நாணமின்றி நடுநிலை தவறும் விசய் தொலைக்காட்சி!

இலக்குவனார் திருவள்ளுவன்      28 February 2015      No Comment

நாணமின்றி நடுநிலை தவறும் விசய் தொலைக்காட்சி!

  கடந்த இதழுரையிலேயே “திறந்த புத்தகம்போல் விசய் தொலைக்காட்சி இருக்க வேண்டும்” எனக் குறிப்பிட்டு இருந்தோம். ஆனால் உச்சப்பாடகர் நிகழ்ச்சியில் உலக மக்கள் தங்களைக் கவனித்துக் கொண்டிருக்கின்றனர் என்ற அச்சம் இல்லாமலும் தட்டிக் கேட்பதற்கு யாருமில்லர் என்ற தலைக்கனத்தாலும் வாக்கில் முதலிடம் பெற்றவருக்குப் பரிசு அளிக்காமல் மூன்றாம் இடம் பெற்றவருக்கு முதல் பரிசு அளித்துள்ளனர். ஒரு கோடிக்கு மேல் ஒருவர் வாக்கு பெற்றது பாரறிய அறிவிக்கப்பட்டது. அவர் (ஃச்) பூர்த்தியாக இருந்தால் அந்த வாக்கு எண்ணிக்கையை அறிவித்திருப்பர். மக்கள்வாக்கும் நடுவர் முடிவும் ஒத்துப் போவதாகவும் கூறியிருப்பர். அவ்வாறு சொல்லாததே முதலிடத்தில் உள்ளவர் பூர்த்தியல்ல என்பதை உறுதிப்படுத்துகிறது. முதலில் ஆறு கோடிக்கு மேல் வாக்குகள் வந்ததாகக் கூறியதன் காரணம், முதல் பரிசு பெறப்போவது தமிழ்ப்பெண் என்பதால் அவருக்குத் தர விருப்பமின்றிப் பிறரும் கோடிக்கணக்கில் வாக்குகள் பெற்றதாகக் கணக்குக் காட்டி விரும்பிய தமிழரல்லாதவருக்குப் பரிசு தர எண்ணியிருப்பர். ஆனால், குறைந்த காலத்தில் அதற்கான வாய்ப்பு இன்மையால், தவறாகத் தெரிவித்துவிட்டதுபோல் அறிவித்து விட்டனர்.

  தேர்தல் என்று வந்துவிட்டாலே வாக்கு அடிப்படையில்மட்டும்தான் வெற்றி முடிவாக வேண்டும். சட்டமன்ற, நாடாளுமன்றத் தேர்தலில் நல்லவர் குறைவான வாக்குகள் பெற்று மிகுதியான கொலைகளும் கொள்ளைகளும் புரிந்த ஒருவர் வெற்றி பெற்றால் அவரைத்தான் வென்றவராக அறிவிக்க இயலுமே தவிர, நல்லவர் வாய்ப்பை இழக்கிறாரே என்று பரிவில் அவரை வென்றவராக அறிவிக்க முடியாது. அதுபோல்தான் வாக்குஅடிப்படையிலான எல்லாத் தேர்தல்களும். ஆனால், இங்கே முதலிடம் பெற்றவர் உண்மையில் குரலினிமையும் பாடற்திறமையும் பெற்ற தகுதியானவரே! ஆனால் தமிழர் என்பதைத் தகுதிக்குறைபாடு எனக் கருதுவோரால் அவர் வெற்றி பறிக்கப்பட்டுள்ளது. அதுபோல் இரண்டாமிடத்தில் இருந்தவரும் தமிழ்ச்சிறுமிதான். எனவே மூன்றாவதாக வந்த தமிழச்சி அல்லாதவருக்கு வாகைப்பட்டம் சூடியுள்ளனர். இதேபோல் ஐந்தாம் இடம் வந்தவருக்கு மூன்றாம் இடம் அளித்துள்ளனர். எனவே, முதல் கோணல் முற்றம் கோணலாகி ஒட்டுமொத்த முறைகேடாக அமைந்துள்ளது.

  மொத்த வாக்குகளில் 65 விழுக்காடு பெற்றவருக்கு மூன்றாம் பரிசாம்! அவர் பெற்றதில் ஒன்பதில் ஒரு பங்கு பெற்றவருக்கு முதல் பரிசாம்! இரண்டாம் இடம் பெற்றவருக்குப் பரிசு இல்லையாம்! அவரது வாக்கு எண்ணிக்கையில் 4இல் 1 பங்கு வாக்கு பெற்றவருக்கு மூன்றாம் பரிசாம்! வாக்குகள் பெற்ற யாரையும் பாடல் திறமையற்றவர் என நடுவர்கள் சொல்ல முடியாது. ஏனெனில் பல்வேறு தடைகளைக் கடந்துதான் முன் இறுதி நிலைக்கும் இறுதி நிலைக்கும் வந்துள்ளனர். எனவே எப்பொழுது வாக்கு அடிப்படையில் வாகையாளரை முடிவெடுக்கின்றார்களோ அப்பொழுதே நடுவர்களுக்கு அங்கே வேலை யில்லை என்பதைப் புரிந்து கொண்டு ஒதுங்கியிருக்க வேண்டும். அவ்வாறு ஒதுங்கினால் தாங்கள் விரும்புபவருக்குப் பரிசளிக்க முடியாதே! இத்தகைய முடிவால் பரிசுத்தொகையில் பங்குபெறும் ஊழலும் இடம் பெற்றுள்ளதோ என எண்ணுவதிலும் தவறிருக்காது. முடிவை அறிவித்ததும் செசிக்கா, அசுனுசுயா குடும்பத்தினர் வாக்கு எண்ணிக்கையை அறிவியுங்கள்; நாங்கள் பரிசு பெற்றுக் கொள்கிறோம் எனத் தெரிவித்திருக்க வேண்டும். நடுவர் முடிவு இறுதியானதுபோன்ற ஏதேனும் விதி உள்ள ஒப்பந்தத்தில் கையொப்பம் இவர்களிடமிருந்து பெறப்பட்டதோ எனத் தெரியவில்லை.

தினைத்துணையாங் குற்றம் வரினும் பனைத்துணையாக்

கொள்வர் பழிநாணு வார் (திருக்குறள் 433)

என்னும் திருவள்ளுவர் மிகச்சிறுஅளவு குற்றம் நேர்நதாலும் பழிச்செயல்களுக்கு வெட்கப்படுபவர் மிகப் பெரிய அளவாகக் கருதுவர் என்கிறார். ஆனால், இவர்களோ இமயமலை அளவு மிகப் பெருங்குற்றம் தொடர்ந்து புரிந்தாலும் வெட்கமின்றி உலவுகின்றனரே! இவர்கள் தம் சொந்தப்பணத்தில் சாதி, மொழி, இனம் பார்த்துப் பரிசு வழங்கினால் நாம் ஒன்றும் சொல்லப்போவதில்லை. ஆனால் மக்கள் பணத்தில் அல்லவா விளையாடுகிறார்கள்! மக்கள் வாக்குஅளிக்கும் பொழுது செலுத்தும் கட்டணத்திலிருந்துதான் நிகழ்ச்சி   நடைபெறுகிறது என்னும் பொழுது அதிலிருந்து அளிக்கப்படும் பரிசுத் தொகையும் மக்கள் பணம்தானே!

  எனவே, விசய் தொலைக்காட்சி நிறுவனமும் இதனை நடத்தும் ஏர்டெல் நிறுவனமும் உண்மை எண்ணிக்கையை அறிவித்து அதற்கிணங்கப் பரிசுகளை அறிவிக்க வேண்டும். முறைகேட்டிற்குக் காரணமானவர்களை இனித் தம் நிகழ்ச்சிகளில் பங்கேற்கத் தடை விதிக்க வேண்டும். முதல் பரிசு பெற்ற பூர்த்தி குடும்பத்தினரும் இம் முறைகேட்டிற்கு உடந்தையாக இருந்திருப்பின் அவருக்கு வழங்கிய பரிசைத் திரும்பப் பெறவேண்டும். உடந்தை இல்லை எனத் தெரியவந்தால் அப்பரிசுத் தொகையைத் திரும்பப் பெற வேண்டா. ஆனால், முதலிரு இடம் பெற்றவர்களுக்கும் அவர்களுக்கு முன்பு வழங்கிய பரிசுகளைத் திரும்பப் பெறாமலேயே புதியதாக மீண்டும் பரிசுகள் அளிக்க வேண்டும். அல்லது வாக்காளர்களுக்கு அவர்களிடமிருந்து பெற்ற கட்டணங்களை ஏதேனும் வகையில் திரும்பத்தர வேண்டும். அஃதாவது பணமாகத்தான் திரும்பத்தரவேண்டும் என்றால் நடைமுறைச்சிக்கல்கள் எழலாம் என்பதால், அந்தத் தொகைக்கு அலைபேசி அழைப்புகளை மேற்கொள்ளலாம் என்பதுபோன்ற முறையில் செலுத்திய கட்டணங்கள் திரும்பப் பெற வேண்டும். முறைகேட்டிற்குக் காரணமானவர்களிடமிருந்து முதலில் அளிக்கப்பட்ட பரிசு மதிப்பினைச் சமமாகப் பெற வேண்டும்.

இதனைக் கண்டுகொள்ளாமல் வழக்கம்போல் அமைதிகாத்து அடுத்து வரும் போட்டியையும் இதே மோசடி முறையில் திட்டமிட்டால், விசய் தொலைாக்காட்சி நிறுவனமும் ஏர்டெல்நிறுவனமும் முறைகேடுகளுக்குக் காரணம் என்பது தெளிவாகும். அப்படியாயின்

1.       நம் நாட்டிலிருந்தோ பிறநாட்டிலிருந்தோ இசையன்பர்கள் இந்நிறுவனத்தின் மீது வழக்கு தொடுக்க வேண்டும்.

2.  விசய் தொலைக்காட்சியையும் அதில் பங்கேற்கும் கலைஞர்களையும் புறக்கணிக்க வேண்டும்.

3.       விளம்பரங்களும் தரக்கூடாது.

4.      இதன் நிகழ்ச்சிகளிலும் பங்கேற்கக்கூடாது.

5. சிங்களத் தோழமை நிறுவனம் என்ற காரணத்தால் ஒரு சாராரால் புறக்கணிக்கப்படும் ஏர் டெல் நிறுவனத்தை உலக மக்கள் அனைவருமே புறக்கணிக்க வேண்டும்.

அதுதான் இவர்களுக்கும் இவர்களைப் போன்ற ஊடக ஊழல் வாதிகளுக்கும் தண்டனையாக அமையும்.

   தவறான தீர்ப்பு வழங்கிய குற்றத்திற்காக வளைந்த செங்கோலை நிமிர்த்த பாண்டிய மன்னன் உயிரையே விட்டான். இவர்கள் உயிரை விடவேண்டா! அறம்வழங்கி முறைப்படி வென்றவர்களுக்குப் பரிசும் பட்டமும் அளித்தால் போதும்! செய்வார்களா?

அன்புடன் இலக்குவனார் திருவள்ளுவன்
இதழுரை
அகரமுதல 67 நாள் மாசி10, 2046 / பிப்பிரவரி 22, 2015

தமிழ்ப்பற்றுக்கு வழி வகுக்கும் விசய் தொலைக்காட்சி!

இலக்குவனார் திருவள்ளுவன்      08 February 2015      No Comment

தமிழ்ப்பற்றுக்கு வழி வகுக்கும் விசய் தொலைக்காட்சி!

தேர்வு முறையில் நடுநிலையைப் பின்பற்றுக!

  மக்கள் தொலைக்காட்சி நீங்கலான தொலைக்காட்சி நிறுவனங்கள் தமிழ்க்கொலையையே தொழிலாகக் கொண்டுள்ளன. சிறிய தொலைக்காட்சி நிறுவனங்கள் கதைத் தொடரை ஒளிபரப்பாமல் பண்பாட்டுக் கொலைபுரியாமல் தொண்டு புரிகின்றன. அவ்வாறிருக்க விசய் தொலைக்காட்சி – அதுவும் சீ சீ என்பதுபோல் பெயருக்குப்பின்னர் பாட்டியம்மா சொல்வதும் முதல் எழுத்துகளைத் தமிழில் குறிப்பிடும் தொகுப்பாளரும் அவ்வாறே சொல்லத் தொடங்கியுள்ளதும் பாடல்நிகழ்ச்சிகளில்கூட சாங்கு, சிங்கர், சூப்பர் போன்று ஆங்கிலச் சொற்களைக் கூறுவதையே கடமையாகக் கொண்டுள்ளதுமான விசய் தொலைக்காட்சி – எவ்வாறு தமிழ்ப்பற்றுக்கு வழி வகுத்துள்ளது என வியக்கலாம்!

 ஆனால், இதன் உச்சப்பாடகர்  அல்லது மேன்மைப்பாடகர் நிகழ்ச்சியைப் பார்ப்பவர்களுக்கு அவர் தமிழராக இருந்தால் இயல்பாகவே தமிழ்ப்பற்று ஊற்றெடுக்கும். பொதுவாகத் தமிழரல்லாதவர்தான் நடுவர்களாக இரு்பபார்கள். அவர்கள் தெரிவில் நடுநிலையுள்ளதுபோல் காட்டப்படும். அவர்கள் தமிழ் உச்சரிப்பிற்கு முதன்மை அளிப்பது பாராட்டிற்குரியதாக இருக்கும். ஆனால் தமிழைத் தாய்மொழியாகக் கொண்டிராத பிற மொழிச்சிறாரைப் புகழ்வதையும் அவர்களுக்குக் கூடுதல் மதிப்பெண்கள் தருவதையும் காணலாம். தமிழ்ச்சிறார் நன்றாகப் பாடினாலும், “உன் குரல் உடைந்து விட்டது; அதனால் இப்படிப் பாடுகிறாய்” என்பதுபோல் பாடலில் குறை இருப்பதுபோன்ற தோற்றத்தைக் காட்டுவதையும் பிற மொழிச்சிறார் பாடலில் குறை இருந்தால், “உனக்கு இன்று உடல்நலக்குறைவு அவ்வாறிருந்தும் நன்றாகப் பாடியுள்ளாய்; எனவே, முந்தைய திறமை அடிப்படையில் மதிப்பெண் அளிக்கிறோம்” எனச் சொல்வதையும் காணலாம்.

  சிறார் எம் மொழியினராக இருப்பினும் அவர்களின் ஆர்வம், முயற்சி, திறமை முதலியவற்றைப் பாராட்டுகிறோம். பொதுவாக அனைவரையைும் ஊக்குவிக்கும் முறையில் கருத்து தெரிவிக்கும் நடுவர்களையும் சிறப்பு அழைப்பாளர்களையும் பாராட்டுகிறோம்! ஆனால், தமிழ்நாட்டில் தமிழில் நன்றாகப் பாடக்கூடிய தமிழ்ச்சிறார் யாருமில்லையா? எப்பொழுதுமே பிற மொழிச்சிறார்களை வெற்றியாளர்களாக அறிவிப்பதேன்? இதனால் மனம் குமுறிய உலகத் தமிழ் மக்கள், பிற மொழிச்சிறார் மூவரை நடுவர்கள் இறுதிப்போட்டிக்குத் தேர்ந்தெடுத்ததால் தமிழுணர்வு கொண்டு தமிழ்ச்சிறார்களை வாக்களித்து இறுதிப் போட்டிப் பங்கேற்பாளர்களாகத் தேர்ந்தெடுத்துள்ளனர். இத்தகைய தமிழ் உணர்வு பரவக் காரணமாக இருந்த விசய் தொலைக்காட்சிக்கு வாழ்த்துகள்!

  நிகழ்ச்சிக்குப் பொறுப்பாளர்கள் நிகழ்ச்சியை நடத்தும் விதத்திற்கும் பங்கேற்பாளர்களை மதித்து அளிக்கும் வாய்ப்பு வசதிகளுக்கும் பாராட்டுகிறோம். அதே நேரம் தேர்வு முறை நடுநிலை பிறழ்ந்து அமைந்துள்ளதையும் சுட்டிக்காட்ட விரும்புகிறோம்.

  நடுவர்கள் மதிப்பெண் அளித்து வெற்றியாளர்களை ஒவ்வொரு நிலையிலும் முடிவெடுக்கும் நேர்வுகளில், அம் முடிவு தவறாக இருந்தாலும் பொதுமக்கள் குறுக்கிட இயலாது. அவ்வாறிருக்க, பொதுமக்கள் வாக்குகள் அளித்து வெற்றியாளர்களைத் தெரிந்தெடுக்கும் முறையில் நடுவர்களின் குறுக்கீடு ஏன்? தாங்கள் விரும்பியவர்கள் பொதுமக்களால் தேர்ந்தெடுக்கப்படவில்லை என்றால் அவருக்கு அதிக மதிப்பெண் அளித்து வெற்றியாளராகக் காட்டுவது எந்த வகையில் முறையாகும்? எனவே, எப்பொழுது தெரிவு முடிவு பொதுமக்களின் கைகளுக்கு வந்து விடுகிறதோ அப்பொழுதே நடுவர்கள் தெரிவு முடிவில் இருந்து விலகி யிருக்க வேண்டும். வாக்கெடுப்பு என்றால் வாக்கெடுப்பைமட்டும்தான் அளவுகோலாகக் கொள்ள வேண்டுமே தவிர, நடுவர்களின் மதிப்பீட்டை அல்ல!

  மேலும், ஒவ்வொரு வாக்கு எண்ணிக்கை முடிவிலும் வெற்றியாளரர்களின் வாக்கு விவரங்களை மட்டும்மதான் தெரிவிக்கின்றனர். பிறரது வாக்கு எண்ணிக்கையைத் தெரிவிப்பதில்லை. அவர்கள் குறைவான வாக்குகள் பெற்றுள்ளமையால் தெரிவிக்கவில்லை என்ற முடிவு தவறாகும். வெற்றி வாய்ப்பை இழந்தவர்கள் தங்களுக்குள்ள செல்வாக்கைப் புரிந்துகொள்ள வாக்கு எண்ணிக்கை துணையாகும். இல்லையேல் முடிவு அறிவிப்பதில் முறைகேடு இருக்கிறது எனப பொதுமக்கள் எண்ணுவதில் தவறில்லை என்றாகும்.

  பணவசதி உள்ளவர்கள் வெற்றி பெறும் வகையில் வாக்களிப்பு முறை இருப்பதும் தவறாகும். ஒருவர் எத்தனைக் குறுந்தகவலும் அனுப்பலாம் என்பது வாக்களிப்பு முறை. எனவே, வசதியுள்ள போட்டியாளர்கள் தாங்களே மிகுதியாக வாக்களித்து வெற்றி முடிவைத் திருப்ப இயலும். இதுபோல், ஒரு கணிப்பொறியிலிருந்து – ஓர் இணையநெறிமுவரியிலிருந்து (IP address) – 500 வாக்கு அளிக்கலாம் என உள்ளது. இம்முறையும் பணச் செல்வாக்கு உள்ளவர்கள் வெற்றியை முடிவுகட்டும் வகையில்தான் உள்ளது. எனவே, இம்முறை தவறானதாகும்.

  இறுதிப்போட்டிக்கான பங்கேற்பாளர்களைத் தெரிவு செய்யும் வாக்கெடுப்பு முடிவை உடனே அறிவிக்காமல் காலந்தாழ்த்தி அறிவிப்பதும் தெரிவுமுறையில் ஊழல் உள்ளதாகப் பொதுமக்களை ஐயப்பட வைக்கின்றது. 500க்குமேல் ஒரே இணையநெறி முகவரியிலிருந்து வந்த வாக்குகளை எண்ணிக் கழிப்பதற்கு நேரம் எடுத்துக்கொண்டதுபோல் கருதும் வகையில் விவரம் அளிக்கிறார்கள். இதுவும் தவறே. கணிணி மூலம் நடைபெறும் வாக்கெடுப்பில் உடனுக்குடன் முடிவுகளை அறிய இயலும். அவ்வாறிருக்க வியாழன் முடிவான வாக்குப்பதிவின் எண்ணிக்கையை அறிய திங்கள் அல்லது செவ்வாய்வரை ஆனதாகக்காட்டுவதும் மோசடியே என மக்கள் எண்ணுகின்றனர். இதை உடனே அறிந்து தெரிவிப்பதுடன் ஒருவருக்கு இவ்வாறு (மொத்த எண்ணிக்கையிலிருந்து நீக்கப்பட்ட) போலியாக அளிக்கப்பட்ட வாக்குகள் எண்ணிக்கையையும் தெரிவிக்க வேண்டும்.

  விசய் தொலைக்காட்சியின் மூடுமந்திரம் அதன் மோசடியை உணர வைப்பதாக உள்ளது. எனவே, திறந்த புத்தகம்போல் விசய் தொலைக்காட்சி இருக்க வேண்டும்.

  பங்கேற்பாளர்களின் பாடல் சிறப்பிற்கு இசையமைப்புக் குழுவினர் முதன்மைக் காரணமாக உள்ளனர். எனவே, பரிசளிக்கும் பொழுது இசைக்குழுவினர் ஒவ்வொருவருக்கும், நிகழ்ச்சியின் பின்னணியில் உழைக்கும் ஒப்பனையாளர்கள், படக்குழுவினர் முதலான ஒவ்வொருவருக்கும் பொதுமக்கள் முன்னிலையில் சிறப்பான பரிசுகள் அளிக்க வேண்டும்.

அடுத்த நிகழ்ச்சியையாவது பண்பாட்டை எதிரொலிக்கும் பாடல்கள்மட்டும் இடம் பெறும் வகையிலும் தமிழ்ச்சிறாரைப் புறக்கணிக்காத வகையிலும் அமைக்க வேண்டுகின்றோம்.

வெற்றி வாய்ப்பைப் பெற்றாலும் இழந்தாலும் பாடல் சிறார் அனைவருக்கும் வாழ்த்துகள்!

அன்புடன் இலக்குவனார் திருவள்ளுவன்

அகரமுதல இதழுரை 65

நாள் தை 25, 2046, பிப்பிரவரி 08, 2015

- அகரமுதல 65 நாள் தை25, 2046 /பிப்பிரவரி 08, 2015