சட்டச் சொற்கள் விளக்கம் 911 – 915 : இலக்குவனார் திருவள்ளுவன்

ஃஃஃ        இலக்குவனார் திருவள்ளுவன்      22 January 2025      அகரமுதல

(சட்டச் சொற்கள் விளக்கம் 906 – 910 : தொடர்ச்சி)

சட்டச் சொற்கள் விளக்கம் 911 – 915

911. assistance international/International assistance	பன்னாட்டுதவி   பன்னாட்டு உதவி   ஒரு நாட்டிற்குப் பிற நாடுகளிலிருந்து கிடைக்கும் உதவிகள்.   பன்னாட்டு உறவுகள் மூலமும்  பன்னாட்டவை( UNO), பன்னாட்டுப் பண நிதியம் (International Monetary Fund) போன்ற பன்னாட்டு அமைப்புகள் மூலமும் கிடைக்கும் உதவிகள்.   1923 ஆம் ஆண்டு உருவாக்கப்பட்ட பன்னாட்டுக் காவல் துறை(The International Criminal Police Organization – INTERPOL) 184  உலக நாடுகளை உறுப்பினர்களாகக் கொண்டுள்ளது. இதன் மூலம் பெறப்படும் உதவியும் பன்னாட்டுதவியில் அடங்கும்.
912.  assistance, invaluable /Invaluable assistance	விலைமதிப்புள்ள விலையுயர்ந்த   அருமதிப்புள்ள உதவி / அருமதிப்பான உதவி விலைமதிக்க முடியாத உதவி விலைமதிக்கவியலாத உதவி விலைமதிப்பற்ற உதவி   Invaluable – வெகுமதிப்புள்ள என்பர். costly என்பதற்குத்தான் அது பொருந்தும்.   குற்றஞ்சாட்டப்படுநருக்கு அல்லது குற்றஞ்சாட்டுநருக்கு, வாதிக்கு அல்லது எதிர்வாதிக்கு வழக்காடுதலில் விலைமதிப்பில்லா கருத்துதவி கிடைப்பது அவர்கள் வாகைசூட வாய்ப்பாக அமையும்.   நீதிமன்றங்களில் வழக்கு ஆய்வில் அல்லது புலனாய்வில் அருமதிப்பான உதவி புரியும் ஊழியர்கள் அல்லது வழக்குரைஞர்கள் இருப்பது செவ்விய தீர்ப்பு வழங்க உதவியாக அமையும்.
913. assistance, legal / Legal assistance	சட்ட உதவி   சட்ட உதவி என்பது இலவயச் சட்ட உதவியையே (Free Legal Aid) குறிக்கிறது.   வழக்குரைஞரை அமர்த்திக் கொள்ள வசதியற்ற ஏழையருக்கு அரசே நிதியுதவி வழக்குரைஞரை அமர்த்திச் சட்ட உதவி கிடைக்க வழி செய்வது.   சட்ட உதவி கிடைக்காமல் யாரும் தண்டிக்கப்படக்கூடாது என்பதற்காக நலிந்த பிரிவினருக்கு அரசு சட்ட உதவி கிடைக்க  வழி செய்கிறது. இந்தியாவில் மாநிலங்கள்தோறும் இலவசச் சட்ட உதவி அறிவுரைக்கழகம் (free legal advisory board) அமைக்கப்பட்டு அவை மூலம் சட்ட உதவிகள் வழங்கப்படுகின்றன.   ஏறத்தாழ 47 நாடுகளில் சட்ட உதவி வழங்கப்படுவதில்லை.
914.  assistance. medical / Medical assistance	மருத்துவ உதவி   மருத்துவம் சார்ந்த முதலுதவிகளையும் பிற நிலை உதவிகளையும் குறிக்கிறது.   மருத்துவ [உதவி] உதவி என்பது குமுகப் பாதுகாப்புச் சட்டத்தின் தலைப்பு 19 (Title XIX of the Social Security Act) இன் கீழ் மாநிலத்தால் செயலாக்கப்படும் திட்டமாகும். இது தகுதியானவர்களும் குறைந்த வருமானம் கொண்டவர்களுமான தனியர்களுக்குத் தேவைப்படும்  விரிவான மருத்துவ, உடல்நலம் தொடர்பான பிற நலக் கவனிப்புகளை வழங்குகிறது.
915.  assistance, mutual / mutual assistance	இருநிலை உதவி   பன்மாற்ற உதவி   ஒருவர்க்கொருவர் உதவி என்பது பொதுவான பொருள். என்றாலும் அரசுகளுக்கிடையே உதவி அல்லது மாநிலங்களுக்கு இடையே உதவி என்பதையே குறிக்கிறது.   பரசுபரம் என்பது அயற்சொல்.   பல்வேறு அரசுகளுக்கு இடையே முறையான பிணைப்பு ஒப்பந்த அடிப்படையில்  பரிமாற்ற அடிப்படையில் செயல்முறை சேவை, சான்றுகளைப் பெறுதலும் பயன்படுத்துதலும் ஆகியவற்றையே குறிக்கிறது.

(தொடரும்)

இலக்குவனார் திருவள்ளுவன்

வாழ்வியல் கட்டளைகள் தொள்ளாயிரம் 71-80: இலக்குவனார் திருவள்ளுவன்

அகரமுதல

இலக்குவனார் திருவள்ளுவன்      14 ஏப்பிரல் 2019      கருத்திற்காக..

(வாழ்வியல் கட்டளைகள் தொள்ளாயிரம் 61-70 தொடர்ச்சி)

வாழ்வியல் கட்டளைகள் தொள்ளாயிரம்

(குறள்நெறி)

71. மக்கள் அறிவுடைமை நம்மினும் மாநிலத்தவர்க்கு இனிது என உணர்!

72. மகனையும் மகளையும் பிறர் புகழுறுமாறு வளர்!

73. “பெற்றோர் செய்த தவம் யாதோ” எனச் சொல்லுமாறு வாழ்!

74. அன்பினை அடைக்கும் தாழ் இல்லை என அறி!

75. “எல்லாம் எனக்கே” என்று சொல்லாது பிறர்க்குத் தா!

76. பெற்றோர் அன்பால் பிறந்ததை எண்ணி அன்பு கொண்டு வாழ்!

77. அன்பினால் பழகும் விருப்பத்தையும் சிறந்த நட்பையும் பெறு!

78.அன்பின் பயனால் சிறப்பு பெறு!

79. அன்பை அறத்திற்கும் மறத்திற்கும் துணையாய்க் கொள்!

80. அன்பு இல்லாது அறத்தால் துன்புறாதே!

(தொடரும்)

இலக்குவனார்திருவள்ளுவன்

தாய்மொழி நாளுக்கு வாழ்த்திய முதல்வருக்குப் பாராட்டுகள்! – இலக்குவனார் திருவள்ளுவன்

அகரமுதல,

இலக்குவனார் திருவள்ளுவன்      23 பிப்பிரவரி 2019      கருத்திற்காக..

தாய்மொழி நாளுக்கு வாழ்த்திய முதல்வருக்குப் பாராட்டுகள்!

உலகத்தாய்மொழி நாளை முன்னிட்டுத் தமிழக முதல்வர் எடப்பாடி க.பழனிசாமி இம்முறை வாழ்த்துச் செய்தி அளித்துள்ளார். உண்மையிலேயே இது வரவேற்க வேண்டிய ஒன்றாகும். இம்முறை ஊடகங்களிலும் உலகத் தாய்மொழி நாள் குறித்த கட்டுரைகள், பேச்சுகள் தமிழின் சிறப்பை உணர்த்தும் வகையில் இடம் பெற்றுள்ளன. பல்கலைக்கழகங்கள், அரசு நிறுவனங்கள், கல்வி நிலையங்கள், தமிழ் அமைப்புகள் சார்பில் உலகத்தாய்மொழி நாள் கொண்டாடப்பட்டுள்ளது. இஃது ஒரு வளர்நிலையாகும்.  எனவே அதற்கு முதல்வரும்  வாழ்த்துச் செய்தி அளித்துள்ளது தாய்மொழி நாள் மகிழ்ச்சிக்கு மகுடம் சூட்டுவதாக உள்ளது.

தாய் மொழி நாளுக்கு வாழ்த்திய முதல்வருக்குப் பாராட்டுகள்! எனவே, தமிழக முதல்வர் விளம்பரத்திற்காக அல்லாமல் உள்ளத்திலிருந்து எழுந்த வாழ்த்துணர்வு என்பதை மெய்ப்பிக்கவும் தமிழ் நலப்பணிகளில் ஈடுபாடு உள்ளதைக் காட்டவும் பின்வருமாறு செயல்பட வேண்டுகிறோம்.

1.நாட்டுமக்களுக்கு முன்னோடியாகத் திகழ்வதற்காக அமைச்சரவையினரும் அரசும் முன்முறையாகத் திகழ வேண்டும். எனவே, அனைவரது பெயர்களில் முன் எழுத்து அல்லது முன் எழுத்துகளைத்  தமிழிலேயே குறிக்க வேண்டும்.

2. அமைச்சர்கள் பெயர்கள் கிரந்த எழுத்துகளின்றிக் குறிக்கப்பெற வேண்டும்.
3. அமைச்சர்களின் ஊர்திகளின் எண்கள் அரசாணைக்கிணங்கத் தமிழில் குறிக்கப் பெற வேண்டும்,
4. அமைச்சர்களின் குடும்பத்தினரின் பிள்ளைகள், அரசுப் பள்ளிகளிலும் தமிழ் வழியிலும் சேர்க்கப்பட வேண்டும்.
5. மடலேடுகளில் தலைப்பில் தமிழ் உரு முத்திரைகள் மட்டுமே இடம் பெற வேண்டும்.
6. தலைமைச்செயலகம் எனக் குறிக்காமல் ‘செயிண்ட் சார்சு கோட்டை’ எனக் குறிக்கப் பெறுவது நிறுததப்பட வேண்டும்.
7. முதலமைச்சர், அமைச்சர்கள் கையொப்பங்கள், சுருக்கொப்பங்கள் யாவும் தமிழிலேயே இருக்க வேண்டும்.
8. பதவிப் பெயர், அலுவலகப் பெயர்  முத்திரைகள் யாவற்றையும் தமிழிலேயே பயன்படுத்த வேண்டும்.
9. தமிழ் வளர்ச்சி தொடா்பான அரசாணைகள் அனைத்தையும் முதலமைச்சர், அமைச்சர்கள் யாவரும் பின்பற்ற வேண்டும்.
10. அனைத்துத் துறைகளிலும் தமிழ் முழுமையாகப் பயன்படுத்தப் பெற அமைச்சர்களே நேரடியாக நடவடிக்கை எடுக்க வேண்டும்.
11. உலகத் தாய்மொழி நாளை ஆண்டுதோறும் சிறப்பாகக் கொண்டாட வேண்டும். சித்திரை நாளில் வழங்கும் விருதுகள் இவ்வாண்டில் மாசியிலேயே/ பிப்பிரவரியிலேயே வழங்கப்பட்டுள்ளன. இனி அதே பிப்பிரவரியில் இடம் பெறும் உலகத்தாய்மொழி நாளில் அவ்விருதுகள் வழங்கப் பெற வேண்டும்.
12. பாட நூல்களில் தமிழுக்காக உயிர் நீத்தவர்கள், சிறை சென்றவர்கள்பற்றிய பாடங்கள் இடம் பெற வேண்டும்.
13. தமிழ்ப்புலவர்களுக்கு உரிய மதிப்பு கொடுத்து ஆண்டுதோறும் சிறப்பிக்க வேண்டும்.
14. மொழிப்போர் வரலாறு பாட நூல்களில் இடம் பெற வேண்டும்.
15. ஆங்கிலக் கல்விக்கு வரவேற்புப் பா பாடுவது நிறுத்தப்பட வேண்டும். எல்லா நிலைகளிலும் தமிழ்வழிக்கல்வியே திகழ உடனடி நடவடிக்கை மேற்கொள்ள வேண்டும்.
16. தனியார் அலுவலகங்கள் அயல்மொழி நிறுவனங்கள் என்ற வேறுபாடு இராமல் தமிழ்நாட்டிலுள்ள அனைத்து அலுவலகங்கள் நிறுவனங்கள் யாவற்றிலும் தமிழே அலுவல் மொழியாக இருக்க நடவடிக்கை எடுக்க வேண்டும்.
17. உலக நாட்டுத் தூதரகங்களில் தமிழ் அறிந்தவர் ஒருவராவது இருக்க மத்திய அரசு மூலம் நடவடிக்கை எடுக்க வேண்டும்.
18. அயல்நாட்டுத் தூதர்களில் பத்தில் ஒருவராவது தமிழராக இருக்கவும் நடவடிக்கை எடுக்க வேண்டும்.
19. தமிழ்நாட்டுக் கல்வியகங்களில் இப்போதைய முறையிலான அயல்மொழிக்கல்வி முறை நிறுத்தப்பட வேண்டும். 6 ஆம் வகுப்பிலிருந்து ஆங்கிலம் கற்பிக்கப்பட்டால் போதுமானது. 3 ஆவது மொழி என்பது பிற மொழியினருக்கு மட்டுமே இருக்க வேண்டும். எனவே, கல்வி நிலையங்களில் எந்த வகையிலும் இந்தி, சமக்கிருதத் திணிப்பு இல்லாதிருக்க நடவடிக்கை எடுக்க வேண்டும்.
20. நவோதயா பள்ளிகளுக்குரிய முழுத் தொகையையும் தமிழக அரசேபெற்று முழுமையான தரமான தமிழ்வழிக்கல்வி நிலையங்களாகச் செயல்பட ஆவன செய்ய வேண்டும்.
21. மத்திய அரசின் திட்டம் எதுவாயினும் தமிழ்ப்பெயரில்தான் தமிழ்நாட்டில் அறிமுகப்படுத்தப் பட வேண்டும்.
22. மத்திய அரசின் திட்டங்களில் பத்தில் ஒன்றுக்காவது தமிழ்ப்பெயர் சூட்டப்பட வேண்டும்.
23. முதல்வர் தலைமையில் இயங்கும் செம்மொழித் தமிழாய்வு நிறுவனத்தை உருப்படியாகச் செயல்படச் செய்து அதன் மூலம் அயல்மாநில, அயல்நாட்டுப் பல்கலைக்கழகங்களில் செந்தமிழ் கற்பிக்கப்பட நடவடிக்கை எடுக்க வேண்டும்.
24. முதல்வரை அதன் நெறியாளர் என மாற்றித் தமிழறிஞர்கள் தலைவராக இருக்கும் வண்ணம் செம்மொழித் தமிழாய்வு நிறுவன விதிமுறையை மாற்ற வேண்டும்.
25. கொச்சைத் தமிழையும் கலப்புத் தமிழையும் பயன்படுத்தும் ஊடகங்கள் தடை செய்யப்பட வேண்டும்.
26. உரிமம் கொடுத்தல், பதிதல் முதலான தொடக்க நிலை விண்ணப்பங்களிலேயே வணிக நிறுவனங்களின் பெயர்கள், திரைப்பட நிறுவனங்களின் பெயர்கள், திரைப்படங்களின் பெயர்கள் தமிழில் உள்ளனவா எனக் கேட்டுஅவ்வாறிருந்தால் மட்டுமே இசைவு தர வேண்டும்.
27. வழிபாடு என்றால் தமிழ் வழிபாடுதான் என்னும் நிலையைச் செயற்படுத்த வேண்டும்
28. இசை என்றாலும் கலை என்றாலும் தமிழ்தான் என்னும் நிலையை உருவாக்கிட வேண்டும்.
29. தமிழில் தமிழ்க்கையொப்பங்களுடன் உள்ள பட்டியல்கள், ஒப்பந்தங்கள், உடன்படிக்கைகள், ஆணைகள் முதலானவை மட்டுமே செல்லத்தக்கன என அறிவித்தால் போதும். தமிழ் ஆட்சி மொழிச் செயலபாடு முழுமை யடையும்.
30. தமிழ் வளர்ச்சி இயக்ககம் மூலம் வழங்கப்படும் விருதுகள், நிதி யுதவிகள் ஆகியவற்றைத் தமிழ்நாடு இயல் இசை நாடக மன்றம் மூலம் வழங்கச் செய்ய வேண்டும்.
31. மாவட்டந் தோறும் மாவட்ட நீதிபதிகள் தலைமையில் தமிழ்ச் செயலாக்க ஆணையம் அமைக்க வேண்டும். இதன் மூலம் தமிழ் ஆட்சிமொழியைக் கண்காணிக்கவும் நெறிப்படுத்தவும் முடியும்.
32. எனவே, தமிழ் வளர்ச்சி இயக்ககத்தை மூட வேண்டும்.

தலைமையின் சரியான செயலோட்டம் அடிமட்டம் வரை பாயும் அல்லவா? எனவே, இனியேனும் தமிழ்நாடு தமிழ் வழங்கும் நாடாகத் திகழத் தமிழக முதல்வர் உடனடி நடவடிக்கை எடுக்குமாறு அன்புடன்  வேண்டுகிறோம்.

 ஒல்லும்வா யெல்லாம் வினைநன்றே ஒல்லாக்கால்
செல்லும்வாய் நோக்கிச் செயல்.

(திருவள்ளுவர், திருக்குறள் 673)

அன்புடன் இலக்குவனார் திருவள்ளுவன்

இதழுரை – அகரமுதல