ஈழத்தமிழர்களே! ஊர்ப்பெயர்களைச் சிதைக்காதீர்கள்! – இலக்குவனார் திருவள்ளுவன்

அகரமுதல 182,  சித்திரை 03, 2048 / ஏப்பிரல் 16, 2017

இலக்குவனார் திருவள்ளுவன்      16 ஏப்பிரல் 2017      கருத்திற்காக..

ஈழத்தமிழர்களே! ஊர்ப்பெயர்களைச் சிதைக்காதீர்கள்!

  அயலவர்கள் அவர்களின் மொழி உச்சரிப்பிற்கேற்ப நம்  ஊர்ப்பெயர்களை உச்சரித்தனர். திருநெல்வேலியைத் ‘தின்ன வேலி’ என்றும் திருவல்லிக்கேணியை ‘டிரிப்பிளிகேன்’ என்றும் சொல்வதுபோல் எண்ணற்ற ஊர்களை இவ்வாறுதான் தவறாக நாம் தமிழிலும் ஒலித்தோம். ஒருபுறம் ஆரியமயமாக்கப்பட்ட பெயர்கள் மறுபுறம் தவறான உச்சரிப்பிலான பெயர்கள் என இருபுறமும் தாக்குதல் நடைபெற்றது. திராவிட இயக்க எழுச்சியாலும் தனித்தமிழியக்கத்தினர் தொண்டினாலும் தமிழறிஞர்களின் ஆற்றுப்படுத்தினாலும் ஓரளவு மாற்றம் ஏற்பட்டுள்ளது. இருப்பினும் இன்னும் தமிழ்மய மாற்றங்கள் தேவை.

  இவ்வாறு நம்மிடையே குறை  வைத்துக்கொண்டு, ஈழத்தமிழர்களை மட்டும் குற்றம் சொல்வதுபோல் சொல்லலாமா என்ற ஐயம் எழலாம்.

  இலங்கையிலும்  ஈழத்திலும் சிங்கள அரசு தமிழ்ப்பகுதிகளில் சிங்களக் குடியேற்றங்களைப் புகுத்தியும், புத்தர் சிலைகளைத் திணித்தும் தமிழ்நிலங்கள் முந்தைய சிங்கள நிலங்கள் எனத் தவறாகப் பரப்பி வருகிறது. தமிழ்மக்களே தமிழ்ப்பெயர்களைத் தவறாக ஒலித்தும் பெயர்க்காரணங்களை அறியாமல் தவறாக உணர்ந்தும் வருவது சிங்கள வெறியர்களுக்கு மேலும் வாய்ப்பாக அமையும்.

  நான் சனவரித்திங்கள் ஈழம் சென்றிருந்த பொழுது உடன் வந்த நண்பர்,  யாழ்ப்பாணம் எப்பொழுது செல்வோம் என்றார். நான் “நேற்றுதானே போய்வந்தோம்” என்றதற்கு நேற்று நாம்  ‘Jaffna’   அல்லவா சென்று வந்தோம் என்றார். ஒருவர்கூட அதை யாழ்ப்பாணம் என்று சொல்லாத பொழுது  அதுதான் யாழ்ப்பாணம் என்று எப்படி நாம் உணரமுடியும்?

  ஒருவர்  என்னிடம் நாளை ‘டிரிங்கோசு’  பார்க்கப் போகிறேன்; வருகிறேன் என்றார். ஒருமறை டிரிங்கோ என்றால்  (மிக்கிமவுசு போன்ற) கேலிப்படம் என்றும் மறுமுறை, ஏதோ கடைவளாகத்தின் பெயர் என்றும் ஒவ்வொரு முறையும் ஈழத்தமிழ் நண்பர் சொல்லும்பொழுது நான் எண்ணிக்  கொண்டேன். திருகோணமலை செல்லுமன்று காலையில் அவரிடம் நான்,  “நாங்கள் திருக்கோணமலை செல்வதாக இருக்கிறோம்” என்றேன். உடனே அவர், “நான் நேற்றுதான் சென்று வந்தேன்” என்றார்.  நேற்று ‘டிரிங்கோசு’ அல்லவா செல்வதாகத் தெரிவித்தீர்கள் என்றதற்கு, “நாங்கள் திருக்கோணமலையை டிரிங்கோசு என்றுதான்  கூறுவோம்” என்றார். ஊரின் பெயர் திரி(three)கோணமாம், எனவே, டிரிங்கோ என்று சொல்லி அது பன்மை என்பதால் டிரிங்கோசு என்கிறார்களாம்.

 பல ஊர்ப்பெயர்களைத் தமிழ்ப்பெயர்கள் எனத் தமிழர்களே அறியாத வண்ணம் சிதைத்துக் கூறுகின்றனர்; எழுத்திலும் பயன்பாட்டில் கொண்டு வந்துவிட்டனர். தமிழ்நெட். என்னும் வலைத்தள இதழில் ஊர்ப்பெயர்கள் குறித்த விளக்கம் அவ்வப்பொழுது வருகின்றது. இது போன்ற கட்டுரைகளை மாணாக்கர்களுக்குப் பாடமாக வைக்க வேண்டும். ஒவ்வோர் ஊரிலும் ஊர்ப்பெயர் வரலாறு குறித்துப் பெயர்ப்பலகை வைக்க வேண்டும். ஆனால் அவ்வரலாறு உண்மையானதாக இருக்க வேண்டும்.

எடுத்துக்காட்டிற்கு ஒன்று கூறுகிறேன்.

  இலங்கையில் மட்டக்களப்பு என்னும் நகரம் இருப்பதை அறிவீர்கள். (இதுகூட பட்டிகோலா அல்லது பட்டிகலோ(Batticaloa)தான்.) இதன் பெயர்க்காரணம் குறித்து, விக்கிபீடியா பின்வருமாறு தெரிவிக்கிறது:

மட்டக்களப்பு எனும் சொல் எப்படி தோற்றம் பெற்றது என்பதில் வெவ்வேறான கருத்துகள் காணப்படுகின்றன. பல தடவைகள் மட்டக்களப்பு பிரதேசம் சிங்கள அரசின் ஆட்சிக்குட்பட்டு இருந்ததால் சிங்களச் சொற்களின் தாக்கம் மட்டக்களப்பில் கலந்திருக்கலாம் எனக் கருதப்படுகிறது. சிங்களத்தில் சேறு என்பதைக் குறிக்கும் “மட்ட” என்ற பதமும், வாவியால் அப்பிரதேசம் சூழப்பட்டதால் நீர் தேங்கியிருக்கும் இடத்தினைக் குறிக்கும் “களப்பு” என்ற பதமும் சேர்ந்து மட்டக்களப்பு எனும் சொல் உருவாகியது என்ற கருத்தும் உள்ளது.[பழந்தமிழ் இலக்கியத்தில் மட்டக்களப்புத் தமிழ். மட்டக்களப்பு: ஆரணியகம். 2005. பக். 75.] 

  உண்மையில் இது நல்ல தமிழ்ப்பெயராகும். களப்பு என்பது ஆழமற்ற நீர்மட்டம் கொண்ட கடல் பகுதியைக் குறிக்கும். நிலத்திற்கு மட்டமாக – இணையாகக் கடல்நீர்ப்பகுதி அமைவதால் அதற்கு மட்டக்களப்பு என்ற பெயர் வந்தது. இந்த அறிவியல் காரணத்தை அறியாமல் சிங்களச்சொல் என்று சொல்வதால் வரலாறு அழிகிறது, தமிழர்க்குரிய நிலம்என்னும் உரிமையாவணமும் காணாமல் போகிறதல்லவா?

  ஈச்சிலம்பற்று ஊரில் ( தை 16, 2048   / 29.01.2017 அன்று) நடைபெற்ற இலக்கியச்சந்திப்பில ஊர்ப்பெயர் சிதைப்புகள் தீமையை விளக்கி இனிமேல் தமிழிலேயே எல்லா மொழிகளிகலும் உச்சரிக்குமாறு வேண்டினேன். வடமாகாண அமைச்சர் திரு  இயோகீசுவரன் தொடக்கத்தில் இருந்து நிறைவு வரை இவ்விழாவில் கலந்துகொண்டார். அவரிடமும் அரசு சார்பில் நடவடிக்கை எடுக்குமாறு (அறியாமையில்) வேண்டினேன்.

  அமைச்சர் இயோகீசுவரன் மேலும் சில ஊர்ப்பெயர்களையும் அவற்றை எப்படியெல்லாம் சிங்களமயமாக்கி அரசு எழுதி வருவதையும் ஒவ்வொருமுறை எதிர்ப்பு தெரிவித்தாலும் பயனில்லை என்றும் சிங்களக் குடியேற்றங்களைத் திணிக்கும் அரசு, படைவீரர்களைக் குடியேற்றும் அரசு அவற்றை யெல்லாம் சிங்களப்பகுதி என்று பொய்யாகக் காட்டுவதற்காகவே செய்வதாகவும் எடுத்துக்காட்டுகளுடன் நன்கு விளக்கினார். எனவே, மக்கள் ஊர்ப்பெயர்களைத் திருத்தமாகக் குறிப்பிட்டால்தான் நம் ஊர்ப்பெயர்களை மாற்றுகிறார்கள் என்ற உணர்வு வந்து எதிர்ப்பார்கள் என்றும்  ஆட்சியில் யாரிருந்தாலும் தமிழர்க்கு எதிரான போக்குதான் இருக்கும் என்றும் ஆனால், இப்போது முறையிட வாய்ப்பு உள்ளதாகவும் கூறினார்.

  எனவேதான் ஈழத்தமிழர்களிடம் வேண்டுகிறோம்! – சிங்கள அரசின் நிலப்பரப்பு வேலைகளுக்கு நம்  செயல்களும் அமைந்துவிடக்கூடாது அல்லவா?

எனவே,

தமிழில் பேசுக!

ஊர்ப்பெயர்களைத் தமிழிலேயே  குறிப்பிடுக!

தமிழிலேயே எழுதிடுக!

தமிழ்ஈழத்தைக் காத்திடுக!

எண்ணென்ப ஏனை எழுத்தென்ப இவ்விரண்டும்

கண்ணென்ப வாழும் உயிர்க்கு. (திருவள்ளுவர், திருக்குறள் 392)

அன்புடன் இலக்குவனார் திருவள்ளுவன்

இதழுரை : அகரமுதல 182,  சித்திரை 03, 2048 / ஏப்பிரல் 16, 2017

ஈழத்தமிழர் வாழ்வு குறித்து இரட்டை நிலைப்பாடு வேண்டா! – இலக்குவனார் திருவள்ளுவன்

அகரமுதல 166,  மார்கழி10, 2047 /  திசம்பர்25, 2016

இலக்குவனார் திருவள்ளுவன்      25 திசம்பர் 2016      கருத்திற்காக..

ஈழத்தமிழர் வாழ்வு குறித்து

இரட்டை நிலைப்பாடு வேண்டா!

   ஒருவர் தன் கொள்கையை அல்லது கருத்தை மாற்றிக் கொண்ட பின்னர் முன்னர்  அவர் சொன்னதையே பிடித்துத் தொங்கிக் கொண்டிருக்கக்கூடாது. சான்றாகத் தந்தை பெரியார் ஈ.வெ.இராமசாமி இறை மறுப்பாளர் என்ற முறையில்தான் உலகறியப்பட்டவர். ஆனால், தொடக்கத்தில் அவர் சாமியாராகத் திரிந்ததை வைத்துக்கொண்டு அவரை இறைஏற்பாளர் என்ற அளவில் மதிப்பிடலாமா? கூடாதல்லவா? அதுபோல்தான் மேனாள் முதல்வர் செயலலிதா தமிழ்ஈழம் குறித்தும் விடுதலைப்புலிகள் குறித்தும் தமிழ்க்கேடர்களின் கருத்தாக்கத்தால் முதலில் தவறான நிலைப்பாடு எடுத்திருந்தார்.  சட்ட மன்றத்திலும் மேதகு பிரபாகரனைக் கைது செய்ய வேண்டும் என்று தீர்மானம் இயற்றச் செய்துள்ளார்.  போரென்றால் சாவு நேர்வது இயற்கை என்றுகூட உளறிக் கொட்டியுள்ளார். ஆனால், அவர், தமிழ் ஈழத்திற்கு ஆதரவான நிலைப்பாட்டை எடுத்துத் தமிழ் ஈழம் மலரச் செய்ய வேண்டும் என்பதையே கொள்கையாக அறிவித்தபின்னர் முந்தைய நிலைப்பாடுகளைக் கொண்டு அவரைக் குறை கூறுவது  பொருந்தாது.

   இரவிசங்கர் குழுவினர் அளித்த காணுரைகளைக்கண்ட பின்  உண்மை உணர்ந்ததாகத் திருந்தி கூறும் செயலலிதாவின் பேச்சுகளில் ஒரு பகுதி வருமாறு:

 வாழ்வதை விடச் சாவதே மேல் என்று எண்ணத் தோன்றும் அளவுக்கு மோசமான நிலையில் இலங்கைத் தமிழர்கள் உள்ளனர். அந்த அளவுக்கு அவர்களை இலங்கை அரசு மிகவும் கேவலமாகக், கொடூரமாக நடத்தி வருகிறது இலங்கைத் தமிழர்களைக் காப்பாற்ற நடவடிக்கை எடுப்பதாக இலங்கை அரசால் சொல்லப்படுவது எல்லாம் பொய், பித்தலாட்டம், கபட நாடகம் என்பதை நான் தற்போது தெரிந்து கொண்டேன். ….. இவற்றை யெல்லாம் பார்க்கின்ற போது,  செருமனியில் நடந்த இட்லரின் கொடுங்கோல் ஆட்சி தான் – தடுப்பு வதை முகாம்களை நடத்தி, (இ)யூதர்களைக் கொடுமைப்படுத்தி அழித்த –  இட்லர் ஆட்சிதான், நினைவிற்கு வருகிறது. …….  தமிழர்கள் பெரும்பான்மையாக வசிக்கும் இடங்களில் எல்லாம், அவர்களை அங்கிருந்து அகற்றிவிட்டு, அந்த இடங்களில் எல்லாம், சிங்கள மக்களை, இலங்கை அரசு தங்க வைக்கிறது; சிங்கள மக்களைக் குடும்பம் குடும்பமாகக் குடி அமர்த்துகிறது. இலங்கையில் உள்ள தமிழினத்தை அழிக்க, இலங்கை அரசால் தீட்டப்பட்டு இருக்கும் மிகக் கொடுமையான திட்டம் இது ….. உண்மை நிலை இப்படி இருக்க, இலங்கையின் அரசியல் அமைப்புச் சட்டத்திற்கு உட்பட்ட, சனநாயக  முறையிலான தீர்வு காண்பது, தமிழர்களுக்கு அதிகாரம் வழங்குவது, என்று பேசுவதெல்லாம் வீண் வேலை; அது வெறும் கண்துடைப்பு என்பது தெரிகிறது.  ……. இலங்கைத் தமிழர்களுக்குச் சிங்களர்களோடு சம உரிமை வழங்கும் எண்ணமே, இலங்கை அரசுக்குக் கிடையாது. ஒரே அடியாக, இலங்கையில் தமிழ் இனத்தையே அழித்துவிட வேண்டும் என்பது தான் இலங்கை அரசின் ஒரே செயல் திட்டமாக உள்ளது.

இலங்கைத் தமிழர்களுக்கு நீதி கிடைக்க வேண்டும். அவர்கள்  இயல்பு வாழ்வு வாழ வேண்டும். சிங்கள மக்களுக்கு உள்ள அனைத்து உரிமைகளையும் அவர்கள் பெற வேண்டும்.

இதற்கு ஒரே வழி தனி ஈழம் அமைப்பதுதான்.

  இவ்வளவு ஆணித்தரமாக உண்மைகளை உணர்ந்து தமிழ் ஈழம்தான் தீர்வு எனக் கூறிய பின்பும் இதற்கு எதிரான கருத்துகளைக் கூறுபவர்கள் தங்களின் இரண்டகங்களை மறைப்பவர்களாகவே இருப்பார்கள்.

  இலங்கைக்குப் பொருளாதாரத் தடை விதிக்க வேண்டும் என்று தமிழகச் சட்டமன்றத்தில் வைகாசி 25, 2042 /  2011  சூன்  8 ஆம் நாளன்று  முதலமைச்சராக இருந்த  செயலலிதா தீர்மானம் நிறைவேற்றியுள்ளார்;

 இலங்கையில் போர்குற்றங்கள் நடத்திய அனைவர் மீதும்   நடைபெற்ற போர்க்குற்றங்கள் குறித்துப் பன்னாட்டு உசாவல் நடத்த வேண்டும். என்றும் தமிழ் ஈழத்திற்கான பொதுவாக்கெடுப்பு நடத்த வேண்டும் என்றும் சட்டமன்றத்தில் பங்குனி 14, 2043 / 2012, மார்ச்சு 27 ஆம்  நாளன்று  தீர்மானம் கொண்டு வந்து நிறைவேற்றியுள்ளார்.

  இவற்றின் பின்னரும் தமிழ்ப்பகைவர்கள் கருத்திற்கு  இரையாகித் தவறாகப் பேசிய முந்தைய பேச்சுகளையே திரும்பத் திரும்பக் கூறுவது தமிழ்   ஈழத்திற்கும் பின்னடைவையே ஏற்படுத்தும்.

  தி.மு.க. உறுப்பினர்கள், பொறுப்பாளர்கள், தலைவர்களின் பெரும்பான்மை உணர்விற்கு முரணாகக் கலைஞர் கருணாநிதி பேராயக்கட்சியாகிய காங்.உடன் கை கோத்து எடுத்த இரண்டக நிலைப்பாடு ஈழத்தமிழர்களின் படுகொலைகளுக்குத் துணை நின்றது என்பது  மறுக்க முடியாத உண்மை. ஆனால், அதனை மறைப்பதற்காக, அவரின் முந்தைய ஈழ ஆதரவுநிலையைப் பாராட்டிக்கொண்டு செயலலிதாவின் முந்தைய தவறான கொள்கை அடிப்படையில் அவரைக் குறைகூறிக் கொண்டுள்ளனர். தாம் செய்த குற்றங்களை மறைப்பதற்காக, அடுத்தவர்மீது ஏற்படும் நல்லெண்ணத்தைச் சிதைக்கும் முயற்சியே இது.

 “உன் முதுகில் உள்ள உத்தரத்தை எடுத்து விட்டு அடுத்தவன் கண்ணில் உள்ள தூசியைப் பார்க்க வேண்டும்” என்பதை உணராதவர்கள் அவர்கள்.

 செயலலிதாவின் கனவுகளை நிறைவேற்றவதாகக் கூறும் அக்கட்சித் தலைவர்கள், அரசின் முதன்மைத் திட்டங்களில் ஒன்றாகத் தமிழ்ஈழமலர்ச்சிக்கான உறுதுணையைச் சேர்க்க வேண்டும்..

 தமிழ்நாட்டினருக்கும் தமிழகச் சட்டமன்றத்திற்கும் களங்கம் ஏற்படும் வகையில் 2002 இல் தமிழக சட்டமன்றத்தில் பிரபாகரனைக் கைது செய்து கொண்டு வர வேண்டும் என்று போட்ட தீர்மானத்தை நீக்கம் செய்து புதிய தீர்மானம்  நிறைவேற்ற வேண்டும்.

 தனி ஈழம் அமைந்திட, ஈழத் தமிழர்களிடம் பொது வாக்கெடுப்பு நடத்துவதற்குச் செயலலிதா எடுத்திருந்த மன உறுதி நிறைவேண்டும். எனவே,  தமிழ்ஈழ ஏற்புத் தூதுக் குழுக்களை அமைத்துப் பிற மாநிலச் சட்டமன்றங்களுக்குத் தமிழ்நாட்டிலிருந்து அனுப்பி.  அந்தந்த மாநிலச் சட்டமன்றங்களில் தீர்மானம் இயற்ற வழிவகை செய்ய வேண்டும். அயல்நாடுகளுக்கும் இக்குழுக்களை அனுப்பி ஈழ வாக்கெடுப்பு  அல்லது உரிமைத் தமிழ்ஈழ ஆதரவு பெற வேண்டும். இத்தூதுக்குழுக்களில்  கட்சி அடிப்படையில் அல்லாமல் ஈழஆதரவு நிலைப்பாட்டிலுள்ளவர்களை உறுப்பினராக அமர்த்த  வேண்டும்.

  தமிழ் ஈழத்திற்கு ஆதரவான நிலை என்றால் ஈழத்தமிழர்களுக்கு ஆதரவான நிலை என்றுதான் பொருள். ஈழத்தமிழர்கள் என்றால் இப்பொழுது ஈழத்தில் வசிப்பவர்களை மட்டும் குறிக்காது. புலம் பெயர்ந்து வாழும் ஈழத்தமிழர்களையும் குறிக்கும். அப்படியாயின், தமிழ்நாட்டிலுள்ள ஈழத்தமிழர்களையும் குறிக்கும் அல்லவா? ஆனால், ஈழத்திலுள்ள தமிழர்களுக்கு ஆதரவாகப் பேசிக்கொண்டு இங்குள்ள ஈழத்தமிழர்களை முகாம் என்ற பெயரிலான கூட்டுச் சி்றையில்  அடைத்துத் துன்புறுத்தலாமா? போதிய மருத்துவவசதி, கல்வி வசதி, வாழ்நிலை வசதி ஆகியன இல்லாமல் அவர்கள், துன்புற விடலாமா? தங்கள் குறைகள் நீங்க அறவழியில் உண்ணாநோன்பு இருப்பவர்கள் உடல்நலன் குறித்துச் சிறிதும் கவலைப்படாமல் சாகும் நிலைக்குக் கொண்டுவரலாமா? பிற நாட்டுப் புலம்பெயர்ந்தோர்கள் உரிமையுடன் வாழ வகைசெய்துவிட்டு ஈழத்தமிழர்களைமட்டும் கொத்தடிமையாக நடத்தச் சொல்லும் இந்திய அரசிற்கு எதிராகக் குரல் கொடுக்காமல் அமைதி காக்கலாமா? அதற்குத் தமிழக அரசுதுணைபுரிவது இரண்டக வேலையல்லவா?

  எனவே, திபேத்தியர் முதலான பிற ஏதிலிகள் வாழ அளிக்கும் உரிமைகளை ஈழத்தமிழர்களுக்கும் தமிழக அரசு அளிக்க வேண்டும்.

  அயகலத்தமிழர் நலனுக்கான தனித்துறை அமைத்தோ தனி வாரியம் அமைத்தோ உலகத்தமிழர் நலனுக்குப் பாடுபட்டுத் தமிழ்மொழியும் தமிழினமும் தழைத்தோங்கத் தவறாது பணியாற்ற வேண்டும்.

   எனவே, தமிழக அரசு ஈழத்தமிழர் நிலைப்பாட்டில் இரட்டை  நிலைப்பாட்டைக் கொள்ளாமல் தமிழ் ஈழத்தில் தமிழர்கள் உரிமை ஆட்சி மலர்ந்திடவும் தமிழ்நாட்டில் உள்ள ஈழத்தமிழர்கள் உரிமையுடன் வாழவும் உண்மையாகவும் உறுதியாகவும் செயல்பட வேண்டும். அவ்வாறு செயல்பட்டு வெற்றி காண வாழ்த்துகிறோம்.

வினைக்கண் வினைகெடல் ஓம்பல் வினைக்குறை

தீர்ந்தாரின் தீர்ந்தன்று உலகு.

. (திருவள்ளுவர், திருக்குறள் 612)

• அன்புடன் இலக்குவனார் திருவள்ளுவன்

இதழுரை,  அகரமுதல 166,  மார்கழி 10, 2047 /  திசம்பர் 25, 2016

முதல்வரே! தஞ்சம் என வந்தோர்க்குத் தாயன்பு தேவையல்லவா?

இலக்குவனார் திருவள்ளுவன்      11 October 2015      No Comment

திபேத்தியர் குடியேற்ற இடங்கள்

முதல்வரே! தஞ்சம் என வந்தோர்க்குத்

தாயன்பு தேவையல்லவா?

  தமிழ் அறநெறிகளுள் ஒன்று, அடைக்கலம் என வந்தோர்க்கு ஆதரவு காட்டி, அரவணைத்து வாழ்வித்தலாகும். அடைக்கலப் பொருளைப் பொன்போல் காப்பவருக்கும் அடைக்கலமாக வந்தவரைத் தம் உயிரினும் மேலாகக் காப்பவர்க்கும் நற்பேறு கிட்டும் என்பது தமிழர் நம்பிக்கை. ‘விருந்தினர் இருக்கையில் சாவா மருந்தெனினும் தனியே உண்ணக்கூடாது’ என்பது தமிழ் நெறியல்லவா? அதைத்தானே தெய்வப்புலவர் திருவள்ளுவர்

விருந்து புறத்ததாத் தானுண்டல் சாவா

மருந்தெனினும் வேண்டற்பாற் றன்று

( திருக்குறள், எண்:82)

என்கிறார்.

  நம் நாட்டைப் புகலிடமாகக் கொண்டு வந்துள்ளோரும் விருந்தினர்தாமே! ஆனால், அவர்களை நாம் நடத்தும்முறை சரிதானா? அறம்தானா? நற்பேற்றிற்கு உரியதுதானா? அடைக்கலம் தருவோருக்குக் கிடைக்கும், ‘முட்டா இன்பத்து முடிவுலகு’ நமக்குக் கிட்டுமா? புகலிடம் நாடி வந்தவர்களைப் பஞ்சுபடும்பாடாக்கித் தவிக்க விடலாமா? “நான் படும்பாடு தாளம் படுமோ தறிபடுமோ” என ஒவ்வொருவரும் துன்பத்துடன் உரைக்க வைக்கலாமா?

நெருப்பினுள் துஞ்சலும் ஆகும் நிரப்பினுள்

யாதொன்றும் கண்பாடு அரிது. (திருக்குறள் 1049)

எனத் தெய்வப்புலவர் திருவள்ளுவர் நெருப்பினுள் தூங்கினாலும் பொருள் வறிதான சூழலில் ஒருவனால் தூங்க இயலாது என்கிறார். அடைக்கலம் என வந்த ஈழத்தமிழர்களைத் தன்மானம் வறிதான சூழலில் வாழ வேண்டும் எனத் தள்ளுவது அதனினும் கொடுமையல்லவா?

  புகலிடம் வருவோர் குறித்த கொள்கை எதுவும் இந்திய அரசால் அறிவிக்கப்படவில்லை. இருப்பினும் இந்திய அரசு திபேத்திலிருந்து அடைக்கலம் வருநருக்கு வாக்குரிமையும் இந்திய அரசில் பணிபுரியும் உரிமை நீங்கலான இந்தியக் குடிமகனுக்குரிய எல்லா உரிமைகளையும் அளிக்கிறது(“the right to enjoy all the privileges enjoyed by any Indian citizen except the right to vote and work in Indian government offices”). அதுபோன்ற உரிமைகளை ஈழத்தமிழர்களுக்கும் தருவதுதானே நடுவுநிலைமையும் மனிதநேயமும் ஆகும். வாக்குரிமையும்கூட, சனவரி 26, 1950 இலிருந்து சூலை 1, 1987 இற்குள் பிறந்த அனைத்துத் திபேத்தியருக்கும் நீதிமன்றத்தீர்ப்பின்படி வழங்கப்பட்டு விட்டது. கருநாடக அரசின் (2013 ஆம் ஆண்டு) தீர்ப்பு ஒன்றின்படி இந்தியத் தலைமைத் தேர்தல் ஆணையம் இந்தியாவில் பிறந்த திபதே்தியர் அனைவருக்கும் இந்தியக் குடிமையுரிமை உண்டு என்ற அடிப்படையில் வாக்குரிமையும் வழங்கியுள்ளது. திபேத்தியர் மொழியையும் பண்பாட்டையும் பேணிக்காப்பதற்காக, இந்தியாவில் தனிப்பள்ளிகள் தொடங்கப்பட்டு நடைபெறுகின்றன. மழலைநிலைப் பள்ளி நீங்கலாக இத்தகைய பள்ளிகள் எண்ணிக்கை 73ஆகும். இந்தியாவில் திபேத்தியர்களுக்கான குடியேற்றங்கள் இருபதுக்கும் மேலே உள்ளன. கருநாடக அரசு (அப்போதைய மைசூர் மாநில அரசு) 1960 இல் பைலக்குப்பே(Bylakuppe) என்னும் இடத்தில் 3000 காணி(ஏக்கர்) நிலத்தைத் திபேத்தியக் குடியேற்றத்திற்காக வழங்கியுள்ளது. (விக்கிபீடியா)

  கருநாடக அரசு 1966இல் மண்டுகாடு (Mundgod) என்னுமிடத்தில் 4000 காணி (ஏக்கர்) நிலப்பரப்பில் குட்டித்திபேத்து போன்ற குடியேற்றத்தை அமைத்துக் கொடுத்துள்ளது. குட்டித் திபேத்து என்று சொல்வதன் காரணம் திபேத்தியர் அல்லாதவர் இங்கே செல்ல வேண்டும் என்றால் மத்திய அரசின் உள்துறையில் இசைவு பெற வேண்டும். இவை தவிர, வேறுசில குடியேற்றங்களையும் அமைத்துத் தந்துள்ளது.( http://www.tibethomestay.com/ )

  இதேபோல், இமாச்சலப்பிரதேச அரசு, காசுமீர் அரசு, உத்தரகண்ட அரசு எனப் பலவும் மத்திய அரசின் கொள்கையால் திபேத்தியர்களை நம் நாட்டுக் குடிமக்களுக்கு இணையாக நடத்திக் குடியேற்றங்களுக்கு நிலங்கள் வழங்கி, கோயில்கள், பள்ளிகளுக்கும் நிலங்களும் பொருளுதவியும் வழங்கி வருகின்றன.

  எந்தக் குடியேற்றப் பகுதியில் திபேத்தியர்கள் இருந்தாலும் அங்கே கூட்டுறவு அமைப்பு, முதியோர் மனைகள், வேளாண் பிரிவு, இளைஞர் பணிவழங்கல் பிரிவு, மகளிர் பிரிவு, வீடமைப்பு, பண்ணையமைப்பு போன்றவற்றின் மூலம்   மத்தியத் திபேத்தியப் பணியகம் உதவிகள்ஆற்றி வருகின்றது. (http://www.centraltibetanreliefcommittee.org )

  பதிவுச் சான்றிதழுடன்[Registration Certificate (RC)] கூடிய தங்கல் இசைமத்துடன்(stay permit) திபேத்தியர்கள் இந்தியாவில் வாழும் உரிமையுடையவர்கள். மருத்துவம், பொறியியல் கல்லூரிகளிலும் திபேத்தியருக்கு இட ஒதுக்கீடு உண்டு. திபேத்தியர்களுக்கு என்னதான் வாய்ப்பு நலன்கள் ஏற்படுத்தித் தந்தாலும் உரிமையுள்ள தங்கள் நாட்டில் வாழ்வதற்கு ஈடாகாதுதான். இங்கும் அவர்களுக்கும் தீர்க்க வேண்டியை சிக்கல்கள் இருக்கின்றன உண்மைதான். என்றபோதும் சீனாவின் பகைத்தலைவரான தலாய்லாமாவிற்கும்   பகை மக்களான அவரது ஆதரவு திபேத்திய மக்களுக்கும் சீனாவின் எதிர்ப்பையும் மீறிப் பல்வேறு உரிமைகளையும் வாய்ப்புகளையும் இந்திய அரசு வழங்குகிறது. ஆனால், சீனாவைப் பொய்யாகக் காரணம் காட்டிச் சிங்கள அரசுடன் இந்திய அரசு உறவு கொள்கிறது. உறவாக விளங்கும் தமிழர்களைப் பகையாகவே கருதி அழித்து வருகிறது. சொல்லொணாத் துயரத்திலிருந்து மீண்டு வந்தவர்களை – நம் இனத்தவரை – ‘வந்தாரை வாழ வைக்கும் தமிழகம்’ எனப் பெருமை பேசிக் கொண்டு நாம் அடிமைகளிலும் கீழாக நடத்தலாமா? குற்றமற்றவர்கள் என நீதிமன்றங்களால் விடுவிக்கப்பட்டவர்களையும் இந்த முகாம்களில் அடைப்பதும் போதிய கல்வி வசதி, உணவு வசதி, மருத்துவ வசதி, உழைப்பு வசதி, குடியிருப்பு வசதி முதலானவற்றைத் தராமல் துன்புறுத்துவதும் எந்த வகையில் முறைமையாகும்? ஒரு கண்ணில் வெண்ணெயும் மறு கண்ணில் சுண்ணாம்புமாக மத்திய அரசுதான் ஈழத்தமிழர்களை ஒடுக்குகின்றது என்றால் தமிழக அரசு அதே முறையைப் பின்பற்றலாமா?

  தமிழர் வாழும் நாடுகளில் தூதரகங்களில் தமிழதிகாரிகளை அமர்த்தாத மத்திய அரசு, தமிழ் நாட்டில் தமிழ்த்தேசியத்தை இந்தித்தேசியமாக மாற்றி வரும் மத்திய அரசு,   உலகத் தமிழர்களை இந்தியர்களாக மாற்றி வரும் மத்திய அரசு, ஈழத் தமிழர்களின் தாயகத்தை அழித்து வரும் மத்திய அரசு, கொத்துக்குண்டுகளாலும் எரி குண்டுகளாலும் ஈழத்தமிழர்களை அழிப்பதற்கு உடந்தையாக இருந்த மத்திய அரசு, அதானேலேயே அவர்கள் புகலிடம் நாடி நம் நாட்டிற்குள் வருவதற்குத் தடையாய் இருந்த மத்திய அரசு புலம் பெயர்ந்து வந்த ஈழத்தமிழர்கள்பால் பரிவுடன் நடந்து கொள்ளும் என எதிர்பார்க்க முடியாதுதான். ஆனால், தமிழ் மொழிக்காகவும் தமிழர்நலனுக்காகவும் செயல்பட வேண்டிய தமிழக அரசு பாராமுகமாக இருப்பதும் அதனினும் மோசமாகக் கொடுமுகத்தைக் காட்டுவதும் எந்த வகையிலும் முறையல்லவே!

  தம்முடைய இயற்பெயரும் மறந்து திரைப்பெயரும் மறைந்து ‘அம்மா’ என்றும் ‘தாய்’ என்றும் அழைக்கப்படுகின்ற முதல்வர், தாயுள்ளத்துடன் அனைவரிடமும் நடந்துகொள்வதுதானே முறையாகும். உலகத்தமிழர்கள் முதல்வர் பக்கம் நிற்கின்றார்கள் என்றால் மத்திய ஆளும் கட்சியுடன் உறவு இருந்தாலும் மத்திய அரசிற்கு எதிராகத் துணிந்து ஈழத்தமிழர்பாலான பரிவினை வெளிப்படுத்தியதுதானே! ஈழத்தில் நடைபெற்றது இனப்படுகொலை என உண்மையைக் கூறிச் சட்டமன்றத்தில் தீர்மானமாக நிறைவேற்றியதுதானே! இனப் படுகொலை புரிந்தவர்கள் அனைவரும் பன்னாட்டு நீதிமன்றத்தில் நிறுத்தப்பட்டுத் தண்டிக்கப்படவேண்டும் என உலகத்தமிழர்களின் உள்ளக்கிடக்கையை வெளிப்படுத்தியதுதானே! உலகத்தமிழர்களிடையே பொது வாக்கெடுப்பு எடுத்துத் தனித்தமிழீழத்தை அமைக்க வலியுறுத்தியதுதானே! இதனால் மகிழ்ச்சியும் நம்பிக்கையும் கொண்டுள்ள உலகத்தமிழர்கள் தங்கள் உறவினர் தமிழ்நாட்டில் வாழும் உரிமையின்றி அடைத்து வைக்கப்பட்டுச் சித்திரவதைக்கு ஆளாகிறார்கள் எனக் கேட்கும் பொழுது நெஞ்சம் பதறாதா? நீதி மன்றங்களால் விடுதலை செய்யப்பட்டவர்களும் முகாம்களில் அடைக்கப்படுவதும் காவல் துறையினரால் அல்லலுக்கு ஆளாக்கப்படுவதும், உரிமை வேண்டி உண்ணா நோன்பு இருந்தால் அது குறித்துக் கவலைப்படாததும் வேதனை தராதா? குழந்தைகள் அம்மாவிடம் முறையிடுவதுபோல் முறையிட்டாலும் தாயுள்ளத்துடன் நோக்காமல் ஈழத்தமிழர்களைக் கொட்டடியில் அடைத்து வைக்கலாமா?

  தமிழக அரசு மக்கள் உதவிகளுடனும் ஈழத்தமிழர்களுக்கு உதவிகள் புரியலாம். முன்னர் நடிகர் விசயகாந்து(தே.தி.மு.க.தலைவராகும் முன்னர்) பெருமளவில் தொடர்ந்து ஈழத்தமிழர் முகாம்களில் உதவியும் அவரைப்போல் பிறர் உதவியும் அரசின் தடைகளால் உதவ இயலவில்லை. திபேத்தியர்கள் முகாம்களில் அடைத்து வைக்கப்படுவதில்லை.   இமாசலப் பிரதேச அரசு உள்துறையின் கட்டுப்பாட்டிலுள்ள மத்தியத் திபேத்தியன் பணியகம்(நிருவாகம்)பல்வேறு திட்டங்கள் தீட்டிச் செயல்படுத்தி வருகிறது. அதே நேரம், ஒவ்வொருவர் படிப்புப் பொறுப்பைப் பிறர் ஏற்கும் வண்ணம் திட்டம் வகுத்துப் படிப்பிக்கச் செய்கின்றனர். தனி மருத்துவமனைகளும் உள்ளன. பிற மாநிலங்களிலும் முதலில் குறிப்பிட்டாற்போல் உதவிகள் அளிக்கப்படுகின்றன. இதேபோல் தமிழக அரசு ஈழத்தமிழர்களின் கல்வி, வேலைவாய்புகளுக்கு உதவ மக்களின் உதவியை நாடினால், உதவுவதற்கு எண்ணற்றோர் உள்ளனர். அயலகத் தமிழர்களும் உதவ முன்வருவர்.

  எனவே, தமிழக அரசு, ஈழத்தமிழர்களை முகாம் எனப்படும் கொட்டடிகளில் அடைத்து வைக்காமல் உரிமையுடன் வாழ வழிவகைசெய்ய வேண்டும்.

அனைவருக்கும் மருத்துவ முகாம்கள் நடத்தி உயரிய மருத்துவ வசதி அளிக்க வேண்டும்.

சிறப்பான கல்வி அளிக்க வேண்டும்.

வேலைவாய்ப்பு, தொழில் வசதிகளை அளிக்க வேண்டும்.

புலம் பெயர்ந்து வந்த ஈழத்தமிழர் நலனகம் ஒன்றைத் தமிழக அரசு அமைத்து அதன் மூலம் வேண்டிய உதவிகளை ஆற்ற வேண்டும்.

  இவ்வாறெல்லாம் செய்ய வேண்டிய அம்மா தாயன்பு காட்ட வேண்டிய அம்மா நிலைத்த பழிச்சொல்லிற்கு ஆளாகும் வண்ணம் ஈழத்தமிழர்களை ஒடுக்கி வைக்கலாமா? அடக்கி வைக்கலாமா? தடுத்து வைக்கலாமா? ஈழத்தமிழர்களிடையே நம் நாட்டில் ஒன்றும் வெளிநாடுகளில் ஒன்றுமாக இரு முகம் காட்டலாமா?

நன்றே செய்க!

நன்றும் இன்றே செய்க!

இன்றும் இன்னே செய்க!

என்றும் நிலை புகழ் பெறுக!

அன்புடன் இலக்குவனார் திருவள்ளுவன்
தமிழே விழி! தமிழா விழி!
எழுத்தைக் காப்போம்! மொழியைக் காப்போம்! இனத்தைக் காப்போம்!
அகரமுதல 100,  புரட்டாசி 24, 2046 / அக்.11, 2015 : இதழுரை