்பில் நடத்திய கருத்தரங்கத்தில்
வாசிக்கப் பெற்ற கட்டுரை.]

ஆகாசவாணி – வெற்றியாய்க் காட்டப்படும் தோல்வி:-

            வானொலியில் ‘ஆகாசவானி’ என்று கூறுவதற்குப் பெரும் எதிர்ப்பு கிளப்பினோம். நீறுபூத்த நெருப்பு, என நம்மை நாமே கூறிக்கொண்டாலும் உண்மையில் நாம் பெட்டைப் பனைமரங்கள்தாம். இந்த ஒலிக்கெல்லாம் நடுவனரசு அஞ்சாது. எனவேதான் குறுகிய எல்லையான தமிழ்நாட்டில் இருந்து ஒலிபரப்பாகும் செய்திகளில் மட்டும் ‘ஆகாசவாணி’ இடம்பெறவில்லை. மாறாகத் தமிழ் அல்ல – ஆங்கிலம்தான் இங்கு இடம்பெறுகிறது. ஏனெனில் நம்நோக்கம் எதையாவது எதிர்ப்பதே தவிரத் தமிழைக் காப்பதல்ல என நடுவனரசிற்குத் தெரியும். என்வேதான் இன்றுவரை உலகெங்கும் ஒலிபரப்பாகும் புதுதில்லி வானொலித் தமிழ்ச் செய்தியில் – தமிழகமெங்கும் உள்ள வானொலி நிலையங்கள் மூலம் ஒலிபரப்பாகும் தில்லிச் செய்தியில் – ஆகாசவாணிதான் இடம் பெறுகிறது.

           தில்லியில் யார் ஆட்சி செய்தாலும் இந்தியின் ஆட்சி என்பது மாறாது. தமிழ் நாட்டிலே ஆள்வோருக்கேற்ப மொழி உணர்வுகள் வெளிப்படுகின்றன. இல்லையென்றால் நெருக்கடிக் காலத்தில் ‘தமிழரசு’ இதழில் ‘திரு’ எனக் குறிப்பிடுவதை நிறுத்தி ‘ஸ்ரீ’ என்று குறித்திருப்பார்களா? கட்டாயப்பாடுத்தியதால் இவ்வாறு குறிப்பிட்டோம் என உரியவர்கள் கூறினார்கள் எனில் கட்டாயப்படுத்தியாவதும் தம்ழி மண்ணில் வாழ்பவன் தானே.

            நம்மைப் பொருத்தவர் ‘தினவெடுத்த தோள்களுக்கு’ வேலை கொடுத்தாயிற்று. அதுபோதும், தொடர்ச்சியான செயற்பாடு நமக்கெதற்கு? ‘ஆகாசவாணி’ என்று இன்றும் கூறப்படுவதை யார் பொருட்படுத்தப்போகிறார்கள். ஆகாசவாணியை அகற்றியதாக வீறு கொண்டு வீரம் பேசுகையில் அவை அடங்கிவிடவா?.

தலைமைச் செயலகம்:-

            தலைமைச் செயலகத்தைப் பொறுத்தவரையில் சட்டம், நிதி, சட்டமன்றத் துறைகள் நீங்களாகப் பிறவற்றில் 01.05.1966 முதல் தமிழ் ஆட்சி மொழிச் செயலாக்க-முதல்நிலை நிறைவேற்றப்பட வேண்டும் என ஆணை பிறப்பிக்கப்பட்டது. 01.04.1970 முதல் நிதி, சட்டத்துறைகளிலும் தமிழ் ஆட்சிமொழிச் செயலாக்க முதல் நிலை நடைமுறைப்படுத்தப்பட வேண்டும் என ஆணை பிறப்பிக்கப்பட்டது. 31.10.1986 முதல் தலைமைச் செயலகத் துறைகள் அரசு சார்பு நிறுவனங்கள், வாரியங்கள், அரசு கழகங்கள், கூட்டுறவு இணையங்கள் போன்ற அனைத்து நிறுவனங்களிலும் உடனடி நடைமுறைக்கு முழுமையாக நிறைவேற்றிக் கொண்டுவரப்படுவதாக ஆணை பிறப்பிக்கப்பட்டது.

            ஆட்சி மொழிச் சட்டம் வந்ததற்கும் செயலகத்தில் நிறைவேற்றுவதற்கும் இடையே ஏன் இவ்வளவு பெரிய இடைவெளி என்று கேட்க வேண்டாம் இவ்விடைவெளிக்குப் பின்னராவது நிறைவேற்றப்பட்டதா என்றால் அதுதான் இல்லை. ஆண்டுதோறும் பிறப்பிக்கப்படுகின்ற விடுமுறைப் பட்டியல் கூடத் தமிழில் வருவதில்லை: ஆண்டிற்கு இருமுறை பிறப்பிக்கப்படும், அகவிலைப்படி உயர்வு ஆணைகள், காலமுறையில் பிறப்பிக்கப்படுகின்ற ஊதிய ஆணைக்குழு அறிக்கைகள் என வாலாயமாக ஒரே வகையில் அமையக்கூடியவை கூடத் தமிழில் வருவதில்லை. அரசாணை நிலை எண் 182 தமிழ் வளர்ச்சி பண்பாட்டுத்துறை நாள் 27.06.1989 இன் படி ஆங்கிலத்தில் வெளியிடும் நேர்வுகளில் இனித் தமிழிலும் ஆணைகள் வெளியிட வேண்டும் என ஆணை பிறப்பித்தும் தமிழில் வருவதில்லை. அரசாணைகளைப் பிறப்பிப்போரே அவற்றை மீறும்பொழுது யாரை நொந்து என்ன பயன்?. ஆட்சி மொழிச் செயலாக்கம் கைக்கெட்டும் தொலைவில் உள்ளதாக எண்ணி ஏமாறுவோரைக் கண்டுதான் வருத்தப்படவேண்டியுள்ளது. இத்தகைய கற்பனை மயக்கத்தில் நாம் வாழும்போது தமிழ் எங்கே ஆளும்?.

            மொழிவாரி மாநிலம் பிரிக்கப்பட்டதைப் பிற மாநிலத்தவர் அனைவரும் தம் மொழிக்கிக் கிடைத்த உரிமை நாளாக மகிழ்ந்து இன்றுவரை கொண்டாடி வருகின்றனர். ஆனால் தமிழ்நாட்டில் இந்நிலை இல்லை. ஏனென்றால், தமிழ்நாடு இன்னுமும், ‘ஆர்யத்தாக்கமுடைய திராவிட நாடாக’ உள்ளது தான். சென்னைப் பெருநிலம் சென்னை மாநிலமாகச் சுருங்கிய பொழுது தமிழ் வழங்கும் பகுதிகளை நாம் இழந்தோம் என்பது அனைவரும் அறிந்த உண்மை. குறைந்தது அன்றைக்கு அயல் மாநில இ.ஆ.ப., இ.கா.ப. அலுவலர்களை அவரவர் மாநிலத்திற்குத் திருப்பி அனுப்பி நம் மாநிலத்தவரைப் பிற மாநிலத்திலிருந்து வரவழைத்திருந்தோம் என்றால் தமிழ்நாட்டிலும் ஓர் எழுச்சி ஏற்பட்டிருக்கும். பரம்பரை பரம்பரையாக அயல் மொழி உயர் அலுவலர்கள் வல்லாண்மை செலுத்தும் நிலையும் ஏற்பட்டிருக்காது. ஒரு சிலரை விதிவிலக்காகக் கொண்டு பார்த்தால் தலைமைச் செயலகத்தில் இதுவரை தமிழ் இடம் பெறத் தடையாக இருந்து, இதன் மூலம் தமிழகமெங்கும் தடைக்கற்களாக விளங்கியவர்கள், விளங்குபவர்கள், தாய்மொழிப் பற்றையும் மறந்து, வாழ்வளிக்கும் தமிழையும் துறந்து ஆங்கில மக்களாகத் திகழும் இத்தகைய அலுவலர்களே என்பதை யாராலும் மறுக்க முடியாது.

சொல்லாமல் புரியும்

            இன்னும் கடந்த காலத்தைப் பற்றியே கூறுவானேன்! நிகழ்காலத்திற்கு வாருங்கள் என்கிறீர்களா? கடந்த கால அவலம் நாம் அறிந்த ஒன்றுதான். என்றாலும் ஏட்டுச்சுரக்காயைக் கொண்டே வெற்றி விருந்து அளித்ததாய் நம்ப வைக்கும் போக்கைப் புரிந்து கொண்டால்தான் நிகழ்கால ஏமாற்றங்களும் தொடர்கதையாகும் என்பதை நாம் புரிந்து கொள்ள இயலும். ஏறத்தாழ 40 ஆண்டுகளில் பிறப்பிக்கப்பட்ட நூற்றுக்கணக்கான ஆணைகளில் ஒரு சிலவற்றைப்பற்றித்தான் நாம் பார்த்துள்ளோம். இவை போன்றுதாம் பிறவற்றின் நிலையும் என்பது சொல்லாமலே புரிந்திருக்கும்.

தமிழைத் துரத்தும் தமிழ்வளர்ச்சித் துறை

            “ஆனால் இவற்றிற்கெல்லாம் தக்க நடவடிக்கைகளைத் தொடராத்து தமிழ் வளர்ச்சித்துறைதானே! தமிழறிவும் தமிழுணர்வும் மண்டிக் கிடக்கும் துறைதானே இத்துறை. எனவேதானே தமிழ்வளர்ச்சித்துறைக்குத் தமிழறிவு தேவையில்லை என்று வழக்காடிக்கொண்டு இருக்கிறார்கள். சம்பளம் வாங்கும் வேலைக்காக மட்டும் ஊதியும் பெறுவோர் நிறந்த துறையிது. இத்துறைக்கு வந்த பின்பும் தமிழறிவையும் தமிழுணர்வையும் வளர்த்துக்கொள்ளாதோர் உள்ளனரே! இத்துறையைக் கலைத்துவிட்டு அனைத்துத்துறைகளில் இருந்தும் தமிழறிவும் துறையறிவும் உடையவர்களைப் பொறுக்கியெடுத்துத் தமிழில் உயர்பட்டங்களைப்பெற்று வெலைநாடுவோருக்கும் வாய்ப்பளித்துத் ‘தமிழ் மேம்பாட்டு ஆணையம்’ என்ற புதிய துறையை உருவாக்கினால், தமிழ் ஆட்சிமொழித் திட்டம் நிறைவேறாதா? ”எனச் சிலர் கேட்பதும் புரிகிறது. தமிழ்வளர்ச்சித்துறைக்குப் புதிய குருதி பாய்ச்ச வேண்டும் என்பதும் செயலகத்தமிழ் வளர்ச்சித்துறையிலும் தமிழ்பட்டம் பெற்றோரையே அமர்த்த வேண்டும் என்பதும் கட்டாயத்தேவைதான். இதனால் துறைதோறும் இடர்நீக்க வழிகாட்ட இயலும். எடுத்துக்காட்டாகப் பொதுப்பணித்துறை உடன்படிக்கைகள், பொருட்பெயர்கள் ஆகியவை தமிழ்ப் படுத்தப்பட்டால், பொதுப்பணித்துறை, நெடுஞ்சாலைத் துறை, மின்வாரியம், போக்குவரத்துக் கழகங்கள் முதலிய அனைத்திலும் தமிழ்ப்பயன்பாடு மிகுதியாகும். இவ்வாறு துறைதோறும் புதிய கலைச் சொற்கள் பெருகவும், ஆட்சி மொழிச் செயலாக்கம் விரைவு பெறவும் வாய்ப்பு நலன்கள் ஏற்பட்டு எழுச்சி உண்டாகும். என்றாலும் நாம் எதை ஆட்சி மொழிச் செயலாக்கம் என்று தவறாக எண்ணிக்கொண்டிருக்கிறோமோ அதுதான் நிறைவேறுமே தவிர, உண்மையில் புறச் சிக்கல்கள் களையப்படும்வரை ‘ தமிழ்நாட்டில் தமிழ்’ என்பது கானல் நீரே!. முதலில் தெரிவித்தவாறு கல்விமொழி, இறைமொழி, பணிமொழி, வணிகமொழி என எல்லா நிலையிலும் தமிழ் இருந்தால்தான் ஆட்சி மொழிச்செயலாக்கம் தானாகவே நிறைவேறும். இதற்கான வாய்ப்புக் கண்ணுக்கு எட்டும் தொலைவில் தென்படவில்லை. இதனை வேறு கோணத்தில் பார்ப்போம்.

(இனியும் காண்போம்)

-  இலக்குவனார் திருவள்ளுவன்

அகரமுதல 71: பங்குனி 8, 2046 / மார்ச்சு 22,2015