தமிழ் இணையக்கல்விக்கழகம் : நோக்கும் போக்கும் 3 – இலக்குவனார் திருவள்ளுவன்

இலக்குவனார் திருவள்ளுவன்      30 August 2015      No Comment

  3

ஙா.) குழுக்கள்:

குழுக்களில் தமிழறிஞர்களுக்கு இடமில்லை அல்லது மிகச் சிறுபான்மையராக உள்ளனர்.

பன்னிருவர் உறுப்பினராக உள்ள பொதுக்குழுவிலும் ஒன்பதின்மர் உறுப்பினராக உள்ள இயக்குநர் குழுமக்குழுவிலும் பதவி வழி உறுப்பினர்கள்தாம் உள்ளனர். தமிழறிஞர்கள் இல்லை.

பதினொருவர் உறுப்பினராக உள்ள கல்விப் பேரவைக் குழுவில் இருவர் மட்டுமே தமிழறிஞர்கள்.

ஒன்பதின்மர் உறுப்பினராக உள்ள கைப்பேசி வல்லுநர் குழுவில் ஒருவர்கூடத் தமிழறிஞர் இல்லை. பத்தொன்பதின்மர் உறுப்பினராக உள்ள அறிவுரை(ஆலோசனை) நிலைக் குழுவிலும் தொடக்கத்தில் தமிழறிஞர் இல்லை. தமிழ்க்காப்புக்கழகத்தின் வேண்டுகோளுக்கிணங்கவே பின்னர்ப் பதவி வழி தமிழ்த்துறையைச் சேர்ந்த மூவர் உறுப்பினராக ஆக்கப்பட்டனர்.

சிலரால் பிறமொழித்திணிப்பிற்கு வாயிலாகக் கொள்ளப்படும் ஒருங்குகுறி தொடர்பான ஒருங்குகுறி உயர்மட்டக் குழுவில் எண்மர் உறுப்பினராக இருப்பினும் இருவர் மட்டுமே தமிழறிஞர்கள். அறுவர் உறுப்பினராக உள்ள தகவலாற்றுப்படைக் குழுவில் ஒருவர் கூடத்தமிழறிஞர் இல்லை.

இதற்கெல்லாம் காரணம் என்ன? அமைப்பின் நோக்கத்தைப் புரிந்துகொள்ளாமையும் ‘தமிழ் இணையப் பல்கலைக்கழகம்’ / இப்போதைய பெயரான ‘தமிழ் இணையக்கல்விக்கழகம்’ என்பதை இணையவழியிலான தமிழ் பரப்பல் அமைப்பு என எடுத்துக்கொள்ளாமல், இணையக்கல்விக்கான தளம் என்னும் போக்கில் பரப்பியமையாலும் தமிழறிஞரல்லாதார் பொறுப்புகளில் வந்தமையால் தங்களை நிலைப்படுத்திக்கொள்ளவும் தங்கள் வழியினரைத் தொடர்ந்து இவ்வமைப்பில் இருக்கச் செய்து தங்கள் நோக்கங்களை நிறைவேற்றிக் கொள்ளவும் இவ்வமைப் பயன்படுத்தியதுதான்.

தமிழ்க்காப்புக்கழகத்தின் தொடர் வேண்டுகோளுக்குப்பின்னர்தான் தமிழ்வளர்ச்சித்துறையின் செயலர், தமிழ்வளர்ச்சித்துறை இயக்குநர், உலகத்தமிழாராய்ச்சி நிறுவன இயக்குநர் ஆகியோர் பதவி வழி உறுப்பினராக அமர்த்தப்பட்டனர். தொடக்கத்தில் இவர்களுக்கான வாய்ப்பு இல்லாத பொழுது குழுக்களில் தமிழ்சார்பானவர் யாருமில்லை என்றநிலைதான் இருந்தது.

தமிழ்சார்ந்த பதவி வழி உறுப்பினர்கள், கூட்டங்களில் நம் வேண்டுகோளை எதிரொலிக்கும் வகையில் குரல் கொடுப்பது மகிழ்ச்சி அளிக்கிறது. ஆனால், தமிழ் தொடர்பான வேண்டுகோளைத் தெரிவிக்கும் பொழுது தமிழ்வளர்ச்சி இயக்ககத்தில் இருந்து அம்மடலைத் ‘தகவல் தொழில்நுட்பத்துறை தொடர்பானது’ என அத்துறைக்கு மாற்றிவிடுகின்றனர். அல்லது ‘கொள்கை முடிவு’ எனத் தட்டிக் கழிக்கின்றனர். கொள்கை முடிவு உருவாக ஆற்றுப்படுத்த வேண்டிய தமிழ்வளர்ச்சி இயக்ககம் தன் பொறுப்பைத் தட்டிக் கழிப்பது வருத்தத்திற்குரியது. தமிழ் தொடர்பான வேண்டுகோள்களுக்குத் தகவல் தொழில்நுட்பத்துறையினர் செவிமடுத்து ஆவன செய்கின்றனர். தகவல்தொழில்நுட்பத்துறையினர் பணி பாராட்டும்படி இருக்கும்பொழுது தமிழ்வளர்ச்சித் துறையினர் ஒப்பிடுவதற்கே வழியின்றி வாளாவிருக்கின்றனர். இந்நிலையை அத்துறையினர் மாற்றிக் கொள்ள வேண்டும். பிறர் அதிகார வரம்பில் குறுக்கிடுவதுபோல் எண்ணிக் கொள்ளாமல் தமிழ்தொடர்பானவற்றில் தமிழறிஞர்களைக் கலந்துபேசி தக்கவாறு வழிகாட்டும் பணியை ஆற்ற வேண்டும்.

(இனியும் போகும்)

– இலக்குவனார் திருவள்ளுவன்

அகரமுதல 94 ஆவணி 13, 2046 / ஆக.30, 2015

இணையக்கல்விக்கழகத்தின் சீர்மையற்ற தேடுபொறிகள் – 5 : இலக்குவனார் திருவள்ளுவன்

இலக்குவனார் திருவள்ளுவன்      30 August 2015      No Comment

(ஆவணி 06, 2046 / ஆக.23, 2015 தொடர்ச்சி)

5

7. & 8.] யாப்பருங்கலம் & யாப்பருங்கலக்காரிகை

இவற்றுள், பொருளடக்கம் பகுதி மேற்பகுதியில் தேடுதல் தலைப்பின் கீழ்ப்,

பக்கம் தேடல்

பாடல் தேடல்

சொல் தேடல்

உள்ளன(பட உரு 29).

படவுரு 29

இருப்பினும் உள் பக்கங்களில் ‘சொல் தேடல்’ தலைப்பு இல்லை. பக்க எண் தேடல் மட்டுமே உள்ளது(பட உரு 30).

படவுரு 30

யாப்பருங்கலத்தில்.

பொருட்குறிப்பகராதி

அரும்பதம் முதலியவற்றின் அகராதி

சூத்திர முதற்குறிப்பு அகராதி

இலக்கண மேற்கோள் முதற்குறிப்பு அகராதி

இலக்கிய மேற்கோள் முதற்குறிப்பு அகராதி

உரையிற் பயின்று வந்துள்ள நூற்பெயர் அகராதி

உரையிற் பயின்று வந்துள்ள ஆசிரியர்களின் பெயரகராதி

உரையிற் பயின்று வந்துள்ள ஊர்ப்பெயர் அகராதி

ஆகிய அகராதிப்பக்கங்களிலும் தேடல் தலைப்பு இல்லை.

யாப்பருங்கலக்காரிகையின் மூலத்திலும் மூலமும் உரையும் அமைந்த பகுதியிலும் சொல் தேடுதல் வாய்ப்பு இல்லை(பட உரு 31).

படவுரு 31

இதன்,

காரிகை முதற்குறிப் பகராதி

மேற்கோட் சூத்திர முதற்குறிப் பகராதி

உதாரண இலக்கிய முதற்குறிப் பகராதி

ஆகியவற்றிலும் சொல் தேடுதலுக்கான வாய்ப்பு வழங்கப்படவில்லை.

(தொடரும்)

– இலக்குவனார் திருவள்ளுவன்

 

அகரமுதல 94 ஆவணி 13, 2046 / ஆக.30, 2015

 

தமிழ் இணையக்கல்விக்கழகம் : நோக்கும் போக்கும் 2 – இலக்குவனார் திருவள்ளுவன்

இலக்குவனார் திருவள்ளுவன்      23 August 2015      No Comment

(அகரமுதல 92 ஆடி 31, 2046 / ஆக.16, 2015 தொடர்ச்சி)

2

  தமிழ்ப்புலமையுள்ளவர்களே இயக்குநர்களாக அமர்த்தப்பட வேண்டும் என்பது குறித்துத் தமிழ்க்காப்புக்கழகம் சார்பில் அரசிற்கு முறையீடு அளிக்கப்பட்டது. இதில், பின்வருமாறு தெரிவிக்கப்பட்டது :

 “இத்தகைய நோக்கங்களையும் குறிக்கோளையும் நிறைவேற்ற தமிழ்ப்புலமை உள்ளவர் அதனை வழி நடத்தலே ஏற்றது என அனைவரும் அறிவர். ஆனால் இயக்குநராக நியமிக்கப்பட விரும்பியவரின் தகுதி அடிப்படையில் இந்நிறுவனம் தொடங்கப்பட்ட பொழுது அப்போதைய அரசால் இயற்பியல் / பொறியியல் / தகவலியலில் முனைவர் பட்டம் பெற்றிருத்தலே அடிப்படைத் தகுதியாக வரையறுக்கப்பட்டு விட்டது. போதிய தமிழறிவு என்பதை மூன்றாவதாகச் சேர்த்துள்ளனர். அவ்வாறில்லாமல் தமிழ்ப்புலமையை முதல் தகுதியாக வரையறுக்க வேண்டும்; தமிழ் தெரிந்தவர்கள் தொழில் நுட்ப வல்லுநர்கள் மூலம்   செயல்பட இயலும். ஆனால் தொழில் நுட்பம் அறிந்தவர்கள் தமிழ்ப்புலமையின்றி அதனை வளர்க்க இயலாது. எனவே, தமிழ்ப்புலமைக்கு முதன்மை அளித்துப் போதிய கணியியலறிவு இருப்பின் நலம் என்பதாக பதவிக்கான தகுதி இருக்க வேண்டும். எனவே, உடனடியாக இயக்குநர் பணியிடத்தை நிரப்பும் நடவடிக்கையை நிறுத்தி அதன் பணித்தகுதியை வரையறுத்து அதன்பின் அதற்கிணங்க இயக்குநர் பதவியை நிரப்ப அன்புடன் வேண்டுகின்றேன்.”

  இவ்வேண்டுகோள், 13.9.2011, 30.9.2011, 1.10.2011,   24.11.2011, 28.11.2011, 18.04.2012     ஆகிய நாளிட்ட மடல்களில் தொடர்ந்து வலியுறுத்தப்பட்டது. அதன்பின்னரும் வலியுறுத்தப்பட்டு வருகின்றது.

அனைத்து மடல்களின் அடிப்படை வேண்டுகோள்கள் வருமாறு:-

“இந்நிறுவனத்தைத் தமிழ் வளர்ச்சி அமைச்சகத்தின் கீழ்த் தமிழ் வளர்ச்சிச் செயலகக்கட்டுப்பாட்டில் கொணர்ந்து முழுமையான பல்கலைக்கழகமாக மாற்றித் தமிழ் இணையப் பல்கலைக் கழகம் என அமைக்க வேண்டுகின்றேன்.

ஆதலின்

௧) இயக்குநர் பணியிடம் தமிழ்ப்புலமை உள்ளவரால் நிரப்பும் வகையில் தகுதி வரையறை செய்தல்

௨) தமிழ்ப்புலமை உள்ளவர்களையே தலைவர், துணைத்தலைவர். உறுப்பினர்கள் ஆக அமர்த்துதல்.

௩.) தமிழ்வளர்ச்சி அமைச்சகத்துறையில் , தமிழ் வளர்ச்சிச் செயலகத்துறையின் கட்டுப்பாட்டில் கொணர்தல்

௪.) முழுமையான பல்கலைக்கழகமாக மாற்றித் தமிழ் இணையப் பல்கலைக்கழகம் என முந்தைய பெயரைச் சூட்டுதல்

எனத் தமிழ்நலன் கருதித் தக்க நடவடிக்கை எடுக்க அன்புடன் வேண்டுகின்றேன்.”

  மேலும், இவ்வமைப்பின் குறிக்கோள்களும் இதன் நோக்கம் தமிழைப்பரப்புவதுதான் என்பதைத் தெளிவாகக் கூறுகின்றன. சான்றாகக் குறிக்கோள் 1 இல்,

“உலகளாவிய தமிழ்ச் சமுதாயத்தினர்க்கும், தமிழியலில் ஈடுபாடுள்ள மற்றையோர்க்கும் தமிழ்மொழி, இலக்கியம், பண்பாடு பற்றிய கல்விச் சாதனங்களை உருவாக்கி இணையம் வழியாக அளித்தல் எனத் தெளிவாகக் கூறப்பட்டுள்ளது. “

பிற குறிக்கோள்கள் வருமாறு:

• பார் தழுவி வாழும் தமிழர்கட்கு, அவர்கள் தேவைக்கேற்பப் பாடத் திட்டங்களை உருவாக்கி அளித்தல்: அவர்கள் தங்கள் பாரம்பரியத்தோடு தொடர்புகொண்டு வாழத் துணைபுரிதல்.
• உலகின் பல நாடுகளில் வாழும் தமிழர்கள் உருவாக்கும் கல்வியறிவுச் சாதனங்களைத் தொகுத்து, அவற்றைப் பரவலாகத் தமிழ் மக்களுக்கு வழங்கும் முயற்சிகளைத் தொடர்ந்து மேற்கொள்ளுதல்
• தமிழ்மொழி, இலக்கியம், பண்பாடு தொடர்பான பாடத் திட்டங்களை வகுத்தல்:
• கேள்வியறிவுக்காகவோ அல்லது சான்றிதழ், பட்டயம், பட்டம் பெறுவதற்காகவோ கற்போருக்கு இப்பாடங்களைக் கற்க வாய்ப்பளித்தல்: உரிய நியமங்களை நிறைவு செய்தோருக்கு, அவர்கள் கற்ற பாடங்களின் தகுதிக்கு ஏற்பத் தஞ்சை, தமிழ்ப் பல்கலைக்கழகம் வழியாகச் சான்றிதழ்/பட்டயம்/பட்டம் வழங்க ஏற்பாடு செய்தல்..

கணிணிக்கல்வி குறித்து இவற்றுள் எங்கும் குறிப்பிடவில்லை. இவ்வாறு இருந்தால் பொறியாளர்கள் நிலை என்னாவது என எண்ணி, இவற்றிலும் தொடர்பில்லாமல், தொடக்கத்தில்,

“கணினித் தமிழுக்கான தீர்வுகளை உருவாக்குதல்” (To develop Tamil Computing solutions.)

எனப் புகுத்தப்பட்டுள்ளது.

 இவ்வாறு தமிழுக்கு எதிராகப் புகுத்தப்பட்ட புனைவாவணம் யாவற்றிலும் கணிணி தொடர்பானவற்றை நோக்கங்கள் அல்லது குறிக்கோள்களுள் இறுதியானதாகக்கூடக் குறிக்காமல் முதன்மை நோக்கமாகக் குறிப்பிட்டதிலிருந்தே, இத்தகையோர் தொடர்ந்து ஆதிக்கம் செலுத்தினால், தமிழ் புறக்கணிக்கப்பட்டுத் தமிழ் வளர்ச்சி பின்னுக்குத் தள்ளப்படும் என்பது உள்ளங்கை நெல்லிக்கனி.

 தொடக்கத்திலேயே தமிழறிஞர்கள் பொறுப்பிலும் செயற்பாட்டிலும் இவ்வமைப்பை உருவாக்கியிருந்தார்களெனில் இந்த அவலம் ஏற்பட்டிருக்காது. பெயரில் குழப்பம் இருப்பதால், இதனைத் ‘தமிழ்க்கல்வி இணையக் கழகம்’ எனப்பெயர் மாற்றலாம்.

  இப்போது இயக்குநர் பொறுப்பில் உள்ள திரு த.உதயச்சந்திரன், இ.ஆ.ப.,   “தமிழறிஞர்கள் கருத்திற்கு இணங்கத்தான் இனி இணையக்கல்விக்கழகம் செயல்படும்; அவர்கள் தெரிவிப்பதைத்தான் இனிச் செயற்படுத்தும்; கணிணிக்கல்விக்கு முதன்மை கொடுத்துத் தமிழைப் பின்னுக்குத் தள்ளமாட்டேன்” என்றார். தமிழார்வமும் தமிழ்நலனில் கருத்து செலுத்தும் ஈடுபாடும் கொண்ட புதிய செயலரால், த.இ.க.கழகம் புதிய பாதையில் நடைபோடும் என்பதில் ஐயமில்லை.

 எனினும் பதவி உயர்வு போன்றவற்றால் இவர் இப்பொறுப்பிலிருந்து விடுபடலாம். எனவே, தான் பொறுப்பில் இருக்கும் பொழுதே நோக்கம் மாற்றப்படாமல் இருப்பதற்குரிய நடவடிக்கையையும் தமிழில் உயர்பட்டம் பெற்றவர்களே இயக்குநராகப் பொறுப்பு வகிக்கும் வகையில் இயக்குநர் பதவிக்கான விதியைத் திருத்தவும் நடவடிக்கை எடுக்க வேண்டும். இதுபோல் இப்பொழுது தகவல் தொழில்நுட்பத்துறைச் செயலர் திரு தா.கி.இராமச்சந்திரன் இ.ஆ.ப. இதன் தலைவர் பொறுப்பில் உள்ளார். தமிழ்நலனுக்கு எதிராகத் த.இ.க.கழகப்பணி அமையும் பொழுது சுட்டிக்காட்டினால் உடன் நடவடிக்கை எடுக்கிறார். தகவல் தொழில்நுட்பம் சார்ந்தது எனத் தமிழ்வளர்ச்சித்துறையினர் பாராமுகமாக இருப்பதுபோல், இது தமிழ் தொடர்பானதுதானே என்று கேளாச் செவியாக இல்லாமல், இவர் ஆற்றும் பணிகளால்தான் ஒவ்வொரு நேர்விலும் தமிழுக்குத்தடை வரும் பொழுது அது விலக்கப்படுகிறது. எனினும் இவரும் பதவி உயர்வு போன்ற காரணங்களால் மாறநேரிடலாம். அடுத்து வருபவர் இவர்போல்தான் இருப்பர் என்று எதிர்பார்க்க இயலாது. எனவே. இவர் தலைவர் பொறுப்பில் இருக்கும் பொழுதே தலைவர், பிற பொறுப்புகளில் தமிழ்ப் புலமையாளர்களை அமர்த்தும் வண்ணம் விதிமுறைகளை இயற்ற வேண்டும். இப்போதைய தலைவர் திரு தா.கி. இராமச்சந்திரன் இ.ஆ.ப., இயக்குநர் திரு த.உதயச்சந்திரன் இ.ஆ.ப. ஆகியோர் கூட்டுப்பொறுப்பில் பல நன்மாற்றங்களைக் காண உள்ள த.இ.க.கழகம் தமிழ்நலப்பாதையில் இக்கழகம் செயல்படும் வகையில் அடிப்படைப்பணிகளை ஆற்ற வேண்டும்.

(இனியும் போகும்)

– இலக்குவனார் திருவள்ளுவன்

அகரமுதல 93 ஆவணி 06, 2046 / ஆக.23, 2015