சட்டச் சொற்கள் விளக்கம் 876-880: இலக்குவனார் திருவள்ளுவன்

 

   ஃஃஃ      இலக்குவனார் திருவள்ளுவன்      18 November 2024      அகரமுதல

(சட்டச் சொற்கள் விளக்கம் 871-875 : இலக்குவனார் திருவள்ளுவன்-தொடர்ச்சி)

சட்டச் சொற்கள் விளக்கம் 876-880

876. alternative and cumulative remedy	மாற்று – திரள் தீர்வழி மாற்று ஒட்டுமொத்தத் தீர்வழி திரள் தீர்வழி என்பது தரப்பாருக்கு நடைமுறையில் உள்ள தீர்வைவிடக் கிடைக்கும் வாய்ப்புள்ளதாகும். ஒரே இரண்டு தீர்வழிகளும் தவறு செய்பவருக்கு அல்லது தவறு செய்பவர்களுக்கு எதிராக அவரால் அல்லது அவர்களால் பாதிப்புற்றவருக்கு அல்லது பாதிப்புற்றவர்களுக்கு வெவ்வேறு வகையாக வகைப்படுத்தப்படுகின்றன. தீங்கிழைத்தவர் ஒரே ஆளாக இருப்பின் தீர்வழிகளில் மிகுதியான மாறுபாடு இருக்காது. எடுத்துக்காடடாக மண முறிவு வழக்குகளில் மண முறிவு அல்லது உறவில் விலகியிருத்தல் என இரு தெரிவைக் குறிப்பது.
877. Alternatively	மறுதலை மாற்றாக மாற்றுத்தேர்வாக முறைப்படி கொலைக்குற்றம் சாட்டப்பட்டு அது மெய்ப்பிக்கப்படாமல் ஆனால் உள்நோக்கமற்ற உயிரிழப்பிற்குக் காரணமாக அமைந்தார் என்னும் பொழுது மாற்றாக வழங்கும் தண்ட னைக்குரிய தீர்ப்பைக் குறிக்கும். காண்க: alternative
878. amicus curiae	நீதிமன்ற நண்பர் நீதிமன்ற இடையீட்டாளர்   வழக்கு தொடர்பான தகவல்களை நீதிமன்றத்திற்குத் தெரிவிக்கும் ஒருவர்.   வழக்குத் தரப்பில் இல்லாத ஒருவர், அல்லது ஒரு நிறுவனம், தகவல், வல்லமை (சிறப்புத் திறன்), நுண்ணறிவு முதலியவற்றை வழங்குவதற்கு இசைவளிக்கப்படும் முறை. ஆனால், நீதிமன்றம் அவற்றை ஏற்க வேண்டும் என்ற கட்டாயம்  இல்லை. அமெரிக்காவில் நீதிமன்ற இடையீட்டாளர் என அழைக்கப்பெறுகிறார். வழக்கு தொடர்பான கருத்தினை நீதிமன்றத்திற்குத் தெரிவிப்பதால், நேர்சொல்லாகக் குறிக்காமல் நீதிமன்றக் கருத்தாளர் என்றோ, வழக்குக் கருத்தாளர் என்றோ அழைக்கலாம்.   இலத்தீன் தொடர்.
879. ante	முந்தைய முந்தை   முன்னால் மேலே முன் முன்பாக முன் என்பது பொதுவான பொருள். இருப்பினும் நீதித்துறையில் இதற்கு முன்னர்த் தெரிவிக்கப்பட்ட தீர்ப்பு அல்லது ஆணை அல்லது குறிப்பைத் தெரிவிக்கையில் முந்தைய எனச் சுட்டிக்காட்டப்படுகின்றது. ஒரே பக்கத்தில் அல்லது தீர்ப்பில் அல்லது செய்தியில் அல்லது கட்டுரையில் முன்னரே குறிக்கப்பட்டவற்றைக் குறிப்பிடும் பொழுது மேலே சொன்னவாறு, மேலே தெரிவித்தவாறு, மேலே விளம்பியவாறு, மேலே அறிவித்தவாறு என்பனபோன்று மேலே என்னும் பொருளில் வரும். ante-bellum – போருக்கு முந்தைய ante-room-முகப்பு அறை, (முதன்மை அறைக்குச் செல்வதற்குரிய) இடைவழி யறை ante natal-பேறுகாலத்திற்கு முந்தைய ante date cheque- (வரும் நாளைக் குறிப்பிடும்) முன் நாளிட்ட காசோலை ante-adoption agreement- முன் மகவேற்பு உடன்படிக்கை ante-debt – முன் கடன் ante mortem – மரணத்தின் முன் ante-mortem record – இறப்புக்கு முந்தைய குறிப்பேடு/பதிவுரு/ஆவணம் ante chamber- இடைக்கூடம் ante meridian – முற்பகல் என இடத்திற்கேற்பப் பொருள்படும். நூல்களிலும் அவற்றின் அடிப்படையிலும் வழக்கத்திலும் முந்திய என்று குறிக்கப்பெறுகிறது. முந்திய என்பது முந்திச் செல்வதைக் குறிக்கிறது. முந்தியக் காலம் என்பது முன்னதான காலம் எனப் பொருள் படுவதால் முன் என்னும் பொருளைத் தெரிவிக்கும் அடிப்படையில் முந்திய என்று சொல்லையும் குறிக்கிறோம். எனினும் முந்தை, முந்தைய என்பனவே சரியாக இருக்கும். நம் முன் வாழ்ந்தவர்களை ‘முந்திசினோர்’ என்கிறது பதிற்றுப்பத்து. இலங்குகதிர்த் திகிரி முந்திசி னோரே – பதிற்றுப்பத்து(69.17) அஃதாவது (விளங்கும் கதிர்களோடு கூடிய ஆணைச்சக்கரத்தைச் செலுத்தியவர்கள்) நின் முன்னோர் என்பதை முந்திசினோர் எனக் குறிக்கிறது. முந்து யாம் கூறிய ஐந்தனுள்ளும் (பரிபாடல் 13.17) என்பதுபோல் சங்க இலக்கியங்களில் பத்து இடங்களில் முந்து என்பது முன்னர் என்னும் பொருளில் வந்துள்ளது. முந்துற, முந்துறல், முந்துறுத்து என்பன போன்று 19 இடங்களில் முந்து என்னும் சொல் வந்துள்ளது.   முந்தை யாமம் சென்ற பின்றை(மதுரைக்காஞ்சி, 620) என்பது போன்று சங்க இலக்கியங்களில் முந்தை என்பது ஐந்து இடங்களில் வந்துள்ளது.   “முந்தைய கண்டும் எழுகல்லாத என் முன்னர்”(கலித்தொகை, 84.29) என்பது போன்றும் வந்துள்ளது. முன்புறம் என்னும் பொருளில் முன்னால் எனக் குறிப்பதைத் தவிர்க்க வேண்டும். முன்னதான என்னும் பொருளிலான முன்னால் அல்லது முன் நாள் என்பதே இச் சொல்லிற்கு உரிய பொருளாகும்.
880. animus contrahendi	ஒப்பந்த நோக்கம்   பொதுவாக ஒப்பந்த முடிவு நோக்கத்தைக் குறித்தாலும  நடைமுறையில் ஒப்பந்தம் மேற்கொள்ள விழைவதைக் குறிக்கிறது. இலத்தீன் தொடர்.

(தொடரும்)
இலக்குவனார் திருவள்ளுவன்

சட்டச் சொற்கள் விளக்கம் 871-875 : இலக்குவனார் திருவள்ளுவன்

 

   ஃஃஃ   இலக்குவனார் திருவள்ளுவன்      11 November 2024      அகரமுதல

(சட்டச் சொற்கள் விளக்கம் 861-870 : இலக்குவனார் திருவள்ளுவன்-தொடர்ச்சி)

சட்டச் சொற்கள் விளக்கம் 871-875

871. alternative dispute resolution	பிணக்குத் தீர்வு மாற்று வழி   பிணக்கு ஏற்படும் பொழுது நீதிமன்றம் செல்லாமல் வேறு வழிகளில் பிணக்கைத் தீர்த்துக் கொள்ளும் வழி.   நடுநிலை இணக்குவிப்பு, சேர்ந்து முடிவெடுக்கும் குடும்பச்சட்டம் முதலியன மாற்று வழிகளாம்.
872. alternative	இரண்டில் ஒன்றான, மாற்றுவழி, ஒன்றுவிட்டு ஒன்று   இரண்டு அல்லது அதற்கு மேற்பட்ட சாத்தியக்கூறுகளில் ஒன்றுக்கு மாற்றாக அமையும் வாய்ப்பு.
873. Alternative plea	மாற்று முறையீடு  மாற்று வாதுரை மாற்று வாதம்‌ வழக்கில் ஒரு தரப்பினர் பல சாத்தியக் கூறுகளை வாதிட அனுமதிக்கும் ஒரு சட்ட முறைப்படியான செயலாகும். இது வாதுரைகளில் புனைந்துரையான அல்லது மாற்றான உரிமைக் கோரல்களை அல்லது காப்புரைகளை முன் வைப்பதன் மூலம் செய்யப்படுகிறது. கோரிக்கைகள் அல்லது காப்புரைகளில் ஒன்று செல்லுபடியாகவில்லை என்றால், மற்ற கோரிக்கைகள் அல்லது காப்புரைகளுக்கு இன்னும் விடையிறுக்க வேண்டும் என்பது கருத்தாகும்.
874. Alternative relief	மாற்றுத் தீர்வு மாற்றுத் தீர்வு என்பது சட்டமுறைச் சொல்லாகும்.  சட்ட முன்மொழிவு அல்லது அழைப்பாணை அல்லது அறிவிப்பில் குறிப்பிடப்பட்டுள்ள உத்தரவிலிருந்து வேறுபட்ட ஓர் உத்தரவைக் குறிக்கிறது. மனுக்கள் அல்லது எதிர்வாதுரைப் பத்திரங்களில் தெளிவாக ஆணை குறிப்பிடப்பட்டால் இதனை வழங்கலாம். நீதிமன்ற மாற்றுத் தீர்வு என்பது நீதிமன்றத்தில் யாராவது கேட்கும் ஒரு வகைத் தீர்வு. அவர்கள் கேட்கக்கூடிய மற்ற வகையான தீர்வுகளிலிருந்து இது வேறுபட்டது, மேலும் அவர்கள் ஒரு வகையான தீர்வை மட்டுமே பெற முடியும். சான்றாக, பணத்தை வழங்கச் செய்யுமாறு கேட்கலாம் அல்லது குறிப்பிட்ட ஒன்றை மாற்றாகச் செய்யுமாறு கேட்கலாம், ஆனால் அவர்களால் இரண்டையும் கோரவோ பெறவோ முடியாது. பாதிப்பிற்குள்ளாகும் மக்களுக்கு அரசு வழங்கும் பணம் போன்ற தேவைப்படும்  உதவி என்றும் பொருள்படும்.
875. Alternative remedy	மாற்றுத் தீர்வழி நீதிப்பேராணைகளைக் கருதிப்பார்ப்பதற்காக உரிய அதிகார வரம்பிற்கு மாற்றான தன் விதிப்பான(self-imposed) வழிகாட்டுதலாகும். இது சட்டச் சிக்கலல்ல. மாறாக, இது கொள்கை, நடைமுறை, தீர்ப்பு தொடர்பானதாகும். எனவே, மாற்று வழிக்கு வாய்ப்பு இருந்தாலும், இயல்பு மீறிய சூழல்களில், நீதிப்பேராணை வழங்கலாம். remedy என்றால் மருந்து என்று மட்டும் பொருளல்ல. தீர்வு, கழுவாய், பரிகாரம், ஈடுசெய்தல், சட்டவாயிலான இழப்பீடு, (நாணயத்தின் எடையில் ஏற்கத்தக்க) மாறுபாட்டளவு, (வினை) குணப்படுத்து, திருத்து, சீர்ப்படுத்து, பரிகரி, ஈடுசெய். எனப் பல பாெருள்கள் உள்ளன. நீதித்துறையில் முதலில் கோரப்படும் தீர்விற்கு மாற்றான மறு தீர்வைக் குறிப்பதாகும். காண்க:  Alternative relief

(தொடரும்)
இலக்குவனார் திருவள்ளுவன்

சட்டச் சொற்கள் விளக்கம் 861-870 : இலக்குவனார் திருவள்ளுவன்

 

   ஃஃஃ     இலக்குவனார் திருவள்ளுவன்      08 November 2024      அகரமுதல

(சட்டச் சொற்கள் விளக்கம் 851-860 : இலக்குவனார் திருவள்ளுவன்-தொடர்ச்சி)

சட்டச் சொற்கள் விளக்கம் 861-870

861. Agreement with the crew		கப்பல் பணியாட்களுடனான உடன்பாடு கப்பல் பணியாளர்களுக்கும் உரிமையாளருக்கும் ஏற்படும் வேலை ஒப்பந்தமாகும். பொதுவாகப் பன்னிரு திங்களுக்கு மேல் நீடிக்காது. எனவே, புதுப்பித்துக் கொள்ள வேண்டும்.   crew  என்றால் ஒன்றாகச் சேர்ந்து பணியாற்றுநர் எனப் பொருள். எனவே, குழு என்றாகிறது. crew என்னும் சொல் கப்பல், படகு, வானூர்தி, விண்கலம் அல்லது  தொடரியில் பணிபுரியும், இயக்கும் அதிகாரிகள் நீங்கலான ஒரு குழுவைக் குறிக்கிறது. எனினும் நடைமுறையில் கப்பல் மீகாமர்கள்(மாலுமிகள்) என்னும் பொருளிலேயே பயன்படுத்துகுகிறோம். (S. 2(a) SPFA, 1966)
862. Agreement without consideration		கருதுகையற்ற உடன்பாடு   இந்திய ஒப்பந்தச் சட்டம், 1872 இன் பிரிவு 25 எழுதிப் பதியப்படாத வரையில் கருதுகையற்ற உடன்படிக்கை செல்லாது என்கிறது. கருத்தில் கொள்ளப்படாத ஓர் ஒப்பந்தம் பொதுவாகச் செல்லாது; சட்டத்தால் செயல்படுத்த முடியாதது. ஏனென்றால், கருத்தில் கொள்ளுதல் என்பது செல்லுபடியாகும் ஒப்பந்தத்தின் ஒரு முதன்மைப் பகுதியாகும், மேலும் அஃது இல்லாமல், எந்தவொரு தரப்பினரும் அதற்கு ஈடாக மதிப்புமிக்க ஒன்றைப் பெறுவதில்லை. இருப்பினும், இந்த விதிக்குச் சில விதிவிலக்குகள் உள்ளன.
863. Agreement, express		வெளிப்படை உடன்பாடு express என்றால் தெரிவித்தல், வெளிப்படுத்தல், சொல்லுதல், பேசுதல், இசைதல் எனப் பொருள்கள். விரைவு என்னும் பொருள் இந்த இடத்தில் பொருந்தாது. உடன்பாட்டின் நோக்கம் வெளிப்படையாகத் தெரிவிக்கப்படுவது. எனவே, வெளிப்படை உடன்பாடு எனப்படுகிறது. வெளிப்படை ஒப்பந்தம் என்பது சட்டப்பூர்வ ஒப்பந்தம் ஆகும், இதில் விதிமுறைகள் வாய்மொழியாகவோ  எழுத்து மூலமாகவோ வெளிப்படையாகக் கூறப்பட்டு, இரு தரப்பினரும் அவற்றை ஒப்புக்கொள்கிறார்கள். வெளிப்படை ஒப்பந்தங்கள் உட்கிடை /மறைமுக/உட்கோள் ஒப்பந்தங்களிலிருந்து வேறுபட்டவை. இதில் விதிமுறைகள் செயல்கள் அல்லது சூழ்நிலைகள் மூலம் தீர்மானிக்கப் படுகின்றன. வெளிப்படை ஒப்பந்தங்கள் பெரும்பாலும் வணிகப் பரிமாற்றங்கள், சட்ட ஒப்பந்தங்களில் பயன்படுத்தப்படுகின்றன
864. Agreement, implied		உட்கிடை உடன்பாடு ஒப்பந்தப் பொருண்மைகளை உள்ளார்ந்த முறையில் தெரிவிப்பது உட்கிடை உடன்பாடு. சட்டமுறை அடிப்படையில், உட்கிடை ஒப்பந்தம் என்பது எழுத்து அல்லது வாய்மொழி உறுதிப்படுத்தலுக்கு மாற்றாகத் தொடர்புடைய தரப்பினரின் நடவடிக்கைகள் அல்லது சூழ்நிலைகளின் அடிப்படையில் சட்டமுறையாகப் பிணைக்கப்பட்ட ஒப்பந்தமாகும். வெளிப்படையான ஒப்பந்தங்களைப் போலவே உட்கிடை ஒப்பந்தங்களும் சட்டமுறையாகப் பிணைக்கப்படுகின்றன, அவை வாய்மொழியாக அல்லது எழுத்துமுறையில் ஒப்புக் கொள்ளப்பட்ட ஒப்பந்தங்கள். வெளிப்படை உடன்பாட்டிற்கு எதிரானது. காண்க : Agreement, express
865. Alien		அயல்நாட்டவர்‌; அயலார்; அயற்கோளர் தனக்கு அல்லது தன் குடும்பத்துக்கு அறிமுகம் இல்லாதவன்; வேற்றாள், அயலார், வெளியார், பிற இடங்களிலிருந்து கொண்டுவரப்பட்டு நிலைபெற்ற செடி அல்லது உயிரினம், வெளிவரவினம், (பெ.) பிறிதொன்றிற்குரிய, புறம்பான, வெளியிடத்திற்குரிய, விருப்பத்திற்கு ஒவ்வாத, சூழலுக்கு உகவாத, ஒத்திசைவற்ற, இசைவு அறுபட்ட, தனக்குரியதல்லாத, புறஆட்சிக்குரிய, முரணியல்பான, விலக்கப்பட்ட, (வினை) அயலாக்கு, அன்னியமாக்கு, தொடர்பறு, (சட்.) உடைமை மாற்று. சட்ட அடிப்படையில், அயற்கோளர் என்பவர் ஒரு குறிப்பிட்ட நாட்டின் குடிமகனாகவோ நாட்டினத்தவனாகவோ  இல்லாத ஒருவர் அல்லது அமைப்பு. வெளிநாட்டில் பிறந்தவர், அல்லது அவர்கள் வசிக்கும் நாட்டின் குடிமகனாக அல்லாமல் வேறொரு நாட்டின் குடிமகனாக இருக்கும் ஒருவரை அயல்நாட்டடவர் என்பது குறிக்கிறது. இச்சொல்லுக்கான வரையறை, அவற்றை விவரிக்கப் பயன்படுத்தப்படும் சொற்கள் சட்ட அமைப்புகளில் மாறுபடும். எடுத்துக்காட்டாக, ஐரோப்பிய ஒன்றியத்தில், அயலாள் என்பது ஐரோப்பிய ஒன்றிய உறுப்பு நாடாக இல்லாத ஒருவர். அமெரிக்காவில், அயலாள் 1940 முதல் பதிவு செய்ய வேண்டும், மேலும் வேலைவாய்ப்பு பெறுவதற்குப் பச்சை அட்டைகள்(Green Cards)  எனப்படும் பதிவு அட்டைகள் தேவை. அயலார் உள்ளூர் சட்டங்களின் கீழ் வரம்புகளுக்கு உட்பட்டிருந்தாலும், அவர்கள் அமெரிக்க அரசியலமைப்பால் பாதுகாக்கப் படுகிறார்கள். இதில் உரிமைகள் வரையம்(Bill), 14 ஆவது திருத்தத்தின் சரியான செயல்முறை பிரிவு ஆகியவை அடங்கும்.
866. Alien enemy		பகை நாட்டவர் அயலகப் பகைவர்  அயல்நாட்டுப்‌ பகைவர்‌; அயற்கோள் பகைவர்     போர்க் காலங்களில் ஓர் அயலகப் பகைவர் அவர் வாழும் அல்லது வேலை செய்யும் நாட்டுடன் போரில் ஈடுபடும் வேறு நாட்டின் குடிமகன் அல்லது நாட்டவன். அவர் கட்டுப்பாடுகள் அல்லது தடுப்புக்கு உட்பட்டிருக்கலாம். அமெரிக்காவில் 1798 ஆம் ஆண்டின் அயலாள் எதிரிகள் சட்டம்(Alien Enemies Act of 1798) எதிரி நாட்டின் குடிமக்கள் அல்லது பூர்வீகவாசிகளை விசாரணையின்றி தடுத்து வைக்க அல்லது நாடு கடத்துவதற்கான அதிகாரத்தை நாட்டின் தலைவருக்கு வழங்குகிறது. இந்தியாவில், ஒன்றிய அரசின் இசைவின்றி இந்தியாவில் வசிப்பவர் அல்லது இந்தியாவுடன் போரில் ஈடுபடும் வெளிநாட்டில் வசிப்பவர்தான் அயலகப் பகைவர். இத்தகையோர் எந்த நீதிமன்றத்திலும் வழக்கு தொடர இசைவு இல்லை
867. allegation	சாட்டுரை பழி சுமத்தும் கூற்று குறை கூறல் சார்த்துரை குறைகூறுதல் பழியுரை குற்றச்சாட்டு சாடல், மெய்ப்பிக்கப்படாத குற்றச் சாட்டு இடுவந்தி, குற்றமில்லாதவர்மேற் குற்றத்தையேற்றுகை ‘பொற்கொல்லன் நெஞ்சம் இடுவந்தி கூறுதலைப் புரிந்துநோக்க’. (சிலப்பதிகாரம் 6.120,அரும்பதவுரை) என இடம் பெற்றுள்ளதை அறிக. ஒருவர் சட்டமுரணாக  அல்லது தவறு செய்ததாகக் கூறப்படும் ஒரு கூற்று. ஒருவருக்கு எதிரான முறையான குற்றச்சாட்டு. Accusation என்பதற்குப் பொருத்தம்.
868. allocatur	ஏற்றுக் கோடல் அனுமதிப்பு அனுமதிப்பு தமிழ்ச்சொல்லே. ஆனால் permission/ permittee எனக் குழப்பம் கொள்ளக் கூடாது. எனவேதான் ஏற்றுக் கோடல் – ஏற்றுக் கொள்ளுதல்  எனப் படுகிறது. ஒதுக்கீடு என்பர். நிதி ஒதுக்கீடுபோல் தவறாகக் கருதலாம்.  நீதிமன்றம், முறையீடு, மனு, மேல் முறையீடு, சிறப்பு இசைவு மனு முதலியவற்றை ஏற்பதைக் குறிக்கிறது. இலத்தீன் தொடர்.
869. arguendo	வாதத்திற்காக வாதத்தின் தொடக்கத்தில் அவற்றின் தாக்கங்களை ஆராயும் உய்த்துரைகளை விவரிக்க சட்ட, கல்வி அமைப்புகளில் இது பயன்படுத்தப்படுகிறது. வழக்குரைஞர்கள், நீதிபதிகள் ஒரு புள்ளியின் தாக்கங்களை ஆராய விரும்பும் போது அஃது உண்மை என்பதை ஏற்காமல் வாதத்திற்காக பயன்படுத்து கின்றனர். எடுத்துக்காட்டு: “குற்றச்சாட்டுகள் உண்மை என்று கருதி வாதிடவும்” எனச் சொல்லப்படுவது. இலத்தீன் தொடர்.
870. alter ego	மறுபுற தான்மை ‘ஈகோ’ என்பது தான் என்னும் தற்செருக்கால் விளைவது. ஆதலின் தான்மை எனலாம். ஒருவருக்குள் இருக்கும் மற்றோர் அடையாளத்தை இத்தொடர் குறிக்கிறது. எனவே, ஆளுமையின் மறுபக்கம் எனலாம். ஆனால் ஆளுமை என்பதை விட அகநிலை, தான் என்னும் எண்ணத்தைக் குறிப்பதால் மறுபுற தான்மை என்று சொல்வது சரியாக இருக்கும். முதலில் நான்மை எனக் குறிப்பிட்டிருந்தேன். எனினும் அது quadriplex என்று பொருள்மயக்கத்தைத் தரும் என்பதால் பொருத்தமான தான்மை என்பதைக் குறித்துள்ளேன். இலத்தீன் தொடர்.

(தொடரும்)
இலக்குவனார் திருவள்ளுவன்

சட்டச் சொற்கள் விளக்கம் 851-860 : இலக்குவனார் திருவள்ளுவன்

 

     ஃஃஃ   இலக்குவனார் திருவள்ளுவன்      04 November 2024      அகரமுதல

(சட்டச் சொற்கள் விளக்கம் 841-850 : இலக்குவனார் திருவள்ளுவன் – தொடர்ச்சி)

சட்டச் சொற்கள் விளக்கம் 851-860

851. Affidavit	உறுதியம் உறுதி யுரை ஆவணம்; உறுதி ஆவணம்; உறுதியாவணம்   ஆணை மொழி ஆவணம், பிரமாணப் பத்திரம் .ஆணை மொழி ஆவணம் . உறுதிப்பாடு; உறுதிமொழி; உறுதிமொழி ஆவணம்; உறுதிமொழித்தாள்; உறுதிமொழித்தாள்ஆணைப்பத்திரம் எனப் பலவாறாகக் கூறுகின்றனர்.   தான் கூறுவது உண்மைதான் என்று உறுதி செய்து எழுத்து வடிவில் ஒருவர் நீதிமன்றத்தில் அளிக்கும் பத்திரம்.   நீதிமன்றத்தில் ஆதாரமாக பயன்படுத்த உறுதிமொழி மூலம் உறுதிப்படுத்தப்பட்ட எழுத்துப்பூர்வ அறிக்கை.   சட்டப்பூர்வமாக அங்கீகாரம் பெற்ற ஒருவர் முன் எழுதப்பட்ட அறிக்கை.     அதிகாரமளிக்கப்பட்ட நீதிபதி அல்லது அதிகாரியிடம் உறுதிமொழியாக எழுத்து மூலமாக அளிக்கப்படும்  ஆவணம்.   பிரமாணம் தமிழ் வழக்கல்ல.   உண்மை என்று உறுதியளிக்கப்பட்ட தரவுகளைக் கொண்ட எழுத்து மூலமான வாக்குமூலம் அல்லது உறுதிமொழி.   affidavit  என்னும் இலத்தீன் சொல்லின் பொருள் உறுதியிட்டுரை. சுருக்கமாக உறுதியம் எனக் குறிக்கலாம்.
852. affidavit of service	ஊழிய உறுதியம்   ஊழிய மெய்ப்பு(Proof of Service) என்றும் கூறப்பெறுகிறது.   Proof – சான்றினை நிறுவு, மெய்ப்பி என்பதன் அடிப்படையில் பிழை திருத்தப்படியை மெய்ப்பு எனத் தவறுதலாகக் கையாள்கின்றனர். அகராதிச் சொற்கள் அடிப்படையில் மட்டும் சொல்லாக்கம் மேற்கொள்வது தவறு என்பதற்கு இச்சொல்லே சான்று.  எனவே, மெய்ப்பு என்பது தவறு. எனவே பணிச்சான்று எனலாம். ஆனால், இங்கே அது பொருந்தாது.
853. Affirmation	உறுதியுரை, மெய்யுறுதி, ஏற்றுறுதிப்படுத்துதல் உறுதிமொழி வாக்குறுதி.   உண்மையைக் கூறுவதற்காக ஒருவர் கூறும் பற்றுறுதி மொழி. வாக்குறுதியில் பொய்கூறுதல் குற்றமாகும்.
854. affirmative covenant	விதியுறு உடன்பாடு வரைநிலை உடன்பாடு   சில விதிமுறைகளைப் பின்பற்ற வேண்டும் என்பதை வலியுறுத்தும் ஒரு வகை உறுதிமொழி அல்லது உடன்பாடு விதியுறு உடன்பாடு எனப்படும். நேர்மறை வரைமொழி உடன்பாடு என ஓர் அகராதியில் குறிக்கப்பெற்றுள்ளது. affirmative என்பதை நேர்மறை என்னும் பொருளில் இந்த இடத்தில் கையாள வேண்டா. சில விதிகளை வரையறுப்பதால் வரைமொழி என்பது சரிதான். இதையே வரைநிலையில் உள்ள உடன்பாடு என்னும் பொருளில் வரைநிலை உடன்பாடு எனக் குறிக்கப்பட்டுள்ளது.
855. Aggravate the punishment	தண்டனையை மேலும் கடுமையாக்கு (மக்கள் சார்பாளுமைச் சட்டம் 2003 பிரிவு 13) Aggravate என்றால் மேலும் கேடாக்கு, தீங்குபெருக்கு, சினமூட்டு, தீங்கைப் பெருக்கு சிக்கலாக்கு, தீவிரமடைதல், மிகைத்தல் என அகராதிகளில் பொருள்கள் கொடுக்கப்பட்டிருக்கும். எனினும் இங்கே கடுமையாக்கு என்ற பொருளிலேயே வருகிறது.
856. Aggravated assault	கடுமையாகத்‌ தாக்க முனைதல்‌   தாக்குதல் என்பது குற்றச்செயல். வன்முறைகளைப் பயன்படுத்திக் கடுமையாகத் தாக்குதல் கூடுதல் தண்டனைக்குரிய குற்றமாகிறது.
857. Aggravation	கடுமையாதல் தீங்கு பெருக்கல்   aggravation என்னும் இடைக்கால பிரெஞ்சுச் சொல்லின் பொருள் மேலும் மோசமாக்கு / தீங்கு பெருக்கல் / சினமூட்டுகை   தீங்கு/சினம் மேலும் கடுமையாக அதிகரிகரிக்கப்படுவதால் கடுமையாதல் எனச் சுருக்கமாகக் கூறப்பட்டுள்ளது.
858. Agreement	உடன்பாடு உடன்படிக்கை   இருவர் அல்லது இருவருக்கு மேற்பட்டவர்கள் குறிப்பிட்ட பொருண்மையில்/பொருண்மைகளில் கருத்தொருமித்து, ஒத்திசைந்து, இணங்கி உடன்பாட்டை எழுத்து மூலமாகத் தெரிவித்தல். இந்து தத்தெடுப்பும் பேணுகையும் சட்டம் 1956, பிரிவு 27 இந்து கற்றல் ஆதாயச் சட்டம் 1930 பிரிவு 4(இ) தொல்பொருட்கள் கலைக்கருவூலங்கள் சட்டம் 1972 பிரிவு 20(1)(அ) (S.  FJA, 1947) (S. 2(a) FA(ETDFL)A,2002)
859. Agreement in restraint of marriage	திருமணத் தடை உடன்பாடு திருமணத் தடை ஒப்பந்தம்   பெண்வீட்டாரும் மாப்பிள்ளை வீட்டாரும் இணங்கி நடைபெற உள்ள திருமணம் ஒன்றிக்கு எதிராகப் போடும் தடை ஒப்பந்தம். அதே நேரம், இந்திய ஒப்பந்தச் சட்டம், 1872 இன் 26 ஆம் பிரிவு, ” சிறார் திருமணம் தவிர, வேறு எந்த ஒருவரின் திருமணத்தையும் தடுக்கும் எந்தவோர் ஒப்பந்தமும் செல்லாது” என்கிறது.  அதுபோல், எந்த ஒருவரின் திருமண  உரிமைக்கு அல்லது எவரையும் திருமணம் செய்யும் அவரின் உரிமைக்கு எதிரான எந்த ஒப்பந்தமும் செல்லாது என்கிறது.
860. Agreement of indemnity	ஈட்டுறுதி உடன்பாடு   நிதிப்பொறுப்பிற்கு எதிரான பாதுகாப்பு.  ஒரு தரப்பினர் மறு தரப்பினருக்கு ஏற்படுத்தும் இழப்புகள், சேதங்கள் முதலியற்றிற்கு எதிராகப் பணம் அல்லது ஈடு செலுத்த ஒப்புக் கொள்கிறார்கள்.   பணக்காப்பின் மூலம்  சிறையிலிருந்து அல்லது சிறைக்குச் செல்லாமல் வெளி வருவதால் பிணைக் காப்பு என்றும் குறிக்கப்பெறுகிறது.

(தொடரும்)
இலக்குவனார் திருவள்ளுவன்

 

சட்டச் சொற்கள் விளக்கம் 841-850 : இலக்குவனார் திருவள்ளுவன்

   ஃஃஃஃஃ     இலக்குவனார் திருவள்ளுவன்      01 November 2024      அகரமுதல

(சட்டச் சொற்கள் விளக்கம் 831-840 : இலக்குவனார் திருவள்ளுவன்- தொடர்ச்சி)

சட்டச் சொற்கள் விளக்கம் 841-850

841. Advisory Jurisdiction	அறிவுரை வரம்பு   சட்டம் தொடர்பில் அரசியல் யாப்பின்படியான அமைப்பு அல்லது கீழ் நீதிமன்றம் மேல் நீதிமன்றத்தின் அறிவுரையை நாடலாம். நீதிமன்ற அறிவுரை என்பது நீதிபதியின் வழிகாட்டும் அறிவுரையே.   சட்டமன்றம் அல்லது பொது அலுவலர்கள்  எழுப்பும் வினாக்கள் அடிப்படையில் அறிவுரை வரம்பு வரையறுக்கப்படுகிறது.   அரசியல் யாப்பு பிரிவு 143 இன்படிக் குடியரசுத் தலைவர் பொது முதன்மை வாய்ந்த எது குறித்தும் கருத்துரை பெறுவது இன்றியமையாதது எனக் கருதுகையில் உச்சநீதிமன்றத்தின் அறிவுரையை நாடலாம். ஆனால், இந்த அறிவுரையை அவர் செவி மடுக்கலாம் அல்லது புறக்கணிக்கலாம். அஃதாவது உச்சநீதிமன்ற அறிவுரை குடியரசுத் தலைவரைக் கட்டுப்படுத்தாது. உச்ச நீதிமன்றம் தவறுகளைச் சுட்டிக்காட்டுவதும் கண்டிப்பதும் அறிவுரையே. சான்றாகப் பேரறிவாளன் தொடர்பில் மாநில அமைச்சரவையின் அறிவுரைக்குப் பின்னர்க் குடியரசுத் தலைவரின் அறிவுரையைத் தமிழக ஆளுநர் கேட்டது, பெருங்கண்டமான முன்னெடுத்துக்காட்டு(Dangerous Precedent for Federalism) என உச்சநீதிமன்றம் கண்டனை கூறியதும் (27.04.2022) அறிவுரையே.
842. Advisory Memo	குறிப்போலை எழுத்து மூலமான குறிப்புரை.   ஒரு பொருள் குறித்து எழுத்து மூலமான அறிவுரையாகவோ ஒன்றைச்செய்யுமாறு பணிக்கும் எழுத்து மூலமான ஆணையாகவோ பணி செய்யாமை குறித்து வினா தொடுக்கும் கேள்வியாணையாகவோ நினைவூட்டலாகவோ  இருக்கலாம்.
843. Advocate	வழக்குரைஞர் வழக்கறிஞர்   நீதி மன்றத்தில் மற்றொருவர் வழக்கிற்காகப் பேசும் ஒருவர். வாதிக்கும் நீதிமன்றத்திற்கும் இடையில் தொடர்பாளராக இருந்து வாதிடும் வாதாளர்.   மற்றொருவருக்காகக் குரல் கொடுப்பவர்.
844. Advocate, Senior	முதுநிலை வழக்குரைஞர்   உச்ச நீதி மன்றம் அல்லது உயர்நீதிமன்றம், ஒருவரின் சட்டப்புலமையின் அடிப்படையில் அல்லது நுண்மாண் நுழைபுலப் பட்டறிவின் அடிப்படையில், தகுதியாளராகக் கருதப்படுகையில் அவரின் ஒப்புதலுடன் அவரை முதுநிலை / மூத்த வழக்கறிஞராகக் குறிக்கலாம்.   வழக்குரைஞர் சட்டம் 1961(Advocates Act, 1961.) பிரிவு 16 முதுநிலை வழக்குரைஞர் குறித்து வரையறுக்கிறது.   இளைய நிலையில் வழக்குரைஞர் எனக் குறிக்கும் நாம் முது நிலையில் வழக்கறிஞர் எனலாம். அகவை குறைந்தவர்களும் தம் சட்டப்புலமையாலும் வாதிடும் திறத்தாலும் முதுநிலை வழக்கறிஞராக ஏற்கப் பெற்றுள்ளனர்.
845. Advocate-General	(மாநிலத்) தலைமை வழக்குரைஞர்   தலைமை வழக்குரைஞர் என்பவர் இந்தியாவில் மாநில அரசின் சட்ட அறிவுரைஞர் ஆவார்.  இப்பதவி இந்திய அரசியல் யாப்பின்(கூறு162)படி உருவாக்கப்பட்டது.   இப்பதவி ஒன்றிய அரசின் தலைநிலை வழக்குரைஞர்(Attorney General)  பதவிக்கு ஒத்ததாகும். மாநில ஆளுநர் உயர்நீதிமன்றத்தின் நீதிபதியாக அமர்த்தப்படும் தகுதியுடைய ஒருவரைத் தலைமை வழக்குரைஞராகப்  பணியமர்த்துவார்.
846. Advocate-On-Record	பதிவு வழக்குரைஞர்   உச்சநீதிமன்றத்தால் நடத்தப்படும் தேர்வில் வென்று, உச்சநீதிமன்றப் பதிவேட்டில் வழக்குரைஞராகப் பதிவு செய்யப்படும் வழக்குரைஞர், பதிவு வழக்குரைஞர் எனப்படுகிறார்.   Record-பதிவுரு ஆவணம் என்று பொருள் கொண்டு பதிவுரு வழக்குரைஞர் எனக் குறிப்பது தவறு.  உச்சநீதிமன்றத்தின் பதிவேட்டில் பதியப்பெற்ற வழக்குரைஞர் என்றுதான் பொருள்.   கட்சிக்காரர் சார்பாக நீதிமன்றத்தில் முன்நின்று அல்லது அவர் சார்பில் சட்டநடவடிக்கைகளில் ஈடுபட்டு,வாதுரைத்து நீதி காண முயலும் சட்ட அறிவுடன் உள்ள ஒருவர் வழக்குரைஞர் எனப்படுகிறார். அவர், வழக்குரைஞர் கழகத்தில் பதிந்தபின் வழக்குரைஞராகச் செயல்படுகிறார்.   உச்சநீதிமன்ற விதிகளின்படி, பதியப்பெற்ற வழக்குரைஞர் மட்டுமே கட்சிக்காரர் / வழக்காளி சார்பில் நீதிமன்றத்தில் தோன்றவும் / முன் நிற்கவும் வழக்காளி சார்பில் செயல்படவும் உரிமை உடையவர். வழக்காளி பதியப்பெற்ற வழக்குரைஞர் ஒருவரை மட்டுமே தன்சார்பில் வாதாடச் செய்ய வேண்டும். – அபய் பிரகாசு சஃகாய் இலாலன் எதிர் பாட்டினா உயர்நீதிமன்றம், (Abhay Prakash Sahay Lalan vs High Court Of Judicature At Patna), 28.10.1997.
847. Advocatrix	பெண் வழக்குரைஞர்   கிறித்துவத் தேவாலயத்தல் கன்னி மேரியையும் குறிக்கும். வழக்குரையாளி (advocatress) என்றும் குறிக்கப்பெறுவார்.
848. Advocatus Diaboli	அலகையின் வழக்குரைஞர்   நம்பிக்கை ஊக்காளர்   இந்த இலத்தீன் தொடரின் ஆங்கிலப் பொருள் Devil’s advocate என்பதாகும். devil என்பதைத் தமிழில் பழு, பழுஉ, இழுதை, அள்ளை, மாலம், கறங்கல், குணங்கர், கூளி, குணங்கு, சாத்தான், சைத்தான், சயித்தான், பசாசம், அறிவழி, அலகை, கருப்பு, அழன், முனி, அண்ணை, சவம், வெறி, இதி, பூதம், பூதராயன், குணுங்கு, வருக்கம், மீளி, இடம்பகம், சோகு, கடி, மருள், துணங்கை, பிடி, அணங்கு, பசாசு, மண்ணை, வேதாளம், பேய், பிசாசு, இணங்கு, நிழல், பைசாசம், அநிமேசம், கணம் எனப் பலவாறாகக் குறிப்பிடுகின்றனர். இவற்றுள் தமிழல்லாச் சொற்களும் கலந்துள்ளன. உலகத்தார் உண்டென்பது இல்லென்பான் வையத்து அலகையா வைக்கப் படும் (திருக்குறள் 850) என்கிறார் திருவள்ளுவர். எனவே, நாம் இச்சொல்லைப் பயன்படுத்தி அலகையின் வழக்குரைஞர் எனலாம்.   வழக்குப் பொருண்மையில் நாட்டமின்றி அல்லது உடன்பாடின்றி எதையாவது எதிர்க்க வேண்டும் என்பதற்காகவே வாதிடுபவரை இவ்வாறு கூறுகின்றனர். எனவே,  நம்பிக்கை ஊக்காளர் என்றும் அழைக்கின்றனர்.
849. aditio hereditatis	பரம்பரை அணுகுமுறை; பரம்பரை அணுகல்   மரபுரிமையர் அல்லது இறுதி முறியில் பரம்பரையர்க்கு உரிமை வழங்குதல். இலத்தீன் தொடர்
850. ad quantitatem	வகைப்பாட்டு அளவு வகைமை அளவு   அளவின்படி  உருப்படியான  விற்பனை விளம்பர அளவு   இங்கே உருப்படியான என்பது உருப்படியாக-பயனுறும் வகையில் – ஒன்றுமில்லை என்னும் பொருளில் குறிக்கப் பெறவில்லை. கணக்கிடக்கூடிய பொருளைக் குறிப்பதற்குப் பயன்படும் சொல்லாகக் குறிக்கப் பெற்றுள்ளது. சொத்து எல்லைகளின் சட்ட விளக்கத்தை வழங்கச் சுற்றியுள்ள சொத்து விவரம் பயன்படுத்தப்படுகிறது

(தொடரும்)
இலக்குவனார் திருவள்ளுவன்