Tuesday, July 17, 2018

செயலலிதாவைவிடத் திறனாளரான எடப்பாடியார் ! – இலக்குவனார் திருவள்ளுவன்

அகரமுதல

செயலலிதாவைவிடத் திறனாளரான எடப்பாடியார் !

   சட்டப்பேரவை விதி எண்110இன் கீழ் அறிவிப்புகள் வெளியிடல், தான் செல்லும் இடங்களில் அமைச்சர்கள், நாடாளுமன்ற உறுப்பினர்கள், சட்ட மன்ற உறுப்பினர்கள். கட்சிப் பொறுப்பாளர்கள், தொண்டர்கள்  அணிவகுத்துச் சிறப்பிக்கச் செய்தல், சென்னையிலிருந்தபடியே காணொளிக் காட்சிகள் மூலம் பல திறப்பு விழாக்களை நடத்துதல்  போன்றவற்றின் மூலம் தன்னைச் செயலலிதாவிற்கு இணையாகவும் சில  நேர்வுகளில் அவரை விட உயர்வாகவும் தன்னைக் காட்டிக் கொள்கிறார் இன்றைய முதல்வர் எடப்பாடி க.பழனிச்சாமி. உண்மையில் இவையெல்லாம் அவருக்குத் தேவையே இல்லை. செயலலிதாவைவிடத் திறம்படவே அவர் செயல்படுகிறார்.
  புரட்சித்தலைவர் எம்ஞ்சியார்,  திமுகவிலிருந்து தான் விலக்கப்படக் காரணமானவர்களை எல்லாம் தன் பக்கம் சேர்த்துக் கொண்டு கலைஞர் கருணாநிதியின் துணைக் கூட்டத்தைப் பிரிக்கச் செய்தார். அவர் ஒருவரை மட்டும் எதிரியாகக் கொண்டு அவர் கூட்டத்தைப் பிரிப்பதிலும் தன் கூட்டத்தில் சேர்ப்பதிலும்  வெற்றி கண்டார்.
பிரித்தலும் பேணிக் கொளலும் பிரிந்தார்ப்
பொருத்தலும் வல்லது அமைச்சு (திருவள்ளுவர், திருக்குறள் 633)
என்பதற்கு இலக்கணமாகப் புரட்சித்தலைவர் திகழ்ந்ததுபோல் எடப்பாடி க.பழனிச்சாமியும் செயல்படுகிறார். தான் முதல்வராகக் காரணமான சசிகலாவிடமிருந்து அவர்பக்கமே நின்றிருந்த தலைவர்களையும் அமைப்புப் பொறுப்பாளர்களையும் தன் பக்கம் ஈர்ப்பதில் வெற்றி கண்டு வருகிறார்.
  புரட்சித்தலைவி செயலலிதாவும் இவ்வாறு நடந்துகொண்டாரே எனில், அவற்றுக்குப் பின்னணியில் இருந்தவர்கள் சசிகலா குடும்பத்தினரே!
  புரட்சித்தலைவி செயலலிதா பெரும்பாலும் சசிகலா குடும்பத்தார் சொற்படியும் சிறுபான்மை தன் வகுப்பு சார்ந்த குழுவினர் சொற்படியும்தான் நடந்துள்ளார் என நிகழ்வுகள் உணர்த்துகின்றன. தன் தாயாயும் தோழியாயும் உற்ற உடன்பிறப்பாயும் நல்லதொரு வாழ்க்கைத் துணையாகவும் இருந்த சசிகலாவை வீட்டை விட்டு வெளியேற்றியதில் இருந்தே அவர் தற்சிந்தனை அற்றவர் என்பது புரிகின்றது. வேறு சான்று எதுவும் தேவையில்லை.
 அமைதியை விரும்பும் நாட்டில்,   நாட்டை ஆளும் தலைவர்கள் மறைந்தால் மாற்று ஏற்பாடு செய்த பின்னரே அம் மறைவைத்  தெரிவிப்பர். செயலலிதா எதிர் நோக்கும் வழக்கில் தண்டனை கிடைக்க வாய்ப்புள்ளது என மறு கோணத்தையும் ஆராய்ந்த சசிகலா குடும்பத்தினர் மாற்று ஏற்பாடு குறித்துச் சிந்தித்துள்ளனர். இவ்வழக்கில் தனக்குத் தண்டனையே கிடைக்காது என எப்படிச் செயலலிதா நம்பினார் எனத்  தெரியவில்லை.
  தண்டனையே கிடைக்காது என்று நம்புபவரிடம் எப்படி மாற்று ஏற்பாடு குறித்துத் தெரிவிப்பது என எண்ணினார்களோ என்று தெரியவில்லை. ஆனால், அவ்வாறு  தெரிவிக்காததுதான் சசிகலா குடும்பத்தினர் செய்த  பெருந்தவறு. எனவே, மாற்று ஏற்பாட்டுச் சிந்தனையைச் செயலலிதாவைச் சிறையில் தள்ளவும் ஆட்சியைப் பறிக்கவும் போட்ட சதியாகத் திரித்துக் கூற முடிந்தது. தற்சிந்தனை அற்ற செயலலிதாவும் அதற்கேற்பவே நடவடிக்கை எடுத்துள்ளார்.
  செயலலிதாவின் அரச வன்முறைச் செயல்களைத் துணிவு எனப் புகழ்பாடிகள் புகழ்ந்ததை நம்பியதும்கூட அவரின் தற்சிந்தனையற்ற போக்கிற்கு எடுத்துக்காட்டாகும்.
 முதல்வர் அருகில் உள்ள அமைச்சர்கள் உதிர்க்கும் முத்துகளைப் பார்த்தால் அவர்கள் வழிகாட்டும் திறனற்றவா்களாகவே தெரிகின்றனர். வழிகாட்டும் வல்லமை உள்ள செங்கோட்டையன் போன்றோர் தன்  இடத்தை நிரப்பக் காத்திருப்பவர்களாக எண்ணுவதால் அவர்களிடமும் கேட்பதாகத் தெரியவில்லை.  ஆனால், எடப்பாடியார் அதிகாரிகள், நண்பர்கள் கருத்தறிந்து ஆராய்ந்து முடிவெடுப்பதாக உள்ளார். ஆளுங்கட்சி, எதிர்க்கட்சி, பொதுமக்கள் என்ற வேறுபாடின்றிக் காட்சிக்கு எளியராக அனைவரும் சந்திப்பதற்கு இடம் தரும் எளிமையை எடப்பாடியார் பின்பற்றுகிறார். அவர் தலைவியிடம் இல்லாத அரும் பண்பு இது.
  பாசகவிற்கு எதிராகக் குரல் கொடுக்க முடிவெடுப்பது அரசியல் தந்திரமாக இருந்தாலும் உரிமை உணர்வாக இருந்தாலும் பாராட்டத்தக்கதே!
  பாசகவின் ஆதரவால்தான் பழனிச்சாமி தாக்கு பிடிக்கிறார் என்றால் அதே ஆதரவு கொண்டிருந்த பன்னீர்செல்வத்தால் தாக்கு பிடிக்க முடியவில்லையே! ஆட்சி இன்றுகவிழும், நாளை கவிழும் என்று ஆருடம் சொல்பவர்கள் முகத்தில் கரி பூசும்வண்ணம் தொடர்ந்து ஆட்சித்தேரை இழுத்துச் செல்கிறாரே!
  ஆட்சித்திறனில் சிறந்து விளங்கும் முதல்வர் இன்றைய சூழலை உணர்ந்து கொண்டு வழக்குகளின் முடிவுகளில் ஆட்சி இருப்பதைப் புரிந்து கொள்ள வேண்டும். வழக்கு முடிவுகள் எதிராக இருந்தால் மேல் முறையீடு செய்து காலத்தை ஓட்டி ஆட்சியை நடத்தலாம் என எண்ணக்கூடாது. ஒரு வேளை மாறான தீர்ப்பிற்கு இடையூறு இல்லாத வகையில் மேல் முறையீட்டிற்கு இசைவளித்தால் துன்பம்தான். பா.ச.க. தேர்தல் நேரத்தில் தன் பிடியில் ஆட்சி இருப்பதையே விரும்பும். எனவே ஆட்சியைக் கலைத்துக் குடியரசுத்தலைவர் ஆட்சி என்ற பெயரில் பொம்மை ஆட்சியைத் திணிக்க விரும்பும். இதனால் எதிர்க்கட்சிகளை விட இவருக்கும் இவர்  ஆதரவாளர்களுக்குமே துன்பம் மிகுதியாகும். மக்கள் ஆதரவு இவரை விடத் தினகரனுக்குத்தான் மிகுதி என்பதையும் புரிந்து கொள்ள வேண்டும். எனவே தேர்தல் வந்தால் மக்களிடம் நற்பெயர் பெற நல்லன சில ஆற்ற வேண்டும்.
எனவே, வினைத்திறம் மிக்க முதல்வர் எடப்பாடி க.பழனிச்சாமி பின்வருமாறு செயல்பட்டுப் புகழ் பெறவேண்டும்.
  1. மூன்றாண்டு முனைப்புத்திட்டம் ஒன்றை அறிவித்து ஆங்கில வழிப்பள்ளிகளை மூட வேண்டும். எல்லா நிலைகளிலும் தமிழ்மொழி,  கல்வி மொழியாக இருக்க உரிய நடவடிக்கைகள் எடுக்க வேண்டும்.
  1. தமிழ்நாட்டுக் கோயில்களில் தமிழ் வழிபாடு கட்டாயம் என்பதை நிலை நாட்ட வேண்டும்.
  1. இராசீவு காந்தி கொலை வழக்கில் பொய்யாகக் குற்றம் சாட்டப்பட்டு அளவுகடந்த தண்டனையில் இருப்பவர்களை விடுதலை செய்வதாகவே சட்ட மன்றத்தில் தீர்மானம் இயற்றியுள்ளதால், உடனடியாக அனைவரையும் பரோல் எனப்படும் காப்பு விடுப்பில் விடுவிக்க வேண்டும். குறுகிய காலத்திற்குள் முடியக் கூடிய மறு  நீதிமன்ற உசாவலுக்கும் ஏற்பாடு செய்ய வேண்டும்.
  1. தண்டனைவாசிகளைச் சாதி, சமயக்கண்ணோட்டத்தில் அணுகுவது தவறு. எனவே, நீண்டகாலமாகச் சிறையிலிருக்கும் இசுலாமியச் சிறைவாசிகளையும் விடுதலை செய்யவும் அதற்கான முடிவு எடுக்கும் வரை காப்பு விடுப்பில் விடுவிக்கவும் ஆணை பிறப்பிக்க வேண்டும்.
  1. இலங்கைத்தமிழர் முகாம்களில் இருப்பவர்களை அனைத்து உரிமைகளும் உள்ள குடிமக்களாக நடத்த வேண்டும்.
  2. மாற்றுக்கருத்துகளுக்கெல்லாம் வழக்கு தொடுக்கும் போக்கிற்கு முற்றுப்புள்ளி வைக்க வேண்டும். இதன் தொடக்கமாக இப்போதைய இத்தகைய வழக்குகளைக் கைவிடவேண்டும்.
  மதி நுட்பம் கொண்ட முதல்வர் இவ்வாறு செயல்பட்டால்  இவரின் அரசியல் எதிரிகள் காணாமல் போவர் என்பது உறுதி. செய்வாரா?
அன்புடன் இலக்குவனார் திருவள்ளுவன்
அகரமுதல இதழுரை

Saturday, July 7, 2018

ஆளுநர் கிரண்(பேடி) செயல்பாடுகள் செம்மையானவை அல்ல! – இலக்குவனார் திருவள்ளுவன்

அகரமுதல:  ஆனி 17-23, 2049 / சூலை 01-07, 2018

ஆளுநர் கிரண்(பேடிசெயல்பாடுகள் செம்மையானவைஅல்ல!

  மத்தியில் ஆளும் பாசக, பாசக ஆளாத மாநிலங்களை ஆளுநர்கள் மூலம் ஆட்டிப்படைத்து வருகிறது. மக்களாட்சிக்கு எதிரான இப்போக்கால் மாநில நன்மைகள் பாதிப்படைகின்றன.  தமிழ்நாட்டு ஆட்சியாளர்கள் காலடியில் வீழ்ந்து கிடப்பதைப் பெருமையாகக் கருதுவதால் இரு தரப்பிலும் சிக்கல் இல்லை. ஆனால் மாநில உரிமைகள் பறிக்கப்படும் தவறான  நடைமுறைகள் அரங்கேற்றப்படுவதால் எதிர்க்கட்சிகளும் மக்களாட்சி ஆர்வலர்களும் எதிர்த்துக் கொண்டு வருகின்றனர்.
 தில்லி  ஒன்றியப் பகுதியில் முதல்வர் அரவிந்து கெசுரிவால் தலைமையிலான ஆம் ஆத்மியின் கடும் போராட்டங்களுக்குப் பின்னர் உச்ச நீதி மன்றத் தீர்ப்பு மூலம் தீர்வு பெற்றுள்ளது. இருப்பினும் அங்குள்ள துணைநிலை ஆளுநரின் போக்கால் விடியவில்லை.
  மாநில அமைச்சரவை அதிகாரத்தை முறியடிக்க எந்தத் தற்சார்பான அதிகாரமும் துணைநிலை ஆளுநருக்கு இல்லை என்று தலைமை நீதிபதி தீபக்கு மிசுரா, நீதிபதிகள் கன்வில்கர், சிக்கரி, சந்திரசூடு, அசோக்கு  பூசன் (Dipak Misra,  Ajay Manikrao Khanwilkar, Arjan Kumar Sikri,  Dhananjaya Y. Chandrachud, Ashok Bhushan) ஆகியோர் அமைந்த உச்சநீதி மன்ற அமர்வு தீர்ப்பு வழங்கியுள்ளது. அப்படியானால் அப்பதவியிலும் குறைநிலை அதிகாரம் கெணாண்ட புதுவை துணைநிலை ஆளுநருக்கும் இது பொருந்தும் என்பதுதான் இயற்கை.
  புதுச்சேரி ஒன்றியப் பகுதியில் இதுவரை இருந்து வந்த மோதலுக்கு இத்தீர்ப்பு முற்றுப்புள்ளி இடும் என முதல்வர் நாராயணசாமியும் ஆள்வோரும் மக்களும் கருதினர். ஆனால்,  துணை நிலை ஆளுநர் கிரண்   பெசவாரியா என்னும் கிரண்பேடி  அதிகார ஆசையில் மூழ்கிப் பிடிவாதம் பிடித்து வருகிறார்.
  இந்திய அரசியல் யாப்பு, பிரிவு 239 அ- புதுச்சேரிக்கு உரியது என்றும் பிரிவு 239  அஅ  தில்லிக்குரியது எனவும்  இருவேறு பிரிவுகளில் இவை வருவதால்  தில்லிக்குரியது புதுவைக்குப் பொருந்தாது என்றும் துணைநிலை ஆளுநர் கிரண்(பேடி)   மறுதலிக்கிறார்.
 பரப்பளவில் பார்த்தால் சென்னைப் பெருநகரைத்தவிர  தமிழ்நாட்டிலுள்ள எந்த மாவட்டத்தையும் விடப் பெரியது அல்ல. பெரும்பாலான தனியொரு மாவட்டப்பரப்பில் பத்தில் ஒரு  பங்குகூட இல்லை.  சிறிய பரப்பளவு நிலத்தின்துணை ஆளுநராக இருந்து கொண்டு பேரதிகாரத்தைச் செயல்படுத்தும்ஆசைத்தீயில் தன்னைத் தள்ளிக் கொண்டார்இதன் விளைவேதேர்ந்தெடுக்கப்பட்ட அரசிற்கும் நியமனம் பெற்ற இவருக்குமான மோதல்போக்கு.
  இந்திய ஒன்றியப் பகுதிகள் மொத்தம் 7. இவற்றுள் தில்லி, புதுச்சேரி ஆகிய ஒன்றியப்பகுதிகளில் மட்டும் தேரந்தெடுக்கப்பட்ட சட்ட மன்றம் உள்ளது. எனவே, இங்கே அதிகார மையம் மக்கள் மன்றத்தைச் சார்ந்தே அமையும். இவற்றுள்  தில்லியானது தேசியத் தலைநகர ஆட்சிப் பரப்பு (National Capital Territory) என அழைக்கப்படுகின்றது.  எனவே,  இதன் துணை நிலை ஆளுநருக்குப் புதுவையின் துணைநிலை ஆளுநரை விடக் கூடுதலாக அதிகாரம் உ்ள்ளது. இதனைத் தனக்குச் சார்பாக எதிர்மறையாக விளக்கி இத் தீர்ப்பு பொருந்தாது என்கிறார்.
  மதிப்பிற்குரிய கிரண் பெசவாரியா என்னும் கிரண்(பேடி) அரசியலில் முதுகலைப் பட்டம் பெற்றவர். எனவே இயல்பாகவே அரசியல் ஈடுபாடு இவருக்கு இருப்பதில் வியப்பில்லை. பொதுப்பணி என்பது  தொண்டு; தொண்டு என்பதுபயன்கொடுக்கவே! பயன் கொள்ள அல்ல!  (Public service is service and service is to serve, not take.) என்னும் நல்ல முழக்கத்தையும் குறிக்கோளாகக் கொண்டுள்ளார். காவல் துறையில் பல்வேறு உயர்நிலைகளில் பணியாற்றி நற்பெயரும் எடுத்துள்ளார். இருப்பினும் விருப்ப ஓய்வு பெற்றுப் பாசகவில் சேர்ந்த  பொழுது  இவரைப்பற்றிய மறு எண்ணமும் பலருக்கு ஏற்பட்டது. தில்லி முதல்வராகக் கனவு கண்டு மக்கள் அக்கனவைச் சிதைத்த பின்னர் புதுவையின் துணை நிலை ஆளுநராக ஆனார். “ஆட்டிற்கு வாலை அளந்து வைத்தவன் அறிவாளி” என்பர். அதுபோல் இவருக்கு மிகச் சிறிய ஒன்றியப் பகுதியின் துணை நிலை ஆளுநர் பதவிதான் வழங்கப்பெற்றது. இவர் அமைச்சரவையுடன் இணைந்து வழிகாட்டிமக்களுக்குத் தொண்டாற்றினால் நற்பெயர் விளைந்திருக்கும். மாறாக அதிகாரப்பசி கொண்டவர்போல் இவரது செயல்பாடுகள் அமைவதால் இதுவரை ஈட்டிய நற்பெயருக்கும் களங்கமே வருகின்றது. இவரது இயல்பான பணிகளும் ஊடக வெளிச்சத்தில் பெரும் பிம்பமாகக் காட்டப்பட்டதோ என்னும் ஐயம் வருகிறது.
  அடக்கி ஆளும் எண்ணம் கொண்டவர் எப்படி மக்களை அரவைணத்துச் செல்வார் என்று மக்கள் கேட்கத் தொடங்கிவிட்டார்கள். போனது போகட்டும். துணை நிலை ஆளுநர் அமைச்சரவையின் கருத்திற்கிணங்கவே  செயல்பட வேண்டும் என 535 பக்கத் தீர்ப்பை  உச்சநீதிமன்ற ஐவர் ஆயம் வழங்கிய பின்னும் அதிகார மோகத்தைக் கைவிட மனம் வரவில்லையே!  அல்லது கீழே விழுந்தும் மீசையில் மண் ஒட்டவில்லை என்பதுபோல் சொல்லிப் பார்க்கிறாரா?
 சட்ட மன்றம் இல்லாத ஆட்சிப் பொறுப்பாளர்(Administrator) பதவி மட்டும் உள்ள ஏதேனும் பிற ஒன்றியப் பகுதிக்கு இவர் மாற்றல் கேட்டுச் சென்றால் அங்கே மக்கள்மன்றத் தலையீடு இன்றித் தான் விருமபியவாறு அதிகாரம் செலுத்தலாம். தான் விரும்பும் முன்முறை(மாதிரி)ப் பகுதியாகக்கூட மாற்றலாம். அவ்வாறில்லாமல் மக்களால் தேர்ந்தெடுக்கப்பட்ட சட்டமன்றமும் அமைச்சரவையும் உள்ள பகுதியில்  துணை நிலை ஆளுநராக இருந்து கொண்டு மோதல் போக்கைத் தொடருவது அவருக்கு அழகல்ல!
 இவரது ஆய்வுப்பணிகளும் அதிகாரிகளைத் தன் கட்டுப்பாட்டிற்குள் கொண்டு வரும் முயற்சிகளும் அமைச்சரவை அல்லது முதலவரின் கருத்துகளுக்கு எதிரான செயல்பாடுகளும் கோப்புகளைப் புறக்கணித்தல் அல்லது புதிய கோப்பை உருவாக்கல் போன்ற அலுவலக நடைமுறைகளும் தேர்ந்தெடுக்கப்பட்ட அரசு இருக்கும்பொழுது  தேர்ந்தெடுக்கப்படாத அரசு ஒன்றை நடத்துவதும்வல்லமையாளர் போன்ற தோற்றத்தையோ இடைக்கால மன மகிழ்வையோ தரலாம். ஆனால், காலப்போக்கில் வரலாற்றில் அழியாப்பழியையே தரும்என்பதை அவர் உணர வேண்டும்.
  மத்திய ஆட்சியின் துணை இருப்பதால் மரபுமீறி. தன்நிலைக்குத் தாழ்வான பணிகளை ஆற்றுவது இவரது பணிகளுக்குச் செம்மை சேர்க்காது. மக்கள் நலப் பகைவர் என்னும் பெயர் வாங்கிப் பயன் என்ன? மக்கள் உள்ளங் கவர்ந்த மங்கையர்க்கரசி என்னும் பெயரல்லவா வாங்க வேண்டும்! எனவே,  மாண்பமை துணைநிலை ஆளுநர் கிரண்(பேடி) இனியேனும் தன் போக்கை மாற்றிக் கொண்டு ஆட்சியாளருடன்  இணை்ந்து மக்கள்பணி யாற்றுவாராக!
குன்றின் அனையாரும் குன்றுவர் குன்றுவ
குன்றி அனைய செயின் (திருவள்ளுவர்திருக்குறள் 965)
அன்புடன் இலக்குவனார் திருவள்ளுவன்
இதழுரை: அகரமுதல:  ஆனி 17-23, 2049 / சூலை 01-07, 2018

Wednesday, July 4, 2018

மொழித் தாளைக் குறைப்பது இந்தி, சமற்கிருதத் திணிப்பை எளிமையாக்கவே! – நக்கீரனில் இலக்குவனார் திருவள்ளுவன்

மொழித் தாளைக் குறைப்பது

ந்திசமற்கிருதத் திணிப்பை எளிமையாக்கவே!

  மொழிப்பாடங்கள் சுமையாக இருப்பதாகக் கூறி அரசு, தாள் 1, தாள் 2 என இருந்த முறையை மாற்றியுள்ளது. இனி  மொழிப்பாடங்களில் ஒரு தேர்வுத்தாள் மட்டுமே இருக்கும்.  மேம்போக்காகப் பார்க்க இது சிறப்பானதாகத் தோன்றலாம். ஆனால்,  மொழி அறிவு என்பது அறிவு வளர்ச்சிக்கு அடிப்படை. அறிவியல் முதலான பிற மொழிப்பாடங்களைப் படிப்பதற்கும் மொழி அறிவு துணை நிற்கின்றது. அறிவில் சிறக்கத் துணையாய் இருக்கும் தாய்மொழி அறிவு குறைக்கப்படுவது மாணவர்களின் அறிவு வளர்ச்சிக்குத் தடையாக இருக்கும்.
 பிற எல்லா நாடுகளிலும் தாய்மொழிக்கு முதன்மை அளிக்கின்றனர்; தாய்மொழி அறிஞர்களைப் போற்றுகின்றனர். நம் நாட்டிலோ தாய்த்தமிழ் ஆசிரியர்களைத் திரைப்படங்களில்கூட நகைச்சுவைக் காட்சிகளுக்காகத்தான் பயன்படுத்துகின்றனர். “தமிழ் வாழ்க” என்று நாம் முழக்கமிட்டாலும் தமிழை வாழ வைக்கும் வழிகளில் ஈடுபடுவதில்லை. எனவேதான் இத்தகைய முயற்சிகளில் ஈடுபடுகின்றனர்.
  இதில் மற்றொரு சதியும் உள்ளது. இந்தியா முழுவதும் ஒரே கல்வி என்பதுதான் பா.ச.க.வின் முழக்கம். மத்திய அரசு கல்வி வாரியத்தில் மொழித்தாள் ஒன்றுதான் உள்ளது. எனவே, அதைப்போல் இங்கும் மாற்ற முயல்கின்றனர். மும்மொழித்திட்டம் என்ற பெயரில் இந்தியையும் சமற்கிருதத்தையும் திணித்து வரும் பாசகவினர், தேர்வுத்தாள் சுமை குறைந்துவிட்டது; அதனால் இந்தியும் சமற்கிருதமும் சுமையல்ல என்றும் கூறுவார்கள்.
 மொழித்தேர்வு இரண்டுதாளாக இருந்தாலும் பிற பாடங்களுக்கு உள்ளதுபோல் 100 + 100  என 200 மதிப்பெண்கள்தான் வழங்கப்படுகின்றன. எனவே, மொழிப்பாடங்களில் ஓர வஞ்சனை காட்டக் கூடாது. இதனடிப்படையில் பிற பாடங்களுக்கான மதிப்பெண்களையும் 100 எனக் குறைத்தால்  அறிவு வளர்ச்சி குறையும்.
  மத்திய அரசின் கல்வித்திட்டம் மேம்பட்டது எனத் தவறான பரப்புரைமேற்கொள்ளப்படுகிறது. தமிழகக் கல்வி முறையில் வினா இருந்தால் மத்தியக்கல்வி பயின்றவர்கள் போதிய தேர்ச்சி  பெற மாட்டார்கள். எனவே மத்தியக் கல்விவாரியததின் மொத்த மதிப்பெண்கள் 500 என்னும் தேர்ச்சி முறையைத் தமிழகஅரசு பின்பற்றத் தேவையில்லை.
  தேர்வுத்தாள் ஒன்றை நீக்குவதன் மூலம் வினாத்தாள் தயாரிப்புச் செலவு, விடைத்தாள் திருத்தும் செலவு முதலானவை குறைவதாக இதன் ஆதரவாளர்கள் பட்டியல் போடுகின்றனர். செலவுக் கண்ணோட்டத்தில் கல்வி இருப்பின் கல்வி வளர்ச்சி என்பது கனவாகப் போய்விடும். கல்வித்துறையில் அடிப்படைச் செலவுகளுக்குக் கணக்கு பார்க்கக் கூடாது.
   இன்னும் சிலர் மாணவர்களுக்கு மன உளைச்சல்  போவதாகக் கூறுகின்றனர். மன உளைச்சல் என்றால் எந்தத் தேர்வும் நடத்த வேண்டாவே!
 தமிழாக இருந்தாலும் பிற மொழியாக இருந்தாலும் மொழிக்கல்வி என்பது ஆழமானதாக இருக்க வேண்டும். எனவேதான் இரண்டு தேர்வுத்தாள் தேவைப்படுகின்றன.
மொழிப்பாடம் என்பது வளர்ந்து வரும் துறையாகும். இதில் மிகுதியாகப் படித்துவிட்டுக் குறைவான விடைகளை அளிக்கும் சூழல் ஏற்படுத்துவதுதான் உண்மையில் மாணவர்களுக்கு உளைச்சலை ஏற்படுத்தும். மிகுதியான தெரிவுகள் இருக்கும் பொழுது   ஏற்படும் மன அமைதி இல்லாமல் போய்விடும். முழுமையாகப் படிக்காமல் பலவற்றை விட்டுவிடத் தோன்றும். இது. தேர்வில் தோல்விக்கு அழைத்துச் செல்லும். எனவே தமிழக அரசின் புதிய முறை மாணவர்களின் தேர்ச்சி எண்ணிக்கையைக் குறைக்கவே செய்யும்.
இங்கிலாந்தில் 10 ஆம் வகுப்பில்  பிரிவு 1 முதல் 3 வரை பயில்பவர்கள்  ஆங்கில மொழி – தாள் 1, தாள் 2 எழுதுகின்றனர்.  11 ஆம் வகுப்பில் ஆங்கில் இலக்கியம் தாள் 1, தாள் 2 எழுதுகின்றனர்.
10 ஆம் வகுப்பில் பிரிவு 3 முதல் 7 வரை படிப்பவர்கள் ஆங்கில இலக்கியம் தாள் 1, தாள் 2 படிக்கின்றனர். இவர்கள் 11 ஆம் ஆண்டில் ஆங்கில  மொழி – தாள் 1  தாள், 2 படிக்கின்றனர். எப்படியாயினும இரண்டு தாள்களில் தேர்வு எழுத வேண்டும். என்றாலும் தேர்வு முறை அவர்கள் மனப்பாடம் செய்து ஒப்பிதது எழுதும் முறையில் அமைக்கவில்லை நன்கு  உணர்ந்து படித்துத்  தெரிவிக்கும் முறையில் அமைத்துள்ளனர்.
 நாம் தேர்வுத்தாள் எண்ணிக்கையைக் குறைக்காமல் தேர்வு முறையை மாற்றலாம்.
தாள் 1 என்பதை இப்பொழுது உள்ளதுபோல், பார்க்காமல் எழுதும் வகையில் அமைக்க வேண்டும். தாள் 2 என்பது புத்ததகங்களைப் பார்த்து எழுதும் வகையில் இருக்க  வேண்டும். பார்த்து எழுதுவதா? அப்படியானால் அப்படியே புத்தகங்களைப் பார்த்து எழுதி மறந்துவிடுவார்களே என எண்ண வேண்டா. அதுபோல் துண்டுத்தாளை அல்லது புத்தகத்தைத் திருட்டுத்தனமாகப் பார்த்துப் படி எடுப்பதுபோல் எழுதுவதற்கும் புத்தகங்களைப் பார்த்துச் சிந்தித்து எழுதுவதற்கும் வேறுபாடு உண்டு. கருத்தைச் சுருக்கி எழுதுதல், விரித்து எழுதுதல், புத்தகங்களில் உள்ள தொடர்களை வேறுவகைகளில் பயன்படுத்தி எழுதுதல், புத்தகச் செய்தி ஒன்றை நாடகமாக நடித்துக் காட்டுதல், கவிதையாக எழுதுதல் என்பன போன்று மாணவர்களின் படைப்புத்திறன்கள் வளரும் வகையில் வினாத்தாள் அமைய வேண்டும். அப்படியாயின் மாணவர்கள் முன்கூட்டியே புத்தகங்களைப் படிப்பர்  சிந்தனைக்கு இடம் கொடுக்கும் வகையில் பாடங்களில் கருத்து செலுத்துவர்.
 இம் முறையில் மாணவர்களுக்கு மன உளைச்சல் ஏற்படாது. அறிவு வளர்ச்சிதான் ஏற்படும்! சிந்தனைத்திறன்தான் வளரும்!
  மொழிப்பாடம் என்பது மண்ணின் மணத்தை வெளிப்படுத்துவது; பண்பாட்டை உணர்த்துவது; நாகரிகத்தை ஏற்படுத்துவது; கலையை வளர்ப்பது; விரிந்து பரந்த பயன்கள் கொண்டது. அதனைச் சுருக்குவது என்பது  நல்ல தன்று. புதுமை செய்வதாக எண்ணிக் கொண்டு சில அதிகாரிகள் செய்கைக்கு அரசும் துணை போகக் கூடாது. மத்திய அரசின் கல்வி முறையுடன் ஒப்பிட்டும் நம் கல்வி முறையைச் சிதைக்க கூடாது.
  • இலக்குவனார் திருவள்ளுவன்
  • நக்கீரன்  இதழ் 30.22. / சூன் 27-29, 2018:   பக்,22-23

 

Wednesday, June 20, 2018

ஆங்கிலத்திற்கு வரவேற்புப் பா பாடும் திமுக, அதிமுக! – இலக்குவனார் திருவள்ளுவன்

சிறப்புக் கட்டுரைஆங்கிலத்திற்கு வரவேற்புப் பா பாடும்திமுகஅதிமுக!

இலக்குவனார் திருவள்ளுவன்
முன்பெல்லாம் திமுகவும் அதிமுகவும் ஆட்சிக்கு வரும் வரை “தமிழ்! தமிழ்!” என முழங்குவார்கள். வந்த பின் தமிழை மறந்துவிடுவார்கள். இப்பொழுதோ ஆட்சியில் இருந்தாலும் இல்லாவிட்டாலும் உதட்டளவில் தமிழைத் தாய்என்கிறார்கள்ஆனால்ஆங்கிலத்தின் அருந்தவப்பிள்ளைகளாகச்செயல்படுகிறார்கள்இந்தியை எதிர்ப்பதுபோல் நாடகமாவது ஆடுகிறார்கள். ஆனால், ஆங்கிலத்திற்குக் காவடி தூக்குகிறார்கள். திமுகவிற்கும் அதிமுகவிற்கும் உள்ள ஒற்றுமை இதுதான்.
முதிய தமிழறிஞர்களுக்கு உதவித்தொகை தருதல், தமிழறிஞர்கள் பெயர்களில் விருதுகள் வழங்கல் போன்று தமிழ் வளர்ச்சிக்கெனச் சில திட்டங்களைச் செயல்படுத்துவது உண்மைதான். ஆனால், கல்வி நிலையங்களில் தமிழைத்துரத்திவிட்டு என்ன செய்து என்ன பயன்?
5.06.2018 அன்று சட்டமன்றத்தில், திமுக ச.ம.உ. (முன்னாள் அமைச்சர்) பூங்கோதை ஆலடி அருணா, “தொடக்கப் பள்ளிகளில் ஆங்கிலவழிக் கல்வியைத் தொடங்க அரசு நடவடிக்கை எடுக்க வேண்டும்” என்று பேசியுள்ளார். தமிழ்வழிக் கல்விக்காகக் குரல் கொடுக்க வேண்டியவர் ஆங்கிலவழிக் கல்வியை வலியுறுத்துவது வெட்கக்கேடானது. பள்ளிகளில் தமிழ்வழிக் கல்வி உள்ளமை போல் கல்லூரிகளிலும் கொண்டுவர வேண்டும் என்று பேராசிரியர் சி.இலக்குவனார் போராடினார். இதற்காகத் தமிழ் உரிமைப் பெருநடைப்பயணம் மேற்கொண்டபோது இந்தியப் பாதுகாப்புச் சட்டத்தின் கீழ்க் கைது செய்யப்பட்டார். அப்போது கலைஞர் கருணாநிதி ‘தமிழ்த்தாய் சிறையில்’ என ஊரெங்கும் பேசித் தமிழ்வழிக் கல்வியை வலியுறுத்தினார். இன்றைக்கு அவர் தலைவராக உள்ள திமுக, கல்வி வணிகம் மூலம் கொள்ளையடிப்பதால் ஆங்கில வழிக் கல்வியைக் கொண்டுவர வேண்டுகிறது. என்ன கொடுமை இது!
ஆங்கிலத்துக்கு ஆதரவான கூட்டணி
“தொடக்கப் பள்ளிகளில் ஆங்கிலவழிக் கல்வி தொடங்க ஆய்வு நடைபெற்று வருகிறது” என்று பூங்கோதைக்குப் பள்ளிக் கல்வி அமைச்சர் செங்கோட்டையன்மறுமொழி அளித்துள்ளார். ஏறத்தாழ 900 தமிழ்வழிப் பள்ளிகளை மூடும் திட்டத்தில் அதிமுக அரசு உள்ளது. எனவே, இவற்றை ஆங்கிலவழிப் பள்ளிகளாக மாற்ற எண்ணியுள்ள அதிமுகவிற்குத் திமுகவும் துணைபோவதால் சட்டமன்றத்தில் எதிர்ப்பு இருக்காது அல்லவா?
திமுக சட்டமன்ற உறுப்பினர் பொ.தி.இரா.(பி.டி.ஆர்.) பழனிவேல் தியாகராசன்தன்னை ஆங்கிலேயராகவும் தான் இங்கிலாந்து நாடாளுமன்றத்தில் பேசுவதுபோலும் எண்ணிக்கொண்டு ஆங்கிலத்திலேயே சட்டமன்றத்தில் பேசுபவர். மாதிரிச் சட்டமன்றத்திலும் அவ்வாறுதான் ஆங்கிலத்தில்தான் பேசினார். இவரைத் தட்டிக் கேட்காத திமுகவிற்குத் தமிழைப் பற்றிப் பேச என்ன தகுதி உள்ளது? எனவே, அரசியல் கட்சிகளின் தமிழ் முழக்கங்கள் கண்டு ஏமாறாமல் மக்களே முன்னின்று தமிழ்வழிக் கல்விக்கு வழி காண வேண்டும்.
ஆங்கிலவழிக் கல்வியின் மாயையைப் பின்வரும் புள்ளிவிவரங்கள் உடைக்கின்றன.
ஐஐடி எனப்படும் இந்தியத் தொழில் நுட்பப் பயிலகத்தில் 2015இல் சேர்க்கப்பட்ட 9,974 மாணாக்கர்களில் 188 பேர் மட்டுமே தமிழ்நாட்டைச் சேர்ந்தவர்கள். இவர்களில் 9 பேர் தவிரப் பிறர் ஆங்கில வழியில் படித்தவர்கள்.
அனைத்திந்திய மருத்துவத் தேர்வில் 2011இல் தமிழ்நாட்டிலிருந்து 9,514 பேர் பங்கேற்றனர். ஆனால், 207 பேர் மட்டுமே தகுதி பெற்றனர். எனவே, ஆங்கிலத்தில் படித்தால்தான் உயரலாம் என்பது தவறு என்றாகிறது.
தமிழ்வழிக் கல்வி 1952ஆம் ஆண்டு அறிமுகம் செய்யப்பட்டது. காமராசர்முதலமைச்சராகப் பதவி வகித்த காலகட்டமான 1954ஆம் ஆண்டு முதல், உயர்நிலைப் பள்ளிவரை தமிழே பயிற்சி மொழியாக இருந்தது. இதனை மாற்றி ஒவ்வொரு வகுப்பிலும் ஒரு பிரிவு ஆங்கில வழிப் பாடமொழியாக இருக்கும் என 1965இல் முதல்வர் பக்தவத்சலம் ஆணை பிறப்பித்தார். தமிழ்வழிக் கல்விக்கு மூடுவிழா நடத்தும் இவ்வாணையைத்தான் செயலலிதா பின்பற்றினார். இப்போதைய அரசும் பின்பற்றுகிறது.
2012-13 இல் செயலலிதா அரசு, அரசின் தொடக்க – நடுநிலைப் பள்ளிகளில் ஆங்கிலவழிக் கல்வியைத் திணித்தது. 320 பள்ளிகளில் முதல் வகுப்பு மற்றும் ஆறாம் வகுப்புகளில் ஆங்கிலவழிப் பிரிவுகள் தொடங்கப்பட்டன. 2013-14 கல்வியாண்டில் மேலும் 3200 பள்ளிகளில் ஆங்கிலவழிப் பிரிவுகள் தொடங்கப்பட்டன. இவ்வாறு ஆண்டுதோறும் ஆங்கிலவழிப் பிரிவுகள் தொடங்கப்பட்டதால், 4,84,498 பேர் தமிழ்வழிக் கல்வியை இழந்தனர். இதைத் தொடர்ந்து 2017-2018 இல் ஆங்கிலவழிக் கல்வித் திணிப்பு அரங்கேறியுள்ள அரசுப் பள்ளிகள் எண்ணிக்கை 3,916.
சென்னை, மதுரைப் பல்கலைக்கழகங்கள் கட்டுப்பாட்டில் பதின்நிலைப் பள்ளிகள் (மெட்ரிகுலேசன் பள்ளிகள்) இருந்தன. இவை 1978 இல் பள்ளிக்கல்வி இயக்ககக் கட்டுப்பாட்டில் கொண்டுவரப்பட்டன. அப்போது ஏறத்தாழ 20 பதின்நிலைப் பள்ளிகள் மட்டுமே இருந்தன. தமிழக அரசு 2011இல் பதின்நிலைப் பள்ளி இயக்ககம் எனத் தனியாகத் தோற்றுவித்தது. இப்பள்ளிகள் இதன் கட்டுப்பாட்டில் வந்தன. இப்போது 4,268 பதின்நிலைப் பள்ளிகள் உள்ளன. 39,18,221 மாணாக்கர்கள் இவற்றில் பயில்கின்றனர். இது வளர்ச்சியின் அடையாளம் அல்ல. வணிகமயமான கல்விக்கு மக்கள் இரையானதைக் காட்டும் அவலம். இதனால் இவர்கள் தாய்மொழி வாயிலான கல்வியை இழந்து சிந்தனை ஆற்றல் இழக்கின்றனர். ஒப்பித்து எழுதும் பாட முறையால் தமிழகச் சிறுவர்கள் இயந்திரமயமாகி வருகிறார்கள்.
தமிழ்நாட்டில் 37,211 அரசுப் பள்ளிகளும் 8,403 அரசு உதவிபெறும் தனியார் பள்ளிகளும் 12,419 அரசு நிதியுதவி பெறாத் தனியார் பள்ளிகளும் உள்ளன.
தமிழ்நாட்டில் மாணாக்கர் சேர்க்கை அரசுப் பள்ளிகளில் 54,71,544. அரசு உதவிபெறும் தனியார் பள்ளிகளில் 28,44,693. அரசு நிதியுதவி பெறாத் தனியார் பள்ளிகளில் 48,69,289 என்னும் எண்ணிக்கையில் உள்ளன. தனியார் பள்ளிகள் பெருகிவருகின்றன. தனியார் பள்ளிகள் ஆங்கிலவழிக் கல்வியே வழங்குவதால் ஆங்கிலவழிக் கல்வியும் பெருகுகிறது.
இவற்றை மாற்ற அரசு என்னென்ன செய்யலாம்?
கோயம்புத்தூர், கிருட்டிணகிரி, நீலகிரி மாவட்டங்களில் மொத்தம் எட்டு உண்டு உறைவிடப் பள்ளிகள் உள்ளன. இவற்றைப்போன்று அனைத்து மாவட்டங்களிலும் தரமான தமிழ்வழியிலான உண்டு உறைவிடப் பள்ளிகளை அரசு தொடங்க வேண்டும். இதனால் தமிழ்வழிக் கல்வியில் பயில்வோர் எண்ணிக்கை உயரும்.
ஆந்திராவில் கூட்டுறவுக் கல்விச் சங்கங்கள் (The Cooperative Educational Societies), கேரளாவில் தொழிற்கல்விக் கூட்டுறவுக் கழகம் (The Co-operative Academy of Professional Education (CAPE) of Kerala) ஆகியன மூலம் கூட்டுறவு அமைப்புகள் மேனிலைக் கல்விக் கூடங்கள், தொழிற்கல்விக் கூடங்கள் ஆகியவற்றை நடத்துகின்றன. இவை குறித்து அரசு முழுமையாக அறிய வேண்டும். இவைபோல்தமிழ்நாட்டில் தமிழ் அமைப்புகள்பெற்றோர்கள்ஆசிரியர்களைக் கொண்டகூட்டுறவுச் சங்கம் அமைத்து மூடக் கருதும் பள்ளிகளை நடத்த வேண்டும்இதனால் அரசிற்கும் சுமை குறையும்தமிழ்வழிப் பள்ளிகளும்காப்பாற்றப்படும்.
இவற்றையெல்லாம் விட ஒரே ஓர் எளிய வழியில் இச்சிக்கலைத் தீர்க்கலாம். தமிழ்வழியில் படிப்போருக்கு வேலைவாய்ப்பில் முன்னுரிமை அளிப்பதுதான் அது. இது தொடர்பில் திமுக ஆட்சியில் கொண்டுவரப்பட்ட அரசாணை சரியானதல்ல. தமிழ்வழியில் படித்தவர்களுக்கு முதல் 80% இடங்களை ஒதுக்கிய பின்னரே பிற வகையினருக்கு வேலைவாய்ப்பு அளிக்க வேண்டும். இதேபோல் தமிழ்வழியில் படித்தவர்களுக்கு வேலைவாய்ப்பில் முன்னுரிமை அளிக்கும் தனியார் நிறுவனங்களுக்கு மட்டுமே அரசின் உதவிகளும் சலுகைகளும் கிடைக்கும் என்றும் ஆணை பிறப்பிக்க வேண்டும். அப்பொழுதுதான் எதிர்கால நம்பிக்கையின்மையால் இதுவரை தமிழ்வழிக் கல்வியைப் புறக்கணிக்கும் மக்கள் தமிழ்வழிக் கல்வியைத் தேடி நாடி ஓடி வருவார்கள்.
தமிழைக் காத்து மாணவர்களின் கல்வித் தரத்தை உயர்த்த முன்வருமா அரசு?
(கட்டுரையாளர் குறிப்பு: இலக்குவனார் திருவள்ளுவன்… தமிழ் காப்புக் கழகத்தின் தலைவர், ‘அகர முதல’ என்னும் தமிழ் இணைய இதழின் ஆசிரியர். தமிழக அரசின் கலைப் பண்பாட்டுத் துறையில் அதிகாரியாகப் பணியாற்றியவர். அப்போது தமிழ் காக்க பல்வேறு நடவடிக்கைகளை மேற்கொண்டவர். குறிப்பாக, இலவசம் என்ற சொல்லுக்கு விலையில்லா என்றும், அரவாணி என்பதற்கு திருநங்கை என்றும் அரசுத் துறைகளில் புதிய சொல்லாடல்களைப் பயன்பாட்டுக் கொண்டுவந்தமைக்குக் காரணமானவர். இவரைத் தொடர்புகொள்ள: thiru2050@gmail )

Followers

Blog Archive