Sunday, August 20, 2017

தினகரன் நிழல் அமைச்சரவை அமைக்கட்டும்! – இலக்குவனார் திருவள்ளுவன்




தினகரன் நிழல்  அமைச்சரவை அமைக்கட்டும்!


   ‘‘எங்கள் அப்பன் குதிருக்குள் இல்லை’’ என அதிமுக தலைவர்கள் கூறினாலும் அதிமுகவைத் தடுமாற்றத்தில் தள்ளி இயக்கிக்கொண்டிருப்பது பாசக தலைவர்கள்தாம் என்பது அனைவரும் அறிந்ததே! ஆளுங்கட்சிக்கு இணையான வலிமை உடைய எதிர்க்கட்சித்தலைவரைக்கூடச் சந்திக்காத தலைமையர் நரேந்திரர்(மோடி), பத்துபேர் கூட இல்லாத  சிறு பிரிவின் தலைவரை அடிக்கடி சந்திப்பதன்  காரணமும் இதுதானே!  வேளாண்மை நாட்டின் தலைவக இருந்து கொண்டு  வாழ்வாதாரத்திற்காகப் போராடும் வேளாண்குடிப் பெருமக்களைச் சந்திக்க மறுத்துவிட்டுப் பதவிகளுக்காகப் போராடுபவர்களைச் சந்திப்பதன் காரணமும் என்ன? அதிமுகவில் பிளவை உணடாக்க மேற்கொண்ட முயற்சிகள் சலசலப்பை உருவாக்கினாலும் எதிர்பார்த்த பிளவு வராமையால் அதை எப்படியும் நிறைவேற்றித் தமிழ்நாட்டை இந்துவெறி, இந்தி நாடாக மாற்ற வேண்டும் என்பதுதானே!
  செயலலிதா மருத்துவமனையில் இருந்த பொழுதும் இறந்த பொழுதும் இல்லாத  சசிகலா குடும்ப எதிர்ப்பு உறுதி திடீரென்று முளைத்ததன் காரணம் என்ன? அதிகார வலிமையால், குறுக்கு வழிகளில் மிரட்டப்படுவதும் இணங்கினால் தரப்படுவதாகக் கூறப்படும் பதவி நலங்களும் பிற வளங்களும்தானே!
  அதிமுக இயல்பாகக் கரைந்தால் ஒன்றும் தீமையில்லை. ஏனெனில், அதில் தமிழ் உணர்வாளர்கள் இருந்தாலும் அக்கட்சி ஒன்றும் தமிழ்நலன் சார்ந்து இயங்கும் கட்சியில்லை. (முதன்மைக்கட்சிகள் யாவுமே இவ்வாறுதான்  உள்ளமையால், இதைமட்டும் குறைகூறிப் பயனில்லைதான்.) ஆனால், வஞ்சக வலையில் சிக்கிச் சீரழிவது அக்கட்சிக்கு மட்டுமல்ல நாட்டிற்கும் நல்லதல்ல. எனவேதான் நாம் இதனை எதிர்க்க  வேண்டியுள்ளது.
  அதிமுகவில் பெரும்பான்மையர் தன் பின்னால் உள்ளதாகப் பன்னீர்செல்வம் கூறினாலும் அஃது உண்மையில்லை என்பதை இப்பொழுது் உணர்ந்திருப்பார். அவர் தொகுதி மக்கள் நடத்திய  குடிநீர்க்கிணற்றுக் காப்புப் போராட்டமும் இதை உறுதிசெய்கின்றது. என்னதான் பாசக  பின்னணியால் வலிமையாக  இருப்பதாகக் காட்டினாலும் அது நிலைக்காது.
 அதே போல், எடப்பாடி பழனிச்சாமி பாசகவின் துணையுடன் தன்பக்கம் அமைச்சர்களை ஈர்த்து வைத்திருந்தாலும் அதுவும் நிலைக்காது. காற்றுள்ளபோதே தூற்றிக்கொள்ள நினைப்பவர்களும்  காற்று அடிக்கும் திசையில் மாறிச் செல்வர்.
  வேறு வழியின்றித் தங்களை  உயரத்தில் ஏற்றியவர்களையே எதிர்க்கும் இவர்கள், மனம்மாறி கட்சி நலன் குறித்து எண்ணப்போவதில்லை.
  இன்றைய நிலையில் தொண்டர்கள் தினகரன் பக்கம் இருக்கிறார்கள். மேலூரில் அவர் நடத்திய கூட்டமே அதற்குச் சான்று.  பணம் கொடுத்துத் திரட்டியதாகச் சிலர் கூறுகின்றனர். இதுதான் இன்றைய கூட்ட இலக்கணம் என்றான பின்னர் அவ்வாறு கூறிப் பயனில்லை. மேலும், அவ்வாறுதான் பன்னீர்செல்வமும் எடப்பாடி பழனிச்சாமியும் கூட்டத்தைத் திரட்டமுயன்று இயலாமல் போயுள்ளது.
 எனவே, தினகரன் தன் முயற்சியில் வெற்றி பெற்றுக் கட்சியைக் காப்பாற்ற வேண்டுமெனில்,  அரசைக் கலைப்பார் என்ற அச்சத்தில் இருந்து எடப்பாடி பழனிச்சாமியை விடுவிக்க வேண்டும். எந்த அளவிற்கு அச்சம் வருகிறதோ அந்த அளவிற்கு அவர் பாசகவின் கால்களைக் கெட்டியாகப் பிடித்துக் கொள்வார்.  தரையளவு வீழந்து பணிந்து வாழ்ந்தவர்களுக்கு அதற்கும் கீழேயும் வீழ்வது ஒன்றும் இயலாததல்ல. எனவே, கவிழ்ப்பு அச்சத்திலிருந்து விடுவிக்கும் வகைகளில் தினகரன் செயல்பாடு இருக்க வேண்டும்.
  அதேநேரம், கட்சியையும் ஆட்சியையும் காப்பாற்ற நிழல் அமைச்சரவை அமைக்க வேண்டும்.
  பொதுவாக நிழல் அமைச்சரவை எதிர்க்கட்சியினரால் அமைக்கப்படும். இப்பொழுது அவரை எதிரர் ஆக அரசு எண்ணுவதால்,  நிழல் அமைச்சரவை அமைக்கலாம்.
  நிழல் பேரவை என்ற பெயரில் இதனை அமைத்து அதன் ஒருங்கிணைப்பாளராக இருக்க வேண்டும். துறைவாரியான நிழல் அமைச்சர்களையும் மாவட்ட வாரியான நிழல் அமைச்சர்களையும்  அமர்த்தி நாட்டுப்பணியில் கருத்து செலுத்த வேண்டும். இதில் பங்கேற்க விரும்பும்  கட்சி சாராதவர்களையும் இதில் இணைக்கலாம்.
 நிழல் பேரவையினர்,  அதிகார மமதையில் செயல்படக்கூடாது என்றும் மக்கள் தொண்டர்களாகத்தான் செயல்பட வேண்டும்என்றும் அறிவுறுத்தி அவ்வாறு செயல்படவேண்டும்.
அரசின் திட்டங்கள் மக்களுக்கு எளிதில் கிடைக்க உதவ வேண்டும்.
கட்சி  சார்பான  ஏசல்களையும் அவதூறுகளையும் தவிர்க்க வேண்டும்.
தேர்தல் நேரத்தில் தங்கள் பணிகளைக் கூறிக்கொள்ளலாமே தவிர,நிழல் பேரவையில் செயல்படும் பொழுது் அதுபோன்ற முயற்சிகளில் ஈடுபடக்கூடாது.
தமிழ்க்காப்பு, தமிழ்வழிக்கல்வி, தமிழ்வழி இறைவழிபாடு எனத் தமிழ்நலன்சார்ந்த பரப்புரைகளிலும் பேரவை ஈடுபட வேண்டும்.
  அவரோ கட்சிப் பொறுப்பாளர்களோ கட்சிப்பணிகளில் ஈடுபட இப்பணிகள் தடையாக இருக்கா.  அதே நேரம் மக்கள் பணியால் கட்சி மேலும் இவர் தலைமையில் வலிவு பெறும்.
  இதனால் அரசின் நலத்திட்டங்கள் விரைவில் மக்களுக்குப் பயனளிக்கும்; ஊழல்கள் தடுக்கப்படும்; அதிமுகவின் அரசிற்கு நல்ல பெயர் கிட்டும். இதற்குக் காரணமான தினகரன் போற்றப்பட்டுத் தன் கனவை விரைவில் நிறைவேற்ற இயலும்.
  அரசை ஆட்டுவிக்கும்  அதிகாரச் செல்வாக்கில் இருந்த பொழுது  செய்யத்தவறிய இலவச உயர் கல்வி, இலவச மருத்துவ உதவி, வேலைவாய்ப்புப் பெருக்கம் போன்றவற்றிலும் கருத்து செலுத்த வேண்டும்.
  அவரிடமும் கட்சியினரிடமும் இருக்கும் செல்வத்தில் இதனை ஆற்ற  இயலும். இவ்வாறு தொடர்ந்து ஈடுபட்டால் மக்களும் உதவுவர்.
  எனவே, அதிமுகவின் துணைப்பொதுச்செயலர் தினகரன் நிழல் பேரவையை உருவாக்கி மக்கள் நலப்பணிகளில் ஈடுபட்டு வெற்றி பெற வாழ்த்துகிறோம்.
அன்புடன் இலக்குவனார் திருவள்ளுவன்
இதழுரை :  அகரமுதல 200, ஆவணி 04, 2048  / ஆகத்து 20, 2017

 

ஒரு சொல்-பல் பொருள், கலைச்சொல்லாக்க வளர்ச்சிக்குத் தடைக்கல் – இலக்குவனார் திருவள்ளுவன்




ஒரு சொல்-பல் பொருள்,

கலைச்சொல்லாக்க வளர்ச்சிக்குத் தடைக்கல்

1/3
  ஒரே பொருளைச் சுட்டும் பல்வேறு சொற்களும்  பல்வேறு பொருள்களை உணர்த்தும் ஒரே சொல்லும் உள்ள நிலைமை அனைத்து மொழிகளிலும் காணப்பெறும் இயல்புதான்.  இந்நிலைமையைத் தமிழிலும் மிகுதியாய்க்; காண்கிறோம். இடத்திற்குத் தகுந்தாற்போல் பொருளை உணரும் நிலை வெளிப்படையாய் இருப்பின் குறையொன்றும்  இல்லைதான். ஆனால், அதே நேரத்தில் பொருளை உணரும் இடர்ப்பாடு இருப்பின் சொற்களஞ்சியத்தை வளப்படுத்த வேண்டியது இன்றியமையாதது அல்லவா?
  ஒரு சொல்-பல்பொருள் என்ற நிலைமை கலைச்சொற்களைப் பொருத்தவரை தவிர்க்கப்பட்டாக  வேண்டும். கலைச்சொற்கள் குழப்பமின்றித் தாம் உணர்த்தும் பொருட்களை வெளிப்படுத்துவனவாக இருக்க வேண்டும்.
 ஒரு பொருளை ஒவ்வொருவர் ஒவ்வொரு சொல்லில் கையாளுவதும் ஒரே சொல்லைப் பல்வேறு பொருள்களில் வழங்கிவருவதும் இன்றைய தமிழ்உலகின் நிலைமையாய் உள்ளது. இதனால் ஏற்படும் இடர்ப்பாடுகளை உணர்ந்து தேக்க நிலையை நீக்க  வேண்டும்.
  சொல்லாக்க வல்லுநர்களும் மொழியியல், கலையியல், அறிவியல் அறிஞர்களும் ஒன்றுகூடிப் பல்வேறு சொல்லில் வழங்கும் ஒரே சொல்லுக்கு மாறாக வெவ்வேறு சொற்களைக் காணுதல் வேண்டும். இவற்றை  உலகறியச் செய்து மேலும் திருத்தமும் செம்மையும் அடைந்தபின் கலைச்சொல் பயன்பாட்டில் சீர்மை நிலையை உருவாக்க வேண்டும்.
  இது குறித்த இன்றைய நிலையையும் இருக்க வேண்டிய கலைச்சொல் வளமையையும் சில எடுத்துக்காட்டுகள் மூலம் நாம் காண்போம்.
Police, Security, Warden, Warder போன்ற பல சொற்களுக்கும் பொதுவாக நாம் காவலர் என்ற சொல்லையே கையாண்டு வருகிறோம். அதனால் குழப்பம் ஏற்படுவது கண்கூடு. மாறாக நாம் காவல் என்ற அடிப்படையில் வெவ்வேறு சொற்களை உருவாக்கினால் குழப்பம் நீங்குவது உறுதி.
Police காவலர்
Warder அரணாளர்
Warden பேணாளர்
Guard காப்பாளர்
Guardian ஓம்புநர்
Security பாதுகாக்குநர்
Gate-keeper வாயிற் காப்போர்
Watchman காவலாள், காவலாளி
இவ்வாறாக நாம் வகைப்படுத்திக் கொண்டால், காவலர், சிறைக்காவலர், விடுதிக்காவலர், ஊர்க்காவலர், பாதுகாவலர் என  இணைச்சொற்களைப் பயன்படுத்துவதைவிட எளிமையும் சொற்சிக்கனமும் இருக்கும் அல்லவா?
Police என்பது துறையைக் குறிக்கையில் காவல் என்கிறோம்.
Inspector General of Police என்றால் காவல் துறைத்தலைவர் என்கிறோம். ஆனால், Head of the Department என்பதற்குத் துறைத்தலைவர் என வழங்கிவருவதுதான் பொருத்தமாக உள்ளது.
I.G. என்பவர் துறைத்தலைவராக இருப்பினும் துறைத்தலைவர் என்பது பதவி நிலையைக்குறிப்பதாக அமையாது. எனவே,
Inspector General ஆய்வுத் தலைவர்
Inspector General of Police காவல் ஆய்வுத் தலைவர்
Inspector General of Prison சிறை ஆய்வுத் தலைவர்
Inspector General of Registration பதிவு ஆய்வுத் தலைவர
என்று வருவது பொருத்தமாக இருக்கும்.
இவை போல்
Director General of Police –  காவல்துறைத் தலைமை இயக்குநர் என்கிறோம்.
ஒன்றுக்கு மேற்பட்ட இயக்குநர் இருந்து ஒருவர் தலைமைப்பொறுப்பில் இருந்தால், அவரைத் தலைமை இயக்குநர் என்பது பொருததமாக இருக்கும். இங்கு அவ்வாறு இல்லை. எனவே,
Director General நெறித் தலைவர்
Director General of Police காவல் நெறித்தலைவர் (ஆய்வுத் தலைவரையும் நெறிப்படுத்துபவர்)
Director General of Prison சிறை நெறித் தலைவர
Director General of Registration பதிவு நெறித் தலைவர்
என்பனபோல் உருவாக்குவது சிறப்பாக இருக்கும் அல்லவா?
(தொடரும்)
. இலக்குவனார் திருவள்ளுவன்
ஆறாவது உலக தமிழ் மாநாட்டில் அளிக்கப் பெற்ற கட்டுரை, கோலாலம்பூர், மலேசியா

Monday, August 14, 2017

பதவி நலன்களுக்காக அடிமையாகிக் கட்சியைச் சிதைக்காதீர்! – இலக்குவனார் திருவள்ளுவன்

அகரமுதல 199,  ஆடி28, 2048  / ஆகத்து 13, 2017

பதவி நலன்களுக்காக  அடிமையாகிக்

கட்சியைச் சிதைக்காதீர்!

அற்ற குளத்தின் அறுநீர்ப் பறவைபோல்” (ஔவையார், மூதுரை 17) இருப்பவர்களே, அரசியல்வாதிகள் என்பது இன்றைய இலக்கணமாகி விட்டது. எனவே,
“ஒருவீர் தோற்பினும் தோற்பதுநும் குடியே”(கோவூர்கிழார், புறநானூறு 45) எனப் பிறர் அறிவுறுத்த வேண்டிய நிலையில் அதிமுக தலைவர்கள் உள்ளனர்.
  இயல்பான போக்கில் அதிமுக வளர்ந்தாலும் தளர்ந்தாலும் ஒன்றுமில்லை. ஆனால், அதிகாரச் சுவையைப் பறிப்பதாகவும் தருவதாகவும் அச்சுறுத்தியும் ஆசைகாட்டியும் தமிழர் நலனுக்கு எதிரான ஒரு கட்சி அதனைச் சிதைத்துக் கொண்டுள்ளது. இதனால், அடிமைத்தனத்தின் உச்சக் கட்டத்தில் அதன் தலைவர்கள் இருப்பது அக்கட்சிக்கு மட்டுமல்ல தமிழ்நாட்டிற்கும்  கேடு தருவதாக உள்ளது.
  மத்திய அரசுடன் இணக்கமாக இருப்பதில் தவறில்லை. ஆனால், நம் உரிமைகள் பாதிப்பிற்கு உள்ளாகும் பொழுதும் உரிமைக்குக் குரல்  கொடுக்காமல் போலி உறவில் கட்டுண்டு கிடப்பதில் பயனில்லை. வாதாடிப் பெற முடியாதவற்றைப்  போராடியாவது  பெற வேண்டும் என்ற உணர்வு இல்லாததால், தமிழக உரிமைகள் பறிபோகின்றன.  எனவே, நாம் தமிழக ஆளுங்கட்சியான அதிமுகவின் ஒற்றுமை குறித்துக் கூற வேண்டியுள்ளது.
  புராணக்கதையில் வரும் பரமசிவன் கழுத்தில்  இருக்கும் பாம்பின்நிலைதான் பன்னீர் செல்வம் நிலை. அவர் ஓரிலக்க எண்ணிக்கை உறுப்பினர்களை வைத்துக் கொண்டு கட்சியையும் ஆட்சியையும் கேட்பதன் காரணம் அதுதான்.
  செயலலிதா மறைந்ததும் சசிகலாவின் காலில் விழுந்து கெஞ்சிக்கதறி அவரைக் கட்சித்தலைமைக்கு அழைத்தவர், இப்பொழுது அவரது குடும்பத்தினரை ஒதுக்கி வைக்க வேண்டுவது பித்தலாட்டம்தான். அப்பொழுதே இந்த முடிவை அறிவித்திருந்தார் என்றால் உளப்பூர்வமான எண்ணம் என ஏற்றிருக்கலாம்.
 அதுபோல்தான் எடப்பாடி பழனிச்சாமியும். ஆட்சிக்கட்டிலைப் பிணைத்துவைத்துக் கொள்ளும் திறமை மிக்கவராக அவர் இருக்கின்றார். ஆனால், கூவத்தூரில் ச.ம.உ.கள் ஆதரவு அவரது தனிப்பட்ட  செல்வாக்கிற்குக் கிடைத்ததில்லை என்பதை உணரவில்லை. அந்த நேரத்தில் வேறு யாரைச் சசிகலா அடையாளம் காட்டியிருந்தாலும் அவர்தான் முதல்வராகியிருப்பார். அப்பொழுது சசிகலா ஆதரவால் கிடைக்கும் முதல்வர்பதவி வேண்டா எனத் தூக்கி எறியவில்லை. இன்றைக்கு மத்தியக் கட்சியின் தூண்டுதலால் அவ்வாறு கூறுகிறார்.
 இராதாகிருட்டிணன் நகர் தொகுதியில் தினகரன், இரட்டை இலையை மறக்க வைக்கும் அளவிற்குத் தன் தேர்தல் குறியீடான தொப்பியைப் புகழ்பெறச்செய்தார். அத்தேர்தல் பரப்புரையில் தினகரனைத் தலையில் தூக்கி வைத்துக் கொண்டாடியவர், இன்றைக்கு பாசகவின் ஆசைகாட்டலுக்கு அடிபணிந்து தூக்கி எறிகிறார்.
  இடைத்தேர்தலில் தினகரன்தோற்பார் எனப் பாசக கருதியிருந்தால்,  அவரது செல்வாக்கு இவ்வளவுதான் என்று சொல்லி ஓரங்கட்ட வாய்ப்பாக இருந்திருக்கும் எனத் தேர்தலை நடத்தியிருக்கும். ஆனால்,  வெற்றிப் பட்டம் அவருக்கே மக்கள் அணிவிக்க ஆயத்தமாக இருப்பதைப் பாசக உணர்ந்தது;  எனவேதான் இடைத் தேர்தலை ஒத்தி வைத்தது. தினகரனை வழக்குகள் மூலம் அகற்றச்செயல்படுகிறது.
  இடைத்தேர்தலின் பொழுது தினகரனின்காலில் தவமிருந்தவர்கள் இப்பொழுது அவரை வெளியேற்றிப் பாசக திருகும் திறவுகோலுக்கு ஏற்பத் தாளம்போடுகிறார்கள்.
  சசிகலா குடும்பத்தினரை வெளியேற்றவேண்டும் என்பது பாசகவின் திட்டமே! அதிமுகவினர் கருத்தல்ல! எனவேதான் அவர்களை  அண்டியே வாழ்ந்தவர்கள் இன்றைக்குப் பாசகவின் ஊதுகுழலாக மாறியுள்ளார்கள். ஆனால், இந்த அடிமைத்தனம் அதிமுக  தொண்டர்களுக்குப் பிடிக்கவில்லை. தினகரனுக்கு எதிராக இருந்தவர்கள்கூட இன்றைக்கு  அவர் பக்கம் திரும்பியுள்ளார்கள் எனில், இதுதான் காரணம்.
  எடப்பாடி பழனிச்சாமி முதல்வர் பதவியை இழந்தார் எனில், அவரும் மற்றொரு பன்னீர்செல்வம்தான். கொங்கு மண்டலத்தினர்கூட அப்பொழுது துணைநிற்க மாட்டார்கள்.
 பதவியில் இல்லாத பொழுதும் தினகரனுக்கு ஆதரவு உள்ளது எனில் அதிமுக  தொண்டர்கள் அவர் ஆளுமையை விரும்புகிறார்கள் என்றுதானே பொருள்.
  தினகரனும் பாசகவிற்கு இணங்கிப் போக முன்வந்தாலும் பாசக அதனை விரும்பாது. ஏனெனில், பிறரைப்போல நல்ல அடிமையாக அவர் இருக்க மாட்டார். மத்திய ஆட்சியைக்கூடத் தன்வயப்படுத்தினாலும் படுத்துவார் என்ற அச்சம் உள்ளது. வேலியில்போகும் ஓணானை வேட்டியில் விடுவானேன்! அவரை ஆதரித்து உள்ளதை இழப்பானேன் என்ற எச்சரிக்கை உணர்வால் அவரையோ சசிகலாவையோ விரும்பவில்லை. அவர்களை வழக்குகள் மூலம் அச்சுறுத்துவதன் காரணங்கள் அரசியலை விட்டு ஒதுங்கவைப்பதும் செயலலிதாவின் சொத்துகளைக் கவருவதும்தான்.
  திறமைமிக்க நடராசனையே ஓரங்கட்டச் செய்துள்ள தினகரனைத் தன் கூட்டணியில் சேர்த்து வீண் வம்பை விலைக்கு வாங்க அது முன்வரவில்லை. எனவேதான் சசிகலா குடும்பத்தினரை அகற்றும் ஒற்றை முழக்கத்தை அதிமுக மூலம் பாசக முன் வைக்கிறது. இதன் மூலம் சசிகலாவிற்குத்தான் ஆதரவு பெருகுகிறது என்பதை  அஃது உணரவில்லை.
  இராசீவு காந்தி அதிமுக ஒற்றுமை குறித்து வலியுறுத்திய போது அதில்  நேர்மை இருந்தது. இப்பொழுது பாசக அதிகமுவின் ஒன்றுமை குறித்துக் கூறுவதில் வஞ்சகம் இருக்கிறது. இந்த வஞ்சக வலையில் சிக்கிக் கொண்டு அதிமுக தலைவர்கள், தாங்கள் கடந்து வந்த பாதையைமறந்து முழங்கிக் கொண்டுள்ளனர்.
  சசிகலா குடும்பத்தினரால் நேரடியாகவோ மறைமுகமாகவோ பாதிக்கப்பட்டவர்கள் அமைதி காக்கின்றனர். ஆனால், அவர்களால் எல்லா நலன்களையும் வளங்களையும் பெற்றவர்கள்தாம் இன்றைக்கு அவர்களால் கட்சிக்குக்  கேடு என்று கூறி வருகின்றனர். இத்தகையவர்களை அறிமுகப்படுத்தி ஆளாக்கியதுதானே அவர் செய்த தவறு. அதைத்தானே தொண்டர்கள் விரும்பவில்லை. அவ்வாறிருக்க எலலாப் பயனையும் அடைந்தவர்கள்,  பொல்லாக் குடும்பத்தினராக அவர்களைக் கூறுவதை மக்கள் எப்படி ஏற்பர்?
   நாளைக்குச் சசிகலா குடும்பத்தைச் சேர்ந்தவர்தான் முதல்வர் என்னும் நிலைவந்தால், இவர்கள் புது முகமூடி அணிவர். தங்களின் அடிமன எண்ணத்திற்கு மாறாகக் கூறவும் செயல்படவும் தூண்டியவர்களால் அவ்வேடம் போட்டோம் எனப் புது வேடம் கட்டுவர். அப்பொழுதும்  இவர்கள்தாம் பயன்பெறுவர். அந்த நம்பிக்கையில்தான் தற்போதைய பாசகவின் முயற்சிகளுக்குக் கை கொடுக்கின்றனர். வென்றால் நன்று. இல்லையேல் பழுத்த மரம்நாடிச் செல்வதில் தவறில்லை என்பதே இவர்களின் எண்ணம்.
  அதிமுக தலைவர்கள், அதிகாரப்போட்டியில் தங்களுக்குள் அடித்துக்கொண்டால் நாளைஅரசியலை விட்டே அகற்றப்படுவர் என்பதை உணரவேண்டும். சிறு குழுவைப்  பெரும் அணியாகக் காட்டுவது   தங்களையே அழித்துக்கொள்ளும் அறியாமை என்பதை அறிய வேண்டும். அதிகாரத்தால் ஒட்டிக் கொண்டிருப்பவர்களை ஆதரவாளர்களாக எண்ணுவதும் பேரறியாமை என்பதைப் புரிந்து கொள்ள வேண்டும்.
  “ஒன்றுபட்டால் உண்டு வாழ்வு” என்பதால் ஒன்றிணைந்து தமிழக நலனுக்குப் பாடுபடவேண்டும். இதற்கு மாறாக அடிமைத்தனத்தில் மூழ்கி இருப்போரைத் தொண்டர்களும் மக்களும் இடம்தெரியா நிலைக்குத் தள்ள வேண்டும்.
ஆளுங்கட்சியினரின் ஒற்றுமை தமிழகத்திற்கு வலிமைசேர்க்கட்டும்! வளம்சேர்க்கட்டும்!
மக்கள் பகையினரைத் தூக்கி எறியட்டும்!
    அச்சமே கீழ்களது ஆசாரம் எச்சம்
    அவாவுண்டேல் உண்டாம் சிறிது (திருவள்ளுவர், திருக்குறள் 1075)

அன்புடன் இலக்குவனார் திருவள்ளுவன்
இதழுரை அகரமுதல 199,  ஆடி28, 2048  / ஆகத்து 13, 2017

Followers

Blog Archive