Friday, May 24, 2019

நரேந்திர(மோடி)க்குப் பாராட்டுகள்! – இலக்குவனார் திருவள்ளுவன்

அகரமுதல

நரேந்திர(மோடி)க்குப் பாராட்டுகள்!

எண்ணிய இலக்கை அடைந்து வெற்றி காண வாழ்த்த வேண்டும். இலக்கை அடைந்து விட்டார் என்றால்  – வெற்றி கண்டுவிட்டார் என்றால்  – பாராட்ட வேண்டும். அந்த வகையில் இரண்டாம் முறையாகத் தலைமை யமைச்சர்பொறுப்பேற்கும் வகையில் வெற்றி கண்டுள்ள நரேந்திர(மோடி)க்குப்பாராட்டுகள்!
இலக்கு மட்டுமல்ல, இலக்கை அடையும் வழியும் நேர்மையானதாக – அறவழிப்பட்டதாக – இருக்க வேண்டும் என்பது தமிழர் நெறி. “எந்த வழியில் சென்றேனும் இலக்கை அடை” என்பது ஆரிய நெறி. இன்றைய தேர்தல் நெறி என்பது இரண்டாம் வகையைச் சேர்ந்தது. எனவே, பா.ச.க.வைமட்டும் குற்றம் கூறிப் பயனில்லை. தேர்தல் ஆணையத்தைக் கூட்டாளியாகச் சேர்த்துக் கொண்டது, வருமானவரித்துறை முதலான மத்திய அரசுத் துறைகளின் செயல்பாடுகளைத் தன் போக்கில் அமைத்து எதிர்க்கட்சியிினரையும் எதிர்ப்பவரையும் மிரட்டுவது, படைத்துறைச் செயல்பாட்டைத் தனிப்பட்ட வெற்றியாகத் திரித்துப் பரப்புவது போன்ற செயல்பாடுகளைப் பேராயக்(காங்.)கட்சி ஆட்சியிலிருந்தாலும் செய்திருக்கும். ஆள்வோருக்கு இப்படி வழிகாட்ட என்றே தன்னல அதிகாரிகள் இருக்கின்றனர். எனவே, பா.ச.க.வைமட்டும் குறை கூறிப் பயனில்லை.
பா.ச.க.ஆட்சிப் பொறுப்பேற்றதிலிருந்தே மகாராட்டிரக் கூட்டுறவு வங்கி ஊழல் முதலான பல ஊழல் செய்திகள் வெளிவந்தன. இருப்பினும் நரேந்திர(மோடி) தனக்குத்தானே நற்சான்றிதழ் வழங்கிக் கொண்டு ஊழலற்ற கட்சி எனப் பா.ச.க.வையும் ஊழலற்றவர் எனத் தன்னையும் மக்கள் பாராட்டுவதாகப் பரப்புரை மேற் கொண்டார். உண்மை உறங்கியது; அவரது சொல்வன்மை வென்றது; ஆட்சிக்கட்டிலில் தொடர்கிறார்.
பணமதிப்பிழப்பிற்கு முன்னர், 2016 ஆகத்து முதல் நவம்பர் 8 வரை, பீகார், உ.பி., தில்லி, அரியானா, இராசசுத்தான் போன்ற பல மாநிலங்களில் பா.ச.க.வினர் கோடிக்கணக்கான பணத்தை வங்கி வைப்புக் கணக்குகளில் செலுத்தினர். அதன்பின்னரே பணமதிப்பிழப்பு அறிவிப்பு வந்தது. இதன் மூலம் பலகோடிக் கணக்கான பா.ச.க.வின் பணம் காப்பாற்றப்பட்டது.  இவ்வாறு விக்னேசு சய்சுவால்(தகவல்உரிமைச்சட்டப்போராளி,தில்லி) முதலான பலரும் மெய்ப்பித்தனர். திருமணம் முதலான ஆடம்பர விழாக்களைப் பா.ச.க.வினர் நடத்தினர். பா.ச.க.வினர் கணக்கின்றிப் புதிய பணத்தாள்களை மாலையாக அணிந்து கொண்டு படங்கள் எடுத்து வெளியிட்டனர். மக்கள் தாங்கள் பட்ட இன்னல்களையும் தங்களில் சிலர் மடிந்த துயரங்களையும் மறக்கும் வகையில்  நரேந்திர(மோடி) இனிமையாகப் பேசினார்; வெற்றி வாகை சூடினார்.
பணமதிப்பிழப்பால் தொழில்கள் நொடித்தன, வேலைவாய்ப்புகள் பறிபோயின.
சரக்கு-சேவை வரியால் ( G.S.T.) தொழில்துறை அழிவைச்சந்தித்தது.
மருத்துவப் பொதுத்தேர்வால் ஏழை மாணாக்கர்களின் கனவுகள் சிதைந்தனஅனிதாக்கள் இன்னுயிர் இழந்தனர்.
மத்திய அரசின் முதன்மைத் துறைகள் காவி வண்ணமாக மாற்றப்பட்டன.
வருமானவரித்துறை முதலான துறைகள் பா.ச.க.வின் ஏவல்படையாக்கப்பட்டன.
பா..ஆளாத மாநிலங்களில் ஆளுநர்கள் மூலம் மாநில அரசுகளை அல்லல் படுத்தியது.
பதினைந்து நூறாயிரம் விலையிலான குப்பாயம்(கோட்டு) அணிந்து கொண்டு கூச்சமின்றி ஏழைத்தாயின் மகன் எனச் சொல்லி மக்களை ஏமாற்றி வருவது.
நம்நாட்டில் இருப்பதைவிடப் பிறநாடுகளில் மிகுதியான காலம் இருப்பது.
எனக் கணக்கிலடங்காக் குறைகள் இருப்பினும் அமித்துசாநரேந்திர(மோடிசிறப்பாகச் செயல்பட்டு  வெற்றியை ஈட்டியுள்ளனர்.
எனவேதிங்களேனும்   புதிய அரசைக் குறை கூறாமல் அவர்கள் போக்கில்ஆளவிடவேண்டும்அதுதான் மக்கள் முடிவிற்கு அளிக்கும் மதிப்பாகும்.
அதேநேரம், நரேந்திர(மோடி) தன் கட்சிக்குவாக்களிக்காத மாநிலங்களைப் புறக்கணிக்காமல், அம் மாநில மக்கள் புறக்கணித்த காரணங்களை உணர்ந்துஅவற்றைச் சரி செய்ய வேண்டும்.
அனைத்து இந்தியத் தேர்வு முறைகளை அகற்ற வேண்டும்.
இந்தி, சமற்கிருதத் திணிப்புகளைக் கைவிட வேண்டும்.
மக்கள் நலன்களுக்கு எதிரான செம்பு உருட்டு (சுடெருலைட்டு) தொழிலகம், கூடங்குளம் அணுமின்னகம்,  நெடுவாசல் நீரகக் கரிமம் (Hydro Carbon) திட்டம் போல் நாடு முழுவதும் உள்ள மக்கள்அழிப்புத் திட்டங்களை ஒழிக்க வேண்டும்.
பா...வளர்ச்சிக்கான கருத்துகள் வருமாறு:
கடந்த முறை ஆட்சிக்கு வந்ததும் உடனிருந்த தோழமைக்கட்சித்தலைவர்களைப் புறக்கணித்ததுபோல இல்லாமல்தமிழகத் தோழமைக் கட்சித் தலைவர்களுக்குப் பதவிகள் வழங்க வேண்டும்.
பா.ச.க.வின் ஒற்றை உறுப்பினராக இருந்த பொன்.இராதகிருட்டிணனுக்கு அமைச்சர் பதவி வழங்காமல் அதிகாரமற்றத் துணை அமைச்சர் என்னும் பொம்மைப் பதவி வழங்கப்பட்டது. இம்முறை யாரும வெற்றி பெறாக் காரணம் அவர்கள் அல்லர். பா.ச.க.வின் கொள்கையே!  தமிழ்நாட்டுத் தோல்விக்குத் தமிழகத் தலைவர் தமிழிசை காரணமானவர் அல்லர். எனவே, இந்த அளவிற்காவது வாக்குகளைத் திரட்டித் தந்த தமிழிசைக்கு அமைச்சர் பதவியும்மாநிலங்களவை பதவியும் வழங்க வேண்டும்.
எச்.இராசாவைத் தமிழக அரசியலில் இருந்து ஓரங்கட்ட வேண்டும்.
ஆட்சியின் பொழுது ஒட்டிக் கொண்டிருப்பவர்களைப் புறக்கணித்து,  உண்மையிலேயே பயன்பாராமல் உங்கள் கட்சிக்கென உழைக்கும்இதழாளர்கள்கலைஞர்கள்அறிஞர்கள் ஆகியோருக்குப் பதவிகள் அளித்துச்சிறப்பிக்க வேண்டும்.
தமிழ்நாட்டில் தமிழ்வழிக்கல்வியும் தமிழ்மொழிக்கல்வியும் இருக்கும் கல்வித்திட்டத்தையே செயல்படுத்த ஆவன செய்ய வேண்டும்.
செம்மொழித் தமிழாய்வு நிறுவனம் முறையாகச் செயல்பட ஆவன செய்யவேண்டும்.
இந்தியப்பல்கலைக்கழகங்களில் தமிழ் கற்பிக்க ஏற்பாடு செய்ய வேண்டும்.
மத்திய அரசின் ஆட்சி மொழியாகத் தமிழை நடைமுறைப்படுத்த வேண்டும்.
ஈழத்தமிழர் படுகொலைக்குகக்காரணமான இனக் கொலையாளிகளைத்தண்டிக்க நடவடிக்கை எடுக்க வேண்டும்.
“பொய்யிலே பிறந்து பொய்யிலே வளர்ந்து பொய்யிலே சிறந்தவர்” என்னும்பெயரைப் போக்கும் வண்ணம் வாய்மை வழியில் செயல்படநரேந்திர(மோடி)யை வேண்டுகிறோம்.
பா.ச.க. நேர்மையான முறையில் வெற்றியை நிலைக்கச் செய்ய இவற்றில் கருத்து செலுத்துமாறு   நரேந்திர(மோடி), அமித்து சா இருவரையும் வேண்டுகிறோம்.
17 ஆவது நாடாளுமன்றத்தில் தனிப்பெரும்பான்மை என்னும் மாபெரும்வெற்றி கண்ட இருவருக்கும் பாராட்டுகள்.
இரண்டாவது முறையாகத் தலைமையமைச்சர் பொறுப்பேற்பதற்குநரேந்திர(மோடிக்குவாழ்த்துகள்!
இறந்த வெகுளியின் தீதே சிறந்த
உவகை மகிழ்ச்சியின் சோர்வு (திருவள்ளுவர்திருக்குறள் 531)
அன்புடன் இலக்குவனார் திருவள்ளுவன்
இதழுரை – அகரமுதல  

Tuesday, May 21, 2019

பாசகவின் தேர்தல் கணிப்புச் சாயம் வெளுத்து விட்டது! – இலக்குவனார் திருவள்ளுவன்

அகரமுதல


பாசகவின் தேர்தல் கணிப்புச் சாயம் வெளுத்து விட்டது!

நடந்து முடிந்த  நாடாளுமன்றத் தேர்தலில் வாக்கிற்குப் பிந்தைய கருத்துக் கணிப்பு என ஒரு நாடகம் அரங்கேறியுள்ளது. பா.ச.க வாக்கு எண்ணிக்கையின் பொழுது குறுக்கு வழியில் வெற்றி பெற்றால் அதற்குச் சார்பாக இருக்க வேண்டும் என்பதற்காகத் தீட்டப்பட்ட நாடகம் என இதனைப் பொதுமக்களே கூறுகின்றனர்.
வாக்கிற்குப் பிந்தைய கருத்துக் கணிப்பு குறித்து நாம் பின்வருவனவற்றைப்பற்றிச் சிந்திக்க வேண்டும்.
எந்தெந்த வாக்குச்சாவடிகளில் எவ்வப்பொழுது எத்தனை பேரிடம் கருத்துக் கணிப்பு மேற்கொள்ளப்பட்டது என்ற விவரம் இல்லை.
இதுவரை ஒருவர்கூட “என்னிடம் கருத்துக் கணிப்பு கேட்டார்கள், நான் தெரிவித்தேன்” என்று கூற வில்லை. கருத்துக் கணிப்பில் கருத்து தெரிவித்தமரும மனிதர்கள் யாவர்?
கருத்து தெரிவிக்க மறுத்தவர்கள் எத்தனை பேர் எனக் கருத்துக் கணிப்பு நாடக இயக்குநர்கள் தெரிவிக்க வில்லை. அததனை பேரும் கருத்து தெரிவித்தார்கள் என்பது நம்பும்படியாக இல்லை.
கட்சிக்காரர்கள் அல்லது தீவிர ஆதரவாளர்கள் தவிர யாரும் இன்னாருக்கு வாக்களித்தேன் என்று சொல்வதில்லை. எல்லாத் தொகுதிகளிலும் பணம் வழங்கப்பட்டதாகச் செய்திகள் தொடர்ந்து வந்தன. தங்கள் வாக்குகளை விற்றவர்கள் உண்மையைச் சொன்னால் பணத்தைத் திருப்பிக் கேட்கலாம் அல்லது தாக்கப்படலாம் என்ற அச்சத்தில் யாருக்கு வாக்களித்தோம் எனக் கூற மாட்டார்கள். எனவே,   இது நம்பும்படி இல்லை.
கட்சிகள் போட்டியிடாத தொகுதிகளில்கூட அக்கட்சி பெறும் வாக்கு விகிதம்கருத்துக் கணிப்பில் தெரிவிக்கப்பட்டுள்ளதுசான்றாக வடக்கே உத்தரகாண்டு மாநிலத்தில் ஆம் ஆத்மி கட்சி போட்டியிடவில்லை. ஆனால், அத்தொகுதியில் ஆம் ஆத்மிக்கு 2.9%  வாக்குகள் கிடைக்கும் என்று ஒரு நிறுவனத்தின் கருத்துக் கணிப்பு கூறுகிறது.
காஞ்சிபுரத்தில் மக்கள் நீதி மையம் போட்டியிடவில்லை. ஆனால், அத்தொகுதியில் அது 3% முதல் 6% வாக்குகள் பெறும் என க் கருத்துக் கணிப்பு  ஒன்றில் தெரிவிக்கப்பட்டுள்ளது. அப்படி என்றால் முன்னதாகவே என்னவாறு அறிவிக்கவேண்டும் என முடிவெடுத்து அதற்கேற்ப கருத்துக் கணிப்பு விவரம்புனையப்பட்டுத் தெரிவிக்கப்பட்டுள்ளது என்பது தெளிவாகத் தெரிகிறது.
மிகப் பெரிய பித்தலாட்டம்  ஒட்டு மொத்த எண்ணிக்கையில் உள்ளதுமாநில வாரியாகக் கணக்கெடுத்தால் பா.ச.க.விற்குக் குறைவான ஆதரவுதான் உள்ளது. ஆனால் நாடு தழுவிய கணிப்பாகக் கூறும் பொழுது அது மிகுதியாகப் பெறுவதாகத் தெரிவிக்கப்பட்டுள்ளது.
தென்னக மாநிலங்களில் கருநாடக மாநிலம் தவிர பிற மாநிலங்களில் மாநிலக் கட்சிகள்தாம் பெரும்பான்மைத் தொகுதிகளில் வெற்றி பெறும் என்று கற்பனைக் கணிப்பு கூறுகிறது. கருநாடகாவில் பா.ச.க.வை முன்னிறுத்துவதன் காரணம்,  அங்கே ஆளும்  ம.ச.த. – பேராய (காங்.) கூட்டணிக் கட்சிகளிடையே கருத்து மாறுபாடு உள்ளது. எனவே, அங்கே பா.ச.க. வெற்றி பெறும் என்று தெரிவித்தால் இப்போதைய சட்ட மன்ற உறுப்பினர்களிடம் பேரம் பேசி ஆட்சியைக் கவிழ்க்கலாம் எனக் கருதுவதாக அம்மாநிலத்தவர் தெரிவிக்கின்றனர்ஆகவே, இதுவும் பொய்க்கணக்குஎன்றுதான் தெரியவருகிறது.
குசராத்து, தில்லி, அசாமில் பா.ச.க. தனிப்பெரும்பான்மை பெறும் எனத் தெரிவிக்கப்பட்டுள்ளது. ஒட்டு மொத்த எண்ணிக்கையில் இவை குறைவானவையே!
மகாராட்டிரத்தில் பாசக கூட்டணி மிகுதியாகப் பெறும் எனத் தெரிவிக்கப்பட்டுள்ளது. தேவைப்பட்டால் இதன் கூட்டணி சிவசேனா பா.ச.க.விலிருந்து விலகலாம்.
மே.வங்காளம்.பி., பஞ்சாபுவடகிழக்கு மாநிலங்களில் தென்னகம் போன்றுபா.ச.க. பெரும்பான்மை பெறவில்லை.
சம்மு,காசுமீரில் பாதி எண்ணிக்கையில் பாசக வெற்றி பெறுமாம்.
பொதுவாகத் தொகுதிகளைக் கணிக்கும் பொழுது ஒன்று அல்லது இரண்டு வேறுபாடு இருந்தால் ஏற்கலாம். ஆனால் அவ்வாறில்லை. சான்றாக ஒரிசாவில் பாசக 6 இலிருந்து 19 தொகுதிகள் வரை பெறுமாம். அம்மாநில ஆளுங்கட்சியான பிசு சனதா தளம் 2 இலிருந்து 15வரை பெறுமாம். மொத்தத் தொகுதியான 21 என்பதைக் கணக்கு காட்டவேண்டும் என்ற சொல்லப்பட்டதாக உள்ளது. உண்மையை எதிரொலிப்பதாக இல்லை.  இவ்வாறு குறைந்த எண்ணிக்கைஒன்றையும் மிகுதியான எண்ணிக்கை ஒன்றையும் தெரிவித்துவிட்டு இறுதியில் மிகுதியான எண்ணிக்கையைக் கூட்டிப் பா...விற்குப்பெரும்பான்மை  என்று கதையளக்கின்றனர்இதனையே மாற்றிச் சொன்னால்  – பிசு சனதா தளத்திற்கு 15, பா.ச.க.விற்கு 6 எனக் கணக்கிட்டால் – இவ்வாறு ஒட்டு மொத்தத் தொகுதி முடிவைக் கணித்தால் – பா.ச.க.மண்ணைக் கெளவுகிறது என்றுதானே வருகிறது.
மாநிலக்கட்சிகளை இழுப்பதற்கான நாடகம் என்பதற்கு மற்றொரு சான்றுதமிழ்நாட்டில் தி.மு.க.கூட்டணி  அறுதிப்பெரும்பான்மைத் தொகுதிகளில் வெற்றி பெறும் என்பதால் அது இந்தக் கருத்துக் கணிப்பை நம்பும்.  எனவே,  மத்தியில் பாசகதான் ஆட்சி அமைக்கும் என்ற கருத்துக் கணிப்பை ஏற்று அதன் பக்கம் சாய முயலலாம் என்பதே பா.ச.க. எண்ணம். அதற்கேற்ப இதழ் ஒன்றில் பா.ச.க. தலைவர் அமித்துசா தி.மு.க. தலைவர் மு.க.தாலினுடன் பேச முயலுவதாகச் செய்தி வந்துள்ளது. ஆனால் பா.ச.க.வின் பக்கம் சாயும் நிலையில் தி.மு.க.இல்லை.
அ.தி.மு.க. சில தொகுதிகளில் மட்டுமே வெற்றி பெறும் எனக் கூறுவதன் மூலம் அதனை மிரட்டலாம் எனப் பா.ச.க. எண்ணலாம். ஆனால், இதனால் அ.தி.மு.க.வினர் தினகரனின் அ.ம.மு.க.பக்கம் சாயத்தான் இஃது உதவும்.
இக்கணிப்பை வெளியிட்ட பா.ச.க. ஆதரவு இதழ்களே இதனை நம்பவில்லை.எனவே , நம்புவதற்கில்லை, என்றும் வாக்கு எண்ணிக்கை நாளான மே 23 இல் தான் உண்மை தெரியும் என்றும் இறுதியில் குறித்துள்ளனர். அதுபோல் பா.ச.க. தலைவர்களுக்கே நம்பிக்கை இல்லை. அதனால்தான் குடியரசுத் துணைத்தலைவர் வெங்கையா போன்றோர் இதனை ஏற்க இயலவில்லை என்பதை வெளிப்படையாகத் தெரிவித்தனர்.
எனவே, நடைமுறைக்கு ஒத்து வராத கற்பனையான பா.ச.க.வின் ஆதரவுக் கருத்துக் கணிப்புகளை மக்கள் தூர எறிந்து விட்டார்கள்.
அடுத்து மத்தியில் அமையும் ஆட்சி  எப்படி கணிப்பு மேற்கொண்டார்கள் என விசாரணை ஆணையம் வைத்து இட்டுக்கட்டிய தகவல்களைப் பரப்பியஊடகங்களுக்குத் தண்டனை வழங்க வேண்டும்.
ஆளுங்கட்சிகளின் கூட்டணிக் கட்சிகளாகச் செயல்படும் தேர்தல் ஆணையம் மீது நடவடிக்கை எடுக்க வேண்டும்அப் பொழுதுதான்  இனிமேலாவது தேர்தல் ஆணையம் நடுநிலையுடன் நடந்து கொள்ளும்.
எற்றிற்கு உரியர் கயவர்-ஒன்று உற்றக்கால்
விற்றற்கு உரியர் விரைந்து.(திருவள்ளுவர், திருக்குறள் 1080)
அன்புடன் இலக்குவனார் திருவள்ளுவன்
இதழுரை – அகரமுதல

Followers

Blog Archive