விருதாளர் திரைக்கதை எழுதுகிறார் 1-இலக்குவனார் திருவள்ளுவன்

ஃஃஃ    இலக்குவனார் திருவள்ளுவன்      12 January 2025      அகரமுதல

விருதாளர் திரைக்கதை எழுதுகிறார்

1

விருது பெறுபவரை விருதாளர் என்பர். இவரோ தான் நிறைய விருதுகளைப் பெற வேண்டும் என்பதற்காகத் தன் பெயரையே விருதாளர் என மாற்றிக் கொண்டவர். தான் சூட்டிய பெயருக்கேற்ப சிறுகதைகளுக்காகவும் புதினங்களுக்காகவும் நிறைய விருதுகள் பெற்றுப் பாராட்டு பெறுபவர். அண்மையில் இவர் எழுதிய ‘வேர்களை மறக்கா விழுதுகள்’ என்னும் புதினம் சிறந்த புதினத்திற்காக அனைத்து இந்திய விருதினைப் பெற்றது. இதற்காகப் பலரும் அவரைப் பாராட்டி வருகின்றனர். அந்த வகையில் புகழ்பெற்ற ‘வி’ தொலைக்காட்சி நிறுவனத்தினர் இவரைப் பாராட்ட இவர் வீட்டிற்கு வந்துள்ளனர்.

ஐயா, வணக்கம் ஐயா.

வணக்கம், வணக்கம். வாருங்கள், அமருங்கள்.

ஐயா, நாங்கள் ‘வி’ தொலைக்காட்சியிலிருந்து வருகிறோம்.

‘வி’ தொலைக்காட்சியா? புகழ் பெற்ற நிறுவனமாயிற்றே! நீங்கள் சிறப்பான தொடர்களை வெளியிட்டு வருவதாகப் பலரும் பாராட்டுகின்றனரே!

ஆம் ஐயா. எங்களின் தொலைக்காட்சித் தொடர்கள் மக்களால் விரும்பப்படுகின்றன. கதைக்காகவும் இயக்கத்திற்காகவும் நடிப்பிற்காகவும் எனப் பல விருதுகளைப் பெற்று வருகின்றன. அதுபோல் உங்கள் படைப்பையும் படமாக்கி விருதுகள் பெற விரும்புகிறோம்.

கதைக்காப் பஞ்சம்? குவிகம் போன்ற அமைப்புகள் புதினப்போட்டி, சிறுகதைப்போட்டிகள் நடத்துகின்றனர். நன்னன் குடில், புதுச்சேரித் தனித்தமிழ் இயக்கம் போன்ற சில அமைப்புகள் நல்ல தமிழில் சிறுகதை எழுதப் போட்டி நடத்துகிறார்கள். உலகளாவிய நிலையில் வெளிநாட்டினரும் இத்தகைய போட்டிகள் நடத்துகின்றனர். அவற்றில் இடம் பெறுவனவற்றில் ஒன்றை நீங்கள் எடுத்துக் கொள்ளலாமே!

உண்மைதான் ஐயா. எங்களுக்கு உங்கள் படைப்பைப் படமாக ஆக்க வேண்டும் என்று ஆசை. அதுதான் உங்களிடம் வந்துள்ளோம்.

என் படைப்பை விரும்புவதற்கு மகிழ்ச்சி. ஆனால், நான் எந்த என படைப்பையும் தொலைக்காட்சித் தொடருக்கு அளிக்கும் எண்ணம் இல்லை.

அப்படிச் சொல்லக் கூடாது ஐயா. உங்களின் ‘வேர்களை மறக்கா விழுதுகள்’ மிகச் சிறந்த புதினமாயிற்றே. எங்கள் குழுவினர் அனைவருக்கும் பிடித்த புதினம் அது. பெருமளவு மக்களால் பாராட்டு பெறும் புதினம் இது. இதனைக் காட்சி வடிவில் மக்களுக்குத்  தொலைக்காட்சித் தொடராக அளிக்கும் பொழுது பல கோடி மக்களை இது சென்றடையும்.

நீங்கள் சொல்வது உண்மைதான். ஆனால் என் கதையைச் சிதைத்து மக்களிடம் காட்ட விரும்பவில்லை. வீட்டில் நான் மட்டுமே இப்பொழுது உள்ளேன். எனவே, உங்களுக்கு அருந்துவதற்குக் கொடுக்க இயலவில்லை. நீங்கள் போகலாம். நன்றி.

ஐயா, நீங்கள் அவ்வாறு சொல்லக் கூடாது. நாங்கள் அனைவருமே உங்கள் படைப்புகளை விரும்பிப் படிப்பவர்கள். உங்கள் சிறுகதையோ புதினமோ வருகிறது என்றால் உடனே வாங்கி முதலில் படித்து முடித்து விடுவோம். எனவேதான், உங்கள் புதினத்தைத் தொலைக்காட்சித் தொடராக மாற்ற விரும்புகிறோம்.

இதற்கு முன்னரே திரைப்பட நிறுவனத்தினரும் இயக்குநர்களும் என் படைப்புகளைப் படமாக்க வேண்டும் என்று வந்து கேட்டுள்ளனர். 2 மணி நேரத்திற்குள் என் புதினத்தை அடைத்துக் கதையைச் சிதைத்து விடுவார்கள் என்று மறுத்து விட்டேன்.

ஆமாம், ஆமாம்! நீங்கள் கூறுவது உண்மைதான். புதினத்தைத் திரைப்படமாக்கும் பொழுது நீங்கள் விவரிக்கும் கருத்துகள் அப்படியே இடம் பெறாது. உங்களின் பல கதைக்களங்களைச் சுருக்கி விடுவார்கள். அல்லது நீக்கி விடுவார்கள். எனவேதான் எழுத்தாளர்கள் தங்கள் புதினங்களைப் படாமக்க விரும்பவில்லை. இந்த முயற்சியில் இதற்கு முன்னர் ஈடுபட்டவர்களும் தோல்விகளையே தழுவியுள்ளார்கள்.

பார்த்தீர்களா? நீங்களே ஒப்புக் கொண்டீர்கள். பிறகு ஏன் என் புதினத்தைப் படமாக்க வருகிறீர்கள்.

ஐயா, நாங்கள் தொலைக்காட்சித் தொடராக ஆக்க விரும்புகிறோம். எனவே, எந்தக் காட்சியையும் நீக்க மாட்டோம். நீங்கள் எழுதியவாறே காட்சிகளை அமைப்போம்.

எப்படி முடியும்? நான் 1600 பக்கங்கள் எழுதியுள்ளேன். நீங்கள் சுருக்கத்தானே செய்வீர்கள்.

இ்ல்லையில்லை. நாங்கள் சுருக்க மாட்டோம். 1600 காட்சிகளாக அமைத்து விடுவோம்.

1600 காட்சிகளா?

ஆமாம். இதற்கு முன்னர் ‘பறக்க மறந்த பறவை’ என்ற தொடரை 5 ஆண்டுகள் ஒளிபரப்பினோம். அதுபோல்  இதனை எடுத்து 6 ஆண்டுகள் ஒளி பரப்ப எண்ணுகின்றோம்.

நீங்கள் சொல்வது கேட்பதற்கு நன்றாகத்தான் உள்ளது. ஆனாலும் நான் இதை விரும்பவில்லை.

அப்படிச் சொல்லக்கூடாது. உங்களின் அன்பர்கள் நாங்கள். நாங்கள் உங்கள் புதினத்திற்கு எந்த ஊறும் நேராமல் பார்த்துக் கொள்வோம். எனவே, சரி என்று சொல்ல வேண்டும்.

என் ஒவ்வொரு படைப்பும் என் குழந்தை மாதிரி. எந்தக் குழந்தையும் அடுத்தவர் கைகளில் சிக்கிச் சீரழிய நான் விரும்பவில்லை.

ஏன் அப்படி எண்ணுகிறீர்கள். நாங்கள் உங்கள் புதினத்திற்கு உரூபத்து இலட்சம் தொகை அளித்துச் சிறப்பிக்கிறோம்.

எப்படி? காசோலை தந்து விட்டு, வங்கியில் போட்டால் பணம் இல்லை என்று திரும்பி வருமே அந்த மாதிரியா?

சே! சே! அப்படி எல்லாம் இல்லை. நீங்கள் சரி என்று சொன்னால் இப்போதே ஐந்து இலட்சம் உரூபாய் முன்பணமாகத் தருகிறோம். தொடர் முடியும் தறுவாயில் மீதி உரூபாய் ஐந்து இலட்சம் தருகிறோம்.

பரவாயில்லையே! எழுத்தாளர்களை மதிக்கிறீர்களே! எனினும் எனக்கு இதில் உடன்பாடில்லை. நன்றி. சென்று வாருங்கள்.

அப்படி எல்லாம் சொல்லக் கூடாது. நீங்கள் பணத்தைப் பொருட்படுத்துபவரில்லை என்பதை நாங்கள் அறிவோம். ஆனால், உங்கள் எழுத்து மக்களிடம் சென்று சேர வேண்டும் என விரும்புகிறோம்.

எப்படி? மொழிக்கொலை புரிந்தா? நான் பேச்சு வழக்கைக் குறித்தாலும் பிற மொழிக் கலப்பின்றி எழுதி வருகிறேன். தொலைக்காட்சியினர் மொழிக் கொலை மன்னர்களாயிற்றே. உங்கள் மொழிக் கொலையில் என் புதின நடை சின்னாபின்னமாக வேண்டுமா? வேண்டா! வேண்டா! என் புதினத்திற்கு அந்த நிலை வேண்டா!

உங்கள் புதினத்திற்கு வேறு யாரேனும் உரையாடல் எழுதினால்தானே அந்த நிலை ஏற்படும் என அஞ்சுகிறீர்கள்?

ஆமாம் ஆமாம். கண்டிப்பாக. கதை என என் பெயரைப் போட்டுவிட்டு உரையாடல் மூலம் கதையையே மாற்றி விடுவீர்கள்.

அந்தக் கவலையே உங்களுக்கு வேண்டா. இந்தத் தொடருக்கு நீங்களே உரையாடல் எழுதுங்கள். கதையும் நீங்களே! உரையாடலும் நீங்களே! என்னும் பொழுது உங்கள் அச்சத்திற்குத் தேவையே இல்லை அல்லவா?

நானே உரையாடல் எழுத வேண்டுமா? திரைக்கதைக்கு உரையாடல் எழுதும் பழக்கம் எனக்கு இல்லையே! என்னை விட்டு விடுங்கள். 

அப்படி எல்லாம் சொல்லக்கூடாது. உங்கள் கை வண்ணத்தை ஒளிவண்ணமாகக் காட்டப் போகிறோம். உங்கள் அன்பர்கள் மட்டுமல்லாமல் அனைத்து மக்களுமே மகிழ்ச்சி யடையப் போகிறார்கள். எனவே, நீங்கள் சரி என்று சொல்ல வேண்டும். எங்கள் கதைக் குழுவினர் உங்களுக்கு உரையாடல் எழுத உதவியாக இருப்பார்கள்.

அப்படியா சொல்கிறீர்கள்?

ஆமாம். நீங்கள் ஒத்துக் கொள்வீர்கள் என எதிர்பார்த்து ஒப்பந்தம் கூடத் தடடச்சு செய்து கொண்டு வந்துள்ளோம். பாருங்கள்.

இந்த விதியில் என்ன, தொடர் முடிக்க முடியாவிட்டாலும் நீங்கள் எனக்கு முழுத் தொகையும் அளிக்க வேண்டும்  என்றும் நான் இடையில் விலகினாலும் மொத்தத் தொகை பத்து இலட்சம் உரூபாயையும் நான்  தொலைக்காட்சி நிறுவனத்திற்கு அளிக்க வேண்டும் என்றும்  உள்ளதே.

அதற்கான சூழல் வராது. பொதுவாக இவையெல்லாம் உடன்படிக்கையில் உள்ள விதிகள்தான்.

எனக்குப் பாதித்தொகைதான் முன்பணமாகத் தருகிறீர்கள். நான் முடிக்கா விட்டால் வாங்காத தொகையும் சேர்த்துத் தர வேண்டுமா?

அதுதாங்கைய்யா விதி. தொலைக்காட்சித் தொடருக்கு மிகுதியான விளம்பரம் செய்கிறோம். இடையில் நின்று விட்டது என்றால் எங்கள் நற்பெயருக்குக் களங்கம் அல்லவா? மாற்று ஏற்பாடு செய்ய வேண்டுமல்லவா? அதனால் இவ்வாறு குறிப்பிட்டுள்ளோம்.

அது, இது என்று சொல்லி என்னைச் சம்மதிக்க வைத்து விட்டீர்கள். உங்களுக்கு மகிழ்ச்சிதானே!

ஆமாம். எங்கள் மகிழ்ச்சிக்கு அளவே இல்லை. எப்பொழுது வெளியிட முடியும் என முடிவெடுத்து விளம்பரம் செய்து விடுகிறோம். நீங்கள் சொல்லும் நாளில் இருந்து உரையாடல் எழுதும் வேலையைத் தொடங்குவோம். இந்தாருங்கள். உங்களுக்கு முன்பணம் உரூ. ஐந்து இலட்சம்.

மிக்க மகிழ்ச்சி. எதில் எதில் கையெழுத்து போட வேண்டும் எனக் குறிப்பிடுங்கள். கையொப்பம் இட்டு விடுகின்றேன்.

இந்தாருங்கள் ஐயா. பணச்சீட்டும் ஒப்பந்தமும். . . . . நீங்கள் கையொப்பமிட்ட ஒப்பந்தத்தின் ஒரு படி இந்தாருங்கள். உங்களுக்கு.

நன்றி ஐயா. மகிழ்ச்சி.  அடுத்த வெள்ளிக் கிழமை நீங்கள் சொல்லும் இடத்திற்கு நானே வருகிறேன். உங்கள் உதவியாளர்களை என் புதினத்தை நன்றாகப் படித்து விட்டு வரச்சொல்லுங்கள்.

எங்களுக்கும் மகிழ்ச்சி ஐயா. உங்களிடம் பிறகு தொடர்பு கொள்கிறோம். வணக்கம்.

வணக்கம்.

(தொடரும்)

இலக்குவனார் திருவள்ளுவன்

சட்டச் சொற்கள் விளக்கம் : 901-905

ஃஃஃ    இலக்குவனார் திருவள்ளுவன்      08 January 2025      அகரமுதல

(சட்டச் சொற்கள் விளக்கம் 896-900, தொடர்ச்சி)

சட்டச் சொற்கள் விளக்கம் : 901-905

901. assistance, employee   / employee assistance	பணியாளர் உதவி பணியாளர்க்கு உதவுதல்   தொழிலாளர்களின் பணிமுறைச் சிக்கல்களைத் தீர்ப்பதற்காகவும் அவர்களின் வாழ்க்கையை மேம்படுத்துவதற்காகவும் முதலாளிகளால் தரப்படும் உதவி.   தொழிலாளர்களின் பணித்திறனை மேம்படுத்தவும் தொழிலாளர்களின் சிக்கல்களைத் தீர்க்கவும் தொழிலாளர் ஆணையத்தால் வழங்கப்படும் நிதியுதவி முதலான உதவிகள். தொழிலாளர்களுக்கு ஆற்ற வேண்டிய உதவிகளைச் செய்யாவிட்டால் அதுவும் குற்றமாகும்.
902. assistance, Enlist/ Enlist  assistance	உதவி பெறு ஆதரவு பெறு   படையில் சேர்த்திடு படையில் இடம்பெறு பட்டியலில் இணைத்துக்கொள் சேர் இணைவுறு ஆள்சேர் படைக்கு வீரர் திரட்டு துணையாகப்பெறு எய்தப்பெறு பயன்படுத்து ஈடுபடுத்து புகுந்தீடுபடு   பணி வளங்களைப் பெறுதல், பிறரின் உதவியைத் துணையாகப் பெறுதல் முதலான பொருள்கள் இருப்பினும் குற்றச் செயல்களில் பிறரது துணையைப் பெறுதல் அல்லது பிறரது துணையைப் பெற்றுக் குற்றச் செயல்களில் ஈடுபடல் என நாம் சட்டத்துறையில் அல்லது நீதித்துறையில் குறிப்பிடலாம்.
903. Assistance,  external /external assistance	புற உதவி   வெளி உதவி   வெளிப்புற உதவி   வெளியிலிருந்து வருகிற உதவி   செயல் சார்ந்த உதவி   குற்றச் செயலில் ஈடுபட்டவர்/ஈடுபடுகிறவர் புற நிலையில் இருந்து பெற்ற / பெறும் உதவி
904. assistance, federal/federal assistance	கூட்டரசு உதவி   கூட்டரசின் உதவி கூட்டமைப்பு உதவி   கூட்டமைப்பின் உதவி கூட்டாண்மையின் உதவி   செயற்பாடுகளில் கூட்டரசின் அல்லது கூட்டமைப்பின் உதவியைப் பெறுவதைக் குறிக்கிறது புற உதவி   வெளி உதவி   வெளிப்புற உதவி   வெளியிலிருந்து வருகிற உதவி   செயல் சார்ந்த உதவி   குற்றச் செயலில் ஈடுபட்டவர் புற நிலையில் இருந்து பெறும் உதவி.
905. assistance , Financial / Financial assistance	நிதியுதவி   நிதிசார் உதவி   வருவாய் உதவி   சட்டத்தில் நிதி உதவி என்பது ஒரு நிறுவனம் அதன் சொந்தப் பங்குகள் அல்லது அதன் வைத்திருக்கும் நிறுவனங்களின் பங்குகளை வாங்குவதற்கு வழங்கப்படும் உதவியைக் குறிக்கிறது. பல அதிகார வரம்புகளில் அத்தகைய உதவி சட்டத்தால் தடைசெய்யப்பட்டுள்ளது அல்லது கட்டுப்படுத்தப்பட்டுள்ளது.   தனியருக்கு அல்லது பலருக்கு அல்லது பொதுமக்களுக்கு அல்லது அமைப்பிற்கு அல்லது நிறுவனத்திற்கு அரசு தரும் நிதியுதவி.   வழக்குகளில் குற்றச் செயல்களில் ஈடுபடப் பெறும்/பெற்ற நிதியுதவியைக் குறிக்கிறது.

(தொடரும்)

இலக்குவனார் திருவள்ளுவன்

எத்தனை ஆண்டுகள் பிறந்தால் என்ன? – இலக்குவனார் திருவள்ளுவன்

 

     

ஃஃஃ01சனவரி 2025  அகரமுதல

எத்தனை ஆண்டுகள் பிறந்தால் என்ன?

இலக்குவனார் திருவள்ளுவன்

எத்தனை ஆண்டுகள் பிறந்தால் என்ன? எள்ளத்தனைத் துயரமும் முடியவில்லை. ஆண்டுகள் முடிந்தாலும் துயரங்களுக்கு முடிவில்லையே! பல நாடுகளில் போர்கள். அதனால் வேறுபல நாடுகளிலும் போர்களால் பாதிப்புகள். உலகெங்கும் போர் அச்சுறுத்தல்கள். “கெட்டபோரிடும் உலகை வேரொடு சாய்ப்போம்” என்னும் பாவேந்தர் பாரதிதாசன் குரல்போல் பலரும் குரல் எழுப்பத்தான் செய்கின்றனர். ஆனால் போர்களுக்கு முடிவில்லையே!

அணுக்குண்டுகளின் அழிவுகளைப் பார்த்த பின்னும் அணுக்குண்டுகள் பயன்படுத்தப்படுகின்றனவே! போர்களில் குழந்தைகள், சிறுவர்கள், இளைஞர்கள், பெண்கள், முதியோர் என எல்லாத் தரப்பு மக்களும் கொல்லப்படுகின்றனரே! பிற உயிரினங்களும் அழிக்கப்படுகின்றனவே! நாடுகளின் வளங்களும் சிதைக்கப்படுகின்றனவே! போர்கள் புத்தாண்டிலும் தொடரும் பொழுது அதனை வரவேற்றுப் பயன் என்ன?

உலகின் ஒரு பகுதியில் மக்கள் வறுமையால் நாளும் மடிகின்ற பொழுது மற்றொரு பகுதி மக்கள் ஆடம்பரத்தில் திளைக்கும் சமநிலையற்ற நிலைக்கு முற்றுப்புள்ளி வைக்காத சூழலில் புத்தாண்டை வரவேற்கலாமா? எல்லார்க்கும் எல்லாம் என்னும் நிலை வராத பொழுது புத்தாண்டு வந்தால்தான் என்ன பயன்?

பல நாடுகளில் புலம்பெயர் மக்கள் விரட்டியடுக்கப் படுகின்றனர். புலம்பெயர் மக்களை வரவேற்று வாழ்வளித்த கனடாவிலேயே இந்த நிலை என்னும் பொழுது, இதனால் பெரிதும் பாதிப்புறுவோர் தமிழர்களாக இருக்கும் பொழுது வாட்டுகின்ற வருத்தத்தைப் போக்குகின்ற நிலை வராமல் புத்தாண்டு வந்து என்ன பயன்? ஈழத்தில் நடைபெற்ற தமிழினப் படுகொலை வேறு வடிவுகளில் தொடரும் பொழுது அவற்றை முறியடிக்க வேண்டிய நிலையில் உள்ளவர்கள் ஊக்கப்படுத்துகின்றனர். நாமோ வேடிக்கை பார்த்துக் கொண்டுள்ளோம். இந்நிலைக்கு இறுதி வராத பொழுது ஆண்டு இறுதி வந்து புதிய ஆண்டு தொடங்குவதில் என்ன மகிழ்ச்சி உள்ளது?

உலக மக்கள் தொகையில் தமிழ் மக்கள் தொகை குறைவாகவே காட்டப்படுகிறது. உண்மைக் கணக்கை யறிந்து நாம் விழிப்புணர்வு பெறாத பொழுது புத்தாண்டு கண்டு மகிழ என்ன உள்ளது?

தமிழ்நாட்டிலும் பிற நாடுகளிலும் உள்ள தமிழர்கள் தமிழறியாத் தமிழர்களாகப் பெருகிக் கொண்டே இருக்கும் பொழுது புத்தாண்டு வாழ்த்துகளைப் பரிமாறிக் கொள்வதில் என்ன பயன்?

 நாடுகளுக்கிடையேதான் போர் என்றால் நாடுகளுக்குள்ளேயும் போர். இன, மத, சாதி, ஊர், பிரிவினை முதலிய சண்டைகள்,  -கலவரங்கள்.  

தமிழ்நாட்டில் இக்கலவரங்களுடன் மொழிக் கொலைஞர்களும் உலாவந்து அரசோச்சுகின்றனரே! பேச்சிலும் தமிழ்க் கொலை! எழுத்திலும் தமிழ்க்கொலை! படிப்பிலும் தமிழ்க்கொலை! படைப்பிலும் தமிழ்க்கொலை! முத்தமிழால் புகழ் பெற்ற தமிழில் இயலிலும் தமிழ் இல்லை! இசையிலும் தமிழைத் தொலைத்து விட்டனர்! நாடகத்திலும் தமிழைச் சிதைத்து விட்டனர்! வழிபாடுகளில் கேட்டால்தான் தமிழ் என்ற பொய்க்கோலம். தமிழ்நாட்டில் இசை என்றால் தமிழிசைதான் என்றில்லாமல் தமிழிசையும் பாடப்படலாம் என்ற சூழலே மேலோங்கியுள்ளதில் மாற்றமில்லை. மாற்றமில்லாச் சூழல் மாறாத பொழுது மாறிவரும் ஆண்டிற்கு வாழ்த்துப் பா இசைத்து என்ன பயன்?

“எண்ணுவோம் தமிழில்! எழுதுவோம் தமிழில்!” என்பது தமிழ் வளர்ச்சித்துறையின் முழக்கமாக உள்ளது. ஆனால், “எண்ணுவோம் ஆங்கிலத்தில்! எழுதுவோம் ஆங்கிலத்தில்!” என்பது பிற துறைகளின் செயற்பாடாக உள்ளது. இவர்களைத் தட்டி வீழ்த்த வேண்டிய தமிழ்நாடு அரசு, தமிழ் வளர்ச்சிப் பணிகளில் ஆர்வம் காட்டிக் கொண்டே இவர்களைத் தட்டிக் கொடுத்து ஊக்கப்படுத்துகிறது.

ஆண்டுகள் மாறினாலும் இந்த நிலையில் மாற்றமில்லை என்னும் பொழுது வருகின்ற ஆண்டை வரவேற்றுப் பயன் என்ன?

தீயவை தீய பயத்தலால் தீயவை
தீயினும் அஞ்சப் படும்.   (திருவள்ளுவர், திருக்குற௨௱௨ – 202)

வருத்தத்துடன் இலக்குவனார் திருவள்ளுவன்

நடைமுறைப் புத்தாண்டுச் சிந்தனைகள்

இதழுரை, அகரமுதல

மார்கழி 17, 2055 / 01.01.2025

சட்டச் சொற்கள் விளக்கம் 896 – 900

 

இலக்குவனார் திருவள்ளுவன்      01 January 2025      No Comment

(Explanation of Legal Terms 891-895 continued)

சட்டச் சொற்கள் விளக்கம் 896-900

896. Assistance	உதவி; உதவுதல்‌; துணை   உதவி என்பது ஒரு செயலுக்கு உதவும் நிலையைக் குறிப்பது. துணை என்பது அதிகாரத்திற்கு அடுத்த நிலையில் இருந்து அல்லது அதிகாரத்தலைமைக்குப் பகரமாகத் துணை நிற்பதைக் குறிப்பது. aid என்பது இலவச உதவியைக் குறிப்பது. எ.கா. legal aid இதனை நாம் உதவுமை எனலாம்.   உதவி பலவகைப்படும். அவற்றை அடுத்துப் பார்க்கலாம்.
897. assistance, consular /consular assistance	தூதரக உதவி    அரசாண்மை வினைஞர்கள் அல்லது முகவர்கள் வெளிநாடுகளில் வசிக்கும் அல்லது பயணம் செய்யும் தம் நாட்டவர்களுக்கு வழங்கும் அறிவுரை.
898. assistance . Direct /  Direct Direct assistance	நேருதவி   படிப்பிற்காக அல்லது தொழில் தொடங்குவதற்கு அல்லது ஒரு செயற்பாட்டிற்குப் பிறர் அல்லது பிற அமைப்பு மூலம் அல்லாமல் நேரடியாக உதவுவது. எனினும் ஓர் இடத்தை அல்லது இலக்கை நோக்கி நேரடியாக அல்லது தங்கு தடையின்றிப் பயணம் மேற்கொள்வதைச் சிறப்பாகக் குறிக்கிறது.,
899. Assistance. Disaster / Disaster assistance	பேரிடர் உதவி                    நில நடுக்கம், நிலச்சரிவு, புயல், பெருவெள்ளம், கடற்கோள், பஞ்சம், வானூர்தி நேர்ச்சி(விபத்து), பெருமளவு மக்கள் கொல்லப்படும் துயர நிகழ்வு போன்ற பெருந்துயர் நிகழ்வுக்காலங்களில் செய்யப்படும் உதவி; இடி மேல் இடி விழுதல் போன்ற அவக்கேடான சூழல்களில் ஊறு நேர்ந்தோருக்கு உதவுதல்.
900. Assistance, economic / Economic assistance	பொருளாதார உதவி பொருளாதார உதவி என்பது தனிநிலை உதவி என்றும் பொது நிலை உதவி என்றும் இருவகைப்படுத்தலாம். பொருளாதாரச் சிக்கல்களால் இடருறும் தனியருக்கு உதவுவதே தனிநிலை உதவி.   பொருளாதாரம் தமிழ்ச்சொல்லே. பலரைப் போல் நானும் தமிழ்ச்சொல்லல்ல  எனக் கருதிப் பொருளியல் என்றே பயன்படுத்தி வந்துள்ளேன். ஆனால் பொருளியல் என்பது அறிவியல் துறை ஒன்றின் பெயர். பொருளாதாரம் குறித்த இயலைப் பொருளியல் என்பதே சரி. பிற இடங்களில் பொருளாதாரம் என்பதே சரி.   ஆதாரம் என்பது அடிப்படை, பற்றுக்கோடு, மூலம் எனப் பல பொருள்கள் உடையது. பொருளை அடிப்படையாக அல்லது மூலமாக உடைய நிலைப்பாட்டைப் பொருளாதாரம் என்பதே சரி.

(தொடரும்)

இலக்குவனார் திருவள்ளுவன்

சட்டச் சொற்கள் 891- 895

 

சட்டச் சொற்கள் விளக்கம் 891-895

ஃஃஃ   இலக்குவனார் திருவள்ளுவன்      25 December 2024   அகரமுதல

(சட்டச் சொற்கள் விளக்கம் 886 – 890)

சட்டச் சொற்கள் விளக்கம் 891-895

891. Assign	உரிமை அளி; உரிமை மாற்று அளி; ஒப்புவி; குறித்‌தளி கையடை கொற்றம்  வை வணிகத்திலும் ஒப்பந்தங்களிலும் உரிமையளித்தல் முதன்மை இடத்தைப் பெறுகிறது.   உரிமைகளை அல்லது நலன்களை ஒரு தரப்பாரிடமிருந்து மற்றறொரு தரப்பாருக்கு மாற்றுவதைக் குறிக்கிறது. உட்குத்தகைக்கும் உரிமை மாற்றியளித்தலுக்கும் வேறுபாடு உள்ளது. உட்குத்தகை என்பது குத்தகையாளர் உரிமைகளில் ஒரு பகுதியை மட்டும் மாற்றியளித்தலைக் குறிக்கிறது. உரிமையளி என்பது குத்தகையாளர் ஒப்பந்தப் பின்னணியில் மற்றொருவருக்கு அல்லது மற்றொரு நிறுவனத்திற்குக் குத்தகைச் சொத்தின் உரிமைகள் நலன்கள் முழுமையையும் மாற்றி யளித்தலைக் குறிக்கிறது.   கொற்றம் வைத்தல் என்பது ஆட்சியை மற்றொருவரிடம் ஒப்புவித்தலைக் குறிக்கிறது.
892. Assignability	மீளா மாற்றுரிமை செய்தல்   காண்க :  Assign
893. Assigned	குறித்தளிக்கப்படும் குறித்தளிக்கப்படுதல் மீகாமர் வைப்புநிதிச் சட்டம் பிரிவு 1(1) [ (S. 12(1) SPFA, 1966) ] குறித்தளிக்கப்பட்ட:  இருப்பூர்தி உடைமை (சட்டப் புறம்பாக வைத்திருத்தல்) சட்டம் 1966 பிரிவு 2(ஊ) [ S. 2(f), The Railway Property (Unlawful Possession) Act 1966 (S. 2(f) RP(UP)A, 1966) பிற்படுத்தப்பட்ட வகுப்பினருக்கான தேசிய ஆணையச் சட்டம்-1993 பிரிவு (3)(1)[National Commission for Backward Classes Act-1993, S. 3(1)], (S. 8B(2)(d) DPA, 1961);  மணக் கொடைத் தடுப்புச்சட்டம் 1961, பிரிவு 8ஆ(2) [sec. 8B(2) The Dowry Prohibition Act, 1961] காண்க:  Assign
894. Assignability	மீளா மாற்றுரிமை செய்தல்   காண்க :  Assign Assigned     குறித்தளிக்கப்படும் குறித்தளிக்கப்படுதல் மீகாமர் வைப்புநிதிச் சட்டம் பிரிவு 1(1) [ (S. 12(1) SPFA, 1966) ] குறித்தளிக்கப்பட்ட:  இருப்பூர்தி உடைமை (சட்டப் புறம்பாக வைத்திருத்தல்) சட்டம் 1966 பிரிவு 2(ஊ) [ S. 2(f), The Railway Property (Unlawful Possession) Act 1966 (S. 2(f) RP(UP)A, 1966) பிற்படுத்தப்பட்ட வகுப்பினருக்கான தேசிய ஆணையச் சட்டம்-1993 பிரிவு (3)(1)[National Commission for Backward Classes Act-1993, S. 3(1)], (S. 8B(2)(d) DPA, 1961);   மணக் கொடைத் தடுப்புச்சட்டம் 1961, பிரிவு 8ஆ(2) [sec. 8B(2) The Dowry Prohibition Act, 1961]kz காண்க:  Assign
895. Assignee	உரிமை(மாற்றம்)‌ பெறுபவர்‌; உரிமையளிக்கப்படுபவர். ஓப்பந்த விதிமுறைகளின்படி,சொத்து, உடைமை, தலைப்பு, உரிமை என்பவற்றை மாற்றல் முறையில் பெறும் ஒருவர் அல்லது ஒரு நிறுவனம் அல்லது ஓர் அமைப்பு ‌ Alienee என்னும் சொல்லும் இதே பொருளில் இடம் பெற்றுள்ளது.

(தொடரும்)

இலக்குவனார் திருவள்ளுவன்

சட்டச் சொற்கள் விளக்கம் 886 – 890: இலக்குவனார் திருவள்ளுவன்

 

அகரமுதல

ஃஃஃ     இலக்குவனார் திருவள்ளுவன்      10 December 2024      

சட்டச் சொற்கள் விளக்கம் 881-885-தொடர்ச்சி)

சட்டச் சொற்கள் 886 – 890

886.Assessment	மதிப்பீடு தீர்வை விதிப்பு ஏதாவதொன்றின் விகிதத்தினை அல்லது தொகையினைத் தீர்மானித்தல். எடுத்துக் காட்டாக இழப்பீடு அல்லது விதிக்கப்பட்ட ஒறுப்புத் தொகை. குற்றவியல் வழக்குகளில் குற்றஞ்சாட்டப் பட்டவரின் உள நிலைமை குறித்துத் தகுதி வாய்ந்த வல்லுநர் ஒருவர் தீர்மானித்தல். குடும்பநல வழக்குகளில் தகுதியான வல்லுநர் ஒருவர் சிறாரின் தேவையையும் அவற்றைப் பூர்த்தி செய்வதற்கான தரப்பினரின் ஆற்றலையும் ஆராய்ந்து மதிப்பிட்டு அறிவிக்கும் பகுப்பாய்வு அறிக்கை. குடியியல் வழக்குகளில் சொத்தினைப் பேணவும் தனிப்பட்ட நலன் சார்ந்த முடிவுகளை மேற்கொள்ளவும் வழக்குரைஞரின் அறிவுரைகளை முறையாக கைக்கொள்ளவும் அறிவுறுத்துவதற்குமான ஒருவரின் ஆற்றலைத் தீர்மானித்தல். மதிப்பீடு(S. 6 W(PCOPA), 1977) மதிப்பீடு(Sch.  PI(CI)A, 1963) வரிவிதிப்பு(S. 2(2) ITA,1974)
887. assessment order	மதிப்பீட்டுக் கட்டளை   இங்கே மதிப்பீடு என்பது உளநிலை மதிப்பீடாகும். குற்றவழக்குகளில் குற்றஞ் சாட்டப்பட்டவரின் உளநிலையைக் கண்டறியக் கேட்கும் நீதிமன்றம் இடும் உத்தரவு.   குடியியல் சட்டத்தின்படி ஒருவரின் உடல் அல்லது உளநிலை தொடர்பான ஐயங்கள் எழும் போது அத்தகையவர் உடல்நல, உளநல ஆய்விற்கு உட்பட வேண்டும் என நீதிமன்றம் இடும் கட்டளை.   குடும்ப நல வழக்குகளில் தொழில்முறை வல்லுநர் ஒருவரிடம் வழக்கிற்குரிய குழந்தையின் தேவைகள்,  அவற்றை நிறைவேற்றுவதற்குரிய தரப்பாரின் ஆற்றல்கள், வாய்ப்பு நலன்கள் முதலியவற்றை ஆராய்ந்து அறிக்கை அளிக்க நீதிமன்றம் இடும் கட்டளை.
888. Assessment year	வரிவிதிப்பு ஆண்டு ஒரு நிதியாண்டில் வரிவிதிப்பைக் கணக்கிடுவதற்கான காலம்(ஏப்பிரல் 1 முதல் மார்ச்சு  31 முடிய),   நிதியறிக்கை, வரவு செலவுத் திட்ட நோக்கங்களுக்காக அரசாங்கங்கள், வணி.க நிறுவனங்கள், தனியார் அமைப்புகளால் பயன்படுத்தப்படும் கால அளவு நிதியாண்டு. நிதியாண்டிற்கு அடுத்த ஆண்டு மதிப்பீட்டு ஆணடு. மதிப்பிடுவது வரிவிதிப்பைக் கணக்கிடுவதறக்காகத்தானே. எனவே வரி விதிப்பாண்டு. அஃதாவது இவ்வாண்டு 2023-24 நிதியாண்டு எனில் 2024-25 வரிவிதிப்பாண்டு,
889. Assessor	கணிப்பாளர், கணிப்பீட்டாளர் வரி விதிப்பு நோக்கங்களுக்காகச் சொத்துகளை மதிப்பிடும் அதிகாரி.   பல நேர்வுகளில் சட்ட அறிவுரைக்காகவும் சட்ட உதவிக்காகவும் ஒருவருக்குச் சட்டப்படியாகப் பெயராளாகச் செயற்படுபவர்.
890. Assets	சொத்துகள்    சொத்திருப்புகள் ஒருவருக்கு அல்லது நிறுவனத்திற்குச் சொந்தமான மதிப்பார்ந்த உடைமை. (இதனைப் பன்மையிலும் குறிப்பிடலாம்.) சொத்து(கள்) பொருள் சார்ந்துதான் இருக்க வேண்டும் என்றில்லை. முதலீடுகள், காப்புரிமைகள், பண மதிப்புடைய பிற பணச் செயற்பாடுகள் முதலியனவும் சொத்துகளாகும்.   சொத்துகள் பொதுவாகப் பணமாக மாற்றக்கூடிய உடைமைகளாகப் பார்க்கப்படுகின்றன. இந்தியப் புள்ளியியல் நிறுவனச் சட்டம், 1959, பிரிவு 9,(1)(ஆ) [(S. 9(1)(b) ISIA, 1959)]

(தொடரும்)
இலக்குவனார் திருவள்ளுவன்

சட்டச் சொற்கள் விளக்கம் 881-885- இலக்குவனார் திருவள்ளுவன்

 

இலக்குவனார் திருவள்ளுவன்      01 December 2024      No Comment

(சட்டச் சொற்கள் விளக்கம் 876-880 தொடர்ச்சி)

சட்டச் சொற்கள் விளக்கம் 881-885

881. animus manendi	தங்குகை நோக்கம் நிலை இருப்பிட நோக்கம் ஓரிடத்தில் காலரையறையின்றித் தங்கி அவ்விடத்தைத் தன் நிலையான இருப்பிடமாக ஆக்க எண்ணும் அகநிலை நோக்கமாகும்.   animus என்னும் இலத்தீன் சொல்லின் பொருள், உணர்வு, மனம், துணிவு,  சினம் முதலியன. இச்சொல் பெரும்பாலும் ஒரு குறிப்பிட்ட நோக்கத்தைக் குறிக்க மற்ற சொற்களுடன் இணைந்து பயன்படுத்தப்படுகிறது.  manendus என்னும் சொல்லில் இருந்து உருவான வடிவமே manendi என்பது. இதன் பொருள் இருத்தல், இருப்பிடம், வசிப்பிடம் என்பன. எனவே இத்தொடரின் பொருள் நிலையான இருப்பிடத்தை நிறுவும் நோக்கம். அஃதாவது, குறுங்காலமாக இடப்பெயர்வு மேற்கொண்டாலும் மீண்டும் திரும்பி வந்து நிலையான தங்குமிடமாகக் கொள்ளுதல், பெரும்பாலும் தனியார் பன்னாட்டுச் சட்டத்தில் (private international law) நிலையான வசிப்பிடத்தைக் குறிக்கப் பயன்படுத்தப்படுகிறது.
882. animus nocendi	தீங்கு நோக்கம் சட்டத்திற்கு எதிரான அறிவுடன் செயல்படும் குற்றம் புரியும் ஒருவரின்  அகமனநிலையைக் குறிக்கிறது. இலத்தீன் தொடர். காண்க  : animus manendi
883. animus possidendi	உடைமையாக்கும் எண்ணம் சொத்துடைமை வழக்கில் பொருளைக் கட்டுப்படுத்துவதற்காக ஒருவரின் உடைமையாக்கும் எண்ணத்தைக் குறிக்கிறது. இலத்தீன் தொடர். காண்க  : animus manendi
884. Animus testandi	விருப்பாவண நோக்கம் animus என்னும் இலத்தீன் சொல்லிற்கு விருப்பம், நோக்கம் முதலான பல்வேறு பொருள்கள் உள்ளன. testandi என்னும் இலத்தீன் சொல் விருப்பாவணத்தைக் குறிக்கிறது. விருப்பாவணத்தை எழுதும் போது அஃது இறுதி முறியாகவும் உண்மையான நோக்கத்தை வெளிப்படுத்துவதாகவும் இருக்க வேண்டும் என்பதை இந்த இலத்தீன் தொடர் உணர்த்துகிறது.   காண்க  : animus manendi
885. animus revertendi	திரும்புதல் நோக்கம் இடப்பெயர்ச்சி நோக்கம் இல்வளம்படாத காட்டில் வாழ்கிற மாற்றமை Animus revertendi என்பது இலத்தீன் சொற்றொடராகும், இதன் பொருள் “இடமாற்றம் செய்யும் நோக்கத்துடன்” அல்லது “திரும்புவதற்கான நோக்கத்துடன்”. உரிமை வழக்கு, பொதுச் சட்டம் இரண்டிலும் பயன்படுத்தப்படும் சட்டம் சார் சொல், சொந்தமான விலங்குகள், சொந்தமாக இருக்க முடியாத காட்டு விலங்குகளை வேறுபடுத்துகிறது. இது மற்றொருவரின் பேணுகையில் உள்ள காட்டு விலங்கு அல்லாத விலங்கைக் குறிக்கிறது.   இது சொத்துச் சட்டத்தால் (property law ) ஏற்கப்பெற்ற ஒரு வகை உடைமை உரிமையாகும். வேலை அல்லது படிப்பு நாடுநரின் aaaகாரணமாக  வேட்பாளரின் வசிப்பிடத்தை கைவிடக்கூடாது என்ற நோக்கத்தையும் இந்த சட்டக் கருத்து ஆதரிக்கிறது. காண்க  : animus manendi

(தொடரும்)
இலக்குவனார் திருவள்ளுவன்