சட்டச் சொற்கள் விளக்கம் 256-260 : இலக்குவனார் திருவள்ளுவன்

 

ஃஃஃ     இலக்குவனார் திருவள்ளுவன்      25 April 2024      அகரமுதல

(சட்டச் சொற்கள் விளக்கம் 251-255 : இலக்குவனார் திருவள்ளுவன் – தொடர்ச்சி)

சட்டச் சொற்கள் விளக்கம் 256-260

256. abstract of judgment	தீர்ப்பாணைச் சுருக்கம்   தீர்ப்பின் சுருக்கம் அல்லது தீர்ப்பாணையின் சுருக்கம் என்பது, ஒரு தீர்ப்பின் எழுதப்பட்ட சுருக்கமாகும்.   வழக்கில் வென்றவருக்கு(தீர்ப்புக் கடனாளி) இழப்பீட்டு எதிர்வாதி எவ்வளவு பணம் செலுத்த வேண்டும் என்பதைக் குறிப்பிடுகிறது.   தீர்ப்புத் தொகை, நீதிமன்றச்செலவுகள், இழப்பீட்டு எதிர்வாதி கண்டிப்பாகப் பின்பற்ற வேண்டிய உத்தரவுகள், செலுத்தப்பட வேண்டிய வட்டி விகிதம், ஆகியவை குறிக்கப்பெற்ற சுருக்கம்  ஒப்புக்கொள்ளப்பட்டு, முத்திரையிடப்பட்டு, பதிவு செய்யப்பட்டு, அரசாங்கத்தின் அதிகாரபூர்வ ஆவணமாக்கப்படும்.
257. abstract of record	ஆவணச் சுருக்கம்   ஆவணச் சுருக்கம் அல்லது பதிவுச் சுருக்கம் என்பது, உசாவல் நீதிமன்றச்செயற்பாடுகளை மேல்முறையீட்டு மன்றத்தில் மறுஆய்வு செய்வதற்காக வைக்கப்படும் வழக்கு விவரமாகும். கீழ் நீதிமன்றத்தில் இவை முறையாகப் பேணப்படுகிறதா எனப் பார்ப்பதற்கும் உதவுகிறது.   வழக்கில் நாளது வரை எடுக்கப்பட்ட நடவடிக்கைகள், வழக்கில் உசாவல்(விசாரணை) மன்றத்தின் முடிவு, முடிவெடுக்கப்படவேண்டிய சட்டச்சிக்கல்கள் என வழக்கின் உள்ளபடியான விவரங்களின் உட்கூறுகளை மேலமைமன்றத்திற்குத் தெரிவிக்கும் ஆவணமாகும்.   மேல்முறையீட்டு மன்றம் கருதிப்பார்க்க வேண்டிய முதன்மை விவரங்களைச் சுருக்கமாகத் தெரிவிக்கும் பதிவுரு.
258. abstract of the instrument	உரிமை யாவணச் சுருக்கம்.   Instrument என்பது இந்த இடத்தில் கருவி என்னும் பொருளில் வரவில்லை. செயற்படுத்துவதற்கு அல்லது நிறைவேற்றுவதற்கு உரிய உரிமை கூறும் ஆவணம்.
259. abstract of title	தொகுப்பு உரித்து   உரிமைமூலச் சுருக்கம்   விற்பனையாளரால் வரையப்படும் ஓர் ஆவணம். சொத்துக்கான உரிமைப் பத்திரங்களைச் சுருக்கமாகக் கூறுகிறது.   நிலத்தை அடையாளம் காணும் சுருக்க வரலாறாகக் கருதலாம். சொத்தின் உரிமையாளர் தன் உரிமையை மெய்ப்பிக்க உதவுகிறது.   காண்க 117:absolute conveyance-முழுமை உரித்து மாற்றம்
260. abstract statement	சுருக்க அறிக்கை   தேர்தல் செலவினச் சுருக்க அறிக்கை, நிதிநிலைச் சுருக்க அறிக்கை போன்று ஓர் அறிக்கையின் சுருக்க வடிவம்.

(தொடரும்)

இலக்குவனார் திருவள்ளுவன்

சட்டச் சொற்கள் விளக்கம் 251-255 : இலக்குவனார் திருவள்ளுவன்

 

ஃஃஃ     இலக்குவனார் திருவள்ளுவன்      22 April 2024      அகரமுதல

(சட்டச் சொற்கள் விளக்கம் 246-250 : இலக்குவனார் திருவள்ளுவன் – தொடர்ச்சி)

சட்டச் சொற்கள் விளக்கம் 251-255

251. Abstinence	தவிர்ப்பு   விட்டொழித்தல், உண்ணாநோன்பு, துய்ப்புத் தவிர்ப்பு   விருப்பமான ஒன்றை விலக்கல் அல்லது செய்யாது விடுதல்.   காண்க: abstain; 2. Abstaine
252. Abstract	பொருண்மை;   பொழிப்பு; பிழிவு; கருத்தியலான; உரைச்சுருக்கம் எடுகுறிப்பு; சுருக்கக் குறிப்பு, (சுருக்கக்குறிப்புகள்,).   ஒரு நூல் அல்லது ஆவணத்தின் அடிப்படைக் கருத்தின் சுருக்கம் மக்கள் அல்லது பொருட்கள் பற்றிய பொதுப்படையான கருத்தைக் சுருக்கப் பொழிவாக எடுத்துரைக்கும் முறை   குழந்தைத் தொழிலாளர் (தடை மற்றும் ஒழுங்குமுறை) சட்டம், 1986, பிரிவு 12./ Child Labour (Prohibition and Regulation) Act, 1986)
253. Abstract bill	சுருக்கப்பட்டி   மாநில அரசால் சில்லறைச் செலவினப் பொருள்களுக்கான பணத்தைப்பட்டியல் வழிக் கோருகையில் ஆதாரச் செலவுச்சீட்டு இல்லாத நேர்வில், பிற்பாடு சுருக்கப்பட்டியில் இணைத்துக் கோரப்படுகிறது.
254. Abstract book	சுருக்கப் புத்தகம்   கட்டுரைச் சுருக்கங்களின் தொகுப்பு   கருத்தரங்கப் பங்கேற்பாளர்களின் பயன்பாட்டிற்காகச் சுருக்கித் தரப்படும் தொகுப்பாகும்.
255. abstract of accounts	கணக்குச் சுருக்கம்   ஒரு நிறுவனம் அல்லது அமைப்பின் ஆண்டுக் கணக்கு விவரங்களைச் சுருக்கமாக வெளியிடப்படுவதாகும். பொதுவாக, நிதியாண்டின்  நிதிநிலை, செயல்பாட்டின் உண்மையான பார்வையை இது வழங்குகிறது.

(தொடரும்)

இலக்குவனார் திருவள்ளுவன்

சட்டச் சொற்கள் விளக்கம் 246-250 : இலக்குவனார் திருவள்ளுவன்

 

ஃஃஃ      இலக்குவனார் திருவள்ளுவன்      18 April 2024      அகரமுதல

(சட்டச் சொற்கள் விளக்கம் 241-245 : இலக்குவனார் திருவள்ளுவன் – தொடர்ச்சி)

சட்டச் சொற்கள் விளக்கம் 246-250

246. abstain. V	தவிர்; விலக்கு விலகியிரு; தவிர்த்திரு (வி)   விலகி யிருத்தல் ; தவிர்த்திருத்தல் (பெ)   வாக்களித்தல் போன்ற எதிலும் பங்கேற்றுக் கொள்வதிலிருந்து விலகி யிருத்தல்.
247. Abstaine	விட்டொழிப்பவர்   ஒரு பழக்கத்தை விட்டொழிப்பவர். பொதுவாக போதை பொருள்களை உட்கொள்வதைக் கைவிடுவதைக் குறிப்பிடுகிறது.   உணவைவிட்டொழிப்பவரைக் குறிக்குமிடத்தில் (உண்ணா)நோன்பு எனப் பொருளாகிறது.
248. Abstaining from carrying out	நிறைவேற்றாதொழிதல்‌; நிறைவேற்றாமல்‌ இருத்தல்‌   திட்டத்தை/செயலை/தீர்மானத்தை/ நிறைவேற்றுதிலிருந்து விலகி அதனைத் தவிர்த்தல். காண்க: abstain
249. Abstaining from commission of any such offence	அத்தகைய குற்றச்செயல்‌ எதையும்‌ செய்யாமல்‌  இருத்தல்‌ / செய்யாதொழிதல்     குற்ற நடைமுறைத் தொகுப்பு இயல் 4 இல் குறிப்பிட்டுள்ள எந்த ஒரு குற்றத்திற்காகவும் தண்டிக்கப்பட்டால், தண்டனை வழங்கிய நீதிமன்றம் இன்றியமையாதது எனக் கருதினால், இத்தகைய குற்றத்தை மீளவும் செய்யாதிருக்க மூன்றாண்டுகளுக்கு மிகாத கால அளவிற்கானஒரு பிணைப்பத்திரத்தைப் பிணையுடனோ பிணையின்றியோ அளிக்க ஆணையிடலாம்.   எற்றென்று இரங்குவ செய்யற்க செய்வானேல் மற்றன்ன செய்யாமை நன்று.  (திருக்குறள் – 655) என்கிறார் திருவள்ளுவர்.   காண்க: abstain
250. abstention. N	வாக்களிக்காமை   தவிர்த்தல், நடுநிலைமை தாங்குதல்.   வாக்களிக்காமை என்பது சட்டப்படி வாக்களிக்கும் தகுதியாளர், வாக்களிக்காமையைக் குறிக்கிறது. இத்தகைய நேர்வுகளில் வாக்களிக்காமை எதிர்வாக்காகக் கருதப்படுகிறது.   தவிர்ப்புக் கோட்பாடு(The abstention doctrine) என்பது கூட்டாட்சி நீதிமன்றங்கள் தம் அதிகார வரம்பிற்குள்  வழக்குகளை உசாவுவதைத் தடுக்கும் அதிகாரத்தைக் குறிப்பது. அதற்கு  மாற்றாக, மாநில நீதிமன்றங்களுக்கு வழக்கின் மீது அதிகாரம் அளிக்கிறது.

(தொடரும்)

இலக்குவனார் திருவள்ளுவன்

சட்டச் சொற்கள் விளக்கம் 241-245 : இலக்குவனார் திருவள்ளுவன்

 இலக்குவனார் திருவள்ளுவன்      15 April 2024      No Comment

(சட்டச் சொற்கள் விளக்கம் 236-240 : இலக்குவனார் திருவள்ளுவன்- தொடர்ச்சி)

சட்டச் சொற்கள் விளக்கம் 241-245

241. Absorb	ஈர்த்துக்கொள்   உட்கொள் உறிஞ்சு ஏற்றுக்கொள்   திரவம், வெப்பம் போன்றவற்றைத் தன்னுள் ஈர்த்துக்கொள்ளுதல்
242. Absorbed in the post	பணி ஈர்ப்பு   பணியிடத்தில் எடுத்துக்கொள்ளப்பட்டார்.
243. Absorber	ஈர்த்துக் கொள்பவர்     பொதுவாக உறிஞ்சியைக் குறிக்கிறது. எனினும் ஒருவரை ஈர்த்துக் கொள்பவரையும் குறிக்கிறது.
244. absorption	ஈர்த்துக்கொளல்   ஒன்றை ஈர்த்துக் கொள்ளல்   பொதுவாக வழக்கில் நீர் அல்லது நீர்ம ஈர்ப்பைக் குறிக்கிறது. எனினும் ஒருவரை அமைப்பிலோ பணியிலோ ஈர்த்துக் கொள்வதையும் குறிக்கிறது.
245. absque hoc	இஃதின்றி, இதுவல்லாமல்   ஒரு மனு அல்லது வாதுரையின் எதிர்மறைப்பகுதியை முன் வைத்தல்   இலத்தீன் தொடர். Absque= இன்றி, இல்லாமல் ; hoc = இது

(தொடரும்)

இலக்குவனார் திருவள்ளுவன்

சட்டச் சொற்கள் விளக்கம் 236-240 : இலக்குவனார் திருவள்ளுவன்

 

ஃஃஃ     இலக்குவனார் திருவள்ளுவன்      11 April 2024      அகரமுதல

(சட்டச் சொற்கள் விளக்கம் 231 – 235 : இலக்குவனார் திருவள்ளுவன்- தொடர்ச்சி)

சட்டச் சொற்கள் விளக்கம் 236-240

236. Absolutely	முற்றிலும்   தனித்த நிறைவாக ஐயத்திற்கிடமின்றி ஆம்.(உடன்பாட்டைக் குறிக்கையில் ஆம், சரி என்ற பொருளில் வரும்.)
237. Absolutely unavoidable	முற்றிலும் தவிர்க்க இயலாதது   செய்தலோ செய்யாமையோ ஒதுக்கித் தள்ள வழியின்றி இன்றியமையாது நிகழ்த்தும் சூழலே முற்றிலும் தவிர்க்க இயலாதது ஆகிறது.
238. Absolve	விடுவி   நீக்கு   பழியினின்று நீக்கு குற்றச்சாட்டினின்று விடுவி கடமை அல்லது குற்றத்தின் விளைவுகளிலிருந்து விடுவிப்பது.   நடுவர் மன்றம் குற்றவாளிகளை அவர்களின் குற்றங்களிலிருந்து விடுவிப்பது.   கடன், கடமை, கடப்பாடு அல்லது பொறுப்பிலிருந்து விடுவித்தல்.
239. absolve from liability	கடப்பாட்டிலிருந்து விடுவி   மனச்சான்றைப் பிணைக்கும் கடப்பாட்டிலிருந்து அல்லது சட்டத்திற்குக் கட்டுப்படாமல் அல்லது பாவம் செய்ததன் விளைவுகளிலிருந்து விடுபடுவதை உணர்த்துகிறது.
240. Absolved(of charges)	(குற்றச்சாட்டுகளிலிருந்து) விடுவிக்கப்படுதல்   ஒருவர் அவர்மீது சுமத்தப்படும் குற்றச்சாட்டுகளிலிருந்து அல்லது குற்றங்களிலிருந்து விடுவிக்கப்படுதல்.

(தொடரும்)

இலக்குவனார் திருவள்ளுவன்

சட்டச் சொற்கள் விளக்கம் 231-235 : இலக்குவனார் திருவள்ளுவன்

 

ஃஃஃ      இலக்குவனார் திருவள்ளுவன்      08 April 2024      அகரமுதல

(சட்டச் சொற்கள் விளக்கம் 226-230 : இலக்குவனார் திருவள்ளுவன்- தொடர்ச்சி)

சட்டச் சொற்கள் விளக்கம் 231 – 235

231. absolute right	முழு உரிமை   முழு உரிமைகளை எக்காரணங் கொண்டும் மட்டுப்படுத்த முடியாது.   எந்தச்சூழலும் முழுமையான உரிமைகளின் தகுதியையோ வரம்பையோநியாயப்படுத்த முடியாது.   அறிவிக்கப்பட்ட நெருக்கடி நிலையின்போதும் முழுமையான உரிமைகளை இடைநிறுத்தவோ கட்டுப்டுத்தவோ முடியாது.
232. absolute title	முழுமை உரிமைமூலம் முழுவுரிமை மூலம்‌ முழு உரிமை ஆவணம் முழு உரிமை யாவணம்   முழுமையான நிறைவான உரிமையுடைமை.
233. Absolute transfer	முழு உடைமை உரிமைமாற்றம்‌   முழு மாற்றம், முழுமைப் பரிமாற்றம்   தனிப்பட்ட சொத்தின் உரிமை மாற்றத்தை விற்பவர் வாங்குநருக்கு  முழுமையாக மாற்றுதல்.
234. Absolute warranty	முழுப் பொறுப்புறுதி   எல்லா வகை இழப்புகளுக்கும் சேதங்களுக்கும் பொறுப்புறுதி அளிப்பதே முழுமையான பொறுப்புறுதி ஆகும்.   இடர்ப்பாட்டால் ஏற்படும் செலவிற்கு மட்டுமல்லாமல், ஏந்துக்குறைவு, மன அழுத்தம் முதலியவற்றிற்கும் காப்புறுதி அளிப்பதே முழு பொறுப்புறுதி ஆகிறது.   கடற்பயண முழுப் பொறுப்புறுதி எனவும் குறிக்கப் பெறும்.
235. Absolute, make	முழுமையாக்கு காண்க: Absolute

(தொடரும்)

இலக்குவனார் திருவள்ளுவன்

சட்டச் சொற்கள் விளக்கம் 226-230 : இலக்குவனார் திருவள்ளுவன்

 

ஃஃஃ    இலக்குவனார் திருவள்ளுவன்      04 April 2024      அகரமுதல

(சட்டச் சொற்கள் விளக்கம் 221-225 : இலக்குவனார் திருவள்ளுவன்- தொடர்ச்சி)

சட்டச் சொற்கள் விளக்கம் 226-230

226. absolute privilege	வரையிலாச் சிறப்புரிமை   நிபந்தனையற்ற சிறப்புரிமை அல்லது சலுகை உரிமை. இது நிபந்தனையுள்ள சிறப்புரிமை அல்லது சலுகை உரிமையினின்றும் வேறுபட்டது.
227. absolute property	முழுச் சொத்துரிமை   இந்தச் சட்டம் நடைமுறைக்கு வந்ததற்கு முன்னரோ, பின்னரோ, எய்தியிருந்த உடைமைக்கு வரையறுக்கப்பட்ட உரிமையாளராக இல்லாமல், முழு உரிமையாளராவார். (இந்து மரபுரிமையர் சட்டம், 1956, பிரிவு 14(1) )
228. absolute responsibility	முழுப் பொறுப்புரிமை     முழுப் பொறுப்புநிலை (அரசின்‌) முழுநிலைப்‌ பொறுப்பு   உள்நோக்கத்துடனோ கவனமின்மையாலோ இழைக்கப்பட்ட குற்றமாயினும் அரசு மீது பொறுப்பைச் சுமத்தும் பன்னாட்டுச் சட்டக் கோட்பாடு.
229. absolute restraint	முழுமைத் தடை   நிகழ்விற்கோ நூலுக்கோ அமைப்புக்கோ வேறு எதற்குமோ விலக்கு எதுவுமின்றி முழுமையான தடை விதிப்பது. பகுதித் தடையும் உண்டு என்பதால் முழுத் தடை கூறப்படுகிறது.
230. absolute restraint on alienation	மாற்றாக்கத்தின் பேரில் முழுத் தடை   சொத்து அயன்மைப்படுத்தல் மீதான கட்டுப்பாடுகளின் ஆய்வு, பிரிவு 10

(தொடரும்)

இலக்குவனார் திருவள்ளுவன்